Dawˬmehˬ 30 - Akha

Aˬ joˆ-ehˇ dehꞈ naˇ guiˬ lahˬ paˇ za-eu gaˇ kawˆ

¹ “Nymˬ-mˇ, ngaˇ naw maꞈ-ahˇ guiˬ lahˬ hawˇ-eu yaˬ kʼehˇ yaˬ-eu heu nyiˬ jeˬ bi tseˇ geuꞈ-eu ma. Kʼoeˇ deuˬ dawˬ tawˆ luꞈ nawˬ-euˬ kʼoeˇ taˆ keuˆ le-awˇ, Sahˬpaˬ Miˬyehˇ neh naw maꞈ-ahˇ bi cehˆ byaˆ-euˬ miˇ kʼahˬ-ahˇ nawˇ jawˇ luꞈ ngeh, ngaˬ neh nawˬ-ahˇ bi tseˇ geuꞈ-euˬ gaˇ nawˇ noeˬ keuˆ tehꞈ-a.

² Nawˇ hawˇ-eu naw maꞈ-euˬ zaˬ deuˬ uˆ deuˬ Sahˬpaˬ Miˬyehˇ jawˇ gaˇ paˇ gʼoꞈ poˆ laˇ-awˇ, iˬ nah ngaˇ nawˬ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ deuˬ-ahˇ nui ma laꞈ kʼoeˇ keuˆ ni nawˇ naˇ haˬ geuꞈ naˇ,

³ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ gʼawˬ shaˬ gaˬ tehꞈ-a. Aˬ yawꞈ neh nawˬ-ahˇ bi cehˆ byaˆ-euˬ miˇ kʼahˬ laꞈ kʼoeˇ neh aˬ yawꞈ nawˬ-ahˇ paˇ sheuˬ kʼoꞈ laꞈ-awˇ, bi baw bi za le tehꞈ-a.

⁴ Nawˬ-euˬ tsawˇ haˬ tiˬ paˆ na deuˬ-aˬ, mˬ dzeˇ miˇ dzeˇ keuˆ ni kaˬ gaˇ cehˆ byaˆ taˬ-euˬ kʼawꞈ, aˬ yawꞈ paˇ sheuˬ kʼoꞈ uiˬ laꞈ tehꞈ-a.

⁵ Aˇ hu nawˬ-euˬ aˬ poeˬ aˬ bawˇ deuˬ jawˇ-eu miˇ kʼahˬ nawˇ paˇ za kʼoꞈ ni, naw maꞈ-ahˇ kʼoeˇ loꞈ-ehˇ sheuˬ kʼoꞈ uiˬ nehˬ laꞈ tehꞈ-a. Naw maꞈ-euˬ aˬ poeˬ aˬ bawˇ deuˬ tiˬ jawˇ-iˬ maˬ ya tahˬ puˬ haw-euˬ baw le za le-eu jeˬ hawˇ-eu jeuˬ le o le-eu jeˬ nawˬ-ahˇ aˬ yawꞈ biꞈ laꞈ tehꞈ-a.

⁶ Nawˬ-euˬ nui ma dawˬ tawˆ luꞈ aˬ yawꞈ-ahˇ gaˬ-awˇ, miˇ kʼahˬ kʼoeˇ kʼahˬ laꞈ kʼoeˇ nawˇ ya dehꞈ ya jawˇ daˆ leꞈ ni, nawˇ hawˇ-eu nawˬ-euˬ zaˬ deuˬ-ahˇ naˇ haˬ geuꞈ-eu nui ma Sahˬpaˬ Miˬyehˇ biꞈ nehˬ laꞈ tehꞈ-a.

⁷ Nawˬ-ahˇ bye-awˇ kʼehˬ nehˬ kʼaˆ nehˬ laꞈ-euˬ naw maꞈ-ahˇ muiˇ-eu deuˬ kʼoeˇ taˆ, yaˬ kʼehˇ yaˬ-eu jeˬ dawˬ tawˆ luꞈ aˬ yawꞈ paˇ bi keuˆ le tehꞈ-a.

⁸ Kʼoeˇ naˇ, aˬ yawꞈ-euˬ ehˇ dawˬ-ahˇ nawˇ paˇ naˇ haˬ geuꞈ-awˇ, iˬ nah ngaˇ nawˬ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ, nawˇ paˇ caw teh tehꞈ-a.

⁹ Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, Sahˬpaˬ Miˬyehˇ nawˬ-ahˇ bi baw bi za le tehꞈ-a. Nawˬ-euˬ zaˬ deuˬ jeuˬ le o le-awˇ, nawˬ-euˬ mawˇ nyoˬ jeˬ kaˇ myaˬ laˇ behˇ laˇ-eu uˬ taꞈ, nawˬ-euˬ deh yaˇ-ahˇ dzaˬ la gʼo cehˇ za dui dui le tehꞈ-a. Nawˬ-euˬ aˬ poeˬ aˬ bawˇ deuˬ baw le za le ni mˇ nehˬ-eu gʼaˇ duˬ aˬ yawꞈ laˬ kʼaˬ cehˇ-eu loꞈ-ehˇ, nawˇ baw le za le ni mˇ nehˬ-eu gʼaˇ duˬ kʼawꞈ, aˬ yawꞈ laˬ kʼaˬ cehˇ tehꞈ-a.

¹⁰ Ehˇ kʼawꞈ, aˬ yawꞈ neh mehˬ nehˬ tsoˆ nehˬ-euˬ jeˬ boꞈ ahˇ taˬ-euˬ sahˬ boꞈ heu taꞈ laꞈ kʼoeˇ ahˇ-eu aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ nawˇ caw teh-awˇ, aˬ yawꞈ-euˬ ehˇ dawˬ ya naˇ haˬ geuꞈ meh.

¹¹ “Iˬ nah ngaˇ nawˬ-ahˇ biꞈ-euˬ zahˇ dawˬ kʼoꞈ dawˬ heu-aˬ, nawˬ-euˬ gʼaˇ duˬ shaˬ dui dui-awˇ laꞈ dzeh maˬ miˇ leˇ nya-eu zahˇ dawˬ kʼoꞈ dawˬ maˬ ngeuˇ-a.

¹² Kʼoeˇ-aˬ, mˬ kʼoeˇ taˆ jaˆ-eu jeˬ maˬ ngeuˇ-a. ‘Ngaˇ ya gaˬ-awˇ naˇ haˬ geuꞈ-eu gʼaˇ duˬ, aˬ suˇ gʼaˬ mˬ-ahˇ daˆ leˇ-awˇ yuˇ ka laˬ leˇ nmˇ’ lehˇ, nawˇ naˇ haˬ-eu maˬ loˬ-a.

¹³ Kʼoeˇ-aˬ, iˬ ma laˆ shaˆ kʼoeˇ dzeˇ-ahˇ jaˆ-eu jeˬ kʼawꞈ maˬ ngeuˇ-a. ‘Ngaˇ ya gaˬ-awˇ naˇ haˬ geuꞈ-eu gʼaˇ duˬ, aˬ suˇ gʼaˬ iˬ ma laˆ shaˆ tsehˆ doˆ-awˇ laˬ-iˇ nmˇ’ lehˇ, nawˇ naˇ haˬ-eu maˬ loˬ-a.

¹⁴ Kʼoeˇ-aˬ, nawˬ nehˬ-ehˇ jaˆ luꞈ-eu meh. Kʼoeˇ-ahˇ, nawˇ siˬ nya-awˇ ehˇ nya-eu meh. Teu miˇ neh nymˬ-mˇ naˇ haˬ geuꞈ-awˬ.

¹⁵ “Iˬ nah nawˬ-ahˇ ngaˇ yaw muiˬ hawˇ-eu yaw doeˇ bi tseˇ geuꞈ-eu ma. Dehꞈ-eu jeˬ hawˇ-eu shiˇ-eu jeˬ bi tseˇ geuꞈ-eu ma.

¹⁶ Iˬ nah ngaˬ neh nawˬ-ahˇ biꞈ-euˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ nawˇ naˇ haˬ geuꞈ-awˇ, aˬ yawꞈ-ahˇ gaˬ-awˬ. Aˬ yawꞈ-euˬ ehˇ dawˬ-ahˇ naˇ haˬ geuꞈ-eu laꞈ kʼoeˇ, aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ caw teh naˇ, nawˇ baw dui za dui dui le-awˇ, tsawˇ haˬ myaˬ dui dui-eu tsawˇ jeuˬ tiˬ jeuˬ pyeuꞈ laˇ tehꞈ-a. Nawˇ jawˇ leˇ-eu lehˇ gʼeh-eu miˇ kʼahˬ laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ guiˬ lahˬ biꞈ laꞈ tehꞈ-a.

¹⁷ Ehˇ kʼawꞈ, nawˇ maˬ naˇ haˬ geuꞈ-ehˇ, miˬyehˇ nui deuˬ-euˬ mehˬ nah caw teh-awˇ uˬ duˬ tahˬ naˇ,

¹⁸ laˆ luˬ laˆ seˇ-eu jeˬ-ahˇ nawˇ ya daˬ tehꞈ-a lehˇ nymˬ-mˇ ngaˇ nawˬ-ahˇ ehˇ-eu ma. Yawˇdaˬ lawˇ baˬ nui baˬ paw jaˆ-eu nawˇ jawˇ leˇ-eu lehˇ gʼeh-eu miˇ kʼahˬ kʼoeˇ kʼahˬ laꞈ kʼoeˇ, nawˇ gʼawˬ myahˇ ni maˬ ya jawˇ-aˇ.

¹⁹ Nymˬ-mˇ, ngaˇ nawˬ-ahˇ dehꞈ-eu jeˬ hawˇ-eu shiˇ-eu jeˬ bi tseˇ geuꞈ-eu ma. Sahˬpaˬ Miˬyehˇ-euˬ guiˬ lahˬ hawˇ-eu yaˬ kʼehˇ yaˬ-eu jeˬ bi tseˇ geuꞈ-eu ma. Mˬ hawˇ-eu miˇ-ahˇ ngaˇ kuˇ-awˇ, nawˬ neh kʼaˇ tseˇ geuꞈ-euˬ jeˬ gʼaˇ duˬ saˇ kiˇ bi geuꞈ ma. Dehꞈ-eu jeˬ-ahˇ tseˇ-awˬ.

²⁰ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˬ. Aˬ yawꞈ-euˬ ehˇ dawˬ naˇ haˬ-awˇ, aˬ yawꞈ-ahˇ saˇ jaˇ ziꞈ-awˬ. Kʼoeˇ loꞈ-ehˇ jahˇ naˇ, nawˬ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ hawˇ-eu Yaˬkoˆ-ahˇ biꞈ-eu gʼaˇ duˬ aˬ yawꞈ neh saˇ jaˇ dzaˬ taˬ-euˬ miˇ kʼahˬ kʼoeˇ kʼahˬ laꞈ kʼoeˇ, nawˇ hawˇ-eu nawˬ-euˬ zaˬ deuˬ gʼawˬ myahˇ ni ya jawˇ tehꞈ-a.”