Dawˬmehˬ 3 - Akha

Sahˬ paˬ Awˇgaˆ-ahˇ Iˇsaˬleˬlaˆ tsawˇ haˬ deuˬ guiˇ deuˆ gʼaˬ-euˬ

¹ “Kʼoeˇ naˇ, laꞈ taˆ paw pyawˬ-ahˇ Baˬshaˬ paw aˬ dui maꞈ daˆ leˇ-awˇ, sahˬ paˬ Awˇgaˆ aˬ dui maꞈ-ahˇ guiˇ deuˆ le-eu lehˇ aˬ yawꞈ-euˬ tsawˇ haˬ dawˬ tawˆ luꞈ sheuˬ-awˇ Eˬdiˇliˇ meuˬ dawˬ peh oe-euˬ meh.

² Ehˇ kʼawꞈ, Sahˬpaˬ Miˬyehˇ ngaˬ-ahˇ ehˇ-eu, ‘Aˬ yawꞈ-ahˇ taˬ guˆ. Aˬ yawꞈ hawˇ-eu aˬ yawꞈ-euˬ tsawˇ haˬ deuˬ maˬ ehˇ, aˬ yawꞈ-euˬ miˇ kʼahˬ dawˬ tawˆ luꞈ maꞈ ehˇ, nawˬ-ahˇ ngaˇ biꞈ ma. Heˬshaˬboˬ meuˬ-ahˇ jawˇ-eu Aˬmawˇliˆ sahˬ paˬ Siˇhoˬ-ahˇ jahˇ nehˬ-euˬ loꞈ-ehˇ, aˬ yawꞈ-ahˇ kʼawꞈ jahˇ nehˬ-awˬ’ lehˇ ehˇ-eu meh.

³ “Sahˬ paˬ Awˇgaˆ hawˇ-eu aˬ yawꞈ-euˬ tsawˇ haˬ dawˬ tawˆ luꞈ aˬ dui-euˬ laꞈ-ahˇ ahˇ le ni, Sahˬpaˬ Miˬyehˇ jahˇ-awˇ, aˬ yawꞈ maꞈ dawˬ tawˆ luꞈ-ahˇ aˬ dui maꞈ sehꞈ-euˬ ma.

⁴ Kʼoeˇ ngeh, aˬ yawꞈ maꞈ-euˬ meuˬ koꞈ tseˇ meuˬ, tiˬ meuˬ-iˬ maˬ bi dzeuˇ-iˇ ni aˬ dui maꞈ deuˆ geuꞈ-awˇ, Baˬshaˬ meuˬ-ahˇ jawˇ-eu sahˬ paˬ Awˇgaˆ uˆ lahˇ-eu Aˬgawˆ miˇ kʼahˬ kʼahˬ lah ni aˬ dui maꞈ deuˆ za-euˬ ma.

⁵ Meuˬ kʼoeˇ deuˬ dawˬ tawˆ luꞈ-ahˇ goˇ dui dui-eu meuˬ lahˇ gawˬ taˬ-awˇ, meuˬ lahˇ lahˇ kʼehˬ deuˬ ziꞈ dah ni jahˇ taˬ-euˬ meh. Kʼoeˇ uˬ taꞈ, meuˬ lahˇ maˬ baw-eu pu pu ma gʼawˬ mya ni jaˆ-eu meh.

⁶ Heˬshaˬboˬ meuˬ-ahˇ jawˇ-eu sahˬ paˬ Siˇhoˬ-euˬ meuˬ deuˬ-ahˇ aˬ dui neh jahˇ nehˬ-euˬ loꞈ-ehˇ, aˬ yawꞈ maꞈ-euˬ meuˬ dawˬ tawˆ luꞈ-ahˇ laˆ luˬ laˆ seˇ nehˬ-awˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, zaˬ maˬ ehˇ, dawˬ tawˆ luꞈ-ahˇ sehꞈ jiˇ nehˬ-euˬ ma.

⁷ Jeˬ zaˬ deuˬ teh geuꞈ-awˇ, meuˬ kʼoeˇ deuˬ laꞈ kʼoeˇ jaˆ-eu myawˬ gahˬ deuˬ yuˇ geuꞈ-euˬ ma.

⁸ “Kʼoeˇ ngeh yamˬ-ahˇ, Yawˇdaˬ lawˇ baˬ nahˇ na doˆ kʼehˬ paw jaˆ-eu, Aˬnoˬ lawˇ baˬ-ahˇ neh Heˬlaˬmoˬ gawˬ jawˬ-ahˇ keuˆ ni jaˆ keuˆ-eu miˇ kʼahˬ kʼoeˇ kʼahˬ-ahˇ, Aˬmawˇliˆ sahˬ paˬ kʼoeˇ nyiˬ gʼaˬ-euˬ laꞈ-ahˇ neh, aˬ dui deuˆ za-euˬ ma.

⁹ (Heˬlaˬmoˬ gawˬ jawˬ-ahˇ Siˇdoˬ tsawˇ haˬ deuˬ Siˬyahˬ lehˇ kuˇ-awˇ, Aˬmoˬ tsawˇ haˬ deuˬ Seˬnyaˬ lehˇ kuˇ-eu meh.)

¹⁰ Baˬshaˬ meuˬ-ahˇ jawˇ-eu sahˬ paˬ Awˇgaˆ-euˬ miˇ kʼahˬ dawˬ tawˆ luꞈ-ahˇ aˬ dui maꞈ deuˆ za-euˬ ma. Miˇ kʼahˬ kʼoeˇ-aˬ, yaw goˇ-ahˇ jaˆ-eu deh saˇ kʼoeˇ taˆ tsoˆ taˬ-euˬ meuˬ deuˬ, Giˇlaˆ hawˇ-eu Baˬshaˬ gahˬ kaˬ nahˇ ma doˆ kʼehˬ paw jaˆ saˬ saˬ-iˇ-euˬ Saˬleˇkaˬ hawˇ-eu Eˬdiˇliˇ meuˬ-ahˇ keuˆ ni meh.”

¹¹ (Sahˬ paˬ Awˇgaˆ-aˬ, Leˬpeˬ tsawˇ jeuˬ-euˬ sahˬ paˬ deuˬ laꞈ kʼoeˇ aˇ saˬ saˬ-eu gʼaˬ pyeuꞈ-eu meh. Aˬ yawꞈ-ahˇ duˬ pahˬ-eu mawˇ dmˬ kʼaˬ lo neh taꞈ-awˇ, yaw mahˇ paw gʼoeˬ caˆ byah-awˇ, yaw jeˇ paw oeˬ caˆ byah-eu meh. Mawˇ dmˬ kʼoeˇ hmˬ-aˬ, Aˬmoˬ tsawˇ haˬ deuˬ-euˬ Laˬbah meuˬ-ahˇ iˬ nah keuˆ ni jaˆ luꞈ-eu meh.)

Yawˇdaˬ lawˇ baˬ nahˇ ma doˆ kʼehˬ paw jawˇ yaꞈ-euˬ Iˇsaˬleˬlaˆ tsawˇ jeuˬ deuˬ

¹² “Miˇ kʼahˬ kʼoeˇ kʼahˬ aˬ dui za gʼaˬ ngeh, Aˬyawˬ meuˬ-euˬ laꞈ taˆ paw pyawˬ-ahˇ Aˬnoˬ lawˇ baˬ dawˬ peh jaˆ-eu gahˬ kaˬ hawˇ-eu, Giˇlaˆ gawˬ jawˬ gawˬ duˇ gahˬ kaˬ hawˇ-eu kʼoeˇ gaˇ jaˆ-eu meuˬ deuˬ ahˇ leˇ-ehˇ, Luˇbeˬ tsawˇ jeuˬ hawˇ-eu Gaˆ tsawˇ jeuˬ-ahˇ ngaˇ biꞈ-euˬ ma.

¹³ Dzeˇ-eu Giˇlaˆ gahˬ kaˬ hawˇ-eu sahˬ paˬ Awˇgaˆ jawˇ-euˬ Baˬshaˬ meuˬ gahˬ kaˬ deuˬ, Maˬnaˇseˬ tsawˇ jeuˬ tiˬ paˆ-ahˇ ngaˇ biꞈ-euˬ ma. Kʼoeˇ-aˬ, Aˬgawˆ miˇ gahˬ gahˬ lah ni meh.” (Baˬshaˬ miˇ kʼahˬ-ahˇ Leˬpeˬ miˇ kʼahˬ lehˇ kuˇ-eu meh.

¹⁴ Maˬnaˇseˬ tsawˇ jeuˬ Yaˬiˇlaˆ tsawˇ haˬ deuˬ-aˬ, Aˬgawˆ lehˇ kʼawꞈ kuˇ-eu Baˬshaˬ miˇ gahˬ gahˬ lah ni geuꞈ-euˬ meh. Kʼoeˇ-aˬ, Geˬshuˇlaˆ meuˬ hawˇ-eu Mawˇkah meuˬ-ahˇ keuˆ ni meh. Yaˬiˇlaˆ-aˬ, kʼoeˇ gaˇ jaˆ-eu pu deuˬ-ahˇ aˬ yawꞈ-euˬ tsawˇ myahˇ biꞈ-awˇ, iˬ nah keuˆ ni Yaˬiˇlaˆ-euˬ pu deuˬ lehˇ aˬ cawˬ kuˇ luꞈ-eu meh.)

¹⁵ “Maˬnaˇseˬ tsawˇ jeuˬ Maˬkiˬlaˇ aˇ jeuˬ deuˬ-ahˇ Giˇlaˆ gahˬ kaˬ ngaˇ biꞈ-euˬ ma.

¹⁶ Luˇbeˬ tsawˇ jeuˬ hawˇ-eu Gaˆ tsawˇ jeuˬ-ahˇ, Giˇlaˆ meuˬ-ahˇ neh Aˬnoˬ lawˇ baˬ-ahˇ keuˆ ni biꞈ-euˬ ma. Aˬ yawꞈ maꞈ-euˬ miˇ kaˬ laꞈ oˆ dzaˬ-aˬ, Aˬnoˬ lawˇ baˬ gʼahˇ ceh pyeuꞈ-awˇ, laꞈ taˆ dzaˬ-aˬ, Jaˬboˆ lawˇ baˬ-ahˇ keuˆ ni pyeuꞈ-awˇ, Aˬmoˬ miˇ kaˬ-ahˇ tuˆ-eu meh.

¹⁷ Aˬ yawꞈ maꞈ-euˬ miˇ kaˬ nahˇ ma ga kʼehˬ paw dzeˇ dzaˬ-aˬ, Yawˇdaˬ lawˇ baˬ-ahˇ keuˆ ni pyeuꞈ-awˇ, laꞈ taˆ paw jaˆ-eu Gaˬliˬlehˇ lah-ahˇ neh aˇ dahˬ beh-awˇ, laꞈ oˆ paw jaˆ-eu Shiˇ-eu iˬ ma laˆ shaˆ-ahˇ neh nahˇ ma doˆ kʼehˬ paw jaˆ-eu Piˇsaˬgaˬ gawˬ jawˬ dawˬ dahˬ-ahˇ keuˆ ni meh.

¹⁸ “Kʼoeˇ ngeh, aˬ yawꞈ maꞈ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. ‘Yawˇdaˬ lawˇ baˬ-euˬ nahˇ ma doˆ kʼehˬ paw jaˆ-eu miˇ kʼahˬ heu kʼahˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ biꞈ-euˬ meh. Nymˬ-mˇ, Iˇsaˬleˬlaˆ tsawˇ jeuˬ nui deuˬ miˇ kʼahˬ za ni guiˇ caw deuˆ nehˬ leˇ-eu gʼaˇ duˬ, naw maꞈ-euˬ guiˆ deuˆ-eu tsawˇ haˬ deuˬ aˇ kʼaˆ bi laˆ dawˆ-awˇ, Iˇsaˬleˬlaˆ tsawˇ jeuˬ kʼoeˇ deuˬ-euˬ mehˬ hu guiˇ daˬ bi daˬ-awˇ, Yawˇdaˬ lawˇ baˬ bi le tsehˆ-awˬ.

¹⁹ Naw maꞈ-euˬ miˬ sawˇ zaˬ deuˬ hawˇ-eu, naw maꞈ-euˬ jeˬ zaˬ deuˬ tehꞈ-ehˇ, ngaˬ neh biꞈ taˬ-euˬ meuˬ kʼoeˇ deuˬ laꞈ kʼoeˇ bi jawˇ yaꞈ-awˬ.

²⁰ (Naw maꞈ jeˬ zaˬ jawˇ myaˬ-eu ngaˇ siˬ nya ma.) Sahˬpaˬ Miˬyehˇ neh naw maꞈ-ahˇ miˇ kʼahˬ heu kʼahˬ biꞈ laꞈ-awˇ coꞈ ngehˇ ni bi jawˇ laꞈ-euˬ loꞈ-ehˇ, naw maꞈ-euˬ cawˬ Iˇsaˬleˬlaˆ tsawˇ jeuˬ deuˬ-ahˇ Sahˬpaˬ Miˬyehˇ biꞈ-eu lehˇ gʼeh-eu Yawˇdaˬ lawˇ baˬ-euˬ nahˇ ma ga kʼehˬ paw jaˆ-eu miˇ kʼahˬ kʼoeˇ kʼahˬ-ahˇ aˬ yawꞈ maꞈ deuˆ gʼaˬ-awˇ, Sahˬpaˬ Miˬyehˇ aˬ yawꞈ maꞈ-ahˇ kʼoeˇ gaˇ bi jawˇ ngeh keuˆ ni, guiˇ caw deuˆ leˇ neh-awˬ. Kʼoeˇ sahˇ miˇ tsa, ngaˬ neh naw maꞈ-ahˇ biꞈ-euˬ miˇ kʼahˬ heu kʼahˬ-ahˇ naw maꞈ gʼoꞈ le-awˬ’ lehˇ ehˇ nehˬ-euˬ ma.

²¹ “Kʼoeˇ naˇ, Yawˇshuˆ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. ‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh, sahˬ paˬ Siˇhoˬ hawˇ-eu sahˬ paˬ Awˇgaˆ aˬ nyaꞈ-ahˇ kʼaˇ jahˇ nehˬ-euˬ jeˬ dawˬ tawˆ luꞈ, nawˇ ya mawˇ-euˬ meh. Naw maꞈ guiˇ kʼaˇ deuˆ uˇ gʼeh-eu miˇ kʼahˬ-ahˇ aˬ yawꞈ kʼoeˇ loꞈ-ehˇ jahˇ nehˬ tehꞈ-a.

²² Aˬ yawꞈ maꞈ-ahˇ taˬ guˆ. Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ gʼaˇ duˬ guiˇ deuˆ tehꞈ-a’ lehˇ ehˇ nehˬ-euˬ ma.

Kaˬnaˬ miˇ kʼahˬ-ahˇ Moˇseˬ maˬ ya uˇ leˇ-a

²³ “Kʼoeˇ ngeh, ngaˇ heu loꞈ-ehˇ guiˬ lahˬ shaˇ dui dui-euˬ ma.

²⁴ ‘Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˇ mˇ-eu lehˇ gʼeh-eu zahˬ leˇ paˬ-ehˇ gʼeh-eu huiˬ dui dui-eu gaˇ deuˬ laꞈ kʼoeˇ, aˇ dahˬ beh-eu deuˬ bi mawˇ laꞈ-euˬ tehꞈ-a siˬ. Nawˬ neh mˇ-euˬ huiˬ-eu gaˇ heu deuˬ-ahˇ mˇ nya-eu miˬ yehˇ, mˬ hawˇ-eu miˇ kʼoeˇ taˆ tiˬ gʼaˬ-iˬ maˬ jawˇ-a.

²⁵ Sahˬpaˬ Miˬyehˇ-oˇ, Yawˇdaˬ lawˇ baˬ bi le tsehˆ laꞈ-awˇ, nui baˬ paw jaˆ-eu baw le za le-eu miˇ kʼahˬ kʼoeˇ kʼahˬ maˬ ehˇ, haw muiˬ dui dui-eu gawˬ jawˬ gawˬ duˇ deuˬ hawˇ-eu Leˬbaˬnoˬ gawˬ jawˬ deuˬ-ahˇ maˬ ehˇ, ngaˬ-ahˇ bi haw mawˇ laꞈ-awˬ’ lehˇ shaˇ-euˬ ma.

²⁶ “Ehˇ kʼawꞈ, naw maꞈ baˬ daˬ neh Sahˬpaˬ Miˬyehˇ ngaˬ-ahˇ nui ma pehˇ-awˇ, ngaˬ-euˬ shaˇ dawˬ-ahˇ maˬ naˇ haˬ nehˬ laꞈ-aˬ. Aˬ yawꞈ ehˇ-eu, ‘Gʼaˬ-aˇ.

²⁷ Piˇsaˬgaˬ gawˬ jawˬ uˬ du daˆ leˇ-awˇ, laꞈ taˆ paw pyawˬ-ahˇ maˬ ehˇ, laꞈ oˆ paw pyawˬ-ahˇ maˬ ehˇ, nahˇ ma doˆ kʼehˬ paw pyawˬ-ahˇ maˬ ehˇ, nahˇ ma ga kʼehˬ paw pyawˬ-ahˇ maˬ ehˇ, haw gʼeh-awˬ. Kʼaˇ ya mawˇ-eu jeˬ-ahˇ yaw duˬ duˬ-ehˇ haw-awˬ. Aˬ jeˬ miˇ neh ehˇ naˇ, Yawˇdaˬ lawˇ baˬ kʼoeˇ paw baˬ-ahˇ nawˇ maˬ paˇ ya le tsehˆ meh.

²⁸ Yawˇshuˆ-ahˇ mehˬ nehˬ tsoˆ nehˬ paˬ-ehˇ gʼeh-eu jeˬ mehˬ nehˬ tsoˆ nehˬ-awˇ gʼaˬ biꞈ nehˬ-awˬ. Aˬ jeˬ miˇ neh ehˇ naˇ, nawˬ neh haw mawˇ-euˬ miˇ kʼahˬ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ ya sheuˬ uˇ gʼeh meh’ lehˇ ehˇ nehˬ laꞈ-euˬ meh.

²⁹ “Kʼoeˇ naˇ, Behˬpyawˇ meuˬ dawˬ peh jaˆ-eu deh kʼawꞈ-ahˇ aˬ dui maꞈ jawˇ-euˬ ma.”