Dawˬmehˬ 28 - Akha

Naˇ haˬ geuꞈ-eu baˬ da neh za-eu guiˬ lahˬ

¹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ nawˇ naˇ haˬ geuꞈ-awˇ, iˬ nah ngaˇ nawˬ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ saˇ jaˇ ziꞈ-eu laꞈ kʼoeˇ caw teh naˇ, miˇ tsaˬ kʼoeˇ taˆ jawˇ-eu tsawˇ jeuˬ dawˬ tawˆ luꞈ naˆ maˬ tseˇ huiˬ dzehˬ-eu tsawˇ jeuˬ, naw maꞈ-ahˇ aˬ yawꞈ bi pyeuꞈ laˇ tehꞈ-a.

² Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ nawˇ naˇ haˬ geuꞈ naˇ, guiˬ lahˬ heu deuˬ dawˬ tawˆ luꞈ nawˇ za tehꞈ-a.

³ “Nawˬ-euˬ meuˬ deuˬ hawˇ-eu nawˬ-euˬ deh yaˇ deuˬ-ahˇ Sahˬpaˬ Miˬyehˇ guiˬ lahˬ biꞈ tehꞈ-a.

⁴ “Nawˬ-euˬ zaˬ bi myaˬ bi behˇ laˇ-eu laꞈ kʼoeˇ maˬ ehˇ, dzaˬ la gʼo cehˇ bi za myaˬ le-eu laꞈ kʼoeˇ maˬ ehˇ, jeˬ zaˬ bi behˇ laˇ-eu laꞈ kʼoeˇ maˬ ehˇ, Sahˬpaˬ Miˬyehˇ nawˬ-ahˇ guiˬ lahˬ biꞈ nehˬ laꞈ tehꞈ-a.

⁵ “Nawˬ-euˬ dzaˬ la gʼo cehˇ-ahˇ maˬ ehˇ, kʼoeˇ neh jahˇ-euˬ kaˬ muˇ-ahˇ maˬ ehˇ, Sahˬpaˬ Miˬyehˇ guiˬ lahˬ biꞈ tehꞈ-a.

⁶ “Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, Sahˬpaˬ Miˬyehˇ nawˬ-ahˇ guiˬ lahˬ biꞈ tehꞈ-a.

⁷ “Muiˇ-eu deuˬ nawˬ-ahˇ guiˇ deuˆ le ngeh, aˬ yawꞈ maꞈ-ahˇ Sahˬpaˬ Miˬyehˇ deuˆ gʼaˬ tehꞈ-a. Aˬ yawꞈ maꞈ dawˬ tawˆ luꞈ tiˬ paw dzeˇ neh tehꞈ-ehˇ oe-awˇ guiˇ deuˆ le-eu kʼawꞈ, teu paw heu paw ehˇ tsaˬ maˬ siˬ ni ya cehˆ byaˆ jiˇ tehꞈ-a.

⁸ “Nawˇ mˇ-eu shaˇ-eu jeˬ laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ guiˬ lahˬ biꞈ-awˇ nawˬ-euˬ cehˇ jiˇ cehˇ tiˬ byah ni jaˆ tehꞈ-a. Nawˬ-ahˇ bi jawˇ-eu lehˇ lehˬ hmˬ taˬ-euˬ miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ nawˬ-ahˇ guiˬ lahˬ biꞈ tehꞈ-a.

⁹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ nawˇ naˇ haˬ-awˇ, aˬ yawꞈ neh dawˬ kʼaˇ biꞈ taˬ-euˬ yawˬ jeˬ na luꞈ mˇ naˇ, aˬ yawꞈ neh saˇ jaˇ dzaˬ taˬ-euˬ loꞈ-ehˇ, nawˇ aˬ yawꞈ-euˬ tsawˇ jeuˬ ya pyeuꞈ laˇ tehꞈ-a.

¹⁰ Kʼoeˇ ngeh, aˬ yawꞈ-euˬ tsawˇ jeuˬ bi pyeuꞈ laˇ-eu gʼaˇ duˬ, Sahˬpaˬ Miˬyehˇ nawˬ-ahˇ tseˇ doˆ taˬ-euˬ gaˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ ya mawˇ-awˇ, aˬ yawꞈ maꞈ nawˬ-ahˇ guˆ tehꞈ-a.

¹¹ Nawˬ-ahˇ biꞈ -eu gʼaˇ duˬ, nawˬ-euˬ aˬ poeˬ aˬ bawˇ deuˬ-ahˇ aˬ yawꞈ neh saˇ jaˇ dzaˬ taˬ-euˬ miˇ kʼahˬ kʼoeˇ kʼahˬ laꞈ kʼoeˇ, nawˬ-euˬ zaˬ deuˬ hawˇ-eu jeˬ zaˬ deuˬ-ahˇ, Sahˬpaˬ Miˬyehˇ bi myaˬ bi behˇ laˇ-awˇ, nawˬ-ahˇ dzaˬ la gʼo cehˇ bi za le tehꞈ-a.

¹² Tsawˇ jeuˬ gʼawˬ mya jeuˬ nawˬ-ahˇ ya shaˇ ngaˬ ya shaˇ paˇ laˇ kʼawꞈ, aˬ cawˬ tsawˇ jeuˬ-ahˇ nawˇ ya shaˇ paˇ-iˇ gaˇ maˬ bi keuˆ ni, mˬ kʼoeˇ taˆ guiˬ lahˬ yaw dzahˇ laˇ gʼoˆ aˬ yawꞈ pah-awˇ, aˇ yamˬ tsaˬ tsaˬ ni uˬ yehˇ bi yehˇ le-awˇ, nawˇ kʼaˇ mˇ kʼaˇ shaˇ-eu jeˬ laꞈ kʼoeˇ aˬ yawꞈ nawˬ-ahˇ guiˬ lahˬ biꞈ nehˬ laꞈ tehꞈ-a.

¹³ Tsawˇ jeuˬ heu myaˆ ni gʼeh-eu laꞈ kʼoeˇ, nawˬ-ahˇ aˬ cawˬ aˬ yuiꞈ bi geuꞈ laꞈ-awˇ, nawˇ aˬ cawˬ mehˬ nah maˬ ya cah-aˇ. Iˬ nah ngaˇ nawˬ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ deuˬ-ahˇ nawˇ saˇ jaˇ ziꞈ-eu laꞈ kʼoeˇ naˇ haˬ geuꞈ naˇ, aˬ myah luꞈ baw le za le-awˇ, maˬ ya shaˬ maˬ ya zahˬ-aˇ.

¹⁴ Ehˇ kʼawꞈ, aˬ jeˬ pyeuꞈ kʼawꞈ, zahˇ dawˬ kʼoꞈ dawˬ heu deuˬ-ahˇ nawˇ maˬ naˇ haˬ geuꞈ ni maˬ ya byehˇ-eu uˬ taꞈ, miˬ yehˇ nui deuˬ-ahˇ uˬ duˬ tahˬ-eu laꞈ kʼoeˇ aˬ yawꞈ maꞈ-euˬ zaˬ kʼaˆ maˬ ya geuꞈ-iˇ-a.

Maˬ naˇ haˬ geuꞈ naˇ yaˬ kʼehˇ yaˬ-eu jeˬ keuˆ le-eu

¹⁵ “Ehˇ kʼawꞈ, iˬ nah ngaˇ nawˬ-ahˇ biꞈ-euˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ hawˇ-eu aˬ yawꞈ neh biꞈ-euˬ dawˬ deuˬ -ahˇ nawˇ saˇ jaˇ ziꞈ-eu laꞈ kʼoeˇ maˬ caw teh naˇ, maˬ muiˬ maˬ jaˬ-eu heu deuˬ dawˬ tawˆ luꞈ nawˬ-euˬ kʼoeˇ taˆ keuˆ le tehꞈ-a.

¹⁶ “Nawˬ-euˬ meuˬ deuˬ hawˇ-eu nawˬ-euˬ deh yaˇ deuˬ-ahˇ Sahˬpaˬ Miˬyehˇ yaˬ kʼehˇ yaˬ nehˬ tehꞈ-a.

¹⁷ “Nawˬ-euˬ dzaˬ la gʼo cehˇ hawˇ-eu kʼoeˇ neh jahˇ-euˬ kaˬ muˇ deuˬ-ahˇ Sahˬpaˬ Miˬyehˇ yaˬ kʼehˇ yaˬ nehˬ tehꞈ-a.

¹⁸ “Nawˬ-euˬ zaˬ ui cuiˆ tehꞈ-ehˇ bi jawˇ le-eu laꞈ kʼoeˇ maˬ ehˇ, nawˬ-euˬ dzaˬ la gʼo cehˇ bi za cuiˆ le-eu laꞈ kʼoeˇ maˬ ehˇ, nawˬ-euˬ jeˬ zaˬ deuˬ bi teˬ le-eu laꞈ kʼoeˇ maˬ ehˇ, Sahˬpaˬ Miˬyehˇ nawˬ-ahˇ yaˬ kʼehˇ yaˬ nehˬ tehꞈ-a.

¹⁹ “Nawˇ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ, Sahˬpaˬ Miˬyehˇ nawˬ-ahˇ yaˬ kʼehˇ yaˬ tehꞈ-a.

²⁰ “Nawˇ maˬ muiˬ maˬ jaˬ-eu jeˬ mˇ-eu laꞈ kʼoeˇ, Sahˬpaˬ Miˬyehˇ-ahˇ byehˇ dzeh naˇ, tiˬ kʼehˇ laˇ kʼehˬ laꞈ kʼoeˇ geuꞈ-eu jeˬ maˬ ahˇ gaˇ keuˆ ni nawˇ ya luˬ ya seˇ-iˇ ni, nawˇ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ, shaˬ zahˬ naˇ gawˇ maˬ ehˇ, nui noeˬ shaˬ-eu jeˬ maˬ ehˇ, noeˬ shaˬ noeˬ zahˬ-eu jeˬ maˬ ehˇ, nawˬ-euˬ kʼoeˇ taˆ aˬ yawꞈ bi keuˆ le tehꞈ-a.

²¹ Nawˇ jawˇ leˇ-eu lehˇ gʼeh-eu miˇ kʼahˬ laꞈ kʼoeˇ, naw maꞈ tiˬ gʼaˬ-iˬ maˬ dzeˇ-ehˇ pyeuꞈ-iˇ ngeh keuˆ ni, naˇ gawˇ tiˬ jeˬ saˇ-iˬ tiˬ jeˬ aˬ yawꞈ bi keuˆ le tehꞈ-a.

²² Nyawˬ leˇ nya-eu naˇ gawˇ maˬ ehˇ, maˇ cuˬ maˇ lu lu-awˇ pyaˬ-eu jeˬ maˬ ehˇ, Sahˬpaˬ Miˬyehˇ nawˬ-euˬ kʼoeˇ taˆ bi keuˆ le tehꞈ-a. Nawˬ-euˬ dzaˬ la gʼo cehˇ-ahˇ bi laˆ cawˆ-eu gʼaˇ duˬ, uˬ yehˇ maˬ bi yehˇ le-eu uˬ taꞈ, lahˇ dui dui-eu jaˬ lehˇ bi baw tehꞈ-a.

²³ Uˬ yehˇ maˬ yehˇ le-eu miˇ neh, nawˬ-euˬ miˇ tsaˬ shmˇ loꞈ-ehˇ gʼahˇ dui dui-iˇ tehꞈ-a.

²⁴ Uˬ yehˇ bi yehˇ le-eu dah zaˇ, nawˇ ya luˬ ya seˇ-iˇ ngeh keuˆ ni, jaˬ lehˇ lehˇ ma bi baw laˇ-awˇ, kʼaˬ lehˇ hawˇ-eu kʼaˇ shuiꞈ bi hehˇ ahˇ laꞈ tehꞈ-a.

²⁵ “Nawˬ-ahˇ muiˇ-eu deuˬ nawˬ-ahˇ gʼaˬ leˇ ni Sahˬpaˬ Miˬyehˇ jahˇ tehꞈ-a. Naw maꞈ dawˬ tawˆ luꞈ tiˬ paw dzeˇ neh tehꞈ-ehˇ iˇ-awˇ aˬ yawꞈ maꞈ-ahˇ guiˇ deuˆ-iˇ kʼawꞈ, teu paw heu paw ehˇ tsaˬ maˬ siˬ ni ya cehˆ byaˆ-awˇ, naw maꞈ kʼoeˇ taˆ keuˆ le teuˇ le-eu jeˬ-ahˇ ya mawˇ ngeh, miˇ tsaˬ kʼoeˇ taˆ jawˇ-eu tsawˇ haˬ dawˬ tawˆ luꞈ tsawˬ guˆ-iˇ dui dui tehꞈ-a.

²⁶ Naw maꞈ shiˇ ngeh, aˇ jiˇ deuˬ hawˇ-eu bawˇ tsahˬ jeˬ zaˬ deuˬ naw maꞈ shiˇ taˬ-awˇ ga gaˇ, naw maꞈ-euˬ shaˬ jiˇ dzaˬ le tehꞈ-a. Ehˇ kʼawꞈ, jeˬ zaˬ hawˇ-eu aˇ jiˇ kʼoeˇ deuˬ-ahˇ teh piˇ-eu tsawˇ haˬ maˬ jawˇ-aˇ.

²⁷ Iˇjiˇtuˆ tsawˇ haˬ deuˬ-ahˇ jahˇ nehˬ-euˬ loꞈ-ehˇ, naw maꞈ-ahˇ Sahˬpaˬ Miˬyehˇ shaˬ ciˬ bi ciˬ laˇ tehꞈ-a. Naw maꞈ-euˬ gʼawˇ mawˇ mawˇ lah-ehˇ maˇ naˇ naˇ byah jiˇ ni Sahˬpaˬ Miˬyehˇ jahˇ tehꞈ-a. Maˇ byahˇ byahˇ-eu miˇ neh gawˇ gawˇ-ehˇ shaˬ kʼawꞈ, taˬ leˇ-eu maˬ baw ni ya jawˇ tehꞈ-a.

²⁸ Nawˇ tsawˇ uˬ uˬ-iˇ ni maˬ ehˇ, myaˆ behꞈ behꞈ-iˇ ni maˬ ehˇ, nui ma suˬ saˬ ni maˬ ehˇ, Sahˬpaˬ Miˬyehˇ jahˇ tehꞈ-a.

²⁹ Myaˆ behꞈ loꞈ-ehˇ, nah gʼahˇ nah gaˆ-ahˇ laꞈ sawˆ sawˆ-ehˇ ya cah-awˇ, nawˬ-euˬ gaˇ ma nawˇ maˬ poˆ mawˇ nya ni ya shaˬ tehꞈ-a. Nawˇ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ, maˬ baw maˬ za le ni pyeuꞈ-iˇ tehꞈ-a. Aˬ myah luꞈ aˬ cawˬ kʼehˬ-eu jeˬ hawˇ-eu smˇ kʼaˆ kʼaˆ dzaˬ-eu jeˬ-ahˇ ya daˬ-awˇ, nawˬ-ahˇ caw ba le-eu gʼaˬ maˬ jawˇ-ehˇ pyeuꞈ tehꞈ-a.

³⁰ “Zaˬ miˬ aˬ buˇ tiˬ gʼaˬ-ahˇ sheuˬ-eu gʼaˇ duˬ nawˇ ngehˬ cawˬ tsehˆ taˬ kʼawꞈ, aˬ cawˬ neh bi sheuˬ geuꞈ tehꞈ-a. Nawˇ nymˇ tsoˆ kʼawꞈ, nawˬ neh tsoˆ-euˬ nymˇ-ahˇ nawˇ tiˬ jawˇ-iˬ maˬ ya jawˇ-aˇ. Aˬ gaꞈ yaˇ kmˇ mˇ kʼawꞈ, aˬ gaꞈ aˇ siˬ nawˇ tiˬ jawˇ-iˬ maˬ ya dzaˬ-aˇ.

³¹ Nawˬ-euˬ myaˆ kʼeh, nawˬ-euˬ mawˇ neˇ aˬ cawˬ sehꞈ dzaˬ gaˇ nawˇ haw haw-ehˇ ya jawˇ tehꞈ-a. Ehˇ kʼawꞈ, shaˬ jiˇ kʼoeˇ nawˇ tiˬ jehꞈ-iˬ maˬ ya dzaˬ haw gaˇ keuˆ tehꞈ-a. Nawˬ-euˬ mahˬ tahˬ laˆ deuˬ-ahˇ, nawˇ mawˇ mawˇ-ehˇ aˬ cawˬ tsahˇ geuꞈ gʼeh tehꞈ-a. Ehˇ kʼawꞈ, mahˬ tahˬ laˆ kʼoeˇ deuˬ-ahˇ nawˇ tiˬ jawˇ-iˬ maˬ paˇ za kʼoꞈ ni pyeuꞈ-iˇ tehꞈ-a. Nawˬ-ahˇ muiˇ-eu deuˬ-ahˇ nawˬ-euˬ yawˇ deuˬ ya teh nehˬ gaˇ keuˆ kʼawꞈ, nawˬ-ahˇ caw ba le-eu gʼaˬ maˬ jawˇ ni pyeuꞈ tehꞈ-a.

³² Nawˬ-euˬ aˬ buˇ aˬ li deuˬ-ahˇ, boeˇ miˬ shiˬ kʼaˬ deuˬ-euˬ zaˬ kʼaˆ bi geuꞈ-eu gʼaˇ duˬ biꞈ nehˬ gaˇ, nawˇ haw haw-ehˇ ya jawˇ tehꞈ-a. Aˬ yawꞈ nah yawꞈ, myaˆ nui gʼah dui dui laˇ ngeh keuˆ ni, nawˬ buˇ nawˬ li gʼoꞈ laˇ-eu baw le lehˇ nawˇ loꞈ-awˇ haw haw-ehˇ jawˇ kʼawꞈ, tiˬ jawˇ-iˬ gʼoꞈ laˇ-eu ma baw-aˇ.

³³ Shaˬ-eu zahˬ-eu laꞈ kʼoeˇ nawˬ neh ka taˬ-euˬ dzaˬ la gʼo cehˇ deuˬ-ahˇ, maˬ siˬ maˬ suˇ-eu boeˇ miˬ siˬ kʼaˬ deuˬ neh bi yuˇ geuꞈ jiˇ tehꞈ-a. Nawˬ-euˬ gʼaˇ duˬ tiˬ pawꞈ-iˬ maˬ bi dzeˇ yaꞈ-eu uˬ taꞈ, aˬ cawˬ neh bi kʼehˬ-awˇ, bi kʼaˆ dzaˬ gaˇ keuˆ ni nawˇ ya daˬ tehꞈ-a.

³⁴ Tsawˇ uˬ uˬ-iˇ paˬ-ehˇ pyeuꞈ-iˇ ngeh keuˆ ni, kʼehˬ-eu kʼaˆ-eu jeˬ-ahˇ nawˇ ya daˬ sehꞈ leꞈ tehꞈ-a.

³⁵ Gawˇ dui dui-eu maˬ laˆ taˬ nya-eu naˇ gawˇ deuˬ, nawˬ-euˬ aˬ kuiˇ-ahˇ Sahˬpaˬ Miˬyehˇ bi naˇ byah tehꞈ-a. Nawˬ-euˬ aˬ kuiˇ pehˬ zaˬ-ahˇ neh uˬ duˬ-ahˇ keuˆ ni, shaˬ ciˬ ciˬ byah jiˇ tehꞈ-a.

³⁶ “Nawˇ maˬ ehˇ, nawˬ-euˬ aˬ poeˬ aˬ bawˇ deuˬ maˬ ehˇ, dzeuˇ laˇ ngeh tiˬ jawˇ-iˬ maˬ jawˇ haw-euˬ boeˇ miˬ siˬ kʼaˬ deuˬ-euˬ miˇ kʼahˬ-ahˇ, nawˇ hawˇ-eu nawˬ-euˬ sahˬ paˬ-ahˇ Sahˬpaˬ Miˬyehˇ sheuˬ gʼeh tehꞈ-a. Kʼoeˇ gaˇ, daˇ kawˬ hawˇ-eu kʼaˬ lo neh jahˇ taˬ-euˬ miˬyehˇ deuˬ-ahˇ nawˇ uˬ duˬ ya tahˬ tehꞈ-a.

³⁷ Sahˬpaˬ Miˬyehˇ neh naw maꞈ-ahˇ bi cehˆ byaˆ-euˬ miˇ kʼahˬ-ahˇ jawˇ-eu tsawˇ haˬ deuˬ, naw maꞈ kʼoeˇ taˆ kʼoeˇ loꞈ-ehˇ keuˆ le-euˬ gaˇ ya mawˇ ngeh, tsawˬ guˆ-iˇ dui dui tehꞈ-a. Naw maꞈ gaˇ kawˆ aˬ yawꞈ maꞈ ja uiˇ niˇ gʼa-awˇ, naw maꞈ-ahˇ ja bu ja doeˇ tehꞈ-a.

³⁸ “Nawˇ siˬ yoeˬ gʼawˬ mya ni sehˬ kʼawꞈ, nyehˇ bahˇ deuˬ laˆ caw le-eu miˇ neh, ui cuiˆ tehꞈ-ehˇ ya yehˬ dzaˬ tehꞈ-a.

³⁹ Aˬ gaꞈ aˇ bawˬ ka-awˇ laˆ saˆ kʼawꞈ, aˬ gaꞈ aˇ bawˬ-ahˇ boeˬ dzaˬ-eu miˇ neh, aˬ gaꞈ aˇ siˬ maˬ za le-ehˇ, aˬ gaꞈ dzaˇ uiˇ maˬ ya dawˇ ni ya jawˇ tehꞈ-a.

⁴⁰ Nawˬ-euˬ miˇ kʼahˬ laꞈ kʼoeˇ yawˬ gaˇ na luꞈ saˬ loˬ aˇ bawˇ bawˇ kʼawꞈ, saˬ loˬ aˇ siˬ ga jiˇ-eu miˇ neh, saˬ loˬ tsiˇ maˬ jaˆ ni ya jawˇ tehꞈ-a.

⁴¹ Nawˇ aˬ buˇ aˬ li jawˇ kʼawꞈ, muiˇ-eu deuˬ guiˇ deuˆ le-awˇ bi nyehꞈ geuꞈ gʼeh-eu miˇ neh, aˬ buˇ aˬ li maˬ jawˇ ni pyeuꞈ-iˇ tehꞈ-a.

⁴² Nawˬ-euˬ sahˬ lahˬ aˇ bawˇ deuˬ hawˇ-eu, dzaˬ la gʼo cehˇ dawˬ tawˆ luꞈ-ahˇ, aˇ mawˇ neh bi laˆ cawˆ jiˇ tehꞈ-a.

⁴³ “Nawˇ tiˬ jawˇ saˇ-iˬ tiˬ jawˇ gʼaˬ baˬ-iˇ luꞈ ngeh, nawˬ-euˬ miˇ kʼahˬ-ahˇ jawˇ luꞈ-eu boeˇ miˬ siˬ kʼaˬ deuˬ tiˬ jawˇ saˇ-iˬ tiˬ jawˇ gʼaˬ kʼaˆ laˇ tehꞈ-a.

⁴⁴ Aˬ yawꞈ maꞈ nawˬ-ahˇ pyuˇ paˇ nehˬ nya kʼawꞈ, nawˇ aˬ yawꞈ maꞈ-ahˇ paˇ nehˬ-eu gʼaˇ duˬ pyuˇ maˬ ahˇ-ehˇ pyeuꞈ-iˇ tehꞈ-a. Aˇ saˬ saˬ laˇ ngeh, aˬ yawꞈ maꞈ nawˬ-euˬ kʼoeˇ taˆ uˆ lahˇ tehꞈ-a.

⁴⁵ “Nawˇ luˬ-iˇ seˇ-iˇ ngeh keuˆ ni, shaˬ zahˬ maˬ tsehˆ leˇ ni keuˆ le tehꞈ-a. Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ nawˇ maˬ naˇ haˬ-ehˇ, aˬ yawꞈ neh biꞈ taˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ nawˇ maˬ caw teh-a.

⁴⁶ Shaˬ zahˬ kʼoeˇ deuˬ-aˬ, nawˇ hawˇ-eu nawˬ-euˬ zaˬ deuˬ uˆ deuˬ kʼoeˇ taˆ keuˆ le-euˬ Miˬyehˇ yaˇ kʼaˬ daˇ-eu jeˬ gaˇ kawˆ, mˬ maˬ maˬ byaˆ zaˇ ziˇ bi siˬ bi mawˇ-euˬ jeˬ pyeuꞈ tehꞈ-a.

⁴⁷ Yawˬ jeˬ na luꞈ laꞈ kʼoeˇ, Sahˬpaˬ Miˬyehˇ nawˬ-ahˇ guiˬ lahˬ biꞈ-euˬ meh. Ehˇ kʼawꞈ, aˬ yawꞈ-euˬ gaˇ-ahˇ nawˇ laˬ kʼaˬ tiˬ cehˇ maˬ mˇ-a.

⁴⁸ Kʼoeˇ miˇ neh, Sahˬpaˬ Miˬyehˇ neh nawˇ jawˇ gaˇ pyehˬ gʼeh leꞈ-euˬ muiˇ-eu deuˬ-ahˇ nawˇ gaˇ ya mˇ nehˬ tehꞈ-a. Nawˇ-aˬ, hawˬ hawˇ-eu iˇ cuꞈ ya dzahˬ-awˇ, mehˬ tsoeˬ maˬ ya dm-ehˇ neˇ nyawˆ ni ya jawˇ-eu uˬ taꞈ, maˬ loˬ-eu tiˬ jeˬ-iˬ maˬ baw ni ya dehꞈ tehꞈ-a. Nawˇ ya luˬ ya seˇ-iˇ ngeh keuˆ ni, Sahˬpaˬ Miˬyehˇ nawˬ-ahˇ yaw kʼaˆ kʼaˆ-ehˇ kʼehˬ nehˬ laꞈ tehꞈ-a.

⁴⁹ Mˬ dzeˇ miˇ dzeˇ jawˇ-eu tsawˇ jeuˬ tiˬ jeuˬ-ahˇ, naw maꞈ jawˇ gaˇ Sahˬpaˬ Miˬyehˇ pyehˬ gʼeh leꞈ tehꞈ-a. Aˬ yawꞈ maꞈ-euˬ dawˬ naw maꞈ maˬ siˬ nya-a. Kʼaˬ dzeˇ ga le-eu loꞈ-ehˇ, naw maꞈ jawˇ gaˇ aˬ yawꞈ maꞈ ja pyuˬ ni ga keuˆ le tehꞈ-a.

⁵⁰ Aˬ yawꞈ maꞈ-aˬ, haiˬ dui dui-awˇ, tsawˇ mawˬ-ahˇ maˬ ehˇ, zaˬ guˬ-ahˇ maˬ ehˇ, gʼawˬ shaˬ gaˬ-eu maˬ siˬ nya-a.

⁵¹ Nawˬ-euˬ mawˇ neˇ hawˇ-eu dzaˬ la gʼo cehˇ deuˬ-ahˇ aˬ yawꞈ maꞈ dzaˬ-awˇ, nawˇ gʼaˬ-aˬ, ya mehꞈ sehꞈ leꞈ tehꞈ-a. Dzaˬ la gʼo cehˇ maˬ ehˇ, aˬ gaꞈ dzaˇ uiˇ maˬ ehˇ, saˬ loˬ tsiˇ maˬ ehˇ, mawˇ neˇ maˬ ehˇ, aˬ yawꞈ maꞈ tiˬ pawꞈ-iˬ maˬ bi jaˆ yaꞈ-eu miˇ neh, nawˇ ya shiˇ tehꞈ-a.

⁵² Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ biꞈ-euˬ miˇ kʼahˬ laꞈ kʼoeˇ kʼaˇ jaˆ-eu meuˬ yawˬ meuˬ na luꞈ-ahˇ, aˬ yawꞈ maꞈ guiˇ deuˆ le-awˇ, nawˬ-euˬ gʼoe duˬ pyeuꞈ-eu goˇ dui dui-eu meuˬ meuˬ lahˇ deuˬ byaˆ-iˇ tehꞈ-a.

⁵³ “Naw maꞈ-euˬ meuˬ deuˬ-ahˇ muiˇ-eu deuˬ neh bi jawˬ lahˇ taˬ ngeh, nawˇ dzaˬ-eu maˬ jaˆ-ehˇ pyeuꞈ-iˇ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ biꞈ taˬ-euˬ nawˬ buˇ nawˬ li deuˬ-euˬ shaˬ jiˇ nawˇ ya dzaˬ gaˇ keuˆ tehꞈ-a.

^54-55 Naw maꞈ laꞈ kʼoeˇ aˬ cawˬ naˆ maˬ tseˇ ya dzaˬ ya dawˇ-awˇ, nahˇ tsaˇ maˬ lawꞈ ni shaˬ jiˇ nahˬ yu ni jawˇ-eu tsawˇ haˬ deuˬ kʼawꞈ, muiˇ-eu deuˬ neh meuˬ-ahˇ jawˬ lahˇ taˬ-euˬ miˇ neh, dzaˬ-eu maˬ jaˆ-ehˇ li laˇ taˬ-awˇ, yawˬ ha-euˬ zaˬ deuˬ-euˬ shaˬ jiˇ ya dzaˬ gaˇ keuˆ tehꞈ-a. Aˬ yawꞈ kʼoeˇ loꞈ-ehˇ dzaˬ ngeh, aˬ yawꞈ-euˬ mehˇ nmˇ-ahˇ maˬ ehˇ, aˬ yawꞈ gaˬ-eu aˬ yawꞈ-euˬ miˬ zaˬ-ahˇ maˬ ehˇ, dzeˇ luꞈ-eu aˬ yawꞈ-euˬ zaˬ deuˬ-ahˇ maˬ ehˇ, maˬ bi dzaˬ mawꞈ gaˇ keuˆ ni tsawˇ tsiˇ tsiˇ tehꞈ-a.

^56-57 Smˇ muiˬ muiˬ dui dui-eu miˇ neh, tsawˬ dahˬ laꞈ nyiˇ maˬ doˆ-iˇ ni nahˬ jawˆ ni dehꞈ-euˬ zaˬ miˬ zaˬ kʼawꞈ, kʼoeˇ loꞈ-ehˇ ya dzaˬ ya dawˇ gaˇ keuˆ tehꞈ-a. Aˬ yawꞈ jawˇ-eu meuˬ-ahˇ muiˇ-eu deuˬ neh bi jawˬ lahˇ taˬ ngeh, dzaˬ-eu maˬ jaˆ-ehˇ li laˇ-awˇ, dehꞈ le-euˬ tiˬ dehˬ pyeuꞈ-euˬ aˬ yawꞈ-euˬ zaˬ nahˬ hawˇ-eu zaˬ jawˇ cawˬ deuˬ-ahˇ, ciˬ cuˇ ni ya dzaˬ kʼoeˬ gaˇ keuˆ tehꞈ-a. Aˬ yawꞈ gaˬ-eu aˬ yawꞈ-euˬ kʼaˬ dzeˇ zaˬ-ahˇ maˬ ehˇ, aˬ yawꞈ-euˬ zaˬ deuˬ-ahˇ maˬ ehˇ, biꞈ-awˇ maˬ bi dzaˬ peuˬ ni tsawˇ tsiˇ tsiˇ tehꞈ-a.

⁵⁸ “Sahˬ boꞈ heu taꞈ laꞈ kʼoeˇ boꞈ taˬ-euˬ Miˬyehˇ neh mehˬ nehˬ tsoˆ nehˬ-euˬ jeˬ dawˬ tawˆ luꞈ-ahˇ saˇ jaˇ ziꞈ-awˇ maˬ caw teh-ehˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˬ dui dui leˇ paˬ-ehˇ gʼeh-eu tsawˇ myahˇ-ahˇ yaw zeu maˬ baw naˇ,

⁵⁹ nawˬ-euˬ kʼoeˇ taˆ maˬ ehˇ, nawˬ-euˬ zaˬ deuˬ uˆ deuˬ kʼoeˇ taˆ maˬ ehˇ, maˬ laˆ taˬ nya-eu naˇ gawˇ deuˬ hawˇ-eu, guˆ dui dui laˇ paˬ-ehˇ gʼeh-eu nyawˬ leˇ nya-eu naˇ gawˇ deuˬ aˬ yawꞈ bi keuˆ le tehꞈ-a.

⁶⁰ Iˇjiˇtuˆ miˇ kʼahˬ laꞈ kʼoeˇ nawˇ ya puˬ ya mawˇ haw-euˬ guˆ dui dui laˇ paˬ-ehˇ gʼeh-eu naˇ gawˇ kʼoeˇ deuˬ nawˬ-euˬ kʼoeˇ taˆ aˬ yawꞈ tiˬ poˆ paˇ bi keuˆ le-awˇ, naˇ-eu tiˬ jawˇ-iˬ maˬ taˬ leˇ ni nawˇ ya shaˬ tehꞈ-a.

⁶¹ Miˬyehˇ-euˬ zahˇ dawˬ kʼoꞈ dawˬ deuˬ hawˇ-eu mehˬ nehˬ tsoˆ nehˬ-eu dawˬ deuˬ boꞈ taˬ-euˬ sahˬ boꞈ heu taꞈ laꞈ kʼoeˇ maˬ ahˇ-eu naˇ gawˇ yawˬ jeˬ na luꞈ hawˇ-eu, nyawˬ leˇ nya-eu yaw jaw naˇ-eu naˇ gawˇ yawˬ jeˬ na luꞈ bi keuˆ le-awˇ, nawˇ ya luˬ ya seˇ-iˇ tehꞈ-a.

⁶² Mˬ kʼoeˇ taˆ tsehˬ luꞈ-eu aˬ guiˇ deuˬ loꞈ-ehˇ naw maꞈ myaˬ laˇ behˇ laˇ kʼawꞈ, tsawˇ haˬ ui cuiˆ tehꞈ-ehˇ ya buˬ ya law-iˇ tehꞈ-a. Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ nawˇ maˬ naˇ haˬ geuꞈ-a.

⁶³ Nawˇ baw le za le-awˇ, myaˬ laˇ behˇ laˇ ni jahˇ nehˬ-eu gʼaˇ duˬ Sahˬpaˬ Miˬyehˇ laˬ kʼaˬ cehˇ-eu loꞈ-ehˇ, nawˇ luˬ-iˇ seˇ-iˇ-awˇ, nawˬ-euˬ kʼoeˇ taˆ yaw cawˆ jeˬ keuˆ le ni mˇ-eu gʼaˇ duˬ kʼawꞈ, aˬ yawꞈ laˬ kʼaˬ cehˇ tehꞈ-a. Nawˇ jawˇ leˇ-eu lehˇ gʼeh-eu miˇ kʼahˬ-ahˇ aˬ yawꞈ nawˬ-ahˇ gʼeu dzeh doˆ tehꞈ-a.

⁶⁴ “Mˬ dzeˇ miˇ dzeˇ keuˆ ni jawˇ luꞈ-eu tsawˇ jeuˬ deuˬ jawˇ gaˇ Sahˬpaˬ Miˬyehˇ nawˬ-ahˇ teh byaˆ-awˇ, nawˇ hawˇ-eu nawˬ-euˬ aˬ poeˬ aˬ bawˇ deuˬ dzeuˇ laˇ ngeh tiˬ jawˇ-iˬ uˬ duˬ maˬ tahˬ haw-euˬ, daˇ kawˬ hawˇ-eu kʼaˬ lo neh jahˇ taˬ-euˬ miˬyehˇ deuˬ-ahˇ, kʼoeˇ gaˇ nawˇ uˬ duˬ ya tahˬ tehꞈ-a.

⁶⁵ Nui saˇ za-eu jeˬ-ahˇ tiˬ gaˇ-iˬ maˬ poˆ mawˇ nya-ehˇ, nawˬ-euˬ jawˇ duˬ lehˇ myahˇ-eu gʼaˇ duˬ, pehˇ tsahˇ maˬ jaˆ ni pyeuꞈ-iˇ tehꞈ-a. Ehˇ kʼawꞈ, noeˬ shaˬ noeˬ zahˬ-eu jeˬ, noeˬ tmˬ duˬ maˬ jaˆ-eu jeˬ hawˇ-eu, nui ma cawˆ-eu jeˬ, Sahˬpaˬ Miˬyehˇ nawˬ-euˬ kʼoeˇ taˆ paˇ baꞈ daˆ nehˬ laꞈ tehꞈ-a.

⁶⁶ Nawˇ yaw dehꞈ dehꞈ-eu jeˬ-aˬ, aˬ myah luꞈ guˆ kʼaˇ za tehꞈ-a. Uˬ ciꞈ nah gʼahˇ maˬ ehˇ, nawˇ guˆ guˆ-ehˇ ya jawˇ-awˇ, aˬ geu ngeh ya shiˇ-eu maˬ siˬ lehˇ, nawˇ maˬ tsehˆ leˇ ni noeˬ guˆ noeˬ guˆ-ehˇ ya dehꞈ tehꞈ-a.

⁶⁷ Kʼaˇ ya mawˇ-euˬ yawˬ jeˬ na luꞈ-ahˇ, nawˇ guˆ-awˇ nui ma cehˇ tahˬ tahˬ tehꞈ-a. Yawˬ shawˬ na luꞈ uˬ ciꞈ bi ciꞈ le mawꞈ-awˇ, yawˬ miˇ na luꞈ uˬ bya bi bya laˇ mawꞈ tehꞈ-a.

⁶⁸ Iˇjiˇtuˆ miˇ kʼahˬ-ahˇ naw maꞈ tiˬ jawˇ-iˬ maˬ paˇ ya gʼoꞈ-iˇ meh lehˇ Sahˬpaˬ Miˬyehˇ ehˇ taˬ-euˬ kʼawꞈ, saˇ baoˬ dziˬ-awˇ paˇ bi gʼoꞈ-iˇ nehˬ laꞈ tehꞈ-a. Kʼoeˇ gaˇ, naw maꞈ-ahˇ muiˇ-eu deuˬ-euˬ zaˬ kʼaˆ geuꞈ-eu gʼaˇ duˬ, naw maꞈ yawˬ haˇ yawˬ ha ahˬ dzaˬ kʼawꞈ, zeuˇ nehˬ laꞈ-eu tiˬ gʼaˬ-iˬ maˬ jawˇ ni ya shaˬ tehꞈ-a.”