Dawˬmehˬ 27 - Akha

Kʼaˬ lo teˇ byaꞈ kʼoeˇ taˆ boꞈ taˬ-euˬ Miˬyehˇ-euˬ zahˇ dawˬ kʼoꞈ dawˬ deuˬ

¹ Kʼoeˇ naˇ, Moˇseˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ Iˇsaˬleˬlaˆ tsawˇ haˬ deuˬ-ahˇ ehˇ nehˬ-eu, “Iˬ nah ngaˇ naw maꞈ-ahˇ mehˬ nehˬ tsoˆ nehˬ-euˬ jeˬ dawˬ tawˆ luꞈ-ahˇ naˇ haˬ geuꞈ-awˬ.

² Yawˇdaˬ lawˇ baˬ tsehˆ doˆ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ laꞈ-euˬ miˇ kʼahˬ-ahˇ nawˇ le uˇ ngeh nah, muiˬ-eu kʼaˬ lo deuˬ nawˇ ya ka tuˇ-awˇ, kʼaˬ lo kʼoeˇ deuˬ-ahˇ laꞈ nyiˇ paw miˇ tsaˬ ya maˇ meh.

³ Zahˇ dawˬ kʼoꞈ dawˬ heu deuˬ hawˇ-eu mehˬ nehˬ tsoˆ nehˬ-euˬ dawˬ heu deuˬ dawˬ tawˆ luꞈ, kʼaˬ lo kʼoeˇ deuˬ kʼoeˇ taˆ ya boꞈ taˬ meh. Nawˬ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ saˇ jaˇ dzaˬ taˬ-euˬ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ-ahˇ nawˇ jawˇ uˇ keuˆ leˇ-awˇ,

⁴ Yawˇdaˬ lawˇ baˬ kʼoeˇ paw baˬ-ahˇ nawˇ jawˇ ngeh, iˬ nah ngaˇ nawˬ-ahˇ mehˬ nehˬ tsoˆ nehˬ taˬ-euˬ loꞈ-ehˇ, Eˇbaˬlaˇ gawˬ jawˬ kʼoeˇ taˆ kʼaˬ lo kʼoeˇ deuˬ ka tuˇ-awˇ, laꞈ nyiˇ paw miˇ tsaˬ maˇ-awˬ.

⁵ Shmˇ dzahˬ taꞈ neh maˬ taꞈ-euˬ kʼaˬ lo yuˇ-awˇ, kʼoeˇ gaˇ lawˇ duˬ tiˬ tsahˇ gawˬ-awˬ.

⁶ Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ nawˬ neh gawˬ-euˬ lawˇ duˬ aˬ geu hmˬ maˬ kaˬ, shmˇ dzahˬ taꞈ neh maˬ taꞈ-euˬ kʼaˬ lo neh tehꞈ-ehˇ ya gawˬ meh. Miˬ dzaˬ dzah puiˆ-awˇ lawˇ-eu jeˬ-ahˇ, kʼoeˇ gaˇ nawˇ ya lawˇ meh.

⁷ Cawˬ cawˬ taꞈ-eu lawˇ-eu jeˬ kʼawꞈ, kʼoeˇ gaˇ lawˇ-awˇ dzaˬ-eu laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi guiˬ lahˬ-ahˇ ya ja ceuˬ meh.

⁸ Laꞈ nyiˇ paw miˇ tsaˬ maˇ taˬ-euˬ kʼaˬ lo kʼoeˇ deuˬ kʼoeˇ taˆ, Miˬyehˇ-euˬ zahˇ dawˬ kʼoꞈ dawˬ aˬ yawꞈ dawˬ yawꞈ yaw muiˬ paˬ-ehˇ mawˇ shawˇ laˇ ni ya boꞈ taˬ meh.”

⁹ Kʼoeˇ naˇ, Moˇseˬ hawˇ-eu Leˬbiˇ tsawˇ haˬ piˇ ma deuˬ Iˇsaˬleˬlaˆ tsawˇ haˬ dawˬ tawˆ luꞈ-ahˇ ehˇ nehˬ-eu, “Iˇsaˬleˬlaˆ tsawˇ jeuˬ-oˇ, ciˬ cuˇ ni jawˇ-awˇ naˬ bawˇ ciˬ kʼmˇ taˬ-eu laꞈ kʼoeˇ, ngaˇ ehˇ gaˇ naˇ haˬ sheˇ. Iˬ nah nawˇ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ jeuˬ pyeuꞈ laˇ-euˬ meh.

¹⁰ Kʼoeˇ miˇ neh, aˬ yawꞈ ehˇ dawˬ naˇ haˬ-awˇ, iˬ nah ngaˇ naw maꞈ-ahˇ biꞈ luꞈ-eu aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-euˬ mehˬ nah caw teh-awˬ.”

Maˬ naˇ haˬ geuꞈ-eu deuˬ kʼoeˇ taˆ yaˬ kʼehˇ yaˬ-eu jeˬ keuˆ le-eu

¹¹ Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Moˇseˬ heu loꞈ-ehˇ ehˇ nehˬ-euˬ meh.

¹² “Naw maꞈ Yawˇdaˬ lawˇ baˬ tsehˆ doˆ gʼaˬ-awˇ, Iˇsaˬleˬlaˆ tsawˇ haˬ deuˬ kʼoeˇ taˆ guiˬ lahˬ biꞈ-awˇ dawˬ ngehˬ gʼeh nehˬ ngeh, Suˇmoˬ tsawˇ jeuˬ, Leˬbiˇ tsawˇ jeuˬ, Yuˇdaˆ tsawˇ jeuˬ, Iˇsaˬkaˬ tsawˇ jeuˬ, Yoˇsehˆ tsawˇ jeuˬ hawˇ-eu Beˬyaˬmiˬ tsawˇ jeuˬ heu deuˬ, Geˬlaˬzmˬ gawˬ jawˬ kʼoeˇ taˆ ya yawꞈ meh.

¹³ Kʼoeˇ naˇ, yaˬ kʼehˇ yaˬ-eu dawˬ ngehˬ ngeh, Luˇbeˬ tsawˇ jeuˬ, Gaˆ tsawˇ jeuˬ, Aˬshaˬ tsawˇ jeuˬ, Zeˬbuˬluˬ tsawˇ jeuˬ, Daˬ tsawˇ jeuˬ hawˇ-eu Naˬtaˬliˇ tsawˇ jeuˬ heu deuˬ, Eˇbaˬlaˇ gawˬ jawˬ kʼoeˇ taˆ ya yawꞈ meh.

¹⁴ Leˬbiˇ tsawˇ haˬ deuˬ, yaw kʼaˆ ehˇ guˇ-awˇ, heu loꞈ-ehˇ ya ehˇ meh.

¹⁵ “ ‘Kʼaˬ lo neh maˬ ehˇ, daˇ kawˬ neh maˬ ehˇ, shmˇ, shuiˇ, pyuˇ, guiˬ shuiˇ, heu deuˬ neh maˬ ehˇ, tahˬ pahˬ aˬ ma mawˇ kawˇ tehˆ-awˇ uˬ duˬ tahˬ kʼoeˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ. Tahˬ pahˬ aˬ ma mawˇ kawˇ-ahˇ uˬ duˬ tahˬ-eu jeˬ-ahˇ Sahˬpaˬ Miˬyehˇ maˬ haw nahˇ-a’ lehˇ guˇ-awˇ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

¹⁶ “ ‘Yawˬ ha-euˬ aˬ da aˬ ma-ahˇ yaw zeu maˬ baw-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

¹⁷ “ ‘Yawˬ ha-ahˇ nymˇ kaˬ taꞈ-eu tsawˇ haˬ-euˬ nymˇ kaˬ teh jiˆ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu je keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

¹⁸ “ ‘Myaˆ behꞈ-ahˇ gaˇ ma mehˬ bahˬ nehˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ yaˬ ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

¹⁹ “ ‘Boeˇ miˬ shiˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ-ahˇ maˬ tsaˬ maˬ dawˇ-eu laꞈ kʼoeˇ yaˇ kʼaˬ ja gʼaˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²⁰ “ ‘Yawˬ ha aˬ da-euˬ miˬ zaˬ tiˬ gʼaˬ na nehˬ-ehˇ bahˬ-eu laꞈ kʼoeˇ, yawˬ ha aˬ da-ahˇ mˇ lehˬ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²¹ “ ‘Jeˬ zaˬ nehˬ-ehˇ kʼaˬ miˬ sheu taꞈ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²² “ ‘Yawˬ ha-euˬ dmˇ ma ci ci ni gʼeh-eu gʼaˬ nehˬ-ehˇ maˬ ehˇ, ma caw dmˇ ma nehˬ-ehˇ maˬ ehˇ, yuꞈ taꞈ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²³ “ ‘Yawˬ ha-euˬ aˬ mawˬ zaˬ miˬ zaˬ gʼaˬ nehˬ-ehˇ yuꞈ taꞈ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²⁴ “ ‘Tsawˇ haˬ-ahˇ ciˬ cuˇ ni sehꞈ kʼoeˬ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²⁵ “ ‘Laˆ lehˬ laˆ ca taˬ-euˬ maˬ jaˆ-eu tsawˇ haˬ-ahˇ sehꞈ-eu gʼaˇ duˬ pyuˇ yuˇ dzaˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.

²⁶ “ ‘Miˬyehˇ-euˬ zahˇ dawˬ kʼoꞈ dawˬ hawˇ-eu mehˬ nehˬ tsoˆ nehˬ-eu jeˬ dawˬ tawˆ luꞈ-ahˇ maˬ naˇ haˬ geuꞈ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh. “Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.