Dawˬmehˬ 24 - Akha

Miˬ zaˬ kʼoꞈ-eu gaˇ kawˆ

¹ “Tsawˇ haˬ tiˬ gʼaˬ miˬ zaˬ sheuˬ-awˇ jawˇ-eu laꞈ kʼoeˇ, aˬ yawꞈ-euˬ miˬ zaˬ-ahˇ aˬ yawꞈ nui ma maˬ tsaˬ-eu jeˬ jaˆ-eu miˇ neh, kʼoꞈ ma lehˇ noeˬ tsehˆ-eu laꞈ kʼoeˇ, miˬ zaˬ kʼoꞈ-eu sahˬ boꞈ boꞈ-awˇ, aˬ yawꞈ-euˬ miˬ zaˬ-ahˇ biꞈ-awˇ, aˬ yawꞈ-euˬ nymˇ-ahˇ neh bi doˆ-iˇ-euˬ ehˇ-awˬ.

² Kʼoeˇ naˇ, zaˬ miˬ zaˬ kʼoeˇ gʼaˬ yawˬ gʼaˬ yawˬ-ahˇ paˇ mˇ dzaˬ-iˇ-euˬ ehˇ-awˬ.

³ Kʼoeˇ gʼaˬ kʼawꞈ, aˬ yawꞈ-ahˇ nui ma maˬ tsaˬ-eu miˇ neh kʼoꞈ ma lehˇ noeˬ tsehˆ-eu laꞈ kʼoeˇ, miˬ zaˬ kʼoꞈ-eu sahˬ boꞈ boꞈ-awˇ, aˬ yawꞈ-ahˇ biꞈ-awˇ, aˬ yawꞈ-euˬ nymˇ-ahˇ neh bi doˆ-iˇ-euˬ ehˇ-awˬ. Maˬ ngeuˇ naˇ, aˬ yawꞈ-euˬ kʼaˬ dzeˇ zaˬ jeˬ nah gʼaˬ shiˇ-euˬ ehˇ-awˬ.

⁴ Kʼoeˇ loꞈ-ehˇ pyeuꞈ laˇ gʼaˬ ngeh, aˬ yawꞈ-euˬ kʼaˬ dzeˇ zaˬ yaw beh gʼaˬ aˬ yawꞈ-ahˇ maˬ paˇ ya sheuˬ kʼoꞈ geuꞈ meh. Zaˬ miˬ zaˬ kʼoeˇ gʼaˬ-aˬ, jawꞈ-iˇ-euˬ tsawˇ haˬ pyeuꞈ-eu meh lehˇ aˬ yawꞈ ya siˬ nya meh. Zaˬ miˬ zaˬ kʼoeˇ gʼaˬ-ahˇ aˬ yawꞈ paˇ sheuˬ kʼoꞈ naˇ, Sahˬpaˬ Miˬyehˇ-ahˇ mˇ bahˬ gaˇ duˇ-eu meh. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ laꞈ kʼoeˇ, kʼoeˇ loꞈ-ehˇ guˆ laˇ paˬ-ehˇ gʼeh-eu iˬ baˇ nawˇ maˬ ya mˇ-a.

Zahˇ sahˇ kʼoꞈ gʼawˬ mya jeˬ

⁵ “Miˬ zaˬ sheuˬ-euˬ tiˬ dehˬ pyeuꞈ-eu tsawˇ haˬ-ahˇ, guiˇ deuˆ-eu paw taꞈ leˇ-eu gaˇ maˬ ehˇ, miˇ kʼahˬ-ahˇ taꞈ leˇ-eu gaˇ maˬ ehˇ, maˬ ya bi mˇ-a. Aˬ yawꞈ-euˬ miˬ zaˬ nehˬ-ehˇ laˬ kʼaˬ tiˬ cehˇ bi dehꞈ taꞈ-eu gʼaˇ duˬ, tiˬ kʼoꞈ byah ni, aˬ yawꞈ-ahˇ gaˇ tiˬ hmˬ-iˬ maˬ ya bi doˇ leˇ-a.

⁶ “Tsawˇ haˬ tiˬ gʼaˬ na-ahˇ, nawˇ tiˬ jeˬ paˬ biꞈ paˇ nehˬ ngeh, aˬ yawꞈ lehˬ dzaˬ luꞈ-eu lo lehˬ nawˬ-ahˇ maˬ ya bi biꞈ daˇ-a. Kʼoeˇ loꞈ-ehˇ jahˇ naˇ, aˬ yawꞈ pehˬ zaˬ yaw dehꞈ ya dehꞈ-eu gʼaˇ duˬ, dzaˬ-eu dawˇ-eu laˆ saˆ-eu keu ka nawˇ yuˇ-euˬ jeˬ pyeuꞈ-eu meh.

⁷ “Tsawˇ haˬ aˬ geu gʼaˬ maˬ kaˬ, yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ tiˬ gʼaˬ na-ahˇ kʼoeˬ-awˇ, yawˬ ha-euˬ zaˬ kʼaˆ bi geuꞈ-eu maˬ ehˇ, aˬ cawˬ zaˬ kʼaˆ bi geuꞈ-eu gʼaˇ duˬ ahˬ dzaˬ-eu maˬ ehˇ, mˇ naˇ, sehꞈ gaˇ ya daˬ tehꞈ-a, Kʼoeˇ loꞈ-ehˇ gʼeh-eu yaw haiˬ jeˬ maˬ ya bi doˆ laˇ ni, kʼoeˇ loꞈ-ehˇ ya sehꞈ meh.

⁸ “Nawˇ nyawˬ naˇ laˇ naˇ, Leˬbiˇ tsawˇ haˬ piˇ ma deuˬ neh kʼaˇ ehˇ nehˬ laꞈ-eu loꞈ-ehˇ, tiˬ dawˬ-iˬ maˬ leuˇ ni mˇ-awˬ. Ngaˬ neh aˬ yawꞈ maꞈ-ahˇ biꞈ taˬ-euˬ mehˬ-eu tsoˆ-eu jeˬ mehˬ nah caw teh-awˬ.

⁹ Iˇjiˇtuˆ miˇ kʼahˬ laꞈ kʼoeˇ neh nawˇ doˆ le ngeh, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh Miˇliˬyaˬ-ahˇ aˬ joˆ-ehˇ jahˇ nehˬ-euˬ gaˇ kawˆ-ahˇ nawˇ noeˬ keuˆ-awˬ.

¹⁰ “Tsawˇ haˬ tiˬ gʼaˬ na-ahˇ nawˇ tiˬ jeˬ paˬ paˇ nehˬ ngeh, aˬ yawꞈ-euˬ nymˇ-ahˇ uˇ-iˇ-awˇ, aˬ yawꞈ neh biꞈ daˇ nehˬ laꞈ-euˬ pehˇ kʼahˬ nawˇ maˬ ya yuˇ-a.

¹¹ Nawˇ nymˇ laꞈ nyiˇ paw loꞈ-awˇ, aˬ yawˇ yawꞈ bi yuˇ doˆ laꞈ-awˇ, nawˬ-ahˇ bi biꞈ daˇ laˇ-awˬ.

¹² Aˬ yawꞈ yaw shaˬ zaˬ tiˬ gʼaˬ pyeuꞈ naˇ, uˬ ciꞈ paw pehˇ kʼahˬ kʼoeˇ kahˇ nawˇ jawˇ gaˇ maˬ ya bi jaˆ-a.

¹³ Aˬ yawꞈ dm-awˇ yuꞈ-eu gʼaˇ duˬ, uˬ ciꞈ aˬ yawꞈ miˇ yawꞈ biꞈ kʼoꞈ nehˬ-awˬ. Kʼoeˇ loꞈ-ehˇ jahˇ naˇ, tsawˇ haˬ kʼoeˇ gʼaˬ nawˬ-ahˇ guiˬ lahˬ huiˬ tehꞈ-a. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ kʼawꞈ, nawˬ-ahˇ nui ma tsaˬ tehꞈ-a.

¹⁴ “Naw maꞈ-euˬ meuˬ deuˬ laꞈ kʼoeˇ jawˇ-eu nawˬ-ahˇ gʼaˬ mahˇ mahˇ dzaˬ-eu yaw shaˬ zaˬ pyeuꞈ-eu nawˬ-euˬ tsawˇ jeuˬ Iˇsaˬleˬlaˆ tsawˇ haˬ-ahˇ maˬ ehˇ, boeˇ miˬ shiˬ kʼaˬ-ahˇ maˬ ehˇ, nawˇ tsawˇ gahˇ maˬ ya gahˇ dzaˬ-a.

¹⁵ Aˬ yawꞈ nah yawꞈ nahˇ ma maˬ ga ahˇ mi naˆ-ehˇ, tiˬ nah mˇ-euˬ gʼaˬ gaˇ poeˬ ya biꞈ meh. Gʼaˬ gaˇ poeˬ kʼoeˇ aˬ yawꞈ loˬ dui dui-awˇ, kʼoeˇ za ni aˬ yawꞈ leh jeh-euˬ meh. Gʼaˬ gaˇ poeˬ maˬ biꞈ nehˬ-eu miˇ neh, Sahˬpaˬ Miˬyehˇ-ahˇ aˬ yawꞈ ngoeˇ gaˬ nehˬ naˇ, nawˬ-euˬ kʼoeˇ taˆ iˬ baˇ jaˆ-eu meh.

¹⁶ “Zaˬ deuˬ-euˬ iˬ baˇ baˬ da neh, aˬ ma aˬ da deuˬ-ahˇ maˬ ya sehꞈ-a. Kʼoeˇ loꞈ-ehˇ duˇ ni, aˬ ma aˬ da deuˬ-euˬ iˬ baˇ baˬ da neh, zaˬ deuˬ-ahˇ kʼawꞈ maˬ ya sehꞈ-a. Tsawˇ haˬ aˬ geu gʼaˬ maˬ kaˬ, yawˬ ha-euˬ iˬ baˇ baˬ da neh tehꞈ-ehˇ sehꞈ-eu jeˬ-ahˇ ya daˬ meh.

¹⁷ “Boeˇ miˬ siˬ kʼaˬ deuˬ hawˇ-eu muˇ coe aˬ nmˇ deuˬ-ahˇ, maˬ tsaˬ maˬ dawˇ-eu laꞈ kʼoeˇ yaˇ kʼaˬ maˬ ya ja gʼaˬ-a. Miˬ coeˬ miˬ ma-ahˇ pyuˇ paˇ nehˬ ngeh, aˬ yawꞈ-euˬ pehˇ kʼahˬ maˬ ya bi biꞈ daˇ-a.

¹⁸ Iˇjiˇtuˆ miˇ kʼahˬ laꞈ kʼoeˇ nawˇ aˬ cawˬ zaˬ kʼaˆ ya geuꞈ luꞈ ngeh, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ bi buˬ-iˇ nehˬ laꞈ-eu gaˇ noeˬ keuˆ-awˬ. Kʼoeˇ miˇ neh, ngaˇ nawˬ-ahˇ heu loꞈ-ehˇ dawˬ biꞈ-eu jeˬ pyeuꞈ-eu ma.

¹⁹ “Nawˇ cehˇ yehˬ ngeh, maˬ ya uiˬ jiˇ-ehˇ dzeˇ yaꞈ-euˬ cehˇ diꞈ maˬ paˇ ya poˆ ni, boeˇ miˬ shiˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ gʼaˇ duˬ kʼoeˇ loꞈ-ehˇ ya bi jaˆ yaꞈ meh. Kʼoeˇ loꞈ-ehˇ jahˇ naˇ, nawˇ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ guiˬ lahˬ biꞈ nehˬ laꞈ tehꞈ-a.

²⁰ Nawˇ saˬ loˬ aˇ siˬ pyaˆ ngeh, maˬ pyaˆ jiˇ ni dzeˇ yaꞈ-euˬ deuˬ-ahˇ maˬ pyaˆ poˆ ni, boeˇ miˬ shiˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ gʼaˇ duˬ ya bi jaˆ yaꞈ meh.

²¹ Nawˇ aˬ gaꞈ aˇ siˬ pyaˆ uiˬ ngeh, nyiˬ poˆ maˬ ya pyaˆ poˆ-a. Dzeˇ yaꞈ-euˬ deuˬ-ahˇ, boeˇ miˬ shiˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ gʼaˇ duˬ ya taˬ yaꞈ meh.

²² Iˇjiˇtuˆ miˇ kʼahˬ laꞈ kʼoeˇ, nawˇ aˬ cawˬ zaˬ kʼaˆ ya geuꞈ yaꞈ-euˬ gaˇ tiˬ jawˇ-iˬ taˬ ngehˇ. Kʼoeˇ miˇ neh, ngaˇ nawˬ-ahˇ heu loꞈ-ehˇ dawˬ biꞈ-eu jeˬ pyeuꞈ-eu ma.