Dawˬmehˬ 23 - Akha

Sahˬpaˬ Miˬyehˇ-euˬ tsawˇ haˬ aˇ maꞈ laꞈ kʼoeˇ neh teh dzeh-eu

¹ “Shawꞈ-euˬ tsawˇ haˬ maˬ ehˇ, uˬ kʼawˇ pyehˆ tsehˆ dzeh-euˬ tsawˇ haˬ maˬ ehˇ, Sahˬpaˬ Miˬyehˇ-euˬ tsawˇ haˬ aˇ maꞈ laꞈ kʼoeˇ maˬ ya uˇ leˇ-a.

² “Aˬ da maˬ baw gaˇ dehꞈ le-euˬ tsawˇ haˬ hawˇ-eu, aˬ yawꞈ-euˬ zaˬ deuˬ uˆ deuˬ, tseˇ ziˇ keuˆ ni Sahˬpaˬ Miˬyehˇ-euˬ tsawˇ haˬ aˇ maꞈ laꞈ kʼoeˇ maˬ ya uˇ leˇ-a.

³ “Aˬmoˬ tsawˇ haˬ maˬ ehˇ, Mawˇbaˆ tsawˇ haˬ maˬ ehˇ, aˬ yawꞈ maꞈ-euˬ zaˬ deuˬ uˆ deuˬ maˬ ehˇ, tseˇ ziˇ keuˆ laˇ kʼawꞈ, Sahˬpaˬ Miˬyehˇ-euˬ tsawˇ haˬ aˇ maꞈ laꞈ kʼoeˇ maˬ ya uˇ leˇ-a.

⁴ Iˇjiˇtuˆ miˇ kʼahˬ laꞈ kʼoeˇ neh nawˇ doˆ le ngeh, aˬ yawꞈ maꞈ nawˬ-ahˇ dzaˬ dzaˬ dawˇ dawˇ hawˇ-eu iˇ cuꞈ maˬ biꞈ-euˬ uˬ taꞈ, naw maꞈ-ahˇ yaˬ kʼehˇ bi yaˬ-eu lehˇ, Maˬsaˬpoˬtaˬmiˇ miˇ kʼahˬ-ahˇ jaˆ-eu Peˬdawˬ meuˬ-ahˇ jawˇ-eu Beˬyoˇ-euˬ aˬ li Baˬlamˬ-ahˇ aˬ yawꞈ maꞈ aˇ poeˬ biꞈ-awˇ, kuˇ taˬ-euˬ meh.

⁵ Ehˇ kʼawꞈ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ gaˬ-eu miˇ neh, Baˬlamˬ-euˬ ehˇ dawˬ-ahˇ maˬ naˇ haˬ ni, yaˬ kʼehˇ yaˬ-euˬ jeˬ-ahˇ guiˬ lahˬ bi pyeuꞈ laˇ-euˬ meh.

⁶ Nawˇ kʼaˇ dehꞈ kʼoeˇ keuˆ ni, tsawˇ jeuˬ heu deuˬ-ahˇ caw ba-eu maˬ ehˇ, bi baw bi za le ni jahˇ nehˬ-eu maˬ ehˇ, maˬ ya mˇ-a.

⁷ “Eˬdoˬ tsawˇ jeuˬ-ahˇ taˬ taˬ nyiˇ. Aˬ yawꞈ maꞈ-aˬ, nawˬ-euˬ aˬ yuiꞈ aˬ nyiˇ pyeuꞈ-eu meh. Iˇjiˇtuˆ tsawˇ haˬ-ahˇ kʼawꞈ taˬ taˬ nyiˇ. Aˬ yawꞈ maꞈ-euˬ miˇ kʼahˬ laꞈ kʼoeˇ nawˇ ya jawˇ haw-euˬ meh.

⁸ Smˬ ziˇ dehꞈ dzeuˇ laꞈ ngeh, aˬ yawꞈ maꞈ-euˬ zaˬ deuˬ uˆ deuˬ-ahˇ, Sahˬpaˬ Miˬyehˇ-euˬ tsawˇ haˬ aˇ maꞈ laꞈ kʼoeˇ bi uˇ laˇ nya meh.

Guiˇ deuˆ-eu deuˬ-euˬ taˆ ya bi muiˬ ya bi shawˇ-eu

⁹ “Nawˇ guiˇ deuˆ-eu laꞈ kʼoeˇ taˆ tsoˆ-awˇ jawˇ ngeh, zahˇ sahˇ kʼoꞈ-ahˇ taꞈ leˇ-eu laꞈ kʼoeˇ maˬ shawˇ-eu tsawˇ haˬ maˬ ya pyeuꞈ laˇ ni, yawˬ haˇ yawˬ ha ya yahˇ meh.

¹⁰ Tsawˇ haˬ tiˬ gʼaˬ na, uˬ ciꞈ paw kʼaˬ miˬ sheu-eu yuꞈ maˆ maˆ-eu laꞈ kʼoeˇ maˬ shawˇ-eu jeˬ yoeˇ doˆ-eu ngeuˇ naˇ, taˆ laꞈ nyiˇ paw doˆ-iˇ-awˇ ya jawˇ meh.

¹¹ Uˬ ciꞈ uˬ taw paw aˬ yawꞈ-euˬ gʼawˇ mawˇ dzuiꞈ shawˇ-awˇ, nahˇ ma ga ahˇ ngeh, taˆ laꞈ kʼoeˇ gʼoꞈ uˇ laˇ nya meh.

¹² “Taˆ laꞈ nyiˇ paw gaˇ nyiˇ iˇ duˬ tiˬ tsahˇ ya bi jaˆ meh.

¹³ Nawˇ gaˇ nyiˇ iˇ ngeh, duˬ kʼahˬ kʼahˬ-awˇ, gaˇ nyiˇ iˇ gʼaˬ ngeh paˇ dehˬ kaˬ yaꞈ-eu gʼaˇ duˬ, nawˬ-euˬ guiˇ deuˆ-eu keu ka deuˬ laꞈ kʼoeˇ, daˇ ceh tiˬ hmˬ ya bi ahˇ meh.

¹⁴ Nawˬ-euˬ taˆ-ahˇ, zahˇ sahˇ kʼoꞈ-ahˇ tsaˬ ni yaw muiˬ yaw shawˇ shawˇ-ehˇ bi jaˆ-awˬ. Aˬ jeˬ miˇ neh ehˇ naˇ, nawˬ-ahˇ haw piˇ-eu gʼaˇ duˬ maˬ ehˇ, nawˬ-ahˇ muiˇ-eu deuˬ-ahˇ nawˇ gʼaˬ leˇ nya ni caw ba-eu gʼaˇ duˬ maˬ ehˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ nehˬ-ehˇ taˆ laꞈ kʼoe jawˇ-eu meh. Sahˬpaˬ Miˬyehˇ nawˬ-ahˇ maˬ ya byehˇ dzeh yaꞈ-eu gʼaˇ duˬ, maˬ muiˬ maˬ shawˇ-eu jeˬ maˬ mˇ ni jawˇ-awˬ.

Zahˇ sahˇ kʼoꞈ gʼawˬ mya jeˬ

¹⁵ “Zaˬ kʼaˆ tiˬ gʼaˬ na, yaw sahˇ gʼaˬ jawˇ gaˇ neh cehˆ doˆ le-awˇ, nawˬ-ahˇ uˬ duˬ tahˬ shaˇ laˇ naˇ, maˬ bi gʼoꞈ-iˇ ni nawˬ nehˬ-ehˇ bi jawˇ-awˬ.

¹⁶ Naw maꞈ-euˬ meuˬ deuˬ laꞈ kʼoeˇ aˬ yawꞈ kʼaˇ jawˇ mawꞈ-eu meuˬ-ahˇ ya bi jawˇ meh. Aˬ yawꞈ-ahˇ maˬ ya kʼehˬ maˬ ya kʼaˆ nehˬ-a.

¹⁷ “Iˇsaˬleˬlaˆ tsawˇ haˬ laꞈ kʼoeˇ, zaˬ miˬ zaˬ maˬ ehˇ, kʼaˬ dzeˇ zaˬ maˬ ehˇ, muiˬ-eu shawˇ-eu meh maˬ laˇ geuꞈ-awˇ maˬ ya bi jawˇ-a.

¹⁸ Kʼoeˇ loꞈ-ehˇ mˇ-awˇ za-euˬ pyuˇ kʼoeˇ neh, saˇ jaˇ mˇ byah-eu aˇ poeˬ biꞈ-eu gʼaˇ duˬ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ nymˇ-ahˇ maˬ ya yuˇ laꞈ-a. Muiˬ-eu shawˇ-eu meh maˬ laˇ geuꞈ-eu jeˬ-ahˇ Sahˬpaˬ Miˬyehˇ bye-eu meh.

¹⁹ “Nawˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ tiˬ gʼaˬ na-ahˇ, pyuˇ maˬ ehˇ, dzaˬ dzaˬ dawˇ dawˇ maˬ ehˇ, nui jeˬ maˬ ehˇ, nawˇ paˇ nehˬ ngeh, jiˇ jeuˬ maˬ ya yuˇ-a.

²⁰ Aˬ cawˬ tsawˇ jeuˬ-ahˇ nawˇ paˇ nehˬ ngeh, jiˇ jeuˬ yuˇ dzaˬ nya meh. Ehˇ kʼawꞈ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ kʼoeˇ taˆ nawˇ jiˇ jeuˬ maˬ ya yuˇ-a. Nawˇ jawˇ leˇ-eu lehˇ gʼeh-eu miˇ kʼahˬ-ahˇ, nawˬ neh kʼaˇ mˇ kʼaˇ shaˇ-euˬ jeˬ laꞈ kʼoeˇ, Sahˬpaˬ Miˬyehˇ guiˬ lahˬ biꞈ laꞈ ni, zahˇ sahˇ kʼoꞈ heu hmˬ-ahˇ caw teh-awˬ.

²¹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ saˇ jaˇ dzaˬ naˇ, saˇ jaˇ kʼaˇ dzaˬ taˬ-euˬ loꞈ-ehˇ maˬ mˇ byah ni maˬ ya byehˇ-a. Nawˬ neh saˇ jaˇ dzaˬ taˬ-euˬ jeˬ-ahˇ, Sahˬpaˬ Miˬyehˇ aˬ diˇ aˬ maˇ maˬ byehˇ nehˬ laꞈ-a. Maˬ mˇ byah naˇ, nawˬ-euˬ kʼoeˇ taˆ iˬ baˇ jaˆ-eu meh.

²² Sahˬpaˬ Miˬyehˇ-ahˇ saˇ jaˇ maˬ dzaˬ-ehˇ jawˇ-eu jeˬ-aˬ, iˬ baˇ maˬ ngeuˇ-a.

²³ Ehˇ kʼawꞈ, yawˬ ha nui ma keuˆ-eu laꞈ kʼoeˇ saˇ jaˇ dzaˬ naˇ, maˬ byehˇ ni ya mˇ byah meh.

²⁴ “Aˬ cawˬ-euˬ aˬ gaꞈ yaˇ kmˇ-ahˇ nawˇ cah tsehˆ ngeh, nawˇ kʼaˇ dzaˬ mawꞈ-eu myaˆ ni aˬ gaꞈ aˇ siˬ pyaˆ dzaˬ nya meh. Ehˇ kʼawꞈ, tiˬ gaˇ paw pyaˆ ahˇ-awˇ, iˇ kahˇ-ahˇ maˬ ya yuˇ kʼoꞈ gʼeh-a.

²⁵ Aˬ cawˬ-euˬ deh yaˇ-ahˇ nawˇ cah tsehˆ ngeh, nawˬ-euˬ aˬ laꞈ neh cehˇ nmˇ shawˆ dzaˬ nya meh. Ehˇ kʼawꞈ, yehˬ kʼoꞈ neh maˬ ya yehˬ-a.