Dawˬmehˬ 21 - Akha

Maˬ caw duˬ-euˬ tsawˇ haˬ sehꞈ-eu gaˇ kawˆ

¹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ laꞈ kʼoeˇ, deh ga-ahˇ tsawˇ haˬ tiˬ gʼaˬ sehꞈ dzeh taˬ-euˬ ya mawˇ-awˇ, sehꞈ-euˬ yaw sahˇ gʼaˬ maˬ caw duˬ nya-eu ehˇ-awˬ.

² Aˬ yuiꞈ aˬ tsu deuˬ hawˇ-eu yaˇ kʼaˬ daˇ-eu deuˬ kʼoeˇ gaˇ iˇ-awˇ, tsawˇ shiˇ ga-eu kʼoeˇ tsahˇ-ahˇ neh, kʼoeˇ-euˬ dawˬ peh maˬ kaˬ maˬ kaˇ-ehˇ jaˆ-eu meuˬ aˬ yawꞈ meuˬ yawꞈ-ahˇ keuˆ ni aˇ mah ni kaˬ-eu daˇ dza ya dehˬ haw meh.

³ Tsawˇ shiˇ ga-eu tsahˇ-ahˇ aˬ cawˬ naˆ maˬ tseˇ peh dzehˬ-eu meuˬ kʼoeˇ meuˬ-ahˇ jawˇ-eu aˬ yuiꞈ aˬ tsu deuˬ-aˬ, tiˬ poˆ-iˬ maˬ kʼehˇ dzaˬ haw-euˬ mawˇ neˇ mawˇ kʼaˇ tiˬ mawˇ ya tseˇ doˆ meh.

⁴ Kʼoeˇ naˇ, tiˬ jawˇ-iˬ maˬ tsiˇ leˇ ni yoeˇ luꞈ-eu lawˇ gawˆ dawˬ peh jaˆ-eu tiˬ poˆ-iˬ maˬ mˇ dzaˬ haw-euˬ miˇ tsaˬ tiˬ tsahˇ-ahˇ, aˬ yuiꞈ aˬ tsu kʼoeˇ deuˬ mawˇ neˇ mawˇ kʼaˇ kʼoeˇ mawˇ tsahˇ gʼeh-awˇ, kawˬ lahˇ ya ngawˬ kʼehꞈ meh.

⁵ Leˬbiˇ tsawˇ haˬ piˇ ma deuˬ kʼawꞈ kʼoeˇ gaˇ ya iˇ meh. Aˬ jeˬ miˇ neh ehˇ naˇ, tsawˇ haˬ-ahˇ diˬ-eu sehꞈ-eu gaˇ kʼaˇ taꞈ leˇ-eu gaˇ kawˆ yawˬ jeˬ na luꞈ-ahˇ, aˬ yawꞈ maꞈ yaˇ kʼaˬ ya daˇ nehˬ meh. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ gaˇ bi mˇ-eu gʼaˇ duˬ maˬ ehˇ, aˬ yawꞈ-euˬ tsawˇ myahˇ uˬ moˆ dawˬ bi ngehˬ gʼeh-eu gʼaˇ duˬ maˬ ehˇ, aˬ yawꞈ maꞈ-ahˇ aˬ yawꞈ neh tseˇ doˆ taˬ-euˬ meh.

⁶ Tsawˇ shiˇ ga-eu tsahˇ-ahˇ aˬ cawˬ naˆ maˬ tseˇ peh dzehˬ-eu meuˬ-ahˇ jawˇ-eu aˬ yuiꞈ aˬ tsu dawˬ tawˆ luꞈ, mawˇ neˇ mawˇ kʼaˇ kʼoeˇ mawˇ kʼoeˇ taˆ aˬ laꞈ ya dzuiꞈ shawˇ meh.

⁷ Kʼoeˇ ngeh, aˬ yawꞈ maꞈ heu loꞈ-ehˇ ya ehˇ meh. ‘Tsawˇ haˬ heu gʼaˬ-ahˇ nga maꞈ sehꞈ-euˬ maˬ ngeuˇ. Aˬ suˇ gʼaˬ neh sehꞈ-euˬ kʼawꞈ nga maꞈ maˬ siˬ.

⁸ Sahˬpaˬ Miˬyehˇ-oˇ, Iˇjiˇtuˆ miˇ kʼahˬ laꞈ kʼoeˇ neh nawˬ neh ka kʼoꞈ doˆ laꞈ-euˬ nawˬ-euˬ tsawˇ haˬ deuˬ-ahˇ iˬ baˇ pyehˬ nehˬ laꞈ-awˬ. Nga maꞈ-ahˇ iˬ baˇ pyehˬ nehˬ laꞈ-awˇ, maˬ lehˬ maˬ ca-eu tsawˇ haˬ heu gʼaˬ-ahˇ sehꞈ-euˬ iˬ baˇ heu nga maꞈ kʼoeˇ taˆ taˬ bi keuˆ le nehˬ laꞈ’ lehˇ ya ehˇ meh.

⁹ Kʼoeˇ loꞈ-ehˇ, Sahˬpaˬ Miˬyehˇ neh bi mˇ-euˬ jeˬ-ahˇ naw maꞈ mˇ ngeh, tsawˇ haˬ kʼoeˇ gʼaˬ-ahˇ sehꞈ-euˬ iˬ baˇ naw maꞈ kʼoeˇ taˆ maˬ keuˆ le-a.

Guiˇ deuˆ gaˇ nyehꞈ laꞈ-euˬ zaˬ miˬ zaˬ deuˬ-ahˇ taꞈ-eu gaˇ kawˆ

¹⁰ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh, nawˇ guiˇ deuˆ ngeh bi gʼaˬ leˇ nehˬ laꞈ-awˇ, nawˇ tsawˇ haˬ nyehꞈ mi ngeh,

¹¹ nawˬ neh nyehꞈ mi-euˬ tsawˇ haˬ deuˬ laꞈ kʼoeˇ, nawˇ sheuˬ mawꞈ-eu aˇ gʼehˇ muiˬ-eu zaˬ miˬ zaˬ tiˬ gʼaˬ na ahˇ-eu baw tehꞈ-a.

¹² Aˬ yawꞈ-ahˇ nawˬ-euˬ nymˇ-ahˇ sheuˬ kʼoꞈ gʼeh-awˇ, aˬ yawꞈ-euˬ uˬ duˬ tsehˇ kahˇ bi jehˆ dzeh-awˇ, laꞈ sahˬ kʼawꞈ bi tehˬ dzeh-awˬ.

¹³ Kʼoeˇ naˇ, mehˬ tsoeˬ bi dm paˇ-awˬ. Aˬ yawꞈ nawˬ-euˬ nymˇ-ahˇ jawˇ-awˇ, ba la tiˬ siˬ byah ni aˬ yawꞈ-euˬ aˬ ma aˬ da-ahˇ noeˬ-eu laꞈ kʼoeˇ tsawˇ ngoeˇ ngoeˇ tehꞈ-a. Kʼoeˇ naˇ, aˬ yawꞈ-ahˇ nawˇ sheuˬ nya meh.

¹⁴ Aˬ yawꞈ-ahˇ nawˇ maˬ paˇ sheuˬ mawꞈ-ehˇ pyeuꞈ laˇ ngeh, aˬ yawꞈ-ahˇ pyehˬ nehˬ-awˇ, kʼaˇ iˇ mawꞈ gaˇ bi iˇ-awˬ. Aˬ yawꞈ-ahˇ nawˇ bahˬ-euˬ miˇ neh, zaˬ kʼaˆ loꞈ-ehˇ sawˇ nehˬ-awˇ maˬ ya ahˬ dzaˬ-a.

Aˬ li aˬ yuiꞈ gʼaˬ-ahˇ oꞈ-eu jeˬ biˇ

¹⁵ “Tsawˇ haˬ tiˬ gʼaˬ miˬ zaˬ nyiˬ gʼaˬ sheuˬ-awˇ, nyiˬ gʼaˬ luꞈ aˬ li jawˇ le-euˬ ehˇ-awˬ. Ehˇ kʼawꞈ, dehꞈ beh beh le-euˬ aˬ li aˬ yuiꞈ gʼaˬ-aˬ, aˬ yawꞈ nui ma tsaˬ dzehˬ-eu ma-euˬ aˬ li maˬ ngeuˇ-eu ehˇ-awˬ.

¹⁶ Tsawˇ haˬ kʼoeˇ gʼaˬ aˬ yawꞈ-euˬ zaˬ deuˬ-ahˇ jeˬ biˇ biˇ nehˬ ngeh, myaˆ pyawˬ huiˬ nyiˇ tseˇ-eu laꞈ kʼoeˇ, aˬ yawꞈ gaˬ dzehˬ-eu miˬ zaˬ gʼaˬ-euˬ aˬ li-ahˇ, aˬ li aˬ yuiꞈ gʼaˬ-ahˇ oꞈ-eu jeˬ biˇ maˬ ya biꞈ-a.

¹⁷ Aˬ li aˬ yuiꞈ gʼaˬ-aˬ, aˬ yawꞈ gaˬ dzehˬ-eu ma-euˬ zaˬ maˬ ngeuˇ kʼawꞈ, jeˬ biˇ biˇ nehˬ ngeh, nui deuˬ myaˆ maˬ tseˇ nyiˬ bymˇ ya biꞈ dzehˬ meh. Tsawˇ haˬ aˬ geu gʼaˬ maˬ kaˬ, yawˬ ha-euˬ aˬ li aˬ yuiꞈ gʼaˬ-ahˇ aˬ yuiꞈ gʼaˬ-euˬ jawˇ duˬ-ahˇ taˬ-awˇ, aˬ yawꞈ za geuˇ-eu jeˬ biˇ, zahˇ sahˇ kʼoꞈ kʼaˇ jaˆ-eu loꞈ-ehˇ ya biꞈ meh.

Ehˇ dawˬ maˬ naˇ haˬ-eu aˬ li-ahˇ taꞈ-eu gaˇ kawˆ

¹⁸ “Tsawˇ haˬ tiˬ gʼaˬ, aˬ ma aˬ da-ahˇ puiˬ mawꞈ-eu, nui ma gʼahˇ-eu aˬ li tiˬ li jawˇ-eu ehˇ-awˬ. Aˬ li kʼoeˇ li-ahˇ aˬ ma aˬ da deuˬ diˬ diˬ-ehˇ mehˬ nehˬ kʼawꞈ, ehˇ dawˬ maˬ naˇ haˬ-eu ehˇ-awˬ.

¹⁹ Aˬ yawꞈ jawˇ-eu meuˬ-euˬ lahˇ kʼehˬ-ahˇ, meuˬ kʼoeˇ taˆ aˬ yuiꞈ aˬ tsu geuꞈ-awˇ uˆ lahˇ-eu deuˬ jawˇ gaˇ, aˬ ma aˬ da deuˬ aˬ li kʼoeˇ gʼaˬ-ahˇ ya sheuˬ gʼeh meh.

²⁰ ‘Nga pehˬ-euˬ aˬ li heu gʼaˬ-aˬ, nui ma gʼahˇ-awˇ, aˬ ma aˬ da-euˬ ehˇ dawˬ maˬ naˇ haˬ ni, aˬ ma aˬ da-ahˇ puiˬ-eu uˬ taꞈ, pyuˇ zmˬ dzeh-awˇ, jiˇ baˬ dawˇ yehꞈ dawˇ yehꞈ-ehˇ jawˇ-eu aˬ li tiˬ gʼaˬ pyeuꞈ-eu meh’ lehˇ, aˬ yuiꞈ aˬ tsu kʼoeˇ deuˬ-ahˇ aˬ ma aˬ da ya ehˇ nehˬ meh.

²¹ Kʼoeˇ ngeh, meuˬ-ahˇ jawˇ-eu tsawˇ haˬ deuˬ aˬ li kʼoeˇ gʼaˬ-ahˇ kʼaˬ lo neh ya biˬ sehꞈ meh. Kʼoeˇ loꞈ-ehˇ jahˇ-eu laꞈ kʼoeˇ, kʼoeˇ loꞈ-ehˇ gʼeh-eu yaw haiˬ jeˬ byoˆ-iˇ ni naw maꞈ ya mˇ meh. Gaˇ kawˆ kʼoeˇ Iˇsaˬleˬlaˆ miˇ kʼahˬ laꞈ kʼoeˇ jawˇ-eu tsawˇ haˬ yawˬ gʼaˬ na luꞈ ya gaˬ-awˇ, guˆ-iˇ tehꞈ-a.

Zahˇ sahˇ kʼoꞈ gʼawˬ mya jeˬ

²² “Tsawˇ haˬ tiˬ gʼaˬ na yaw haiˬ jeˬ mˇ-euˬ miˇ neh, aˬ cawˬ neh bi sehꞈ-awˇ, aˬ yawꞈ-euˬ gʼawˇ mawˇ kʼawˇ zeuˇ-ahˇ paꞈ gʼeu-awˇ bi jaˆ ngeh,

²³ uˬ ciꞈ uˬ bya bya ni maˬ ya bi jaˆ-a. Aˬ yawꞈ ngeh nah neh ya duˬ pahˬ meh. Aˬ jeˬ miˇ neh ehˇ naˇ, tsawˇ shiˇ-euˬ gʼawˇ mawˇ kʼawˇ zeuˇ-ahˇ paꞈ-awˇ bi ga gʼeu-euˬ jeˬ-aˬ, Miˬyehˇ-euˬ yaˬ kʼehˇ yaˬ-eu jeˬ bi keuˆ le-eu meh. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-euˬ miˇ kʼahˬ-ahˇ nawˇ maˬ ya laˆ jawꞈ ni, tsawˇ shiˇ-euˬ gʼawˇ mawˇ kʼoeˇ duˬ pahˬ-awˬ.