Dawˬmehˬ 20 - Akha

Guiˇ deuˆ gaˇ taꞈ-eu gaˇ kawˆ

¹ “Nawˬ-ahˇ muiˇ-eu deuˬ-ahˇ guiˇ deuˆ-iˇ-eu lehˇ nawˇ doˆ-iˇ-awˇ, naw maꞈ naˆ maˬ tseˇ myaˬ dzehˬ-eu mahˬ laˆ lawˬ deuˬ hawˇ-eu guiˇ guiˇ maꞈ deuˬ-ahˇ ya mawˇ ngeh, taˬ guˆ. Iˇjiˇtuˆ miˇ kʼahˬ laꞈ kʼoeˇ neh nawˬ-ahˇ ka kʼoꞈ doˆ laꞈ-euˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ nehˬ-ehˇ jawˇ tehꞈ-a.

² Guiˇ deuˆ dahˬ beh-eu lehˇ gʼeh ngeh, piˇ ma tiˬ gʼaˬ mehˬ hu paw doˆ le-awˇ, heu loꞈ-ehˇ ya ehˇ meh.

³ ‘Iˇsaˬleˬlaˆ tsawˇ haˬ deuˬ-oˇ, naˇ haˬ sheˇ. Iˬ nah naw maꞈ guiˇ deuˆ-eu lehˇ gʼeh luꞈ meh. Naw maꞈ-ahˇ muiˇ-eu deuˬ-ahˇ taˬ guˆ. Gʼaˬ taˬ baˬ. Yaw dzuˬ taˬ dzuˬ. Taˬ noeˬ shaˬ.

⁴ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ nehˬ-ehˇ iˇ-awˇ, naw maꞈ gʼaˬ leˇ tehꞈ-a’ lehˇ ya ehˇ meh.

⁵ “Kʼoeˇ naˇ, guiˇ maꞈ kʼoeˇ taˆ uˆ lahˇ-eu yaw huiˬ geuꞈ-eu deuˬ heu loꞈ-ehˇ ya ehˇ meh. ‘Nymˇ yaw shuiꞈ tsoˆ gʼaˬ-euˬ tiˬ dehˬ pyeuꞈ-awˇ, maˬ ya a nehˬ dah-euˬ tsawˇ haˬ tiˬ gʼaˬ na keuˬ te loˇ. Keuˬ naˇ, iˇ kahˇ gʼoꞈ-iˇ-awˬ. Guiˇ deuˆ-eu laꞈ kʼoeˇ aˬ yawꞈ ya shiˇ lawˬ naˇ, aˬ yawꞈ-euˬ nymˇ-ahˇ aˬ cawˬ neh ya bi a nehˬ gaˇ keuˆ tehꞈ-a.

⁶ Aˬ gaꞈ yaˇ kmˇ laꞈ kʼoeˇ aˬ gaꞈ aˇ bawˬ ka taˬ-awˇ, aˇ siˬ tiˬ poˆ-iˬ maˬ ya pyaˆ dah-euˬ tsawˇ haˬ keuˬ te loˇ. Keuˬ naˇ, gʼoꞈ-iˇ-awˬ. Guiˇ deuˆ-eu laꞈ kʼoeˇ aˬ yawꞈ ya shiˇ lawˬ naˇ, aˬ yawꞈ-euˬ aˬ gaꞈ dzaˇ uiˇ aˬ cawˬ neh bi dawˇ gaˇ keuˆ tehꞈ-a.

⁷ Oeˇ mˇ baˇ-eu gʼaˇ duˬ ngehˬ cawˬ tsehˆ taˬ-euˬ tsawˇ haˬ keuˬ te loˇ. Keuˬ naˇ, gʼoꞈ-iˇ-awˬ. Guiˇ deuˆ-eu laꞈ kʼoeˇ aˬ yawꞈ ya shiˇ lawˬ naˇ, aˬ yawꞈ sheuˬ-eu lehˇ gʼeh-eu zaˬ miˬ aˬ buˇ-ahˇ aˬ cawˬ neh bi sheuˬ gaˇ keuˆ tehꞈ-a’ lehˇ ya ehˇ meh.

⁸ “Kʼoeˇ naˇ, guiˇ maꞈ-ahˇ uˆ lahˇ-eu yaw huiˬ geuꞈ-eu deuˬ heu loꞈ-ehˇ paˇ ya ehˇ meh. ‘Guˆ nya-eu tsawˇ haˬ keuˬ te loˇ. Keuˬ naˇ, gʼoꞈ-iˇ-awˬ. Maˬ ngeuˇ naˇ, aˬ yawꞈ baˬ da neh nui deuˬ gʼaˬ baˬ laˇ tehꞈ-a’ lehˇ paˇ ya ehˇ meh.

⁹ Guiˇ guiˇ maꞈ kʼoeˇ taˆ uˆ lahˇ-eu yaw huiˬ geuꞈ-eu deuˬ guiˇ guiˇ maꞈ-ahˇ dawˬ ngehˬ nehˬ gʼaˬ naˇ, aˬ yawꞈ muˇ yawꞈ kʼoeˇ taˆ uˆ lahˇ-eu yaw huiˬ deuˬ ya tseˇ doˆ meh.

¹⁰ “Meuˬ tiˬ meuˬ-ahˇ nawˇ guiˇ deuˆ ngeh, kʼoeˇ gaˇ jawˇ-eu tsawˇ haˬ deuˬ-ahˇ guiˇ maˬ deuˆ mi naˆ-ehˇ, nawˬ-euˬ laꞈ oꞈ awꞈ ma loˇ lehˇ jeˬ huˬ guˇ naˇ haˬ-awˬ.

¹¹ Aˬ yawꞈ maꞈ nawˬ-euˬ laꞈ oꞈ awꞈ-eu laꞈ kʼoeˇ, meuˬ lahˇ kʼehˬ pah nehˬ laꞈ naˇ, dawˬ tawˆ luꞈ nawˬ-euˬ zaˬ kʼaˆ bi geuꞈ-eu laꞈ kʼoeˇ myawˬ kʼaˆ bi mˇ-awˬ.

¹² Ehˇ kʼawꞈ, meuˬ kʼoeˇ meuˬ-ahˇ jawˇ-eu tsawˇ haˬ deuˬ nawˬ-euˬ laꞈ oꞈ maˬ awꞈ-ehˇ, guiˇ deuˆ-eu lehˇ lehˬ hmˬ naˇ, nawˬ-euˬ guiˇ maꞈ neh meuˬ kʼoeˇ meuˬ-ahˇ jawˬ lahˇ-awˬ.

¹³ Kʼoeˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh meuˬ kʼoeˇ meuˬ-ahˇ nawˬ-euˬ laꞈ-ahˇ bi ahˇ le ngeh, kʼoeˇ gaˇ jawˇ-eu kʼaˬ dzeˇ zaˬ yawˬ gʼaˬ na luꞈ sehꞈ-awˬ.

¹⁴ Ehˇ kʼawꞈ, zaˬ miˬ zaˬ deuˬ, zaˬ deuˬ, jeˬ zaˬ deuˬ hawˇ-eu meuˬ kʼoeˇ meuˬ laꞈ kʼoeˇ kʼaˇ jaˆ-eu yawˬ jeˬ na luꞈ nawˇ yuˇ geuꞈ-awˬ. Nawˬ-ahˇ muiˇ-eu deuˬ kʼaˇ jaˆ-eu yawˬ jeˬ na luꞈ nawˇ geuꞈ nya meh. Kʼoeˇ deuˬ dawˬ tawˆ luꞈ, Sahˬpaˬ Miˬyehˇ neh nawˬ-ahˇ biꞈ taˬ-euˬ jeˬ pyeuꞈ-eu meh.

¹⁵ Nawˇ jawˇ-eu miˇ kʼahˬ-ahˇ neh gaˇ mahˇ kaˬ gaˇ jaˆ-eu meuˬ deuˬ-ahˇ nawˇ kʼoeˇ loꞈ-ehˇ ya jahˇ nehˬ-meh.

¹⁶ “Ehˇ kʼawꞈ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ laꞈ kʼoeˇ jaˆ-eu meuˬ deuˬ-ahˇ nawˇ guiˇ deuˆ gʼaˬ ngeh, kʼaˇ jawˇ-eu tsawˇ haˬ yawˬ gʼaˬ na luꞈ maˬ bi dzeuˇ-iˇ ni nawˇ ya sehꞈ meh.

¹⁷ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Kaˬnaˬ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ heu deuˬ-ahˇ tiˬ gʼaˬ-iˬ maˬ bi dzeuˇ-iˇ ni laˆ luˬ laˆ seˇ nehˬ-awˬ.

¹⁸ Aˬ yawꞈ maꞈ-euˬ miˬyehˇ deuˬ-ahˇ aˬ yawꞈ maꞈ uˬ duˬ tahˬ ngeh mˇ-euˬ jawꞈ dui dui-eu jeˬ dawˬ tawˆ luꞈ aˬ yawꞈ maꞈ naw maꞈ-ahˇ mehˬ nehˬ laꞈ-awˇ, Sahˬpaˬ Miˬyehˇ-ahˇ bahˬ ni nawˇ iˬ baˇ maˬ ya mˇ-eu gʼaˇ duˬ, aˬ yawꞈ maꞈ-ahˇ sehꞈ-awˬ.

¹⁹ “Meuˬ tiˬ meuˬ na-ahˇ nawˇ guiˇ deuˆ luꞈ ngeh, aˇ yamˬ gʼawˬ myahˇ ni jawˬ lahˇ taˬ-awˇ ya jawˇ kʼawꞈ, kʼoeˇ gaˇ bawˇ-eu aˇ siˬ aˇ bawˇ deuˬ maˬ ya tuˇ dzeh-a. Aˇ siˬ kʼoeˇ nawˇ pyaˆ dzaˬ nya meh. Ehˇ kʼawꞈ, aˇ bawˇ maˬ ya tuˇ dzeh-a. Aˇ bawˇ kʼoeˇ deuˬ nawˬ-ahˇ muiˇ-eu maˬ ngeuˇ-a.

²⁰ Aˇ siˬ aˇ bawˇ maˬ ngeuˇ-eu aˇ bawˇ nui deuˬ tuˇ-awˇ, guiˇ deuˆ gaˇ zmˬ nya meh.