Dawˬmehˬ 2 - Akha

¹ “Kʼoeˇ naˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Aˬgaˬbaˬ iˬ ma laˆ shaˆ lahˇ gʼoꞈ paw dahˇ ka gʼeh-euˬ gaˇ ma caw caw-ehˇ, bawˇ tsahˬ bawˇ dahˇ paw aˬ dui maꞈ paˇ gʼoꞈ poˆ-iˇ-awˇ, Eˬdoˬ miˇ kʼahˬ gawˬ jawˬ gawˬ duˇ-ahˇ gʼawˬ myahˇ ni cah cah-ehˇ jawˇ-euˬ ma.

² “Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

³ ‘Gawˬ jawˬ gawˬ duˇ heu deuˬ-ahˇ naw maꞈ cah cah-ehˇ jawˇ-eu aˇ yamˬ myahˇ laˇ gʼaˬ-euˬ meh. Nymˬ-mˇ poˆ jawˇ-aˬ, laꞈ taˆ paw daˆ leˇ-awˬ.

⁴ Iˇsaˬleˬlaˆ tsawˇ haˬ-ahˇ heu loꞈ-ehˇ mehˬ nehˬ tsoˆ nehˬ-awˬ. Naw maꞈ nehˬ-ehˇ paˬ gʼawˬ gʼawˬ-iˇ taˬ-euˬ naw maꞈ-euˬ aˇ jeuˬ aˇ ca pyeuꞈ-eu Iˇsawˇ-euˬ zaˬ deuˬ uˆ deuˬ-euˬ miˇ kʼahˬ pyeuꞈ-eu Eˬdoˬ miˇ kʼahˬ gawˬ jawˬ gawˬ duˇ-ahˇ naw maꞈ ya le tsehˆ-eu aˇ yamˬ tsaˬ laˇ-euˬ meh. Aˬ yawꞈ maꞈ naw maꞈ-ahˇ guˆ tehꞈ-a.

⁵ Ehˇ kʼawꞈ, aˬ yawꞈ maꞈ-ahˇ guiˇ taˬ deuˆ. Aˬ jeˬ miˇ neh ehˇ naˇ, aˬ yawꞈ maꞈ-euˬ miˇ kʼahˬ aˬ kuiˇ pehˬ zaˬ hui ni tehꞈ-ehˇ kʼawꞈ, naw maꞈ-ahˇ ngaˇ maˬ biꞈ. Eˬdoˬ miˇ kʼahˬ-aˬ, Iˇsawˇ-euˬ zaˬ deuˬ uˆ deuˬ-ahˇ ngaˬ neh biꞈ tsehˆ taˬ-euˬ miˇ kʼahˬ pyeuꞈ-eu ma.

⁶ Dzaˬ dzaˬ dawˇ dawˇ hawˇ-eu iˇ cuꞈ aˬ yawꞈ maꞈ jawˇ gaˇ naw maꞈ zeuˇ dzaˬ zeuˇ dawˇ nya meh’ lehˇ ehˇ-eu meh.

⁷ “Naw maꞈ neh kʼaˇ mˇ kʼaˇ shaˇ-euˬ jeˬ laꞈ kʼoeˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ aˬ joˆ-ehˇ guiˬ lahˬ biꞈ laꞈ-euˬ gaˇ kawˆ-ahˇ noeˬ keuˆ-awˬ. Jeˇ dui dui-eu bawˇ tsahˬ bawˇ dahˇ heu laꞈ kʼoeˇ naw maꞈ cah luꞈ ngeh, naw maꞈ-ahˇ aˬ yawꞈ haw piˇ-euˬ meh. Aˇ yamˬ heu oeˬ tseˇ kʼoꞈ laꞈ kʼoeˇ, aˬ yawꞈ naw maꞈ nehˬ-ehˇ jawˇ-awˇ, kʼaˇ loˬ-eu jeˬ naw maꞈ za-euˬ meh.

⁸ “Kʼoeˇ naˇ, aˬ dui maꞈ mehˬ hu paw le-awˇ, Eˇlaˆ hawˇ-eu Eˬzoˇgeˇbaˬ meuˬ-ahˇ neh Shiˇ-eu Iˬ ma laˆ shaˆ-ahˇ iˇ-eu gaˇ ma-ahˇ byehˇ dzeh yaꞈ-awˇ, laꞈ taˆ paw pyawˬ-ahˇ nahˇ ma doˆ kʼehˬ paw dzeˇ-ehˇ jaˆ-eu Mawˇbaˆ miˇ kʼahˬ paw le-euˬ ma.

⁹ Sahˬpaˬ Miˬyehˇ ngaˬ-ahˇ ehˇ-eu, ‘Lawˇtaˬ-euˬ zaˬ deuˬ uˆ deuˬ pyeuꞈ-eu Mawˇbaˆ tsawˇ haˬ deuˬ-ahˇ taˬ laˆ bahˬ nehˬ. Guiˇ kʼawꞈ taˬ deuˆ nehˬ. Aˬ jeˬ miˇ neh ehˇ naˇ, ngaˇ aˬ yawꞈ maꞈ-ahˇ Aˇlaˆ meuˬ biꞈ taˬ-euˬ ma. Aˬ yawꞈ maꞈ-euˬ miˇ kʼahˬ tiˬ pyehˬ tehˬ-ehˇ kʼawꞈ, naw maꞈ-ahˇ ngaˇ maˬ biꞈ’ lehˇ ehˇ-eu meh.”

¹⁰ (Aˇlaˆ meuˬ laꞈ kʼoeˇ, gʼaˬ kʼaˆ-awˇ, huiˬ-eu goˇ-eu Eˇmiˬ lehˇ kuˇ-eu tsawˇ haˬ deuˬ jawˇ-eu meh. Aˬ yawꞈ maꞈ-aˬ, huiˬ dui goˇ dui dui-eu tsawˇ jeuˬ pyeuꞈ-eu Aˬnaˬkaˆ tsawˇ haˬ deuˬ naˆ ni goˇ-eu meh.

¹¹ Aˬnaˬkaˆ tsawˇ haˬ deuˬ-ahˇ kuˇ-eu loꞈ-ehˇ, aˬ yawꞈ maꞈ-ahˇ kʼawꞈ Leˬpeˬ tsawˇ jeuˬ lehˇ kuˇ-eu meh. Ehˇ kʼawꞈ, Mawˇbaˆ tsawˇ haˬ deuˬ aˬ yawꞈ maꞈ-ahˇ Eˇmiˬ tsawˇ jeuˬ lehˇ kuˇ-eu meh.

¹² Eˬdoˬ miˇ kʼahˬ laꞈ kʼoeˇ, Hawˇlaˆ tsawˇ haˬ deuˬ jawˇ-eu meh. Ehˇ kʼawꞈ, Iˇsaˬleˬlaˆ tsawˇ haˬ deuˬ neh muiˇ-eu deuˬ-ahˇ teh doˆ-awˇ, Sahˬpaˬ Miˬyehˇ neh biꞈ-euˬ miˇ kʼahˬ-ahˇ jawˇ-eu loꞈ-ehˇ, Iˇsawˇ-euˬ zaˬ deuˬ uˆ deuˬ Hawˇlaˆ tsawˇ haˬ deuˬ-ahˇ teh doˆ-awˇ laˆ luˬ laˆ seˇ nehˬ-eu laꞈ kʼoeˇ, Eˬdoˬ miˇ kʼahˬ-ahˇ jawˇ-euˬ meh.)

¹³ “Kʼoeˇ naˇ, Sahˬpaˬ Miˬyehˇ aˬ dui-ahˇ ehˇ-eu loꞈ-ehˇ, Zaˬyehˆ lawˇ baˬ aˬ dui tsehˆ-euˬ ma.

¹⁴ Kʼoeˇ ngeh, Kaˬdeˬshaˇbaˬneˬ-ahˇ neh aˬ dui maꞈ doˆ laˇ-euˬ smˬ tseˇ yehꞈ kʼoꞈ byah laˇ-euˬ meh. Sahˬpaˬ Miˬyehˇ neh ehˇ taˬ-euˬ loꞈ-ehˇ, kʼoeˇ ziˇ laꞈ kʼoeˇ guiˇ kʼaˇ deuˆ-eu tsawˇ haˬ deuˬ shiˇ dzeuˇ jiˇ-euˬ meh.

¹⁵ Aˬ yawꞈ maꞈ-ahˇ maˬ laˆ sehꞈ byoˆ jiˇ kʼoeˇ keuˆ ni, Sahˬpaˬ Miˬyehˇ-euˬ aˬ laꞈ aˬ yawꞈ maꞈ-ahˇ muiˇ-euˬ meh.

¹⁶ “Aˬ yawꞈ maꞈ shiˇ dzeuˇ jiˇ ngeh,

¹⁷ Sahˬpaˬ miˬyehˇ aˬ dui maꞈ-ahˇ ehˇ-eu,

¹⁸ ‘Aˇlaˆ meuˬ jaˆ-eu paw kahˇ neh, Mawˇbaˆ miˇ kʼahˬ-ahˇ iˬ nah naw maꞈ ya le tsehˆ meh.

¹⁹ Kʼoeˇ naˇ, Lawˇtaˬ-euˬ zaˬ deuˬ uˆ deuˬ pyeuꞈ-eu Aˬmoˬ tsawˇ jeuˬ jawˇ-eu miˇ kʼahˬ dawˬ peh naw maꞈ le keuˆ tehꞈ-a. Aˬ yawꞈ maꞈ-ahˇ naw maꞈ taˬ laˆ bahˬ nehˬ. Guiˇ kʼawꞈ taˬ deuˆ nehˬ. Aˬ jeˬ miˇ neh ehˇ naˇ, aˬ yawꞈ maꞈ-euˬ miˇ kʼahˬ naw maꞈ-ahˇ ngaˇ maˬ biꞈ’ lehˇ ehˇ-eu meh.”

²⁰ (Miˇ kʼahˬ heu kʼahˬ-ahˇ aˇ hu jawˇ haw-euˬ tsawˇ jeuˬ-euˬ tsawˇ myahˇ yuˇ-awˇ, Leˬpeˬ miˇ kʼahˬ lehˇ kʼawꞈ kuˇ-eu meh. Tsawˇ haˬ kʼoeˇ deuˬ-ahˇ Aˬmoˬ tsawˇ haˬ deuˬ Zaˬmaˬzmˬmiˬ lehˇ kuˇ-eu meh.

²¹ Aˬ yawꞈ maꞈ-aˬ, Aˬnaˬkaˆ tsawˇ haˬ deuˬ loꞈ-ehˇ goˇ-eu meh. Tsawˇ haˬ behˇ-awˇ baoˬ huiˬ-eu tsawˇ jeuˬ pyeuꞈ-eu meh. Ehˇ kʼawꞈ, aˬ yawꞈ maꞈ-euˬ miˇ kʼahˬ laꞈ kʼoeˇ Aˬmoˬ tsawˇ haˬ deuˬ bi jawˇ-eu gʼaˇ duˬ, aˬ yawꞈ maꞈ-ahˇ Sahˬpaˬ Miˬyehˇ laˆ luˬ laˆ seˇ nehˬ-euˬ meh.

²² Eˬdoˬ miˇ kʼahˬ gawˬ jawˬ gawˬ duˇ-ahˇ jawˇ-eu Iˇsawˇ-euˬ zaˬ deuˬ uˆ deuˬ pyeuꞈ-eu Eˬdoˬ tsawˇ haˬ deuˬ-ahˇ kʼawꞈ Sahˬpaˬ Miˬyehˇ kʼoeˇ loꞈ-ehˇ jahˇ nehˬ-euˬ meh. Hawˇlaˆ tsawˇ haˬ deuˬ-ahˇ aˬ yawꞈ laˆ luˬ laˆ seˇ nehˬ-awˇ, aˬ yawꞈ maꞈ-euˬ miˇ kʼahˬ-ahˇ Eˬdoˬ tsawˇ haˬ deuˬ-ahˇ bi jawˇ-euˬ meh. Eˬdoˬ tsawˇ haˬ deuˬ iˬ nah keuˆ ni kʼoeˇ gaˇ jawˇ luꞈ-eu meh.

²³ Gʼahˇ ceh-euˬ Iˬ ma laˆ shaˆ lawˇ deh caw caw-ehˇ jaˆ-eu miˇ kʼahˬ-ahˇ, Gaˬlaˬdeˬ iˇ jaw lahˇ-ahˇ neh oe-euˬ tsawˇ haˬ deuˬ jawˇ-eu meh. Yaw beh kʼoeˇ gaˇ jawˇ luꞈ-eu Aˬbymˬ tsawˇ jeuˬ-ahˇ aˬ yawꞈ maꞈ laˆ luˬ laˆ seˇ nehˬ-awˇ, tsawˇ jeuˬ kʼoeˇ jeuˬ-euˬ miˇ kʼahˬ dawˬ tawˆ luꞈ, laꞈ oˆ paw Gaˬzaˬ meuˬ-ahˇ keuˆ ni aˬ yawꞈ maꞈ jawˇ byah gʼeh-euˬ meh.)

²⁴ “Mawˇbaˆ miˇ kʼahˬ-ahˇ aˬ dui maꞈ tsehˆ doˆ dzeuˇ gʼaˬ ngeh, Sahˬpaˬ Miˬyehˇ ehˇ-eu, ‘Iˇ-awˇ, Aˬnoˬ lawˇ baˬ tsehˆ-awˬ. Heˬshaˬboˬ meuˬ-ahˇ jawˇ-eu Aˬmoˬ sahˬ paˬ Siˇhoˬ hawˇ-eu aˬ yawꞈ-euˬ miˇ kʼahˬ naw maꞈ-ahˇ ngaˇ biꞈ-eu ma. Aˬ yawꞈ-ahˇ guiˇ deuˆ-awˇ, aˬ yawꞈ-euˬ miˇ kʼahˬ deuˆ geuꞈ-awˬ.

²⁵ Iˬ nah neh aˇ dahˬ beh-awˇ, yawˬ gaˇ na luꞈ aˬ cawˬ naw maꞈ-ahˇ guˆ ni ngaˇ jahˇ ma. Naw maꞈ-euˬ tsawˇ myahˇ ya gaˬ-euˬ tehꞈ-ehˇ kʼawꞈ, tsawˇ haˬ yaw gʼaˬ na luꞈ yaw dzuˬ dzuˬ tehꞈ-a’ lehˇ ehˇ-eu meh.

Sahˬ paˬ Siˇhoˬ-ahˇ Iˇsaˬleˬlaˆ tsawˇ haˬ deuˬ guiˇ deuˆ gʼaˬ-euˬ

²⁶ “Kʼoeˇ naˇ, Geˬdiˇmoˇ bawˇ tsahˬ bawˇ dahˇ-ahˇ neh ngaˬ neh tsawˇ haˬ pyehˬ gʼeh-awˇ, Heˬshaˬboˬ meuˬ-ahˇ jawˇ-eu sahˬ paˬ Siˇhoˬ-ahˇ heu loꞈ-ehˇ bi tsaꞈ gaˬ iˇ-euˬ ma.

²⁷ ‘Nawˬ-euˬ miˇ kʼahˬ-ahˇ nga maꞈ-ahˇ bi iˇ tsehˆ laꞈ-awˬ. Gaˇ ma caw caw-ehˇ tehꞈ-ehˇ nga maꞈ cah ma.

²⁸ Nga maꞈ dzaˬ-eu dzaˬ dzaˬ dawˇ dawˇ hawˇ-eu nga maꞈ dawˇ-eu iˇ cuꞈ gʼaˇ duˬ aˇ poeˬ biꞈ ma. Naw maꞈ-euˬ miˇ kʼahˬ-ahˇ ya iˇ tsehˆ naˇ gʼaˬ ma.

²⁹ Eˬdoˬ miˇ kʼahˬ-ahˇ jawˇ-eu Iˇsawˇ-euˬ zaˬ deuˬ uˆ deuˬ hawˇ-eu Aˇlaˆ meuˬ-ahˇ jawˇ-eu Mawˇbaˆ tsawˇ haˬ deuˬ aˬ yawꞈ maꞈ-euˬ miˇ kʼahˬ laꞈ kʼoeˇ nga maꞈ-ahˇ bi cah tsehˆ laꞈ-euˬ loꞈ-ehˇ, Yawˇdaˬ lawˇ baˬ-ahˇ nga maꞈ tsehˆ doˆ-awˇ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh nga maꞈ-ahˇ biꞈ laꞈ-euˬ miˇ kʼahˬ-ahˇ iˇ keuˆ ngeh keuˆ ni, nawˬ-euˬ miˇ kʼahˬ laꞈ kʼoeˇ bi cah tsehˆ laꞈ-awˬ’ lehˇ bi tsaꞈ leˇ-euˬ ma.

³⁰ “Ehˇ kʼawꞈ, sahˬ paˬ Siˇhoˬ-aˬ, aˬ yawꞈ-euˬ miˇ kʼahˬ laꞈ kʼoeˇ aˬ dui maꞈ-ahˇ maˬ bi cah tsehˆ laꞈ-aˬ. Aˬ yawꞈ-ahˇ aˬ dui guiˇ deuˆ-awˇ gʼaˬ leˇ-eu laꞈ kʼoeˇ, nymˬ-mˇ keuˆ ni aˬ dui-euˬ laꞈ-ahˇ jaˆ luꞈ-eu aˬ yawꞈ-euˬ miˇ kʼahˬ heu aˬ dui za ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jahˇ-euˬ meh.

³¹ “Kʼoeˇ naˇ, Sahˬpaˬ Miˬyehˇ ngaˬ-ahˇ ehˇ-eu, ‘Haw yawˬ, sahˬ paˬ Siˇhoˬ hawˇ-eu aˬ yawꞈ-euˬ miˇ kʼahˬ nawˬ-ahˇ ngaˇ biꞈ-euˬ ma. Aˬ yawꞈ-euˬ miˇ kʼahˬ-ahˇ deuˆ geuꞈ-awˬ’ lehˇ ehˇ-eu meh.

³² Siˇhoˬ-aˬ, aˬ yawꞈ-euˬ tsawˇ haˬ dawˬ tawˆ luꞈ sheuˬ-awˇ, aˬ dui maꞈ-ahˇ guiˇ deuˆ-eu lehˇ Yaˬhaˇ meuˬ dawˬ peh oe-euˬ meh.

³³ Ehˇ kʼawꞈ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh, aˬ yawꞈ-ahˇ aˬ dui-euˬ laꞈ-ahˇ bi ahˇ le-awˇ, aˬ yawꞈ-ahˇ maˬ ehˇ, aˬ yawꞈ-euˬ aˬ li deuˬ-ahˇ maˬ ehˇ, aˬ yawꞈ-euˬ tsawˇ haˬ dawˬ tawˆ luꞈ-ahˇ maˬ ehˇ, aˬ dui sehꞈ-euˬ ma.

³⁴ Kʼoeˇ ngeh, meuˬ yawˬ meuˬ na luꞈ-ahˇ aˬ dui deuˆ gʼaˬ-eu laꞈ kʼoeˇ, laˆ luˬ laˆ seˇ nehˬ-awˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, zaˬ maˬ ehˇ, tiˬ gʼaˬ-iˬ maˬ bi dzeuˇ-iˇ ni, dawˬ tawˆ luꞈ-ahˇ sehꞈ-euˬ ma.

³⁵ Jeˬ zaˬ deuˬ teh geuꞈ-awˇ, meuˬ kʼoeˇ deuˬ laꞈ kʼoeˇ kʼaˇ jaˆ-eu myawˬ gahˬ deuˬ yuˇ geuꞈ jiˇ-euˬ ma.

³⁶ Aˬnoˬ lawˇ baˬ gawˆ mehˇ paw, deh kʼawꞈ mehˬ dzaˬ-ahˇ jaˆ-eu Aˬyawˬ meuˬ-ahˇ neh, deh kʼawꞈ gʼahˇ ceh jaˆ-eu meuˬ hawˇ-eu Giˇlaˆ meuˬ-ahˇ doˆ ni, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-ahˇ bi deuˆ gʼaˬ laꞈ-euˬ meh. Aˬ dui maꞈ maˬ deuˆ uˇ gʼeh nya-eu meuˬ meuˬ lahˇ tiˬ lahˇ-iˬ maˬ jaˆ-aˬ.

³⁷ Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh aˬ dui-ahˇ taˬ iˇ lehˇ dawˬ biꞈ taˬ-euˬ pehˇ tsahˇ deuˬ pyeuꞈ-eu, Aˬmoˬ miˇ kʼahˬ-ahˇ maˬ ehˇ, Jaˬboˆ lawˇ baˬ lawˇ deh-ahˇ maˬ ehˇ, gawˬ jawˬ gawˬ duˇ-ahˇ jaˆ-eu meuˬ deuˬ-ahˇ maˬ ehˇ, (kʼoeˇ maˬ ngeuˇ) yawˬ gaˇ yawˬ maˬ ehˇ, aˬ dui maˬ iˇ peh-aˬ.