Dawˬmehˬ 19 - Akha

Buˬ-iˇ law-iˇ-eu meuˬ deuˬ

¹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ kʼoeˇ kʼahˬ-ahˇ jawˇ-eu tsawˇ jeuˬ deuˬ-ahˇ aˬ yawꞈ laˆ luˬ laˆ seˇ gʼaˬ-awˇ, aˬ yawꞈ maꞈ-euˬ meuˬ deuˬ hawˇ-eu nymˇ deuˬ laꞈ kʼoeˇ naw maꞈ jawˇ uˇ leˇ gʼaˬ ngeh,

^2-3 nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ laꞈ-euˬ miˇ kʼahˬ-ahˇ smˬ paˆ ya biˇ paˆ-awˇ, aˬ yawꞈ paˆ yawꞈ laꞈ kʼoeˇ yaw awˇ laꞈ-ehˇ iˇ keuˆ nya-eu meuˬ tiˬ meuˬ ya tseˇ doˆ taˬ meh. Aˬ cawˬ-ahˇ sehꞈ-euˬ tsawˇ haˬ-aˬ, meuˬ kʼoeˇ tiˬ meuˬ na laꞈ kʼoeˇ cehˆ uˇ leˇ-awˇ, tsawˇ shiˇ uˬ kʼawˇ cehˆ buˬ nya tehꞈ-a.

⁴ Tsawˇ haˬ tiˬ gʼaˬ na, yawˬ ha nehˬ-ehˇ nui ma laˆ naˇ taˬ-euˬ maˬ jaˆ-eu tsawˇ haˬ tiˬ gʼaˬ-ahˇ maˬ yehꞈ maˬ caˇ-ehˇ laˆ tahˬ-awˇ bi shiˇ naˇ, meuˬ kʼoeˇ tiˬ meuˬ na-ahˇ cehˆ uˇ-iˇ ngeh, maˬ ya shiˇ ni ya buˬ-iˇ tehꞈ-a.

⁵ Yaw jeˬ ma jeˬ ehˇ ngeh, tsawˇ haˬ nyiˬ gʼaˬ bawˇ tsahˬ-ahˇ miˬ dzaˬ kʼehꞈ-iˇ-eu lehˇ tiˬ kawˆ loꞈ-ehˇ gʼoˆ doˆ-iˇ-eu ehˇ-awˬ. Tiˬ gʼaˬ aˇ bawˇ tuˇ luꞈ ngeh deuˆ haˬ seuˬ lehˆ-iˇ-awˇ, yawˬ gʼaˬ yawˬ-ahˇ teuˆ zaw-awˇ bi shiˇ naˇ, yawˬ ha gʼaˬ ya buˬ-iˇ ni, meuˬ kʼoeˇ smˇ meuˬ laꞈ kʼoeˇ tiˬ meuˬ na-ahˇ ya cehˆ uˇ leˇ meh.

⁶ Kʼoeˇ loꞈ-ehˇ gʼeh-eu meuˬ tiˬ meuˬ tehꞈ-ehˇ bi jaˆ naˇ, aˇ dzehˬ-ehˇ kaˬ-eu jawˇ duˬ tiˬ tsahˇ na-ahˇ lehˬ laˇ ca laˇ ngeh, shiˇ-euˬ gʼaˬ-euˬ aˬ yuiꞈ aˬ nyiˇ laꞈ kʼoeˇ laꞈ poˆ ya poˆ-eu gʼaˬ aˬ yawꞈ-ahˇ teh miˇ-awˇ, nui ma aˬ huˬ huˬ-awˇ, iˬ baˇ maˬ ahˇ-eu tsawˇ haˬ kʼoeˇ gʼaˬ-ahˇ sehꞈ tehꞈ-a. Aˬ jeˬ miˇ neh ehˇ naˇ, tsawˇ haˬ kʼoeˇ gʼaˬ-aˬ, aˬ cawˬ nehˬ-ehˇ nui ma laˆ naˇ taˬ-euˬ maˬ jaˆ gaˇ, maˬ yehꞈ maˬ caˇ-ehˇ laˆ tahˬ-awˇ bi shiˇ-euˬ jeˬ pyeuꞈ-eu meh.

⁷ Kʼoeˇ miˇ neh, meuˬ smˇ meuˬ tseˇ doˆ taˬ-awˇ bi jaˆ-awˬ lehˇ ngaˇ ehˇ-eu ma.

⁸ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-euˬ aˬ poeˬ aˬ bawˇ deuˬ-ahˇ ehˇ taˬ-euˬ loꞈ-ehˇ, nawˬ-euˬ miˇ kʼahˬ-ahˇ aˬ yawꞈ bi huiˬ bi jeˇ laˇ-awˇ, saˇ jaˇ dzaˬ taˬ-euˬ miˇ kʼahˬ kʼahˬ lah ni nawˬ-ahˇ biꞈ laꞈ ngeh,

⁹ meuˬ smˇ meuˬ paˇ ya tseˇ doˆ lahˬ meh. (Iˬ nah ngaˇ naw maꞈ-ahˇ dawˬ kʼaˇ biꞈ-euˬ loꞈ-ehˇ yawˬ jeˬ na luꞈ mˇ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-eu laꞈ kʼoeˇ, aˬ yawꞈ neh mehˬ nehˬ tsoˆ nehˬ-euˬ loꞈ-ehˇ tehꞈ-ehˇ dehꞈ naˇ, miˇ kʼahˬ kʼoeˇ kʼahˬ nawˬ-ahˇ biꞈ laꞈ tehꞈ-a.)

¹⁰ Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ kʼoeˇ kʼahˬ laꞈ kʼoeˇ, iˬ baˇ maˬ ahˇ-eu tsawˇ haˬ deuˬ maˬ ya shiˇ ni maˬ ehˇ, kʼoeˇ loꞈ-ehˇ gʼeh-eu tsawˇ haˬ deuˬ-ahˇ sehꞈ-euˬ baˬ da neh nawˬ-euˬ kʼoeˇ taˆ iˬ baˇ maˬ ya keuˆ le ni maˬ ehˇ, kʼoeˇ loꞈ-ehˇ mˇ-awˬ.

¹¹ “Ehˇ kʼawꞈ, tsawˇ haˬ tiˬ gʼaˬ na , yawˬ ha nehˬ-ehˇ nui ma laˆ naˇ taˬ-euˬ jaˆ-eu tsawˇ haˬ-ahˇ, yaw muiˬ paˬ-ehˇ lehˬ hmˬ-awˇ sehꞈ-euˬ laꞈ kʼoeˇ, buˬ-iˇ law-iˇ-eu meuˬ tiˬ meuˬ na laꞈ kʼoeˇ cehˆ uˇ leˇ-eu ehˇ-awˬ.

¹² Kʼoeˇ loꞈ-ehˇ pyeuꞈ laˇ ngeh, aˬ yawꞈ jawˇ-eu meuˬ-ahˇ jawˇ-eu aˬ yuiꞈ aˬ tsu deuˬ neh aˬ yawꞈ-ahˇ ya bi sheuˬ kʼoꞈ laˬ-iˇ-awˇ, shiˇ-euˬ gʼaˬ-euˬ aˬ yuiꞈ aˬ nyiˇ laꞈ kʼoeˇ laꞈ poˆ ya poˆ-eu gʼaˬ-euˬ laꞈ-ahˇ a nehˬ-awˇ, ya bi sehꞈ meh.

¹³ Aˬ yawꞈ-ahˇ gʼawˬ shaˬ taˬ gaˬ. Nawˇ yaw muiˬ paˬ-ehˇ ya dehꞈ dzaˬ-eu gʼaˇ duˬ, kʼoeˇ loꞈ-ehˇ tsawˇ haˬ-ahˇ sehꞈ-eu jeˬ Iˇsaˬleˬlaˆ miˇ kʼahˬ laꞈ kʼoeˇ maˬ ya bi pyeuꞈ doˆ laˇ ni mˇ-awˬ.

Aˇ hu ba-euˬ miˇ kaˬ

¹⁴ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ-ahˇ yaw beh neh jaˆ luꞈ-eu yawˬ ha nehˬ-ehˇ nymˇ kaˬ taꞈ-eu tsawˇ haˬ-euˬ miˇ kaˬ maˬ ya teh jiˆ-a.

Tsawˇ kaˬ gaˇ kawˆ

¹⁵ “Tsawˇ kaˬ tiˬ gʼaˬ tehꞈ-euˬ dawˬ-ahˇ gʼoe-awˇ, tsawˇ haˬ tiˬ gʼaˬ tiˬ jeˬ paˬ mˇ bahˬ-euˬ meh lehˇ maˬ daˇ tsehˆ nya-a. Tsawˇ haˬ tiˬ gʼaˬ iˬ baˇ ahˇ meh lehˇ daˇ tsehˆ nehˬ nya-eu gʼaˇ duˬ, kʼaˇ teˬ-eu tsawˇ kaˬ nyiˬ gʼaˬ ya jawˇ meh.

¹⁶ Tsawˇ haˬ tiˬ gʼaˬ na, yawˬ gʼaˬ yawˬ tiˬ jeˬ paˬ mˇ bahˬ-euˬ meh lehˇ maˬ tsaˬ maˬ dawˇ-eu laꞈ kʼoeˇ saˇ kiˇ kamˬ naˇ,

¹⁷ nyiˬ gʼaˬ luꞈ uˬ duˬ tahˬ-eu jawˇ duˬ-ahˇ ya le-awˇ, kʼoeˇ gaˇ gaˇ mˇ luꞈ-eu piˇ ma deuˬ hawˇ-eu yaˇ kʼaˬ daˇ-eu deuˬ neh ya bi daˇ tsehˆ meh.

¹⁸ Yaˇ kʼaˬ daˇ-eu deuˬ gaˇ kawˆ kʼoeˇ hmˬ-ahˇ yaw muiˬ paˬ-ehˇ ya pyehˆ tseˇ duˬ-awˇ, tsawˇ haˬ kʼoeˇ gʼaˬ-aˬ, yawˬ ha tsawˇ jeuˬ pyeuꞈ-eu Iˇsaˬleˬlaˆ tsawˇ haˬ gʼaˇ duˬ maˬ tsaˬ maˬ dawˇ-eu laꞈ kʼoeˇ saˇ kiˇ kamˬ-euˬ gaˇ ya mawˇ naˇ,

¹⁹ mˇ bahˬ-euˬ meh lehˇ aˬ yawꞈ neh lehꞈ-euˬ gʼaˬ ya daˬ paˬ-ehˇ gʼeh-eu kʼehˬ-eu kʼaˆ-eu jeˬ-ahˇ aˬ yawꞈ ya daˬ meh. Kʼoeˇ loꞈ-ehˇ gʼeh-eu jeˬ naw maꞈ laꞈ kʼoeˇ maˬ ya pyeuꞈ doˆ laˇ ni, kʼoeˇ loꞈ-ehˇ mˇ-awˬ.

²⁰ Kʼoeˇ ngeh, pyeuꞈ laˇ-euˬ gaˆ kawˆ kʼoeˇ yawˬ gʼaˬ na luꞈ ya gaˬ-awˇ, guˆ-eu laꞈ kʼoeˇ, kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ-ahˇ tiˬ gʼaˬ-iˬ maˬ paˇ mˇ peuˬ ni pyeuꞈ-iˇ tehꞈ-a.

²¹ Kʼoeˇ loꞈ-ehˇ gʼeh-eu gaˇ kawˆ deuˬ pyeuꞈ doˆ laˇ ngeh, gʼawˬ shaˬ taˬ haw gaˬ nehˬ. Saꞈ laˇ aˇ poeˬ saꞈ laˇ, myaˆ nuiˆ aˇ poeˬ myaˆ nuiˆ, seuˬ aˇ poeˬ seuˬ, aˬ laꞈ aˇ poeˬ aˬ laꞈ, aˬ kuiˇ aˇ poeˬ aˬ kuiˇ bi biꞈ tsoeˬ-eu laꞈ kʼoeˇ, kʼehˬ nehˬ kʼaˆ nehˬ-awˬ.