Dawˬmehˬ 18 - Akha

Piˇ ma deuˬ-euˬ jeˬ biˇ

¹ “Leˬbiˇ tsawˇ jeuˬ piˇ ma deuˬ-ahˇ Iˇsaˬleˬlaˆ-euˬ miˇ tsaˬ jeˬ biˇ maˬ oꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ-ahˇ lawˇ-euˬ shehˇ-euˬ jeˬ-aˬ, Leˬbiˇ tsawˇ jeuˬ dzaˬ-eu dawˇ-eu gʼaˇ duˬ ya bi pyeuꞈ-eu meh.

² Iˇsaˬleˬlaˆ tsawˇ jeuˬ nui deuˬ loꞈ-ehˇ, Leˬbiˇ tsawˇ haˬ tiˬ gʼaˬ-iˬ yawˬ ha-euˬ miˇ tsaˬ pehˇ tsahˇ maˬ ya bi baw-a. Sahˬpaˬ Miˬyehˇ neh aˬ yawꞈ maꞈ-ahˇ saˇ jaˇ dzaˬ taˬ-euˬ loꞈ-ehˇ, Sahˬpaˬ Miˬyehˇ-euˬ piˇ ma deuˬ ya geuꞈ-eu kʼoeˇ-aˬ, aˬ yawꞈ maꞈ-euˬ jeˬ biˇ meh.

³ “Mawˇ neˇ maˬ ehˇ, yawˇ maˬ ehˇ kʼaˇ lawˇ ngeh, baꞈ pu, mehˬ oꞈ, tsahˬ nahˬ uˇ jiˇ, heu deuˬ-aˬ, piˇ ma deuˬ-ahˇ ya biꞈ meh.

⁴ Keuˆ beh beh le-euˬ dzaˬ la gʼo cehˇ, aˬ gaꞈ dzaˇ uiˇ, saˬ loˬ tsiˇ hawˇ-eu yawˇ caꞈ hm deuˬ, aˬ yawꞈ maꞈ-ahˇ ya biꞈ meh.

⁵ Mˬ maˬ maˬ byaˆ zaˇ ziˇ aˬ yawꞈ gʼaˇ duˬ piˇ ma bi geuꞈ-eu lehˇ, naw maꞈ-euˬ tsawˇ jeuˬ tsawˇ ca heu myaˆ ni gʼeh-eu laꞈ kʼoeˇ, Leˬbiˇ tsawˇ jeuˬ-ahˇ aˬ yawꞈ tseˇ doˆ-euˬ meh.

⁶ “Leˬbiˇ tsawˇ haˬ tiˬ gʼaˬ na, Iˇsaˬleˬlaˆ miˇ kʼahˬ laꞈ kʼoeˇ jaˆ-eu meuˬ aˬ geu meuˬ-ahˇ jawˇ-eu maˬ kaˬ, nui ma keuˆ-awˇ uˬ duˬ tahˬ-eu jawˇ duˬ-ahˇ laˇ naˇ,

⁷ kʼoeˇ gaˇ gaˇ mˇ luꞈ-eu Leˬbiˇ tsawˇ haˬ deuˬ loꞈ-ehˇ, aˬ yawꞈ-ahˇ kʼoeˇ gaˇ gaˇ bi mˇ nya meh.

⁸ Piˇ ma nui deuˬ dzaˬ dzaˬ dawˇ dawˇ kʼaˇ za-eu myaˆ ni, aˬ yawꞈ kʼawꞈ za-awˇ, aˬ yawꞈ-euˬ miˬ sawˇ zaˬ deuˬ neh kʼaˇ dawˆ ahˇ laꞈ-euˬ jeˬ aˬ yawꞈ jeˬ hmˬ taˬ nya meh.

Lawˇ ciꞈ zaˬ deuˬ loꞈ-ehˇ taˬ dehꞈ

⁹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ-ahˇ nawˇ jawˇ leˇ ngeh, kʼoeˇ gaˇ jawˇ luꞈ-eu tsawˇ jeuˬ deuˬ mˇ luꞈ-eu jawꞈ dui dui-eu jeˬ-ahˇ nawˇ dzaw geuꞈ-awˇ taˬ mˇ.

^10-11 Yawˬ ha-euˬ aˬ buˇ aˬ li-ahˇ lawˇ duˬ kʼoeˇ taˆ dzah puiˆ-awˇ naw maꞈ maˬ ya lawˇ-a. Ja maw maw-eu maˬ ehˇ, mah loˬ loˬ-eu maˬ ehˇ, nyiˇ paˬ shiˇ-eu maˬ ehˇ, shiˇ dzeuˇ-euˬ tsawˇ haˬ-euˬ yaw sahˇ nehˬ-ehˇ mehˬ bawˬ mˇ-eu maˬ ehˇ, naw maꞈ-euˬ tsawˇ haˬ deuˬ maˬ ya bi jahˇ-a.

¹² Jawꞈ dui dui-eu gaˇ heu deuˬ mˇ-eu tsawˇ haˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ bye dui dui-eu meh. Kʼoeˇ miˇ neh, naw maꞈ le gʼeh leꞈ-eu nehˬ-ehˇ, tsawˇ jeuˬ kʼoeˇ deuˬ-ahˇ, miˇ kʼahˬ kʼoeˇ kʼahˬ laꞈ kʼoeˇ neh aˬ yawꞈ teh doˆ meh.

¹³ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi iˬ baˇ taˬ kʼaˇ maˬ za ni dehꞈ-awˬ.”

Miˬyehˇ gʼaˇ duˬ ngehˬ dah-eu tiˬ gʼaˬ bi oe ma lehˇ saˇ jaˇ dzaˬ-euˬ

¹⁴ Kʼoeˇ naˇ Moˇseˬ ehˇ-eu, “Nawˇ jawˇ uˇ leˇ-eu lehˇ gʼeh-eu miˇ kʼahˬ-ahˇ jawˇ-eu tsawˇ haˬ deuˬ-aˬ, ja maw maw-eu deuˬ hawˇ-eu nyiˇ paˬ deuˬ-euˬ ehˇ dawˬ naˇ haˬ-eu meh. Ehˇ kʼawꞈ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ kʼoeˇ loꞈ-ehˇ maˬ bi mˇ-a.

¹⁵ Ngaˇ loꞈ-ehˇ gʼeh-eu aˬ yawꞈ gʼaˇ duˬ ngehˬ dah-eu tsawˇ haˬ tiˬ gʼaˬ aˬ yawꞈ bi oe-awˇ, kʼoeˇ gʼaˬ-euˬ ehˇ dawˬ-ahˇ naw maꞈ ya naˇ haˬ tehꞈ-a.

¹⁶ “Siˇnaˆ gawˬ jawˬ-ahˇ naw maꞈ uiˬ leˇ ngeh nah, ‘Sahˬpaˬ Miˬyehˇ dawˬ ngehˬ-eu taˬ paˇ bi gaˬ nehˬ laꞈ.’ ‘Guˆ laˆ paˬ-ehˇ gʼeh-eu miˬ dzaˬ kʼawˇ zeuˇ taˬ paˇ bi mawˇ laꞈ’ lehˇ naw maꞈ shaˇ-euˬ meh. Naw maꞈ ya shiˇ gaˇ guˆ-eu miˇ neh, kʼoeˇ loꞈ-ehˇ naw maꞈ shaˇ-euˬ meh.

¹⁷ Kʼoeˇ miˇ neh, Sahˬpaˬ Miˬyehˇ ngaˬ-ahˇ ehˇ-eu, ‘Aˬ yawꞈ maꞈ shaˇ-eu tsaˬ meh.

¹⁸ Nawˇ loꞈ-ehˇ gʼeh-eu ngaˬ-euˬ gʼaˇ duˬ ngehˬ dah-eu tsawˇ haˬ tiˬ gʼaˬ, aˬ yawꞈ maꞈ laꞈ kʼoeˇ ngaˇ bi doˆ laˇ ma. Aˬ joˆ-ehˇ ya ngehˬ ya tmˇ-eu gaˇ kawˆ ngaˇ aˬ yawꞈ-ahˇ ehˇ nehˬ-awˇ, ngaˬ neh dawˬ kʼaˇ biꞈ-euˬ yawˬ jeˬ na luꞈ, aˬ yawꞈ maꞈ-ahˇ aˬ yawꞈ ehˇ nehˬ tehꞈ-a.

¹⁹ Ngaˬ-euˬ tsawˇ myahˇ uˬ moˆ aˬ yawꞈ dawˬ ngehˬ-awˇ, aˬ yawꞈ-euˬ ehˇ dawˬ maˬ naˇ haˬ-eu tsawˇ haˬ-ahˇ ngaˇ kʼehˬ nehˬ ma.

²⁰ Ehˇ kʼawꞈ, ngaˬ-euˬ gʼaˇ duˬ ngehˬ dah-eu tsawˇ haˬ tiˬ gʼaˬ na, ngaˬ neh dawˬ maˬ biꞈ-euˬ gaˇ, ngaˬ-euˬ tsawˇ myahˇ uˬ moˆ dawˬ ngehˬ naˇ, kʼoeˇ loꞈ-ehˇ mˇ-eu baˬ da neh ya shiˇ tehꞈ-a. Miˬyehˇ nui deuˬ-euˬ tsawˇ myahˇ uˬ moˆ dawˬ ngehˬ-eu tsawˇ haˬ kʼawꞈ, kʼoeˇ loꞈ-ehˇ ya shiˇ tehꞈ-a.’

²¹ “Miˬyehˇ gʼaˇ duˬ ngehˬ dah-eu gʼaˬ neh ehˇ-euˬ jeˬ-aˬ, Sahˬpaˬ Miˬyehˇ neh bi ngehˬ-euˬ dawˬ ngeuˇ-eu maˬ ngeuˇ-eu aˬ joˆ-ehˇ ehˇ tsehˆ nya nmˇ lehˇ naw maꞈ zahˬ leˇ kʼaˇ za tehꞈ-a.

²² Miˬyehˇ gʼaˇ duˬ ngehˬ dah-eu gʼaˬ, Sahˬpaˬ Miˬyehˇ-euˬ tsawˇ myahˇ uˬ moˆ tiˬ jeˬ paˇ ehˇ ngeh, aˬ yawꞈ neh ehˇ-euˬ loꞈ-ehˇ maˬ pyeuꞈ laˇ naˇ, Sahˬpaˬ Miˬyehˇ neh bi ehˇ-euˬ dawˬ maˬ ngeuˇ-a. Miˬyehˇ gʼaˇ duˬ ngehˬ dah-euˬ kʼoeˇ gʼaˬ yawˬ ha-euˬ baoˬ-ahˇ gʼoe-awˇ ngehˬ-eu tmˇ-eu jeˬ pyeuꞈ-awˇ, aˬ yawꞈ-ahˇ nawˇ maˬ ya guˆ-a.