Dawˬmehˬ 17 - Akha

¹ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˇ byawꞈ baw-eu mawˇ neˇ maˬ ehˇ, maˇ byawꞈ baw-eu yawˇ maˬ ehˇ, maˬ ya lawˇ-a. Kʼoeˇ loꞈ-ehˇ gʼeh-eu lawˇ-eu jeˬ-ahˇ Sahˬpaˬ Miˬyehˇ maˬ haw nahˇ-a.

^2-3 “Naw maꞈ jawˇ-eu meuˬ tiˬ meuˬ na laꞈ kʼoeˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, tiˬ gʼaˬ na, Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ leuˇ-awˇ, miˬ yehˇ nui deuˬ-ahˇ maˬ ehˇ, nahˇ ma-ahˇ maˬ ehˇ, ba la-ahˇ maˬ ehˇ, aˬ guiˇ-ahˇ maˬ ehˇ, uˬ duˬ tahˬ-eu laꞈ kʼoeˇ, Sahˬpaˬ Miˬyehˇ-ahˇ mˇ bahˬ-awˇ, aˬ yawꞈ-euˬ dawˬ ma saˇ jaˇ-ahˇ puiˬ-euˬ gaˇ kawˆ ya gaˬ-euˬ ehˇ-awˬ.

⁴ Kʼoeˇ loꞈ-ehˇ ja gaˇ nawˇ ya gaˬ ngeh, yaw muiˬ paˬ-ehˇ pyehˆ tseˇ haw-awˬ. Iˇsaˬleˬlaˆ miˇ kʼahˬ laꞈ kʼoeˇ, kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ aˬ diˇ aˬ maˇ pyeuꞈ doˆ laˇ-euˬ ngeuˇ naˇ,

⁵ tsawˇ haˬ kʼoeˇ gʼaˬ-ahˇ meuˬ laꞈ nyiˇ sheuˬ doˆ gʼeh-awˇ, kʼaˬ lo neh biˬ sehꞈ-awˬ.

⁶ Ehˇ kʼawꞈ, aˬ yawꞈ mˇ lehˬ-euˬ jeˬ-ahˇ ya mawˇ-euˬ tsawˇ kaˬ kʼaˇ teˬ-eu nyiˬ gʼaˬ maˬ jawˇ naˇ, aˬ yawꞈ-ahˇ maˬ ya sehꞈ-a. Tsawˇ kaˬ tiˬ gʼaˬ tehꞈ-ehˇ jawˇ naˇ, aˬ yawꞈ-ahˇ maˬ ya sehꞈ-a.

⁷ Tsawˇ kaˬ geuꞈ-eu deuˬ neh aˬ yawꞈ-ahˇ kʼaˬ lo biˬ dawꞈ dawꞈ gʼaˬ miˇ tsa, nui deuˬ ya biˬ meh. Kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ byoˆ-iˇ ni, naw maꞈ kʼoeˇ loꞈ-ehˇ jahˇ-awˬ.

⁸ “Jeˬ biˇ-ahˇ taꞈ leˇ-eu gaˇ kawˆ, laˆ tahˬ laˆ naˇ-euˬ gaˇ kawˆ, tsawˇ haˬ-ahˇ sehꞈ-euˬ hawˇ-eu laˆ tahˬ-awˇ bi shiˇ-euˬ heu nyiˬ jeˬ aˬ joˆ-ehˇ ya tseˇ paˆ-eu gaˇ kawˆ, kʼoeˇ loꞈ-ehˇ gʼeh-eu shaˬ-eu gaˇ kawˆ deuˬ doˆ laˇ ngeh, naw maꞈ nehˬ-ehˇ jawˇ luꞈ-eu yaˇ kʼaˬ daˇ-eu deuˬ gʼaˇ duˬ jahˇ tsehˆ-eu yaw shaˬ meh. Kʼoeˇ loꞈ-ehˇ gʼeh-eu gaˇkawˆ doˆ laˇ ngeh, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh tseˇ doˆ taˬ-euˬ uˬ duˬ tahˬ-eu jawˇ duˬ kʼoeˇ tsahˇ-ahˇ le-awˬ.

⁹ Leˬbiˇ tsawˇ jeuˬ piˇ ma deuˬ hawˇ-eu, kʼoeˇ gaˇ jawˇ luꞈ-eu yaˇ kʼaˬ daˇ-eu deuˬ-ahˇ, gaˇ kʼoeˇ a nehˬ-awˇ, bi daˇ tsehˆ-awˬ.

¹⁰ Aˬ yawꞈ maꞈ neh bi daˇ tsehˆ-awˇ, aˬ yawꞈ maꞈ kʼaˇ ehˇ-eu loꞈ-ehˇ maˬ bi lehˬ-iˇ ni mˇ-awˬ.

¹¹ Aˬ yawꞈ maꞈ neh daˇ tsehˆ nehˬ laꞈ-euˬ gaˇ juˬ-awˇ, aˬ yawꞈ maꞈ neh kʼaˇ mehˬ kʼaˇ tsoˆ laꞈ-euˬ loꞈ-ehˇ, tiˬ dawˬ-iˬ maˬ bi lehˬ-iˇ ni caw teh-awˬ.

¹² Yaˇ kʼaˬ daˇ-eu deuˬ-euˬ dawˬ-ahˇ maˬ ehˇ, kʼoeˇ gaˇ piˇ ma geuꞈ luꞈ-eu gʼaˬ-euˬ dawˬ-ahˇ maˬ ehˇ, maˬ naˇ haˬ geuꞈ-eu tsawˇ haˬ-ahˇ ya sehꞈ meh. Kʼoeˇ loꞈ-ehˇ jahˇ-awˇ, Iˇsaˬleˬlaˆ tsawˇ haˬ deuˬ laꞈ kʼoeˇ maˬ muiˬ maˬ jaˬ-eu jeˬ maˬ bi jaˆ ni naw maꞈ yuˇ dzeh-awˬ.

¹³ Gaˇ kawˆ kʼoeˇ tsawˇ haˬ yawˬ gʼaˬ na luꞈ ya gaˬ ngeh, guˆ laˇ-awˇ, kʼoeˇ loꞈ-ehˇ maˬ mˇ peuˬ ni pyeuꞈ-iˇ tehꞈ-a.

Sahˬ paˬ-ahˇ taꞈ leˇ-eu mehˬ-eu tsoˆ-eu dawˬ

¹⁴ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ biꞈ-eu lehˇ gʼeh-eu miˇ kʼahˬ-ahˇ naw maꞈ za gʼaˬ-awˇ, jawˇ uˇ leˇ gʼaˬ ngeh, naw maꞈ-euˬ jawˬ jawˬ-ehˇ jawˇ-eu tsawˇ jeuˬ dawˬ tawˆ luꞈ-ahˇ duˇ ni, naw maꞈ kʼawꞈ sahˬ paˬ tiˬ gʼaˬ loˬ nya lehˇ noeˬ tsehˆ laˇ tehꞈ-a.

¹⁵ Naw maꞈ neh tseˇ doˆ-euˬ sahˬ paˬ-aˬ, Sahˬpaˬ Miˬyehˇ neh tseˇ doˆ-euˬ gʼaˬ pyeuꞈ ni, yaw muiˬ paˬ-ehˇ shaˇ noeˬ-awˬ. Aˬ yawꞈ-aˬ, naw maꞈ tsawˇ jeuˬ ya bi pyeuꞈ meh. Boeˇ miˬ siˬ kʼaˬ-ahˇ naw maꞈ-euˬ sahˬ paˬ taˬ bi geuꞈ.

¹⁶ Sahˬ paˬ geuꞈ-eu gʼaˬ-aˬ, aˬ yawꞈ-euˬ guiˇ guiˇ maꞈ gʼaˇ duˬ mahˬ gʼawˬ mya ni maˬ ya cu-a. Iˇjiˇtuˆ miˇ kʼahˬ-ahˇ aˬ yawꞈ-euˬ tsawˇ haˬ pyehˬ gʼeh-awˇ mahˬ maˬ ya bi zeuˇ laˬ-iˇ-a. Aˬ jeˬ miˇ neh ehˇ naˇ, aˬ yawꞈ-euˬ tsawˇ haˬ deuˬ kʼoeˇ gaˇ tiˬ jawˇ-iˬ maˬ paˇ ya gʼoꞈ poˆ-iˇ meh lehˇ Sahˬpaˬ Miˬyehˇ neh ehˇ taˬ-euˬ jaˆ-eu meh.

¹⁷ Sahˬ paˬ geuꞈ-eu gʼaˬ miˬ zaˬ gʼawˬ mya gʼaˬ maˬ ya sheuˬ-a. Aˬ jeˬ miˇ neh ehˇ naˇ, kʼoeˇ loꞈ-ehˇ mˇ naˇ, Sahˬpaˬ Miˬyehˇ-ahˇ aˬ yawꞈ gʼawˬ-iˇ tehꞈ-a. Pyuˇ hawˇ-eu shuiˇ poˆ uiˬ-eu laꞈ kʼoeˇ, yawˬ ha smˇ muiˬ muiˬ laˇ ni maˬ ya mˇ-a.

¹⁸ Aˬ yawꞈ sahˬ paˬ pyeuꞈ laˇ ngeh, Leˬbiˇ tsawˇ jeuˬ piˇ ma deuˬ jeˬ hmˬ taˬ-euˬ Miˬyehˇ-euˬ zahˇ dawˬ kʼoꞈ dawˬ hawˇ-eu mehˬ-euˬ tsoˆ-euˬ jeˬ boꞈ ahˇ taˬ-euˬ sahˬ boꞈ paˇ dmˬ laꞈ kʼoeˇ kʼaˇ boꞈ taˬ-euˬ jeˬ dawˬ tawˆ luꞈ, aˬ yawꞈ yaw oeˇ-ahˇ duˇ ni paˇ boꞈ ahˇ taˬ-euˬ sahˬ boꞈ paˇ dmˬ tiˬ dmˬ aˬ yawꞈ jawˇ gaˇ ya bi jaˆ meh.

¹⁹ Sahˬpaˬ Miˬyehˇ-ahˇ taˬ huiˬ taˬ mahˇ nya laˇ-awˇ, kʼoeˇ gaˇ kʼaˇ boꞈ taˬ-euˬ zahˇ dawˬ kʼoꞈ dawˬ deuˬ-ahˇ saˇ jaˇ ziꞈ-eu laꞈ kʼoeˇ caw teh nya laˇ ni, sahˬ boꞈ paˇ dmˬ kʼoeˇ aˬ yawꞈ dawˬ peh bi jaˆ-awˇ, ziˇ jiˇ leˇ ngeh keuˆ ni ya gui meh.

²⁰ Kʼoeˇ loꞈ-ehˇ gui naˇ, “Ngaˇ-aˬ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ naˆ maˬ tseˇ huiˬ dzehˬ ma’ lehˇ aˬ yawꞈ maˬ noeˬ-ehˇ, Sahˬpaˬ Miˬyehˇ -euˬ zahˇ dawˬ kʼoꞈ dawˬ-ahˇ tiˬ jeˬ gʼeh-awˇ neh-iˬ maˬ puiˬ ni dehꞈ tehꞈ-a. Kʼoeˇ naˇ, aˬ yawꞈ gʼawˬ mya kʼoꞈ keuˆ ni sahˬ paˬ geuꞈ-awˇ ya uˆ lahˇ tehꞈ-a. Aˬ yawꞈ-euˬ zaˬ deuˬ uˆ deuˬ kʼawꞈ, gʼawˬ mya ziˇ keuˆ ni Iˇsaˬleˬlaˆ miˇ kʼahˬ-ahˇ ya uˆ lahˇ tehꞈ-a.