Dawˬmehˬ 16 - Akha

Baˬsaˬkaˬ Bawˬ-iˬ

¹ “Aˬbiˇbaˬ ba la-ahˇ Baˬsaˬkaˬ Bawˬ-iˬ gʼeh-eu laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ taˬ mahˇ-awˬ. Ba la kʼoeˇ siˬ uˬ ciꞈ tiˬ miˇ-ahˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ aˬ yawꞈ ka kʼoꞈ doˆ laꞈ-euˬ meh.

² Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ ta mahˇ-eu laꞈ kʼoeˇ, Baˬsaˬkaˬ Bawˬ-iˬ dzaˬ-eu gʼaˇ duˬ, uˬ duˬ tahˬ-eu jawˇ duˬ kʼoeˇ tsahˇ-ahˇ le-awˇ, nawˬ-euˬ yawˇ maˬ ngeuˇ naˇ mawˇ neˇ tiˬ mawˇ sehꞈ-awˬ.

³ Bawˬ-iˬ heu hmˬ dzaˬ ngeh, dehˬ tseˬ dawˆ taˬ-euˬ kaˬ muˇ taˬ dzaˬ. Iˇjiˇtuˆ miˇ kʼahˬ laꞈ kʼoeˇ neh naw maꞈ tehˬ law baw law-ehˇ ya doˆ le ngeh dzaˬ-euˬ loꞈ-ehˇ, shiꞈ nah keuˆ ni dehˬ tseˬ maˬ dawˆ-euˬ kaˬ muˇ nawˇ ya dzaˬ meh. Shaˬ-eu zahˬ-eu jeˬ-ahˇ ya daˬ-euˬ jawˇ duˬ pyeuꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ le-euˬ aˇ nah kʼoeˇ nah-ahˇ, maˬ shiˇ tiˬ ziˇ naw maꞈ maˬ ya ngehˇ ni, shaˬ-eu zahˬ-euˬ jeˬ-ahˇ ya daˬ-euˬ kaˬ muˇ lehˇ kuˇ-eu kaˬ muˇ kʼoeˇ dzaˬ-awˬ.

⁴ Shiꞈ nah laꞈ kʼoeˇ, naw maꞈ-euˬ miˇ kʼahˬ laꞈ kʼoeˇ jawˇ-eu tsawˇ haˬ tiˬ gʼaˬ-iˬ yawˬ ha-euˬ nymˇ laꞈ kʼoeˇ dehˬ tseˬ maˬ ya bi jaˆ-eu uˬ taꞈ, yaw beh nah uˬ ciꞈ uˬ taw paw sehꞈ-euˬ jeˬ zaˬ-euˬ shaˬ jiˇ-ahˇ, kʼoeˇ ngeh miˇ laꞈ kʼoeˇ ya dzaˬ jiˇ meh.

⁵ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ taˬ-euˬ meuˬ deuˬ laꞈ kʼoeˇ, Baˬsaˬkaˬ Bawˬ-iˬ-ahˇ taꞈ leˇ-awˇ lawˇ-eu jeˬ nawˇ maˬ ya lawˇ-a.

⁶ Ehˇ kʼawꞈ, Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ le-euˬ yamˬ pyeuꞈ-eu, uˬ ciꞈ uˬ taw paw nahˇ ma ga ahˇ ngeh yamˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh tseˇ doˆ taˬ-euˬ uˬ duˬ tahˬ-eu jawˇ duˬ-ahˇ, Baˬsaˬkaˬ Bawˬ-iˬ-ahˇ taꞈ leˇ-eu lawˇ-eu jeˬ nawˇ ya lawˇ meh.

⁷ Uˬ duˬ tahˬ-eu jawˇ duˬ kʼoeˇ tsahˇ-ahˇ shaˬ jiˇ caꞈ dzaˬ-awˇ, yawˬ shawˬ yawˬ iˇ kahˇ-ahˇ gʼoꞈ-iˇ-awˬ.

⁸ Koꞈ nah keuˆ ni dehˬ tseˬ maˬ dawˆ-euˬ kaˬ muˇ naw maꞈ dzaˬ-awˇ, shiꞈ nah tiˬ nah-ahˇ gaˇ maˬ mˇ ni uiˬ leˇ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-awˬ.

Cehˇ laˆ luiˆ-eu Bawˬ-iˬ

⁹ “Cehˇ yehˬ dahˬ beh-eu yamˬ-ahˇ neh aˇ dahˬ beh-awˇ, jawˇ nah shiꞈ jaw keuˆ ni aˇ nah gui daˆ leꞈ-awˬ.

¹⁰ Kʼoeˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ guiˬ lahˬ kʼaˇ biꞈ nehˬ laꞈ-euˬ loꞈ-ehˇ geuˇ ni, nui ma keuˆ-awˇ lawˇ-eu jeˬ aˬ yawꞈ jawˇ gaˇ yuˇ laꞈ-awˇ, aˬ yawꞈ-ahˇ taˬ huiˬ taˬ mahˇ-eu laꞈ kʼoeˇ, Cehˇ laˆ luiˆ-eu Bawˬ-iˬ gʼeh-awˬ.

¹¹ Nawˬ-euˬ zaˬ deuˬ, nawˬ-euˬ zaˬ kʼaˆ deuˬ, naw maꞈ-euˬ meuˬ deuˬ-ahˇ jawˇ luꞈ-eu Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu miˬ coeˬ miˬ ma deuˬ nehˬ-ehˇ, uˬ duˬ tahˬ-eu jawˇ duˬ-ahˇ Sahˬpaˬ Miˬyehˇ-euˬ mehˬ shi laˬ kʼaˬ cehˇ-awˬ.

¹² Zahˇ dawˬ kʼoꞈ dawˬ heu deuˬ-ahˇ nawˇ maˬ ngehˇ ni caw teh-awˬ. Iˇjiˇtuˆ miˇ kʼahˬ laꞈ kʼoeˇ nawˇ aˬ cawˬ zaˬ kʼaˆ ya geuꞈ yaꞈ-euˬ gaˇ kawˆ-ahˇ taˬ ngehˇ.

Sehˬ gʼawˆ-euˬ Bawˬ-iˬ

¹³ “Cehˇ laˆ luiˆ jiˇ-awˇ, aˬ gaꞈ aˇ siˬ lehˬ gʼaˬ ngeh, shiꞈ nah keuˆ ni Sehˬ gʼawˆ-euˬ Bawˬ-iˬ gʼeh-awˬ.

¹⁴ Nawˬ-euˬ zaˬ deuˬ, nawˬ-euˬ zaˬ kʼaˆ deuˬ, naw maꞈ-euˬ meuˬ deuˬ-ahˇ jawˇ-eu Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ nehˬ-ehˇ, bawˬ-iˬ heu hmˬ gʼeh-eu laꞈ kʼoeˇ laˬ kʼaˬ cehˇ-awˬ.

¹⁵ Uˬ duˬ tahˬ-eu jawˇ duˬ kʼoeˇ tsahˇ-ahˇ shiꞈ nah keuˆ ni bawˬ-iˬ gʼeh-eu laꞈ kʼoeˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ taˬ mahˇ-awˬ. Nawˇ cehˇ laˆ luiˆ-eu laꞈ kʼoeˇ maˬ ehˇ, nawˬ neh mˇ-euˬ gaˇ-ahˇ maˬ ehˇ, Sahˬpaˬ Miˬyehˇ guiˬ lahˬ biꞈ nehˬ laꞈ-euˬ miˇ neh, laˬ kʼaˬ cehˇ-awˬ.

¹⁶ “Baˬsaˬkaˬ Bawˬ-iˬ, Cehˇ laˆ luiˆ-eu Bawˬ-iˬ hawˇ-eu, Sehˬ gʼawˆ-euˬ Bawˬ-iˬ heu smˇ hmˬ laꞈ kʼoeˇ, tiˬ kʼoꞈ smˬ poˆ, naw maꞈ tsawˇ haˬ kʼaˬ dzeˇ zaˬ dawˬ tawˆ luꞈ Sahˬpaˬ Miˬyehˇ-ahˇ uˬ duˬ ya tahˬ laˇ meh. Aˬ yawꞈ gʼaˬ yawꞈ, yawꞈ ngehꞈ-ehˇ maˬ laˇ ni, laꞈ sawˬ ya yuˇ laꞈ meh.

¹⁷ Aˬ yawꞈ gʼaˬ yawꞈ, yawˬ ha-ahˇ Sahˬpaˬ Miˬyehˇ neh guiˬ lahˬ biꞈ laꞈ-euˬ loꞈ-ehˇ geuˇ ni, laꞈ sawˬ ya yuˇ laꞈ meh.

Yaw tsaˬ yawˬ dawˇ laꞈ kʼoeˇ uˆ lahˇ-eu

¹⁸ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ meuˬ yawˬ meuˬ na luꞈ laꞈ kʼoeˇ, yaˇ kʼaˬ daˇ-eu tsawˇ haˬ deuˬ hawˇ-eu yaw huiˬ yaw mahˇ geuꞈ-eu deuˬ ya tseˇ doˆ meh. Tsawˇ haˬ kʼoeˇ deuˬ-aˬ, myaˆ pyawˬ huiˬ nyiˇ maˬ tseˇ ni yaˇ kʼaˬ ya daˇ meh.

¹⁹ Aˬ yawꞈ maꞈ yaˇ kʼaˬ daˇ ngeh, maˬ tsaˬ maˬ dawˇ-eu jeˬ hawˇ-eu myaˆ pyawˬ huiˬ nyiˇ tseˇ-eu jeˬ maˬ ya mˇ-a. Laꞈ nmꞈ nmꞈ-eu jeˬ-ahˇ maˬ ya ha geuꞈ-a. Aˬ jeˬ miˇ neh ehˇ naˇ, laꞈ nmꞈ nmꞈ-eu jeˬ-aˬ, dawˇ coe ni mˇ-eu tsawˇ haˬ deuˬ hawˇ-eu zaˬ siˬ tsawˇ gahˇ ahˇ-eu tsawˇ haˬ deuˬ-ahˇ myaˆ behꞈ bi behꞈ-iˇ-awˇ, yaˇ kʼaˬ daˇ-eu jeˬ-ahˇ bi lehˬ-iˇ nya-eu meh.

²⁰ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ-ahˇ naw maꞈ ya jawˇ-awˇ mehˬ hu paw dehꞈ daˆ leꞈ nya ni, aˬ myah luꞈ yaw tsaˬ yaw dawˇ jeˬ-ahˇ yaw muiˬ muiˬ-ehˇ mˇ-awˬ.

²¹ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ naw maꞈ lawˇ duˬ tsoˆ ngeh, kʼoeˇ-euˬ gaˇ dzeˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ taˬ bi jaˆ.

²² Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ maˬ haw nahˇ-eu kʼaˬ lo kʼawˇ zeuˇ deuˬ kʼawꞈ naw maꞈ maˬ ya ka tuˇ-a.