Dawˬmehˬ 15 - Akha

Aˇ kʼoꞈ shiꞈ kʼoꞈ tiˬ kʼoꞈ

¹ “Shiꞈ kʼoꞈ tiˬ kʼoꞈ kʼaˇ doˆ le ngeh, naw maꞈ neh pyuˇ paˇ nehˬ taˬ-euˬ tsawˇ haˬ-ahˇ dziˇ dzoˆ ya byehˇ nehˬ meh.

² Naw maꞈ heu loꞈ-ehˇ ya jahˇ meh. Yawˬ ha-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ pyuˇ paˇ daˆ nehˬ taˬ-euˬ tsawˇ haˬ yawˬ gʼaˬ na luꞈ, dziˇ dzoˆ ya byehˇ nehˬ meh. Paˇ daˆ nehˬ-euˬ pyuˇ kʼoeˇ maˬ ya shaˇ kʼoꞈ-a. Aˬ jeˬ miˇ neh ehˇ naˇ, dziˇ dzoˆ kʼoeˇ ya byehˇ meh lehˇ Sahˬpaˬ Miˬyehˇ neh daˇ tsehˆ taˬ-euˬ meh.

³ Aˬ cawˬ tsawˇ jeuˬ deuˬ naw maꞈ-ahˇ biꞈ kʼoꞈ paˬ-ehˇ jaˆ-eu jeˬ naw maꞈ yuˇ kʼoꞈ geuꞈ nya meh. Ehˇ kʼawꞈ, naw maꞈ-euˬ tsawˇ jeuˬ naw maꞈ-ahˇ biꞈ kʼoꞈ paˬ-ehˇ jaˆ-eu jeˬ naw maꞈ maˬ ya yuˇ kʼoꞈ geuꞈ-a.

^4-5 “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ laꞈ kʼoeˇ, aˬ yawꞈ naw maꞈ-ahˇ guiˬ lahˬ biꞈ nehˬ laꞈ tehꞈ-a. Iˬ nah ngaˇ naw maꞈ-ahˇ dawˬ kʼaˇ biꞈ nehˬ-euˬ yawˬ jeˬ na luꞈ-ahˇ yaw muiˬ paˬ-ehˇ caw teh -awˇ, aˬ yawꞈ-euˬ ehˇ dawˬ naˇ haˬ geuꞈ naˇ, naw maꞈ tsawˇ haˬ tiˬ gʼaˬ-iˬ maˬ shaˬ ni ya dehꞈ dzaˬ tehꞈ-a.

⁶ Sahˬpaˬ Miˬyehˇ saˇ jaˇ dzaˬ taˬ-euˬ loꞈ-ehˇ, naw maꞈ-ahˇ aˬ yawꞈ guiˬ lahˬ biꞈ laꞈ tehꞈ-a. Tsawˇ jeuˬ gʼawˬ mya jeuˬ, naw maꞈ-ahˇ pyuˇ ya shaˇ paˇ laˇ tehꞈ-a. Ehˇ kʼawꞈ, aˬ cawˬ tsawˇ jeuˬ tiˬ jeuˬ-ahˇ-iˬ, naw maꞈ pyuˇ ya shaˇ paˇ-iˇ gaˇ maˬ keuˆ-aˇ. Tsawˇ jeuˬ gʼawˬ mya jeuˬ kʼoeˇ taˆ naw maꞈ ya uˆ lahˇ tehꞈ-a. Ehˇ kʼawꞈ, tsawˇ jeuˬ tiˬ jeuˬ-iˬ naw maꞈ kʼoeˇ taˆ maˬ ya uˆ lahˇ-aˇ.

⁷ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ-ahˇ jaˆ-eu meuˬ tiˬ meuˬ na laꞈ kʼoeˇ jawˇ-eu naw maꞈ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na iˇ shaˬ shaˬ naˇ, yawˬ ha gʼaˇ duˬ tehꞈ-ehˇ shaˇ noeˬ-awˇ maˬ caw ba nehˬ ni taˬ jawˇ.

⁸ Ehˇ kʼawꞈ, tsawˇ tsiˇ maˬ tsiˇ ni, aˬ yawꞈ kʼaˇ loˬ-eu myaˆ ni ngaˬ nehˬ paˇ nehˬ-awˬ.

⁹ Dziˇ dzoˆ ya byehˇ-eu aˇ kʼoꞈ pyeuꞈ-eu shiꞈ kʼoꞈ tiˬ kʼoꞈ keuˆ le-eu dawˬ peh peh laˇ-euˬ miˇ neh, aˬ yawꞈ-ahˇ tiˬ jeˬ paˬ maˬ ngaˬ maˬ paˇ nehˬ mawꞈ-eu nui ma taˬ bi jaˆ. Kʼoeˇ loꞈ-ehˇ gʼeh-eu maˬ tsaˬ maˬ dawˇ-eu nui noeˬ naw maꞈ laꞈ kʼoeˇ taˬ bi ahˇ. Naw maꞈ maˬ ngaˬ maˬ paˇ nehˬ ni jawˇ naˇ, naw maꞈ-euˬ gaˇ kawˆ Sahˬpaˬ Miˬyehˇ-ahˇ aˬ yawꞈ ngoeˇ haw nehˬ-awˇ, naw maꞈ kʼoeˇ taˆ iˬ baˇ jaˆ laˇ tehꞈ-a.

¹⁰ Tsawˇ tsiˇ maˬ tsiˇ ni, nui ma keuˆ-eu laꞈ kʼoeˇ aˬ yawꞈ-ahˇ biꞈ nehˬ-awˬ. Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, Sahˬpaˬ Miˬyehˇ naw maꞈ-ahˇ guiˬ lahˬ biꞈ laꞈ tehꞈ-a.

¹¹ Iˇsaˬleˬlaˆ tsawˇ haˬ laꞈ kʼoeˇ, iˇ shaˬ shaˬ-awˇ, loˬ-eu tsawˇ haˬ aˬ myah luꞈ jawˇ tehꞈ-a. Kʼoeˇ miˇ neh, kʼoeˇ loꞈ-ehˇ gʼeh-eu tsawˇ haˬ deuˬ-ahˇ tsawˇ tsiˇ maˬ tsiˇ ni caw ba-eu gʼaˇ duˬ, naw maꞈ-ahˇ ngaˇ dawˬ biꞈ-eu ma.

Zaˬ kʼaˆ-ahˇ pyehˬ nehˬ-eu

¹² “Naw maꞈ-euˬ tsawˇ jeuˬ Iˇsaˬleˬlaˆ tsawˇ haˬ kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, tiˬ gʼaˬ na, nawˬ-euˬ zaˬ kʼaˆ geuꞈ-eu gʼaˇ duˬ yawˬ haˇ yawˬ ha ahˬ dzaˬ naˇ, nawˬ-euˬ zaˬ kʼaˆ koꞈ kʼoꞈ geuꞈ gʼaˬ ngeh, aˬ yawꞈ-ahˇ ya pyehˬ nehˬ meh. Shiꞈ kʼoꞈ tiˬ kʼoꞈ keuˆ laˇ ngeh, aˬ yawꞈ-ahˇ pyehˬ nehˬ-awˇ ya bi gʼoꞈ-iˇ meh.

¹³ Aˬ yawꞈ-ahˇ nawˇ pyehˬ nehˬ ngeh, tiˬ jeˬ-iˬ maˬ biꞈ ni yawꞈ ngehꞈ-ehˇ maˬ ya bi doˆ-iˇ-a.

¹⁴ Sahˬpaˬ Miˬyehˇ neh nawˬ-ahˇ guiˬ lahˬ biꞈ laꞈ-euˬ deuˬ pyeuꞈ-eu yawˇ, dzaˬ la gʼo cehˇ hawˇ-eu, aˬ gaꞈ dzaˇ uiˇ deuˬ, tsawˇ tsiˇ maˬ tsiˇ ni aˬ yawꞈ-ahˇ ya biꞈ meh.

¹⁵ Iˇjiˇtuˆ miˇ kʼahˬ laꞈ kʼoeˇ nawˇ aˬ cawˬ-euˬ zaˬ kʼaˆ ya geuꞈ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ pyehˬ nehˬ laꞈ-euˬ gaˇ noeˬ keuˆ-awˬ. Kʼoeˇ baˬ da neh, naw maꞈ-ahˇ ngaˇ heu loꞈ-ehˇ dawˬ biꞈ-eu jeˬ pyeuꞈ-eu ma.

¹⁶ “Ehˇ kʼawꞈ, nawˬ-euˬ zaˬ kʼaˆ nawˬ-ahˇ maˬ gʼawˬ-iˇ mawꞈ-ehˇ, nawˇ hawˇ-eu nawˬ-euˬ miˬ sawˇ zaˬ deuˬ kʼoeˇ taˆ nui gaˬ ahˇ-eu laꞈ kʼoeˇ, nawˬ nehˬ-ehˇ jawˇ mawꞈ naˇ,

¹⁷ nawˬ-euˬ nymˇ gʼoˆ kʼehˬ-ahˇ aˬ yawꞈ-ahˇ sheuˬ gʼeh-awˇ, naˬ bawˇ naˬ tahˇ tahˇ nehˬ-awˇ, maˬ shiˇ tiˬ ziˇ nawˬ-eu zaˬ kʼaˆ bi geuꞈ-awˬ. Zaˬ miˬ zaˬ zaˬ kʼaˆ deuˬ-ahˇ kʼawꞈ, kʼoeˇ loꞈ-ehˇ jahˇ nehˬ-awˬ.

¹⁸ Nawˬ-euˬ zaˬ kʼaˆ -ahˇ nawˇ ya pyehˬ nehˬ ngeh, nui kʼahˇ maˬ shiˇ maˬ shiˇ-ehˇ taˬ gʼeh. Gʼaˬ mahˇ mahˇ dzaˬ-eu tsawˇ haˬ za-eu gʼaˬ gaˇ poeˬ tiˬ paˆ tehꞈ-ehˇ za-eu laꞈ kʼoeˇ, koꞈ kʼoꞈ keuˆ ni nawˬ-euˬ gaˇ aˬ yawꞈ mˇ nehˬ gʼaˬ-euˬ meh. Nawˇ kʼaˇ mˇ kʼaˇ shaˇ-eu jeˬ dawˬ tawˆ luꞈ laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ guiˬ lahˬ biꞈ nehˬ laꞈ tehꞈ-a.

Gʼaw beh beh-euˬ mawˇ neˇ hawˇ-eu yawˇ

¹⁹ “Gʼaw beh beh-euˬ mawˇ neˇ mawˇ gaw zaˬ hawˇ-eu yawˇ aˬ buˬ zaˬ dawˬ tawˆ luꞈ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ tseˇ doˆ taˬ-awˬ. Jeˬ zaˬ kʼoeˇ deuˬ-ahˇ maˬ ya kʼehˇ dzaˬ-a. Caꞈ hm kʼawꞈ, maˬ ya tehˬ geuꞈ-a.

²⁰ Aˬ yawꞈ kʼoꞈ yawꞈ uˬ duˬ tahˬ-eu jawˇ duˬ-ahˇ Sahˬpaˬ Miˬyehˇ-euˬ mehˬ shi, nawˇ hawˇ-eu nawˬ-euˬ miˬ sawˇ zaˬ deuˬ jeˬ zaˬ kʼoeˇ deuˬ-euˬ shaˬ jiˇ ya dzaˬ meh.

²¹ Ehˇ kʼawꞈ, kuiˇ kuˆ laꞈ kuˆ kuˆ-eu maˬ ehˇ, myaˆ behꞈ behꞈ-euˬ maˬ ehˇ, maˇ byawꞈ maˇ naˇ baw-eu maˬ ehˇ, jeˬ zaˬ kʼoeˇ deuˬ laꞈ kʼoeˇ pyeuꞈ doˆ laˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, jeˬ zaˬ kʼoeˇ deuˬ nawˇ maˬ lawˇ nehˬ kʼmˬ-a.

²² Kʼoeˇ loꞈ-ehˇ gʼeh-eu jeˬ zaˬ-euˬ shaˬ jiˇ-ahˇ, nawˬ-euˬ nymˇ laꞈ kʼoeˇ dzaˬ nya meh. Kʼaˬ tsehˆ hawˇ-eu ciˇ haˬ shaˬ jiˇ naw maꞈ dzaˬ-eu loꞈ-ehˇ, shawˇ-eu tsawˇ haˬ maˬ ehˇ, maˬ shawˇ-eu tsawˇ haˬ maˬ ehˇ, aˬ geu gʼaˬ maˬ kaˬ, jeˬ zaˬ kʼoeˇ-euˬ shaˬ jiˇ dzaˬ nya meh.

²³ Ehˇ kʼawꞈ, jeˬ zaˬ kʼoeˇ-euˬ shiˬ maˬ dzaˬ ni, iˇ cuꞈ shehˆ dzeh-eu loꞈ-ehˇ, miˇ tsa ya shehˆ dzeh meh.