Dawˬmehˬ 12 - Akha

Uˬ duˬ tahˬ-eu jawˇ duˬ tiˬ tsahˇ tehꞈ-ehˇ bi baw-awˬ

¹ “Heu-aˬ, naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ kʼoeˇ kʼahˬ laꞈ kʼoeˇ kʼaˇ jawˇ kʼoeˇ keuˆ ni, naw maꞈ ya caw teh-eu zahˇ sahˇ kʼoꞈ deuˬ meh. Zahˇ dawˬ kʼoꞈ dawˬ heu deuˬ-ahˇ naˇ haˬ sheˇ.

² Naw maꞈ jawˇ leˇ-eu miˇ kʼahˬ laꞈ kʼoeˇ, kʼoeˇ gaˇ jawˇ-eu tsawˇ haˬ deuˬ aˬ yawꞈ maꞈ-euˬ miˬ yehˇ deuˬ-ahˇ uˬ duˬ tahˬ-euˬ jawˇ duˬ pyeuꞈ-eu gawˬ jawˬ yaw goˇ-ahˇ maˬ ehˇ, gawˬ duˇ pu lu-ahˇ maˬ ehˇ, nyoeˇ jawꞈ ni gʼeh-eu aˇ bawˇ dawˬ pehˬ-ahˇ maˬ ehˇ, kʼaˇ jaˆ-eu uˬ duˬ tahˬ-eu jawˇ duˬ-ahˇ naw maꞈ laˆ cawˆ nehˬ jiˇ-awˬ.

³ Aˬ yawꞈ maꞈ-euˬ lawˇ duˬ deh pyaˆ-awˇ, aˬ yawꞈ maꞈ-euˬ muiˬ-eu shawˇ-eu kʼawˇ zeuˇ deuˬ laˆ meuˇ laˆ loeˇ nehˬ jiˇ-awˬ. Aˬ yawꞈ maꞈ-euˬ Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ-ahˇ miˬ dzaˬ dzah puiˆ-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ deuˆ coˬ dzeh-awˬ. Jawˇ duˬ kʼoeˇ deuˬ-ahˇ tiˬ jawˇ-iˬ uˬ duˬ maˬ paˇ ya tahˬ ni laˆ piˬ laˆ byoˆ nehˬ-awˬ.

⁴ “Tsawˇ haˬ kʼoeˇ deuˬ aˬ yawꞈ maꞈ-euˬ miˬ yehˇ deuˬ-ahˇ uˬ duˬ tahˬ gaˇ dzaw geuꞈ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ uˬ duˬ taˬ tahˬ.

⁵ Naw maꞈ tsawˇ jeuˬ heu myaˆ ni gʼeh-eu miˇ kʼahˬ laꞈ kʼoeˇ, aˬ yawꞈ-euˬ mehˬ shi naw maꞈ le-awˇ, aˬ yawꞈ-ahˇ uˬ duˬ ya tahˬ-eu jawˇ duˬ tiˬ tsahˇ Sahˬpaˬ Miˬyehˇ tseˇ doˆ tehꞈ-a.

⁶ Miˬ dzaˬ dzah puiˆ-awˇ lawˇ-eu jeˬ hawˇ-eu, nui deuˬ lawˇ-eu jeˬ maˬ ehˇ, tseˇ bymˇ tiˬ bymˇ hawˇ-eu nui deuˬ damˬ-eu jeˬ maˬ ehˇ, gʼaw beh beh-euˬ mawˇ neˇ hawˇ-eu yawˇ maˬ ehˇ, kʼoeˇ gaˇ naw maꞈ ya lawˇ meh.

⁷ Kʼoeˇ gaˇ, naw maꞈ-ahˇ guiˬ lahˬ biꞈ-eu gʼaˬ pyeuꞈ-eu naw maꞈ-euˬ Sahˬpaˬ Miˬyehˇ mehˬ shi, naw maꞈ hawˇ-eu naw maꞈ-euˬ miˬ sawˇ zaˬ deuˬ dzaˬ-awˇ dawˇ-awˇ, naw maꞈ neh mˇ-euˬ yaw muiˬ jeˬ gʼaˇ duˬ laˬ kʼaˬ ya cehˇ meh.

⁸ “Aˇ yamˬ kʼoeˇ yamˬ keuˆ laˇ ngeh, iˬ nah naw maꞈ mˇ luꞈ-eu loꞈ-ehˇ maˬ ya mˇ-a. Iˬ nah keuˆ ni, yawˬ ha uˬ duˬ kʼaˇ tahˬ mawꞈ-eu loꞈ-ehˇ naw maꞈ tahˬ luꞈ-eu meh.

⁹ Aˬ jeˬ miˇ neh ehˇ naˇ, naw maꞈ-euˬ Sahˬpaˬ Miˬyehˇ neh naw maꞈ-ahˇ biꞈ-euˬ, nui ma saˇ lehˆ ni ya jawˇ-eu miˇ kʼahˬ kʼoeˇ kʼahˬ-ahˇ naw maꞈ maˬ jawˇ keuˆ leˇ-aˬ si.

¹⁰ Yawˇdaˬ lawˇ baˬ tsehˆ doˆ ngeh, Sahˬpaˬ Miˬyehˇ naw maꞈ-ahˇ miˇ kʼahˬ kʼoeˇ kʼahˬ biꞈ laꞈ-awˇ, bi jawˇ laꞈ tehꞈ-a. Naw maꞈ-ahˇ muiˇ-eu deuˬ dawˬ tawˆ luꞈ-euˬ baꞈ tsahˬ laꞈ kʼoeˇ, aˬ yawꞈ naw maꞈ-ahˇ haw piˇ-awˇ, naw maꞈ nui ma saˇ lehˆ ni ya jawˇ tehꞈ-a.

¹¹ Aˬ yawꞈ-ahˇ uˬ duˬ ya tahˬ-eu jawˇ duˬ tiˬ tsahˇ aˬ yawꞈ tseˇ doˆ-awˇ, kʼoeˇ gaˇ aˬ yawꞈ-ahˇ naw maꞈ uˬ duˬ ya tahˬ tehꞈ-a. Ngaˇ naw maꞈ-ahˇ dawˬ biꞈ taˬ-euˬ loꞈ-ehˇ, naw maꞈ-euˬ miˬ dzaˬ dzah puiˆ-awˇ lawˇ-eu jeˬ maˬ ehˇ, nui jeˬ lawˇ-eu jeˬ maˬ ehˇ, tseˇ bymˇ tiˬ bymˇ hawˇ-eu naw maꞈ neh damˬ-euˬ jeˬ maˬ ehˇ, naw maꞈ neh Sahˬpaˬ Miˬyehˇ-ahˇ saˇ jaˇ dzaˬ taˬ-euˬ yaw zawˇ muiˬ-eu laꞈ sawˬ deuˬ maˬ ehˇ, dawˬ tawˆ luꞈ kʼoeˇ gaˇ aˬ yawꞈ-ahˇ ya yuˇ gʼeh nehˬ meh.

¹² Naw maꞈ-euˬ zaˬ deuˬ, naw maꞈ-euˬ zaˬ kʼaˆ deuˬ hawˇ-eu, naw maꞈ-euˬ meuˬ deuˬ-ahˇ jawˇ-eu Leˬbiˇ tsawˇ haˬ deuˬ nehˬ-ehˇ tiˬ kawˆ loꞈ-ehˇ, kʼoeˇ gaˇ Sahˬpaˬ Miˬyehˇ-euˬ mehˬ shi laˬ kʼaˬ cehˇ-awˬ. Leˬbiˇ tsawˇ haˬ deuˬ miˇ kʼahˬ maˬ baw-eu gaˇ noeˬ keuˆ-awˬ.

¹³ Lawˇ-eu shehˇ-eu jeˬ-ahˇ naw maꞈ kʼaˇ mˇ mawꞈ gaˇ maˬ ya mˇ-a.

¹⁴ Naw maꞈ tsawˇ jeuˬ tiˬ jeuˬ-euˬ miˇ kʼahˬ laꞈ kʼoeˇ Sahˬpaˬ Miˬyehˇ neh tseˇ doˆ-euˬ jawˇ duˬ-ahˇ tehꞈ-ehˇ ya lawˇ ya shehˇ meh. Miˬ dzaˬ dzah puiˆ-awˇ lawˇ-eu jeˬ lawˇ-eu hawˇ-eu ngaˬ neh dawˬ kʼaˇ biꞈ taˬ-eu jeˬ dawˬ tawˆ luꞈ-ahˇ, jawˇ duˬ kʼoeˇ tsahˇ laꞈ kʼoeˇ tehꞈ-ehˇ naw maꞈ ya mˇ meh.

¹⁵ “Ehˇ kʼawꞈ, naw maꞈ kʼaˇ jawˇ-eu jawˇ duˬ-ahˇ, naw maꞈ-euˬ jeˬ zaˬ sehꞈ-awˇ dzaˬ nya meh. Shawˇ-eu tsawˇ haˬ maˬ ehˇ, maˬ shawˇ-eu tsawˇ haˬ maˬ ehˇ, ciˇ haˬ hawˇ-eu kʼaˬ tsehˆ-euˬ shaˬ jiˇ dzaˬ nya-eu loꞈ-ehˇ, jeˬ zaˬ kʼoeˇ deuˬ-euˬ shaˬ jiˇ dzaˬ nya meh.

¹⁶ Ehˇ kʼawꞈ, jeˬ zaˬ kʼoeˇ deuˬ-euˬ shiˬ naw maꞈ maˬ dzaˬ ni, iˇ cuꞈ shehˆ dzeh-eu loꞈ-ehˇ miˇ tsaˬ-ahˇ ya shehˆ dzeh meh.

¹⁷ Sahˬpaˬ Miˬyehˇ-ahˇ lawˇ nehˬ-eu jeˬ pyeuꞈ-eu tseˇ bymˇ tiˬ bymˇ damˬ-euˬ dzaˬ lo gʼo cehˇ deuˬ, aˬ gaꞈ dzaˇ uiˇ, saˬ loˬ tsiˇ, gʼaw beh beh-euˬ mawˇ neˇ hawˇ-eu yawˇ, Sahˬpaˬ Miˬyehˇ-ahˇ biꞈ ma lehˇ naw maꞈ neh saˇ jaˇ dzaˬ taˬ-eu laꞈ sawˬ deuˬ, nui ma keuˆ-awˇ lawˇ-eu jeˬ hawˇ-eu nui jeˬ lawˇ-eu jeˬ heu deuˬ-ahˇ, naw maꞈ-euˬ jawˇ duˬ laꞈ kʼoeˇ maˬ ya dzaˬ-a.

¹⁸ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh tseˇ doˆ-euˬ uˬ duˬ tahˬ-eu jawˇ duˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi tehꞈ-ehˇ, naw maꞈ-euˬ zaˬ kʼaˆ deuˬ hawˇ-eu naw maꞈ-euˬ meuˬ-ahˇ jawˇ-eu Leˬbiˇ tsawˇ haˬ deuˬ nehˬ-ehˇ, naw maꞈ hawˇ-eu naw maꞈ-euˬ zaˬ deuˬ lawˇ dzaˇ kʼoeˇ deuˬ-ahˇ dzaˬ nya meh. Kʼoeˇ gaˇ, naw maꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ laꞈ kʼoeˇ naw maꞈ laˬ kʼaˬ cehˇ-awˬ.

¹⁹ Naw maꞈ-euˬ miˇ kʼahˬ laꞈ kʼoeˇ naw maꞈ kʼaˇ jawˇ kʼoeˇ keuˆ ni, Leˬbiˇ tsawˇ haˬ deuˬ-ahˇ naw maꞈ maˬ ya byehˇ dzeh ni yahˇ-awˬ.

²⁰ “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-eu loꞈ-ehˇ, naw maꞈ-euˬ miˇ kʼahˬ-ahˇ aˬ yawꞈ bi huiˬ bi jeˇ laˇ ngeh, naw maꞈ kʼaˇ dzaˬ mawꞈ-eu yamˬ-ahˇ shaˬ jiˇ dzaˬ nya tehꞈ-a.

²¹ Uˬ duˬ tahˬ-eu jawˇ duˬ kʼoeˇ aˇ dzehˬ-ehˇ kaˬ gaˇ jaˆ naˇ, ngaˬ neh naw maꞈ-ahˇ ehˇ nehˬ taˬ-euˬ loꞈ-ehˇ, Sahˬpaˬ Miˬyehˇ neh naw maꞈ-ahˇ biꞈ taˬ-euˬ mawˇ neˇ maˬ ehˇ, yawˇ maˬ ehˇ, sehꞈ-awˇ, naw maꞈ-euˬ nymˇ laꞈ kʼoeˇ dzaˬ nya tehꞈ-a.

²² Ciˇ haˬ hawˇ-eu kʼaˬ tsehˆ-euˬ shaˬ jiˇ dzaˬ nya-eu loꞈ-ehˇ, shawˇ-eu tsawˇ haˬ maˬ ehˇ, maˬ shawˇ-eu tsawˇ haˬ maˬ ehˇ, jeˬ zaˬ-euˬ shaˬ jiˇ kʼoeˇ dzaˬ nya tehꞈ-a.

²³ Shiˬ maˬ dzeˇ-iˇ-euˬ shaˬ jiˇ taˬ dzaˬ. Aˬ jeˬ miˇ neh ehˇ naˇ, shiˬ laꞈ kʼoeˇ saꞈ laˇ ahˇ-awˇ, saꞈ laˇ ahˇ-eu shaˬ jiˇ naw maꞈ maˬ dzaˬ kʼmˬ-a.

²⁴ Shiˬ maˬ dzaˬ ni, iˇ cuꞈ shehˆ dzeh-eu loꞈ-ehˇ miˇ tsa shehˆ dzeh-awˬ.

²⁵ Zahˇ dawˬ kʼoꞈ dawˬ heu dawˬ-ahˇ naw maꞈ naˇ haˬ geuꞈ naˇ, Sahˬpaˬ Miˬyehˇ nui ma tsaˬ-awˇ, naw maꞈ hawˇ-eu naw maꞈ-euˬ zaˬ deuˬ yaw muiˬ paˬ-ehˇ ya dehꞈ dzaˬ tehꞈ-a.

²⁶ Naw maꞈ-euˬ lawˇ-eu jeˬ hawˇ-eu naw maꞈ neh Sahˬpaˬ Miˬyehˇ-ahˇ biꞈ ma lehˇ saˇ jaˇ dzaˬ taˬ-euˬ laꞈ sawˬ deuˬ-ahˇ, uˬ duˬ tahˬ-eu jawˇ duˬ kʼoeˇ tsahˇ-ahˇ yuˇ gʼeh-awˬ.

²⁷ Mawˇ lah-ehˇ miˬ dzaˬ-ahˇ dzah puiˆ-awˇ Sahˬpaˬ Miˬyehˇ-euˬ lawˇ duˬ kʼoeˇ taˆ ya lawˇ-eu lawˇ-eu jeˬ-ahˇ, kʼoeˇ gaˇ lawˇ-awˬ. Shaˬ jiˇ deuˬ naw maꞈ dzaˬ-awˇ shiˬ deuˬ-ahˇ lawˇ duˬ kʼoeˇ taˆ shehˆ daˆ-awˇ ya lawˇ-eu jeˬ kʼawꞈ, kʼoeˇ gaˇ lawˇ-awˬ.

²⁸ Naw maꞈ hawˇ-eu naw maꞈ-euˬ zaˬ deuˬ uˆ deuˬ ehˇ kʼaˇ maˬ za ni yaw muiˬ paˬ-ehˇ ya dehꞈ dzaˬ-eu gʼaˇ duˬ, ngaˬ neh naw maꞈ-ahˇ dawˬ kʼaˇ biꞈ-euˬ yawˬ jeˬ na luꞈ-ahˇ yaw muiˬ paˬ-ehˇ naˇ haˬ geuꞈ-awˬ. Aˬ jeˬ miˇ neh ehˇ naˇ, yaw tsaˬ yaw dawˇ jeˬ hawˇ-eu, Sahˬpaˬ Miˬyehˇ nui ma tsaˬ-eu jeˬ-ahˇ naw maꞈ ya mˇ-eu meh.

Miˬyehˇ nui gʼaˬ-ahˇ uˬ duˬ taˬ tahˬ

²⁹ “Tsawˇ jeuˬ kʼoeˇ deuˬ-euˬ miˇ kʼahˬ-ahˇ naw maꞈ le uˇ gʼeh-eu nehˬ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ maꞈ-ahˇ laˆ luˬ laˆ seˇ nehˬ-awˇ, miˇ kʼahˬ kʼoeˇ kʼahˬ laꞈ kʼoeˇ naw maꞈ ya jawˇ tehꞈ-a.

³⁰ Tsawˇ jeuˬ kʼoeˇ deuˬ-ahˇ Sahˬpaˬ Miˬyehˇ laˆ cawˆ gʼaˬ ngeh, aˬ yawꞈ maꞈ-euˬ uˬ duˬ tahˬ-eu zahˇ sahˇ kʼoꞈ deuˬ-ahˇ naw maꞈ maˬ ya caw teh ni yahˇ-awˬ. Aˬ jeˬ miˇ neh ehˇ naˇ, kʼoeˇ-aˬ, naw maꞈ bi shiˇ-eu gʼaˇ duˬ lahˇ ju kʼmˇ gaˇ duˇ-eu meh. Aˬ yawꞈ maꞈ uˬ duˬ tahˬ ngeh mˇ-eu loꞈ-ehˇ, naw maꞈ kʼawꞈ mˇ-eu lehˇ, aˬ yawꞈ maꞈ-euˬ miˬ yehˇ deuˬ-ahˇ aˬ yawꞈ maꞈ aˬ joˆ-ehˇ uˬ duˬ tahˬ-eu gaˇ kawˆ-ahˇ naw maꞈ pyehˆ tseˇ-eu laꞈ kʼoeˇ maˬ ya dzaw geuꞈ-a.

³¹ Aˬ yawꞈ maꞈ-euˬ miˬ yehˇ deuˬ-ahˇ aˬ yawꞈ maꞈ uˬ duˬ tahˬ gaˇ dzaw geuꞈ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ uˬ duˬ taˬ tahˬ. Aˬ jeˬ miˇ neh ehˇ naˇ, aˬ yawꞈ maꞈ-euˬ miˬ yehˇ deuˬ-ahˇ aˬ yawꞈ maꞈ uˬ duˬ tahˬ ngeh, Sahˬpaˬ Miˬyehˇ maˬ haw nahˇ-eu nui daˆ daˆ laˇ paˬ-ehˇ gʼeh-eu jeˬ aˬ yawꞈ maꞈ mˇ-eu meh. Aˬ yawꞈ maꞈ-euˬ zaˬ deuˬ-ahˇ lawˇ duˬ kʼoeˇ taˆ miˬ dzaˬ-ahˇ dzah puiˆ-awˇ lawˇ-eu jeˬ kʼawꞈ, aˬ yawꞈ maꞈ mˇ-eu meh.

³² “Ngaˬ neh dawˬ kʼaˇ biꞈ taˬ-euˬ yawˬ jeˬ na luꞈ-ahˇ naw maꞈ mˇ-awˬ. Dawˬ tiˬ dawˬ tehꞈ-ehˇ kʼawꞈ, dawˆ lahˬ-eu maˬ ehˇ, yuˇ teˬ-eu maˬ ehˇ, maˬ ya jahˇ-a.