Dawˬmehˬ 10 - Akha

Zahˇ dawˬ kʼoꞈ dawˬ boꞈ poˆ-euˬ

¹ “Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. ‘Yaw beh poˆ-ahˇ duˇ-eu kʼaˬ lo teˇ byaꞈ nyiˬ byaꞈ taꞈ-awˇ, kʼaˬ lo teˇ byaꞈ kʼoeˇ dawˆ ahˇ-eu gʼaˇ duˬ daˇ kawˬ bahˬ keuˆ tiˬ keuˆ taꞈ-awˇ, gawˬ jawˬ-ahˇ ngaˇ jawˇ gaˇ daˆ laˇ-awˬ.

² Nawˬ neh ka paˆ dzeh-euˬ kʼaˬ lo teˇ byaꞈ kʼoeˇ nyiˬ byaꞈ kʼoeˇ taˆ kʼaˇ boꞈ-euˬ loꞈ-ehˇ, heu nyiˬ byaꞈ kʼoeˇ taˆ ngaˇ paˇ boꞈ poˆ ma. Kʼoeˇ naˇ, kʼaˬ lo teˇ byaꞈ heu nyiˬ byaꞈ-ahˇ bahˬ keuˆ laꞈ kʼoeˇ dawˆ ahˇ taˬ-awˬ’ lehˇ ehˇ-eu meh.

³ “Kʼoeˇ naˇ, aˬ kaˬ shaˇ daˇ kawˬ neh bahˬ keuˆ tiˬ keuˆ ngaˇ taꞈ-awˇ, yaw beh poˆ-ahˇ duˇ-eu kʼaˬ lo teˇ byaꞈ nyiˬ byaꞈ taꞈ-awˇ, gawˬ jawˬ kʼoeˇ taˆ baꞈ daˆ leꞈ-euˬ ma.

⁴ Kʼoeˇ ngeh, yaw beh poˆ boꞈ-euˬ dawˬ deuˬ pyeuꞈ-eu, gawˬ jawˬ dawˬ peh naw maꞈ uiˬ leˇ-awˇ jawˇ ngeh nah, miˬ dzaˬ laꞈ kʼoeˇ Sahˬpaˬ Miˬyehˇ naw maꞈ-ahˇ dawˬ ngehˬ cawˬ ngeh nah biꞈ laꞈ-euˬ Zahˇ dawˬ kʼoꞈ dawˬ kʼoeˇ Tseˇ dawˬ, kʼaˬ lo teˇ byaꞈ kʼoeˇ taˆ aˬ yawꞈ paˇ boꞈ poˆ-awˇ, kʼaˬ lo teˇ byaꞈ kʼoeˇ nyiˬ byaꞈ aˬ yawˬ ngaˬ-ahˇ biꞈ laꞈ-euˬ meh.

⁵ Kʼoeˇ naˇ, gawˬ jawˬ dawˬ dahˬ-ahˇ ngaˇ paˇ gʼoꞈ ka le-euˬ ma. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, kʼaˬ lo teˇ byaꞈ kʼoeˇ nyiˬ byaꞈ bahˬ keuˆ laꞈ kʼoeˇ ngaˇ dawˆ ahˇ taˬ-euˬ ma. Kʼaˬ lo teˇ byaꞈ kʼoeˇ nyiˬ byaꞈ, iˬ nah keuˆ ni kʼoeˇ gaˇ ahˇ-eu meh.”

⁶ (Iˇsaˬleˬlaˆ tsawˇ haˬ deuˬ-aˬ, Yaˬkaˬ tsawˇ jeuˬ-euˬ lah duˬ deuˬ jaˆ gaˇ neh doˆ-iˇ-awˇ, Moˇseˬlahˬ lehˇ kuˇ-eu jawˇ duˬ-ahˇ le-euˬ meh. Kʼoeˇ gaˇ Aˬloˬ shiˇ-awˇ, baꞈ pahˬ nehˬ yaꞈ-euˬ meh. Aˬ yawꞈ-euˬ dah zaˇ, aˬ yawꞈ-euˬ aˬ li Eˇlaˬzaˬ piˇ ma geuꞈ-euˬ meh.

⁷ Kʼoeˇ gaˇ neh naˇ, Guˇgoˇdaˬ-ahˇ aˬ yawꞈ maꞈ le-euˬ meh. Kʼoeˇ gaˇ neh naˇ, iˇ cuꞈ jaˆ myaˬ-eu Yoˇbaˬdaˬ-ahˇ le-euˬ meh.

⁸ Kʼoeˇ ngeh, Dawˬ ma saˇ jaˇ Bahˬ keuˆ-ahˇ haw-eu pyaˆ-eu gʼaˇ duˬ maˬ ehˇ, piˇ ma geuꞈ-eu gʼaˇ duˬ maˬ ehˇ, Sahˬpaˬ Miˬyehˇ-euˬ tsawˇ myahˇ laꞈ kʼoeˇ aˬ cawˬ-ahˇ dawˬ ngehˬ gʼeh nehˬ-eu gʼaˇ duˬ maˬ ehˇ, Leˬbiˇ tsawˇ jeuˬ-ahˇ Sahˬpaˬ Miˬyehˇ tseˇ doˆ-euˬ meh. Iˬ nah keuˆ ni gaˇ heu deuˬ aˬ yawꞈ maꞈ tawˬ luꞈ-eu meh.

⁹ Kʼoeˇ miˇ neh, Leˬbiˇ tsawˇ jeuˬ-aˬ, Iˇsaˬleˬlaˆ tsawˇ jeuˬ nui deuˬ loꞈ-ehˇ miˇ kʼahˬ maˬ za-a. Aˬ yawꞈ maꞈ za-euˬ jeˬ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, Sahˬpaˬ Miˬyehˇ gʼaˇ duˬ piˇ ma geuꞈ-eu kʼoeˇ meh.)

¹⁰ “Yaw beh poˆ loꞈ-ehˇ, gawˬ jawˬ kʼoeˇ taˆ oeˬ tseˇ nah oeˬ tseˇ miˇ ngaˇ jawˇ-euˬ ma. Ngaˬ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, naw maꞈ-ahˇ maˬ laˆ luˬ maˬ laˆ seˇ-eu gʼaˇ duˬ nui ma tsaˬ-euˬ meh.

¹¹ Kʼoeˇ naˇ, naw maꞈ-euˬ aˬ poeˬ aˬ bawˇ deuˬ-ahˇ biꞈ ma lehˇ aˬ yawꞈ neh saˇ jaˇ dzaˬ taˬ-euˬ miˇ kʼahˬ-ahˇ naw maꞈ za nya ni, naw maꞈ-ahˇ sheuˬ gʼeh-awˬ lehˇ aˬ yawꞈ ngaˬ-ahˇ ehˇ-eu meh.

Sahˬpaˬ Miˬyehˇ-ahˇ guˆ-awˬ

¹² “Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ neh naw maꞈ-ahˇ bi mˇ-euˬ jeˬ-ahˇ naˇ haˬ geuꞈ-awˇ mˇ-awˬ. Sahˬpaˬ Miˬyehˇ-ahˇ uˬ duˬ tahˬ-awˇ, aˬ yawꞈ neh dawˬ kʼaˇ biꞈ taˬ-euˬ jeˬ mˇ-awˬ. Aˬ yawꞈ-ahˇ gaˬ-awˇ, naw maꞈ-euˬ nui ma dawˬ tawˆ luꞈ aˬ yawꞈ-euˬ gaˇ mˇ-awˬ.

¹³ Naw maꞈ gʼaˇ duˬ muiˬ ni, iˬ nah ngaˇ naw maꞈ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ.

¹⁴ Goˇ dui dui-eu mˬ deuˬ maˬ ehˇ, miˇ tsaˬ maˬ ehˇ, miˇ tsaˬ kʼoeˇ taˆ kʼaˇ jaˆ-eu yawˬ jeˬ na luꞈ maˬ ehˇ, Sahˬpaˬ Miˬyehˇ-euˬ pyeuꞈ-eu meh.

¹⁵ Ehˇ kʼawꞈ, naw maꞈ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ gaˬ dui dui-eu miˇ neh, tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ aˬ yawꞈ tseˇ doˆ-euˬ meh. Naw maꞈ-aˬ, iˬ nah keuˆ ni aˬ yawꞈ neh tseˇ doˆ-euˬ tsawˇ haˬ pyeuꞈ luꞈ-eu meh.

¹⁶ Kʼoeˇ miˇ neh, nymˬ-mˇ neh aˇ dahˬ beh-awˇ, nui ma maˬ gʼahˇ ni Sahˬpaˬ Miˬyehˇ-euˬ ehˇ dawˬ naˇ haˬ geuꞈ-awˬ.

¹⁷ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, miˬ yehˇ dawˬ tawˆ luꞈ hawˇ-eu baoˬ dawˬ tawˆ luꞈ kʼoeˇ taˆ huiˬ dzehˬ-eu meh. Aˬ yawꞈ-aˬ, baoˬ huiˬ dui dui -awˇ, guˆ laˇ paˬ-ehˇ gʼeh-eu meh. Aˬ yawꞈ-aˬ, myaˆ pyawˬ huiˬ nyiˇ maˬ tseˇ-ehˇ, laꞈ nmꞈ nmꞈ-eu jeˬ-ahˇ kʼawꞈ, maˬ ha geuꞈ-a.

¹⁸ Muˇ coe aˬ nmˇ hawˇ-eu miˬ coeˬ miˬ ma deuˬ-ahˇ aˬ yawꞈ haw piˇ-eu meh. Aˬ dui nehˬ-ehˇ jawˇ luꞈ-eu boeˇ miˬ siˬ kʼaˬ deuˬ-ahˇ aˬ yawꞈ gaˬ-awˇ, dzaˬ dzaˬ dawˇ dawˇ hawˇ-eu dm gʼaˬ dm lmˇ biꞈ-eu meh.

¹⁹ Kʼoeˇ miˇ neh, boeˇ miˬ siˬ kʼaˬ deuˬ-ahˇ gaˬ-awˬ. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ, naw maꞈ boeˇ miˬ siˬ kʼaˬ pyeuꞈ haw-euˬ meh.

²⁰ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ naˇ haˬ geuꞈ-awˇ, aˬ yawꞈ-ahˇ tehꞈ-ehˇ uˬ duˬ tahˬ-awˬ. Aˬ yawꞈ-ahˇ saˇ jaˇ ziꞈ-awˇ, aˬ yawꞈ-euˬ tsawˇ myahˇ laꞈ kʼoeˇ tehꞈ-ehˇ saˇ jaˇ dzaˬ-awˬ.

²¹ Aˬ yawꞈ-ahˇ ja ceuˬ-awˬ. Aˬ yawꞈ-aˬ, naw maꞈ-euˬ Miˬyehˇ pyeuꞈ-awˇ, naw maꞈ gʼaˇ duˬ aˬ yawꞈ neh mˇ-euˬ huiˬ dui dui-awˇ zahˬ leˇ paˬ-ehˇ gʼeh-eu jeˬ-ahˇ, naw maꞈ-euˬ myaˆ nuiˆ neh ya mawˇ duˬ gʼaˬ-euˬ meh.

²² Naw maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ-ahˇ jawˇ-iˇ ngeh, shiꞈ tseˇ gʼaˬ byah-eu tehꞈ meh. Ehˇ kʼawꞈ, mˬ-ahˇ tsehˬ-eu aˬ guiˇ deuˬ loꞈ-ehˇ iˬ nah naw maꞈ myaˬ laˇ behˇ laˇ ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jahˇ-euˬ meh.