Bawˇtsahˬ 6 - Akha

Naˬzaˬliˇ saˇ jaˇ dzaˬ-eu zahˇ sahˇ kʼoꞈ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

² Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ mehˬ nehˬ tsoˆ nehˬ-awˬ. Kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, tsawˇ haˬ tiˬ gʼaˬ na Naˬzaˬliˇ tsawˇ haˬ pyeuꞈ laˇ-eu gʼaˇ duˬ saˇ jaˇ dzaˬ-awˇ, yawˬ ha-euˬ gʼawˇ mawˇ Sahˬpaˬ Miˬyehˇ-ahˇ a nehˬ naˇ,

³ aˬ gaꞈ dzaˇ uiˇ hawˇ-eu bi yehꞈ laˇ nya-eu jeˬ maˬ ya dawˇ-a. Aˬ gaꞈ aˇ siˬ neh jahˇ-euˬ dzaˇ uiˇ aˬ geu jeˬ maˬ kaˬ maˬ ya dawˇ-a. Aˬ gaꞈ aˇ siˬ yaw jmˬ hawˇ-eu lawꞈ koˆ taˬ-euˬ aˬ gaꞈ aˇ siˬ kʼawꞈ maˬ ya dzaˬ-a.

⁴ Aˬ yawꞈ Naˬzaˬliˇ tsawˇ haˬ kʼaˇ pyeuꞈ kʼoeˇ keuˆ ni, aˬ gaꞈ baw duˆ-ahˇ neh kʼaˇ doˆ le-euˬ jeˬ maˬ ya dzaˬ-a. Aˬ gaꞈ aˇ nuiˆ hawˇ-eu aˬ gaꞈ aˇ siˬ baˆ kʼoˆ tehꞈ-ehˇ kʼawꞈ maˬ ya dzaˬ-a.

⁵ Naˬzaˬliˇ saˇ jaˇ uˬ moˆ jawˇ luꞈ-eu aˇ nah aˇ yamˬ laꞈ kʼoeˇ, uˬ duˬ tsehˇ kahˇ maˬ ya tehˬ-a. Aˇ nah aˇ yamˬ kʼoeˇ tiˬ byah ni saˇ jaˇ dzaˬ-awˇ Sahˬpaˬ Miˬyehˇ-ahˇ aˬ yawꞈ-euˬ gʼawˇ mawˇ a nehˬ taˬ-euˬ loꞈ-ehˇ, aˬ yawꞈ-euˬ uˬ duˬ tsehˇ kahˇ hawˇ-eu mehˬ mahˬ ya bi mahˇ le meh.

⁶ Aˬ yawꞈ-euˬ gʼawˇ mawˇ Sahˬpaˬ Miˬyehˇ-ahˇ a nehˬ taˬ-euˬ aˇ yamˬ kʼoeˇ-euˬ laꞈ kʼoeˇ, shiˇ taˬ-euˬ jeˬ dawˬ peh aˬ yawꞈ maˬ ya iˇ-a.

⁷ Aˬ yawꞈ-euˬ aˬ da, aˬ ma, mehˇ nmˇ hawˇ-eu dmˇ ma tsi tsi ni gʼeh-eu deuˬ shiˇ-euˬ gaˇ kʼawꞈ, maˬ ya iˇ-a. Kʼoeˇ loꞈ-ehˇ gʼeh gaˇ iˇ naˇ, yawˬ haˇ yawˬ ha maˬ shawˇ-ehˇ pyeuꞈ-iˇ ni mˇ gaˇ duˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ uˬ duˬ tsehˇ kahˇ-aˬ, aˬ yawꞈ-euˬ gʼawˇ mawˇ Miˬyehˇ-ahˇ a nehˬ taˬ-euˬ gaˇ kawˆ bi siˬ bi mawˇ-eu jeˬ pyeuꞈ-eu meh.

⁸ Aˬ yawꞈ Naˬzaˬliˇ tsawˇ haˬ kʼaˇ pyeuꞈ kʼoeˇ keuˆ ni, Sahˬpaˬ Miˬyehˇ-ahˇ a nehˬ taˬ-euˬ tsawˇ haˬ pyeuꞈ-eu meh.

⁹ Dawˬ peh jawˇ-eu tsawˇ haˬ tiˬ gʼaˬ na ja pyuˬ ni shiˇ-euˬ baˬ da neh, Naˬ zaˬliˇ tsawˇ haˬ-euˬ a nehˬ taˬ-euˬ uˬ duˬ tsehˇ kahˇ kʼoeˇ maˬ shawˇ-ehˇ pyeuꞈ-iˇ naˇ, shiꞈ nah dawˬ-awˇ, uˬ duˬ tsehˇ kahˇ hawˇ-eu mehˬ mahˬ ya jehˆ dzeh meh. Kʼoeˇ naˇ, aˬ yawꞈ shawˇ laˇ-eu meh.

¹⁰ Yehꞈ nah tiˬ nah-ahˇ, kʼaˬ kʼoeˬ nyiˬ mawˇ maˬ ngeuˇ naˇ kʼaˬ guˬ nyiˬ mawˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ piˇ ma jawˇ gaˇ aˬ yawꞈ ya yuˇ laꞈ meh.

¹¹ Iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ hawˇ-eu miˬ dzaˬ-ahˇ dzah puiˆ-awˇ lawˇ-eu jeˬ gʼaˇ duˬ tiˬ mawˇ, piˇ ma gʼaˬ lawˇ-awˇ, aˬ yawꞈ bi shawˇ laˇ-eu zahˇ ya jahˇ nehˬ meh. Kʼoeˇ ngeh nah laꞈ kʼoeˇ tsawˇ haˬ kʼoeˇ gʼaˬ aˬ yawꞈ-euˬ uˬ duˬ tsehˇ kahˇ paˇ ya a nehˬ meh.

¹² Kʼoeˇ naˇ, Naˬzaˬliˇ tsawˇ haˬ tiˬ gʼaˬ loꞈ-ehˇ, aˬ yawꞈ-euˬ aˇ nah aˇ yamˬ Sahˬpaˬ Miˬyehˇ-ahˇ paˇ ya a nehˬ meh. Aˬ jeˬ miˇ neh ehˇ naˇ, a nehˬ taˬ-euˬ aˬ yawꞈ-euˬ uˬ duˬ tsehˇ kahˇ maˬ shawˇ-ehˇ pyeuꞈ-iˇ-euˬ meh. Dziˇ dzoˆ tsoeˬ-eu lawˇ-eu jeˬ gʼaˇ duˬ, tiˬ myaˇ byah laˇ-euˬ yawˇ zaˬ tiˬ mawˇ aˬ yawꞈ ya tsahˇ laꞈ meh.

¹³ Naˬzaˬliˇ tsawˇ haˬ tiˬ gʼaˬ saˇ jaˇ mˇ byah gʼaˬ ngeh, heu loꞈ-ehˇ ya jahˇ meh. Sehˬ gʼawˆ-euˬ gʼoˆ kʼehˬ-ahˇ aˬ yawꞈ ya le meh.

¹⁴ Kʼoeˇ gaˇ, maˇ byawꞈ maˬ baw-eu jeˬ zaˬ smˬ mawˇ Sahˬpaˬ Miˬyehˇ jawˇ gaˇ aˬ yawꞈ ya tsahˇ laꞈ meh. Miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ, tiˬ myaˇ byah laˇ-euˬ yawˇ zaˬ aˬ buˬ tiˬ mawˇ, iˬ baˇ shawˇ-eu lawˇ-eu jeˬ lawˇ-eu gʼaˇ duˬ tiˬ myaˇ byah laˇ-euˬ yawˇ zaˬ a ma tiˬ mawˇ hawˇ-eu, cawˬ cawˬ taꞈ-eu lawˇ-eu jeˬ lawˇ-eu gʼaˇ duˬ yawˇ aˬ buˬ tiˬ mawˇ meh.

¹⁵ Cehˇ meu hawˇ-eu saˬ loˬ tsiˇ keuˬ-awˇ jahˇ taˬ-euˬ tuˇ jawˬ ni gʼeh-eu kaˬ muˇ hawˇ-eu saˬ loˬ tsiˇ lehꞈ taˬ-euˬ kaˬ muˇ aˇ yaˆ yaˆ zaˬ kʼa sa tiˬ sa ya lawˇ-eu uˬ taꞈ, loˬ-eu dzaˬ la gʼo cehˇ lawˇ-eu jeˬ hawˇ-eu aˬ gaꞈ dzaˇ uiˇ lawˇ-eu jeˬ heu deuˬ kʼawꞈ aˬ yawꞈ ya lawˇ meh.

¹⁶ Piˇ ma gʼaˬ heu deuˬ dawˬ tawˆ luꞈ Sahˬpaˬ Miˬyehˇ jawˇ gaˇ ya yuˇ gʼeh-awˇ, iˬ baˇ shawˇ-eu lawˇ-eu jeˬ hawˇ-eu miˬ dzaˬ dzah puiˆ-awˇ lawˇ-eu jeˬ ya lawˇ meh.

¹⁷ Yawˇ aˬ buˬ yuˇ-awˇ, kaˬ muˇ kʼa sa nehˬ-ehˇ tiˬ kawˆ loꞈ-ehˇ cawˬ cawˬ taꞈ-eu lawˇ-eu jeˬ ya lawˇ meh. Dzaˬ la gʼo cehˇ hawˇ-eu aˬ gaꞈ dzaˇ uiˇ kʼawꞈ, aˬ yawꞈ ya lawˇ meh.

¹⁸ Naˬzaˬliˇ tsawˇ haˬ kʼoeˇ gʼaˬ, Sehˬ gʼawˆ gʼoˆ kʼehˬ-ahˇ yawˬ ha-euˬ uˬ duˬ tsehˇ kahˇ ya jehˆ dzeh-awˇ, miˬ dzaˬ dzah puiˆ-awˇ lawˇ-eu cawˬ cawˬ taꞈ-eu lawˇ-eu jeˬ kʼoeˇ taˆ ya dawˆ puiˆ meh.

¹⁹ Yawˇ aˬ buˬ kʼoeˇ mawˇ-euˬ laꞈ byaˆ puꞈ jaꞈ gʼaˬ ngeh, kaˬ muˇ yaw tuˇ jeˬ tiˬ siˬ hawˇ-eu kaˬ muˇ aˇ yaˆ yaˆ zaˬ tiˬ yaˆ nehˬ-ehˇ, Naˬzaˬliˇ kʼoeˇ gʼaˬ-euˬ laꞈ kʼawˆ-ahˇ piˇ ma gʼaˬ ya dawˆ ahˇ nehˬ meh.

²⁰ Kʼoeˇ naˇ, piˇ ma gʼaˬ kʼoeˇ deuˬ paˇ yuˇ-awˇ, muiˬ-eu laꞈ sawˬ loꞈ-ehˇ Sahˬpaˬ Miˬyehˇ-ahˇ ya damˬ nehˬ meh. Kʼoeˇ deuˬ uˬ taꞈ, yawˇ aˬ buˬ kʼoeˇ mawˇ-euˬ kʼahˬ hawˇ-eu aˬ kuiˇ-aˬ, zahˇ dawˬ kʼoꞈ dawˬ jaˆ-euˬ loꞈ-ehˇ, piˇ ma gʼaˬ-euˬ shaˬ bymˇ pyeuꞈ-eu muiˬ-eu shawˇ-eu lawˇ-eu jeˬ meh. Kʼoeˇ loꞈ-ehˇ mˇ gʼaˬ ngeh, Naˬzaˬliˇ tsawˇ haˬ kʼoeˇ gʼaˬ aˬ gaꞈ dzaˇ uiˇ dawˇ nya meh.

²¹ Heu-aˬ, Naˬzaˬliˇ tsawˇ haˬ deuˬ ya mˇ ya shaˇ-eu zahˇ sahˇ kʼoꞈ meh. Ehˇ kʼawꞈ, Naˬzaˬliˇ tsawˇ haˬ tiˬ gʼaˬ na, aˬ yawꞈ saˇ jaˇ dzaˬ ngeh zahˇ sahˇ kʼoꞈ jaˆ-eu loꞈ-ehˇ ya lawˇ-eu naˆ maˬ tseˇ lawˇ dzehˬ ma lehˇ saˇ jaˇ dzaˬ taˬ-euˬ jaˆ naˇ, aˬ yawꞈ neh saˇ jaˇ kʼaˇ dzaˬ taˬ-euˬ loꞈ-ehˇ ya mˇ byah meh.

Piˇ ma deuˬ dawˬ ngehˬ gʼeh-eu

²² Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

²³ “Iˇsaˬleˬlaˆ tsawˇ haˬ deuˬ-ahˇ dawˬ ngehˬ gʼeh nehˬ ngeh, heu loꞈ-ehˇ ehˇ-awˬ lehˇ dawˬ biꞈ-euˬ meh.

²⁴ Sahˬpaˬ Miˬyehˇ naw maꞈ-ahˇ guiˬ lahˬ biꞈ-awˇ bo saˆ luꞈ-uˇ.

²⁵ Sahˬpaˬ Miˬyehˇ-euˬ myaˆ pyawˬ naw maꞈ kʼoeˇ taˆ yaw shehꞈ bi bya-awˇ, naw maꞈ-ahˇ gʼawˬ shaˬ gaˬ luꞈ-uˇ,

²⁶ Sahˬpaˬ Miˬyehˇ-euˬ myaˆ pyawˬ naw maꞈ jawˇ paw zeuˆ pyawˇ-awˇ, naw maꞈ-ahˇ nui saˇ oꞈ-eu jeˬ biꞈ luꞈ-uˇ.”

²⁷ Kʼoeˇ naˇ, Sahˬpaˬ Miˬyehˇ ehˇ-eu, “Ngaˬ-eu tsawˇ myahˇ kuˇ-awˇ Iˇsaˬleˬlaˆ tsawˇ haˬ deuˬ-ahˇ dawˬ ngehˬ gʼeh nehˬ naˇ, ngaˇ guiˬ lahˬ biꞈ ma.”