Bawˇtsahˬ 4 - Akha

Leˬbiˇ tsawˇ haˬ Kawˇhaˆ aˇ jeuˬ ya mˇ-eu gaˇ deuˬ

¹ Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Leˬbiˇ tsawˇ haˬ Kawˇhaˆ aˇ jeuˬ deuˬ-ahˇ, aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-awˬ.

³ Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ -euˬ tsawˇ myahˇ yuˇ-awˬ.

⁴ Muiˬ dui shawˇ dui dui-eu gaˇ deuˬ-ahˇ aˬ yawꞈ maꞈ ya mˇ meh.”

⁵ Moˇseˬ-ahˇ Sahˬpaˬ Miˬyehˇ heu loꞈ-ehˇ mehˬ nehˬ tsoˆ nehˬ-euˬ meh. Mehˬ hu paw doˆ-iˇ-eu aˇ yamˬ keuˆ laˇ ngeh, Aˬloˬ hawˇ-eu aˬ yawꞈ-euˬ aˬ li deuˬ Sehˬ gʼawˆ laꞈ kʼoeˇ uˇ leˇ-awˇ, Dawˬ ma saˇ jaˇ Bahˬ keuˆ mehˬ shi taw taˬ-euˬ saˬ paˇ ya yuˇ ka-awˇ, Dawˬ ma saˇ jaˇ Bahˬ keuˆ-ahˇ saˬ paˇ kʼoeˇ yuˇ-awˇ ya dehˬ kaˬ meh.

⁶ Kʼoeˇ-euˬ kʼoeˇ taˆ shawˇ jehˆ ni gʼeh-eu shaˬ kʼoˆ paˇ dehˬ kaˬ-awˇ, nyoeˇ leuˬ leuˬ-eu saˬ paˇ ya sheu kaˬ meh. Kʼoeˇ naˇ, kʼaˆ baꞈ kawˬ deuˬ ya cawˬ ahˇ meh.

⁷ Sahˬpaˬ Miˬyehˇ-ahˇ kaˬ muˇ damˬ nehˬ duˬ hawˬ jeh kʼoeˇ taˆ, nyoeˇ leuˬ leuˬ-eu saˬ paˇ aˬ yawꞈ maꞈ kʼawˬ-awˇ, kʼmˬ maˬ, yaw saw jeˬ dawˆ ahˇ-eu naˬ bo, damˬ nehˬ ngeh zmˬ-eu iˇ cuꞈ naˬ bo, aˬ gaꞈ dzaˇ uiˇ damˬ ngeh geuꞈ-eu mui deuˇ oeˬ lahˬ, heu deuˬ-ahˇ hawˬ jeh kʼoeˇ taˆ ya ciˬ daˆ meh. Hawˬ jeh kʼoeˇ taˆ kaˬ muˇ aˬ myah luꞈ ya bi jaˆ meh.

⁸ Kʼoeˇ deuˬ dawˬ tawˆ luꞈ kʼoeˇ taˆ saˬ paˇ paˇ neˇ dehˬ kaˬ-awˇ, shawˇ jehˆ ni gʼeh-eu shaˬ kʼoˆ paˇ ya dehˬ kaˬ meh. Kʼoeˇ naˇ, kʼaˆ baꞈ kawˬ deuˬ ya cawˬ ahˇ taˬ meh.

⁹ Tsiˇ kʼmˬ doꞈ taˬ duˬ, tsiˇ kʼmˬ, ciˆ nyawˆ, kʼaˬ lehˇ tawˆ ahˇ duˬ hawˇ-eu saˬ loˬ tsiˇ dawˆ ahˇ-eu mui deuˇ oeˬ lahˬ heu deuˬ kʼoeˇ taˆ, nyoeˇ leuˬ leuˬ-eu saˬ paˇ tiˬ dzeh yuˇ-awˇ ya dehˬ kaˬ meh.

¹⁰ Kʼoeˇ naˇ, tsiˇ kʼmˬ doꞈ taˬ duˬ hawˇ-eu kʼoeˇ-euˬ keu ka dawˬ tawˆ luꞈ-ahˇ, shawˇ jehˆ ni gʼeh-eu shaˬ kʼoˆ neh lahˇ cuꞈ-awˇ, baꞈ kawˬ kʼoeˇ taˆ ya bi jaˆ meh.

¹¹ Shuiˇ neh jahˇ taˬ-euˬ lawˇ duˬ kʼoeˇ taˆ, nyoeˇ leuˬ leuˬ-eu saˬ paˇ kʼawˬ-awˇ, shawˇ jehˆ ni gʼeh-eu shaˬ kʼoˆ dehˬ kaˬ-awˇ, baꞈ kawˬ ya cawˬ ahˇ taˬ meh.

¹² Muiˬ-eu shawˇ-eu jawˇ duˬ laꞈ kʼoeˇ zmˬ-eu keu ka dawˬ tawˆ luꞈ aˬ yawꞈ maꞈ yuˇ-awˇ, nyoeˇ leuˬ leuˬ-eu saˬ paˇ neh lahˇ cuꞈ-awˇ, shawˇ jehˆ ni gʼeh-eu shaˬ kʼoˆ dehˬ kaˬ-awˇ, baꞈ kawˬ kʼoeˇ taˆ ya bi jaˆ meh.

¹³ Guiˬ shuiˇ neh jahˇ taˬ-euˬ lawˇ duˬ kʼoeˇ taˆ jaˆ-eu tsiˇ lehꞈ-eu kʼaˬ lehˇ aˬ yawꞈ maꞈ ya tawˆ dzeh-awˇ, lawˇ duˬ kʼoeˇ-euˬ kʼoeˇ taˆ neˇ naˆ naˆ-eu saˬ paˇ ya kʼawˬ meh.

¹⁴ Lawˇ duˬ-ahˇ kʼaˇ taꞈ leˇ-eu keu ka pyeuꞈ-eu miˬ dzaˬ kʼmˬ maˬ, kuˆ seuˬ, kuˬ tseuˆ hawˇ-eu sehˇ byehˇ heu deuˬ dawˬ tawˆ luꞈ-ahˇ lawˇ duˬ kʼoeˇ taˆ ya yuˇ taˬ meh. Kʼoeˇ naˇ, shawˇ jehˆ ni gʼeh-eu shaˬ kʼoˆ neh dehˬ kaˬ-awˇ, kʼaˆ baꞈ kawˬ ya cawˬ ahˇ taˬ meh.

¹⁵ Mehˬ hu paw doˆ-iˇ-eu aˇ yamˬ keuˆ laˇ ngeh, Aˬloˬ hawˇ-eu aˬ yawꞈ-euˬ aˬ li deuˬ muiˬ-eu shawˇ-eu mˇ myawˬ keu ka dawˬ tawˆ luꞈ-ahˇ dehˬ kaˬ gʼaˬ miˇ tsa, Kawˇhaˆ tsawˇ jeuˬ deuˬ kʼoeˇ deuˬ-ahˇ baꞈ-eu gʼaˇ duˬ ya laˇ meh. Kawˇhaˆ tsawˇ haˬ deuˬ muiˬ-eu shawˇ-eu keu ka kʼoeˇ deuˬ-ahˇ maˬ ya toeˬ ciˆ-a. Toeˬ ciˆ naˇ ya shiˇ meh. Heu-aˬ, mehˬ hu paw doˆ-iˇ-eu aˇ yamˬ kʼaˇ keuˆ le ngeh, Kawˇhaˆ tsawˇ haˬ deuˬ ya mˇ-eu gaˇ meh.

¹⁶ Piˇ ma Aˬloˬ-euˬ aˬ li Eˇlaˬzaˬ-aˬ, tsiˇ kʼmˬ doꞈ-eu tsiˇ, tsiˇ yaw saw jeˬ, dzaˬ la gʼo cehˇ lawˇ-eu jeˬ hawˇ-eu, tseˇ doˆ-euˬ deuˬ-ahˇ lehꞈ-eu tsiˇ heu deuˬ-ahˇ ya haw ya pyaˆ meh. Sehˬ gʼawˆ gʼawˆ lah ni hawˇ-eu, Sehˬ gʼawˆ laꞈ kʼoeˇ kʼaˇ jaˆ-eu Sahˬpaˬ Miˬyehˇ-ahˇ a nehˬ taˬ-euˬ jeˬ dawˬ tawˆ luꞈ-ahˇ ya haw ya pyaˆ meh.

¹⁷ Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁸ “Kawˇhaˆ aˇ jeuˬ-ahˇ, Leˬbiˇ tsawˇ jeuˬ laꞈ kʼoeˇ neh paˬ dzeh maˬ ya dzeh ni yaw kʼaˆ-ehˇ yahˇ-awˬ.

¹⁹ Yaw zawˇ-ehˇ muiˬ-eu shawˇ-eu jeˬ dawˬ peh aˬ yawꞈ maꞈ laˇ ngeh, maˬ ya shiˇ-eu gʼaˇ duˬ heu loꞈ-ehˇ jahˇ-awˬ. Aˬloˬ hawˇ-eu aˬ yawꞈ-euˬ aˬ li deuˬ muiˬ-eu shawˇ-eu jawˇ duˬ-ahˇ uˇ leˇ-awˇ, aˬ yawꞈ maꞈ tiˬ gʼaˬ saˇ-iˬ tiˬ gʼaˬ-ahˇ aˬ jeˬ ya mˇ-awˇ aˬ jeˬ ya baꞈ-eu gaˇ kawˆ bi mehˬ nehˬ-awˬ.

²⁰ Ehˇ kʼawꞈ, muiˬ-eu shawˇ-eu keu ka deuˬ-ahˇ haw leˇ-eu gʼaˇ duˬ, Kawˇhaˆ tsawˇ haˬ deuˬ Sehˬ gʼawˆ laꞈ kʼoeˇ tiˬ kʼehˇ laˇ kʼehˬ tehꞈ-ehˇ kʼawꞈ maˬ ya uˇ leˇ-a. Kʼoeˇ loꞈ-ehˇ uˇ leˇ naˇ ya shiˇ tehꞈ-a.”

Leˬbiˇ tsawˇ haˬ Geˬlaˬshoˬ aˇ jeuˬ ya mˇ-eu gaˇ deuˬ

²¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²² “Leˬbiˇ tsawˇ haˬ Geˬleˬshoˬ aˇ jeuˬ-ahˇ, aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-awˬ.

²³ Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu, smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ-euˬ tsawˇ myahˇ yuˇ-awˬ.

²⁴ Aˬ yawꞈ maꞈ-euˬ gaˇ-aˬ, heu loꞈ-ehˇ meh.

²⁵ Sehˬ gʼawˆ hawˇ-eu, Sehˬ gʼawˆ-ahˇ laꞈ kʼoeˇ tiˆ dehˬ kaˬ-eu saˬ paˇ, laꞈ nyiˇ tiˆ dehˬ kaˬ-eu saˬ paˇ, kʼoeˇ taˆ taˆ saˬ tiˆ-ahˇ dehˬ kaˬ-eu shawˇ jehˆ ni gʼeh-eu shaˬ kʼoˆ, gʼoˆ kʼehˬ-ahˇ taw taˬ-eu saˬ paˇ,

²⁶ Sehˬ gʼawˆ hawˇ-eu lawˇ duˬ-ahˇ yaˇ kmˇ mˇ jawˬ gaˇ taw-eu saˬ paˇ hawˇ-eu aˇ caˆ deuˬ, yaˇ kmˇ gʼoˆ kʼehˬ-ahˇ taw-eu saˬ paˇ hawˇ-eu kʼoeˇ deuˬ tsoˆ ngeh zmˬ-eu keu ka deuˬ aˬ yawꞈ maꞈ ya baꞈ meh. Keu ka heu deuˬ-ahˇ taꞈ leˇ-awˇ mˇ paˬ-ehˇ gʼeh-eu gaˇ dawˬ tawˆ luꞈ-ahˇ aˬ yawꞈ maꞈ ya mˇ meh.

²⁷ Aˬloˬ hawˇ-eu aˬ yawꞈ-euˬ aˬ li deuˬ neh bi mˇ-euˬ gaˇ deuˬ-ahˇ Geˬlaˬshoˬ tsawˇ haˬ deuˬ mˇ gaˇ, Moˇseˬ hawˇ-eu Aˬloˬ naw nyaꞈ nmˇ ya haw meh.

²⁸ Heu-aˬ, Geˬlaˬshoˬ tsawˇ jeuˬ Sehˬ gʼawˆ laꞈ kʼoeˇ ya mˇ-eu gaˇ deuˬ meh. Piˇ ma Aˬloˬ-euˬ aˬ li Iˇdaˬmaˬ neh mehˬ nehˬ tsoˆ nehˬ-euˬ loꞈ-ehˇ, gaˇ kʼoeˇ deuˬ-ahˇ aˬ yawꞈ maꞈ ya mˇ meh.”

Leˬbiˇ tsawˇ haˬ Meˬlaˬliˇ aˇ jeuˬ ya mˇ-eu gaˇ deuˬ

²⁹ Moˇseˬ-ahˇ Sahˬpaˬ Miˬyehˇ ehˇ nehˬ-eu, “Leˬbiˇ tsawˇ haˬ Meˬlaˬliˇ aˇ jeuˬ deuˬ-ahˇ, aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-awˬ.

³⁰ Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ-euˬ tsawˇ myahˇ yuˇ-awˬ.

³¹ Aˬ yawꞈ maꞈ-euˬ gaˇ-aˬ, Sehˬ gʼawˆ teˇ byaꞈ, laꞈ law, kʼawˇ zeuˇ, zeuˇ dahˇ,

³² Sehˬ gʼawˆ jawˬ jawˬ-ehˇ yaˇ kmˇ mˇ lahˇ gaˇ geuꞈ-eu kʼawˇ zeuˇ, zeuˇ dahˇ, taꞈ cmˬ, aˇ caˆ hawˇ-eu, kʼoeˇ deuˬ gʼoˆ tsoꞈ ngeh zmˬ-eu keu ka dawˬ tawˆ luꞈ-ahˇ ya baꞈ-eu gaˇ pyeuꞈ-eu meh.

³³ Heu-aˬ, Sehˬ gʼawˆ laꞈ kʼoeˇ Meˬlaˬliˇ tsawˇ haˬ deuˬ ya mˇ-eu gaˇ pyeuꞈ-eu meh. Piˇ ma Aˬloˬ-euˬ aˬ li Iˇdaˬmaˬ neh aˬ yawꞈ maꞈ-ahˇ mehˬ nehˬ tsoˆ nehˬ-euˬ loꞈ-ehˇ, kʼoeˇ deuˬ-ahˇ aˬ yawꞈ maꞈ ya baꞈ meh.”

Leˬbiˇ tsawˇ jeuˬ-euˬ tsawˇ myahˇ yuˇ-euˬ

³⁴ Moˇseˬ, Aˬloˬ hawˇ-eu Iˇsaˬleˬlaˆ tsawˇ haˬ deuˬ kʼoeˇ taˆ aˬ yuiꞈ aˬ tsu geuꞈ-eu deuˬ neh, Kawˇlaˆ aˇ jeuˬ-ahˇ, aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-euˬ meh.

^35-36 Aˇ jeuˬ aˬ yawꞈ jeuˬ yawꞈ-ahˇ tsawˇ myahˇ yuˇ doe ngeh, Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu, smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ nyiˬ heˇ shiꞈ yaˇ ngaˬ tseˇ gʼaˬ byah-eu meh.

³⁷ Kawˇhaˆ aˇ jeuˬ laꞈ kʼoeˇ, Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu tsawˇ haˬ dawˬ tawˆ luꞈ kʼoeˇ myaˆ gʼaˬ byah-eu meh. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Moˇseˬ hawˇ-eu Aˬloˬ aˬ nyaꞈ aˬ yawꞈ maꞈ-euˬ tsawˇ myahˇ yuˇ-euˬ meh.

³⁸ Geˬlaˬshoˬ aˇ jeuˬ-ahˇ, aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-euˬ meh.

^39-40 Aˇ jeuˬ aˬ yawꞈ jeuˬ yawꞈ-ahˇ tsawˇ myahˇ yuˇ doe ngeh, Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ, nyiˬ heˇ koꞈ yaˇ smˬ tseˇ gʼaˬ byah-eu meh.

⁴¹ Geˬlaˬshoˬ aˇ jeuˬ laꞈ kʼoeˇ, Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ-eu tsawˇ haˬ dawˬ tawˆ luꞈ kʼoeˇ myaˆ gʼaˬ byah-eu meh. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Moˇseˬ hawˇ-eu Aˬloˬ aˬ nyaꞈ aˬ yawꞈ maꞈ-euˬ tsawˇ myahˇ yuˇ-euˬ meh.

⁴² Meˬlaˬliˇ tsawˇ haˬ deuˬ-ahˇ aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-euˬ meh.

^43-44 Aˇ jeuˬ aˬ yawꞈ jeuˬ yawꞈ-ahˇ tsawˇ myahˇ yuˇ doe ngeh, Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-eu smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ smˬ heˇ nyiˬ yaˇ gʼaˬ byah-eu meh.

⁴⁵ Meˬlaˬliˇ tsawˇ haˬ dawˬ tawˆ luꞈ heu myaˆ gʼaˬ byah-eu meh. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Moˇseˬ hawˇ-eu Aˬloˬ aˬ nyaꞈ aˬ yawꞈ maꞈ-euˬ tsawˇ myahˇ yuˇ-euˬ meh.

⁴⁶ Moˇseˬ, Aˬloˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ Leˬbiˇ tsawˇ jeuˬ aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ-ahˇ kʼaˇ taꞈ-eu loꞈ-ehˇ tsawˇ myahˇ yuˇ-euˬ meh.

^47-48 Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ gaˇ mˇ nya-awˇ, Sehˬ gʼawˆ baꞈ nya-eu smˬ tseˇ kʼoꞈ hawˇ-eu ngaˬ tseˇ kʼoꞈ yaw kaˬ-ahˇ jawˇ luꞈ-eu kʼaˬ dzeˇ zaˬ dawˬ tawˆ luꞈ yehꞈ heˇ ngaˬ yaˇ yehꞈ tseˇ gʼaˬ byah-eu meh.

⁴⁹ Sahˬpaˬ Miˬyehˇ neh Moˇseˬ-ahˇ dawˬ biꞈ nehˬ-eu loꞈ-ehˇ, tsawˇ haˬ yawˬ gʼaˬ na luꞈ-euˬ tsawˇ myahˇ yuˇ-awˇ, Sahˬpaˬ Miˬyehˇ neh Moˇseˬ-ahˇ dawˬ biꞈ nehˬ-euˬ loꞈ-ehˇ, tsawˇ haˬ yawˬ gʼaˬ na luꞈ-ahˇ yawˬ ha ya baꞈ ya pi-eu gaˇ biꞈ nehˬ-euˬ meh.