Bawˇtsahˬ 36 - Akha

Kʼaˬ dzeˇ zaˬ baw-eu zaˬ miˬ zaˬ deuˬ-euˬ jeˬ biˇ

¹ Yoˇsehˆ-euˬ aˬ li Maˬnaˇseˬ, Maˬnaˇseˬ-euˬ aˬ li Maˬkiˬlaˇ, Maˬkiˬlaˇ-euˬ aˬ li Giˇlaˆ meh. Giˇlaˆ-euˬ aˇ jeuˬ laꞈ kʼoeˇ aˬ yuiꞈ aˬ tsu geuꞈ-eu deuˬ Moˇseˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ jawˇ gaˇ le-euˬ meh.

² Aˬ yawꞈ maꞈ ehˇ-eu, “Shehˆ tsaˬ bi tsaˬ geuꞈ-eu laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ miˇ kʼahˬ biˇ nehˬ-awˬ lehˇ, naw maꞈ-ahˇ Sahˬpaˬ Miˬyehˇ dawˬ biꞈ taˬ-euˬ meh. Nga maꞈ-euˬ aˬ yuiꞈ aˬ nyiˇ Zeˬloˇpeˬhaˇ-euˬ jeˬ biˇ kʼawꞈ, aˬ yawꞈ-euˬ aˬ buˇ deuˬ-ahˇ biꞈ nehˬ-awˬ lehˇ aˬ yawꞈ naw maꞈ-ahˇ dawˬ biꞈ taˬ-euˬ meh.

³ Ehˇ kʼawꞈ, tsawˇ jeuˬ yawˬ jeuˬ yawˬ-ahˇ aˬ yawꞈ maꞈ dahˬ dzaˬ-iˇ naˇ, aˬ yawꞈ maꞈ-euˬ jeˬ biˇ kʼawꞈ tsawˇ jeuˬ kʼoeˇ jeuˬ-ahˇ oꞈ-eu meh. Heu loꞈ-ehˇ ngeuˇ naˇ, nga maꞈ-ahˇ oꞈ-eu jeˬ biˇ teˬ-iˇ tehꞈ-a.

⁴ Juˬbiˬliˬ aˇ kʼoꞈ keuˆ le-awˇ, kʼaˇ ahˬ dzaˬ-euˬ yawˬ jeˬ na luꞈ ahˬ sahˇ gʼaˬ-ahˇ yaˬ biꞈ kʼoꞈ ngeh, Zeˬloˇpeˬhaˇ-euˬ aˬ buˇ kʼoeˇ deuˬ-euˬ jeˬ biˇ kʼawꞈ, aˬ yawꞈ maꞈ dahˬ dzaˬ-iˇ-euˬ tsawˇ jeuˬ kʼoeˇ jeuˬ-euˬ jeˬ biˇ pyeuꞈ tsehˆ-awˇ, nga maꞈ tsawˇ jeuˬ ya smˬ-iˇ meh loˇ.”

⁵ Sahˬpaˬ Miˬyehˇ neh dawˬ biꞈ-euˬ loꞈ-ehˇ, Iˇsaˬleˬlaˆ tsawˇ haˬ deuˬ-ahˇ Moˇseˬ heu loꞈ-ehˇ ehˇ nehˬ-euˬ meh. “Maˬnaˇseˬ tsawˇ jeuˬ ehˇ-eu tsaˬ meh.

⁶ Sahˬpaˬ Miˬyehˇ ehˇ-eu, Zeˬloˇpeˬhaˇ-euˬ aˬ buˇ deuˬ-aˬ, yawˬ ha kʼaˇ dahˬ dzaˬ-iˇ mawꞈ-eu gʼaˬ-ahˇ dahˬ dzaˬ-iˇ nya meh. Ehˇ kʼawꞈ, yawˬ ha tsawˇ jeuˬ laꞈ kʼoeˇ tehꞈ-ehˇ ya dahˬ dzaˬ-iˇ meh lehˇ ehˇ taˬ-euˬ jaˆ-eu meh.

⁷ Iˇsaˬleˬlaˆ tsawˇ haˬ deuˬ laꞈ kʼoeˇ, yawˬ ha tsawˇ jeuˬ-euˬ jeˬ biˇ yawˬ ha ya bi jaˆ meh.

⁸ Iˇsaˬleˬlaˆ tsawˇ jeuˬ tiˬ jeuˬ laꞈ kʼoeˇ jeˬ biˇ kʼaˇ za taˬ-euˬ zaˬ miˬ zaˬ-aˬ, yawˬ ha tsawˇ jeuˬ-ahˇ tehꞈ-ehˇ ya dahˬ dzaˬ-iˇ meh. Kʼoeˇ loꞈ-ehˇ jahˇ naˇ, Iˇsaˬleˬlaˆ tsawˇ jeuˬ yawˬ jeuˬ na luꞈ, yawˬ ha-euˬ aˬ poeˬ aˬ bawˇ-euˬ laꞈ-ahˇ neh jeˬ biˇ kʼaˇ za taˬ-euˬ loꞈ-ehˇ maˬ paˇ laˇ ni jaˆ tehꞈ-a.

⁹ Jeˬ biˇ kʼoeˇ deuˬ kʼawꞈ, tsawˇ jeuˬ tiˬ jeuˬ tiˇ jeuˬ-euˬ laꞈ-ahˇ maˬ ahˇ leˇ ni jaˆ-awˇ, tsawˇ jeuˬ yawˬ jeuˬ na luꞈ, yawˬ ha-euˬ jeˬ biˇ yawˬ haˬ ziꞈ dah ni jaˆ tehꞈ-a.”

^10-11 Zeˬloˇpeˬhaˇ-euˬ aˬ buˇ deuˬ pyeuꞈ-eu Maˬhaˬlahˬ, Teuˇzaˬ, Hawˇgaˬlaˇ, Miˇlaˬkah hawˇ-eu Noˇaˬ-aˬ, Sahˬpaˬ Miˬyehˇ neh Moˇseˬ-ahˇ dawˬ biꞈ-euˬ gaˇ naˇ haˬ geuꞈ-awˇ, aˬ yawꞈ maꞈ-euˬ aˇ jeuˬ aˇ ca-ahˇ tehꞈ-ehˇ dahˬ dzaˬ-iˇ-euˬ meh.

¹² Yoˇsehˆ-euˬ aˬ li Maˬnaˇseˬ-euˬ aˇ jeuˬ-ahˇ tehꞈ-ehˇ aˬ yawꞈ maꞈ dahˬ dzaˬ-iˇ-awˇ, aˬ yawꞈ maꞈ-euˬ jeˬ biˇ kʼawꞈ, aˬ yawꞈ maꞈ-euˬ aˬ da-euˬ tsawˇ jeuˬ laꞈ kʼoeˇ tehꞈ-ehˇ jaˆ-euˬ meh.

¹³ Heu-aˬ, Yeˬliˇkoˇ meuˬ kʼoeˇ paw paˆ, Yawˇdaˬ lawˇ baˬ nui baˬ paw jaˆ-eu Mawˇbaˆ miˇ kʼahˬ deh ga laꞈ kʼoeˇ, Moˇseˬ-ahˇ gʼoe-awˇ, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ neh biꞈ-euˬ zahˇ sahˇ kʼoꞈ deuˬ pyeuꞈ-eu meh.