Bawˇtsahˬ 34 - Akha

Kaˬnaˬ miˇ kʼahˬ-euˬ miˇ kaˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ mehˬ nehˬ tsoˆ nehˬ-awˬ. Ngaˇ naw maꞈ-ahˇ biꞈ-euˬ Kaˬnaˬ miˇ kʼahˬ-ahˇ naw maꞈ le keuˆ ngeh, naw maꞈ-euˬ miˇ kʼahˬ miˇ kaˬ heu loꞈ-ehˇ jaˆ tehꞈ-a.

³ Naw maꞈ miˇ kʼahˬ laꞈ oˆ paw pyawˬ-euˬ miˇ kaˬ-aˬ, Ziˇnaˆ bawˇ tsahˬ bawˇ dahˇ-ahˇ neh Eˬdoˬ miˇ kʼahˬ-euˬ miˇ kaˬ-ahˇ keuˆ ni meh. Laꞈ oˆ paw pyawˬ miˇ kaˬ kʼoeˇ-aˬ, Shiˇ-eu Iˬ ma laˆ shaˆ lah dahˬ paw coeˇ-ahˇ neh aˇ dahˬ beh-eu meh.

⁴ Kʼoeˇ gaˇ neh naˇ, Aˬkaˬlaˬbeˬ gʼaˬ lahˇ-ahˇ neh iˇ gʼeh-awˇ, Ziˇnaˆ bawˇ tsahˬ bawˇ dahˇ iˇ dzeuˇ-awˇ, Kaˬdeˬshaˇbaˬneˬ-ahˇ keuˆ ni meh. Kʼoeˇ gaˇ neh naˇ, nahˇ ma ga kʼehˬ paw pyawˬ-ehˇ laꞈ taˆ paw pyawˬ-ahˇ paˇ le gʼeh leꞈ-awˇ, Haˬzaˇaˬdaˇ le dzeuˇ-awˇ, Aˬzaˬmoˬ-ahˇ keuˆ ni iˇ gʼeh-eu meh.

⁵ Kʼoeˇ gaˇ neh naˇ, Iˇjiˇtuˆ miˇ kʼahˬ-euˬ miˇ kaˬ dawˬ peh jaˆ-eu deh kʼawꞈ-ahˇ keuˆ ni iˇ ka gʼeh-awˇ, Gʼahˇ ceh-euˬ Iˬ ma laˆ shaˆ-ahˇ dahˬ-iˇ-eu meh.

⁶ “Nahˇ ma ga kʼehˬ paw pyawˬ miˇ kaˬ-aˬ, Gʼahˇ ceh-euˬ Iˬ ma laˆ shaˆ meh.

⁷ “Laꞈ taˆ paw pyawˬ miˇ kaˬ-aˬ, Gʼahˇ ceh-euˬ Iˬ ma laˆ shaˆ-ahˇ neh aˇ dahˬ beh-awˇ, Hawˇlaˆ gawˬ jawˬ paw le gʼeh leꞈ-eu meh.

⁸ Kʼoeˇ gaˇ neh naˇ, Haˬmaˆ gʼaˬ lahˇ-ahˇ neh Zeˬdaˇ hawˇ-eu

⁹ Ziˇpaˬloˬ le dzeuˇ-awˇ, HaˬzaˇEˇnaˬ-ahˇ keuˆ ni meh.

¹⁰ “Nahˇ ma doˆ kʼehˬ paw miˇ kaˬ-aˬ, Haˬzaˇeˇnaˬ-ahˇ neh aˇ dahˬ beh-awˇ, Sheˬpamˬ paw iˇ gʼeh-euˬ meh.

¹¹ Sheˬpamˬ-ahˇ neh naˇ, laꞈ oˆ paw Aˬiˇnaˆ meuˬ-euˬ nahˇ ma doˆ kʼehˬ paw jaˆ-eu Haˬlaˬbeˬlaˇ meuˬ-ahˇ keuˆ ni iˇ gʼeh-awˇ, Gaˬliˬlehˇ lah-euˬ nahˇ ma doˆ kʼehˬ paw jaˆ-eu gawˬ jawˬ deuˬ-ahˇ daˆ doˆ leˇ-eu meh.

¹² Kʼoeˇ gaˇ neh naˇ, Yawˇdaˬ lawˇ baˬ caw caw-ehˇ iˇ ka-awˇ, Shiˇ-eu Iˬ ma laˆ shaˆ-ahˇ dahˬ-iˇ-eu meh. “Heu-aˬ, oeˬ paw oeˬ coeˇ-ahˇ jaˆ-eu naw maꞈ-euˬ miˇ kaˬ meh lehˇ ehˇ nehˬ-awˬ.”

¹³ Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Heu-aˬ, naw maꞈ shehˆ tsaˬ tsaˬ-eu laꞈ kʼoeˇ ya biˇ geuꞈ-eu miˇ kʼahˬ meh. Tsawˇ jeuˬ gʼoeˬ jeuˬ uˬ taꞈ tiˬ paˆ-ahˇ, Sahˬpaˬ Miˬyehˇ miˇ kʼahˬ heu kʼahˬ biꞈ-eu meh.

¹⁴ Aˬ jeˬ miˇ neh ehˇ naˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ yaꞈ-euˬ Maˬnaˇseˬ tsawˇ jeuˬ tiˬ paˆ-aˬ, yawˬ ha aˇ jeuˬ yawˬ ha jeˬ biˇ za gʼaˬ jiˇ-euˬ meh.

¹⁵ Tsawˇ jeuˬ nyiˬ jeuˬ uˬ taꞈ tiˬ paˆ kʼoeˇ deuˬ-aˬ, Yeˬliˇkoˇ meuˬ kʼoeˇ paw paˆ, Yawˇdaˬ lawˇ baˬ nahˇ ma doˆ kʼehˬ paw baˬ-ahˇ jeˬ biˇ za gʼaˬ-euˬ meh.”

Aˬ yuiꞈ aˬ tsu geuꞈ-eu deuˬ miˇ kʼahˬ ya biˇ nehˬ-eu

¹⁶ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁷ “Piˇ ma Eˇlaˬzaˬ hawˇ-eu Nuˬ-euˬ aˬ li Yawˇshuˆ aˬ nyaꞈ, Iˇsaˬleˬlaˆ tsawˇ haˬ deuˬ-ahˇ miˇ kʼahˬ ya biˇ nehˬ meh.

¹⁸ Aˬ yawꞈ nyaꞈ miˇ kʼahˬ biˇ ngeh, tsawˇ jeuˬ tiˬ jeuˬ-euˬ aˬ yuiꞈ aˬ tsu tiˬ gʼaˬ tseˇ doˆ-awˇ, aˬ yawꞈ nyaꞈ-ahˇ ya bi caw ba meh.”

¹⁹ Heu-aˬ, Sahˬpaˬ Miˬyehˇ neh tseˇ doˆ-euˬ tsawˇ haˬ deuˬ-euˬ tsawˇ myahˇ meh. Yuˇdaˆ tsawˇ jeuˬ laꞈ kʼoeˇ, Yeˬpuˬnehˇ-euˬ aˬ li Gaˬlehˆ.

²⁰ Suˇmoˬ tsawˇ jeuˬ laꞈ kʼoeˇ, Aˬmiˇhuˆ-euˬ aˬ li Sheˬluˇmeˬlaˇ.

²¹ Beˬyaˬmiˬ tsawˇ jeuˬ laꞈ kʼoeˇ, Ciˇsaˬloˬ-euˬ aˬ li Eˇliˇdaˆ.

²² Daˬ tsawˇ jeuˬ laꞈ kʼoeˇ, Yoˇgaˬliˇ-euˬ aˬ li Buˇkiˬ.

²³ Maˬnaˇseˬ tsawˇ jeuˬ laꞈ kʼoeˇ, Eˇpoˬ-euˬ aˬ li Haˬneˬlaˇ.

²⁴ Eˇpaˬleˬ tsawˇ jeuˬ laꞈ kʼoeˇ, Shiˇpaˬtaˬ-euˬ aˬ li Gaˬmoeˬlaˇ.

²⁵ Zeˬbuˬluˬ tsawˇ jeuˬ laꞈ kʼoeˇ, Paˬnaˆ-euˬ aˬ li Eˇliˇzaˬpaˬ.

²⁶ Iˇsaˬkaˬ tsawˇ jeuˬ laꞈ kʼoeˇ, Aˇzaˬ-euˬ aˬ li Paˬlaˬteˬlaˇ.

²⁷ Aˬsaˬ tsawˇ jeuˬ laꞈ kʼoeˇ, Sheˬloˬmiˬ-euˬ aˬ li Aˬhiˇhuˆ.

²⁸ Naˬtaˬliˇ tsawˇ jeuˬ laꞈ kʼoeˇ, Aˬmiˇhuˆ-euˬ aˬ li Peˬdaˬheˬlaˇ.

²⁹ Tsawˇ haˬ heu deuˬ-aˬ, Kaˬnaˬ miˇ kʼahˬ laꞈ kʼoeˇ Iˇsaˬleˬlaˆ tsawˇ haˬ deuˬ-ahˇ jeˬ biˇ biꞈ nehˬ-eu gʼaˇ duˬ Sahˬpaˬ Miˬyehˇ neh tseˇ doˆ-euˬ tsawˇ haˬ deuˬ pyeuꞈ-eu meh.