Bawˇtsahˬ 33 - Akha

Iˇsaˬleˬlaˆ tsawˇ haˬ deuˬ tiˬ gaˇ saˇ-iˬ tiˬ gaˇ jawˇ naˬ-euˬ

¹ Heu-aˬ, Moˇseˬ hawˇ-eu Aˬloˬ aˬ nyaꞈ Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh Sheuˬ doˆ laꞈ nehˬ-awˇ, aˬ yawꞈ maꞈ tiˬ gaˇ saˇ-iˬ tiˬ gaˇ jawˇ naˬ-euˬ jawˇ duˬ deuˬ-euˬ tsawˇ myahˇ pyeuꞈ-eu meh.

² Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, aˬ yawꞈ maꞈ kʼaˇ jawˇ naˬ ngeh, jawˇ naˬ-euˬ jawˇ duˬ tsawˇ myahˇ Moˇseˬ boꞈ-euˬ meh.

³ Ba la yaw beh siˬ tseˇ ngaˬ nah Baˬsaˬkaˬ Bawˬ-iˬ jahˇ beh beh-euˬ poˆ bawˬ-iˬ gʼeh gʼaˬ-awˇ yawˬ nah yawˬ-ahˇ, Iˇjiˇtuˆ miˇ kʼahˬ laꞈ kʼoeˇ neh Iˇsaˬleˬlaˆ tsawˇ haˬ deuˬ doˆ laˇ-euˬ meh. Sahˬpaˬ Miˬyehˇ haw piˇ-eu uˬ moˆ, Iˇjiˇtuˆ tsawˇ haˬ deuˬ mawˇ mawˇ-ehˇ, Laˬmaˬsehˇ meuˬ-ahˇ neh aˬ yawꞈ maꞈ doˆ laˇ-euˬ meh.

⁴ Kʼoeˇ ngeh, Iˇjiˇtuˆ tsawˇ haˬ deuˬ-aˬ, Sahˬpaˬ Miˬyehˇ neh sehꞈ-euˬ aˬ yawꞈ maꞈ-euˬ aˬ li aˬ yuiꞈ deuˬ-ahˇ baꞈ pahˬ luꞈ-eu meh. Sahˬpaˬ Miˬyehˇ kʼoeˇ loꞈ-ehˇ jahˇ-awˇ, Iˇjiˇtuˆ miˬyehˇ deuˬ naˆ maˬ tseˇ aˬ yawꞈ baoˬ huiˬ dzehˬ-eu gaˇ kawˆ bi siˬ bi mawˇ-euˬ meh.

⁵ Iˇsaˬleˬlaˆ tsawˇ haˬ deuˬ Laˬmaˬsehˇ meuˬ-ahˇ neh doˆ laˇ-awˇ, Suˇkoˆ lehˇ kuˇ-eu jawˇ duˬ-ahˇ jawˇ naˬ-euˬ meh.

⁶ Kʼoeˇ naˇ, bawˇ tsahˬ bawˇ dahˇ dawˬ peh tehˬ ni jaˆ-eu Eˇdamˬ meuˬ-ahˇ aˬ yawꞈ maꞈ jawˇ naˬ-euˬ meh.

⁷ Kʼoeˇ gaˇ neh naˇ, Baˬlaˇzeˬpoˬ meuˬ-euˬ nahˇ ma doˆ kʼehˬ paw jaˆ-eu Piˇhaˬhiˇyoˆ meuˬ paw paˇ gʼoꞈ le-awˇ, Miˇgaˬdawˇlaˆ meuˬ dawˬ peh jawˇ naˬ-euˬ meh.

⁸ Piˇhaˬhiˇyoˆ-ahˇ neh naˇ, Iˬ ma laˆ shaˆ Yaw neˇ tsehˆ doˆ-awˇ, Shuˇyaˆ bawˇ tsahˬ bawˇ dahˇ laꞈ kʼoeˇ iˇ uˇ-awˇ, smˬ nah paˇ iˇ gʼeh naˇ, Maˬlahˬ lehˇ kuˇ-eu jawˇ duˬ-ahˇ paˇ jawˇ naˬ-euˬ meh.

⁹ Kʼoeˇ gaˇ neh naˇ, Eˇlmˬ lehˇ kuˇ-eu jawˇ duˬ-ahˇ iˇ-awˇ, kʼoeˇ gaˇ jawˇ naˬ-euˬ meh. Aˬ jeˬ miˇ neh ehˇ naˇ, kʼoeˇ gaˇ iˇ cuꞈ iˇ beuˆ tseˇ nyiꞈ beuˆ doˆ-awˇ, daoˇ aˇ bawˬ shiꞈ tseˇ bawˬ dehꞈ-eu meh.

¹⁰ Eˇlmˬ-ahˇ neh aˬ yawꞈ maꞈ paˇ doˆ-iˇ-awˇ, Suˇzaˆ iˬ ma laˆ shaˆ lahˇ gʼoꞈ dawˬ peh jawˇ naˬ-euˬ meh.

¹¹ Kʼoeˇ gaˇ neh naˇ, Siˬ lehˇ kuˇ-eu bawˇ tsahˬ bawˇ dahˇ-ahˇ aˬ yawꞈ maꞈ paˇ jawˇ naˬ-euˬ meh.

¹² Kʼoeˇ gaˇ neh naˇ, Doˇpaˬkaˬ lehˇ kuˇ-eu jawˇ duˬ-ahˇ jawˇ naˬ-euˬ meh.

¹³ Kʼoeˇ gaˇ neh naˇ, Aˬluˇshaˆ lehˇ kuˇ-eu jawˇ duˬ-ahˇ jawˇ naˬ-euˬ meh.

¹⁴ Kʼoeˇ gaˇ neh naˇ, aˬ yawꞈ maꞈ dawˇ-eu gʼaˇ duˬ iˇ cuꞈ maˬ jaˆ-eu Leˬpiˇdeˬ lehˇ kuˇ-eu jawˇ duˬ-ahˇ jawˇ naˬ-euˬ meh.

^15-37 Leˬpiˇdeˬ-ahˇ neh Hawˇlaˆ gawˬ jawˬ yaw kaˬ-ahˇ, jawˇ duˬ heu deuˬ-ahˇ aˬ yawꞈ maꞈ jawˇ naˬ-euˬ meh. Siˇnaˆ bawˇ tsahˬ bawˇ dahˇ, Giˇbyoˆhaˬtaˬbaˬ (mehˇ juiˇ juiˇ-eu lmˬ bymˇ), Haˬzeˬloˆ, Liˇdaˬmaˬ, Leˬmoˬpaˬyehˆ, Liˇbaˬnaˬ, Li sah, Jeˬhaˇlaˬdaˇ, Sheˬpeuˬ gawˬ jawˬ, Haˬlaˬdaˬ, Maˬkaˬheˬloˆ, Taˬhaˇ, Teˬlah, Miˇdaˬkaˬ, Haˬshaˬmoˇnaˬ, Moˇseˬlawˆ, Beˬneˬjaˬkaˬ, Hawˇlaˆhaˬgiˇgaˆ, Yoˇbaˬdaˬ, Aˬbyoˬnaˬ, Eˬzoˇgeˇbaˬ, Ziˇnaˆ lehˇ kuˇ-eu bawˇ tsahˬ bawˇ dahˇ (Kaˬdeˬshaˇ-ahˇ ehˇ-eu meh) hawˇ-eu Eˬdoˬ miˇ kʼahˬ gaˇ dzeˇ jaˆ-eu Hawˇlaˆ gawˬ jawˬ heu deuˬ meh.

³⁸ Sahˬpaˬ Miˬyehˇ neh dawˬ biꞈ-euˬ loꞈ-ehˇ, Hawˇlaˆ gawˬ jawˬ-ahˇ Aˬloˬ daˆ leˇ-awˇ, Iˇsaˬleˬlaˆ tsawˇ haˬ Iˇjiˇtuˆ miˇ kʼahˬ-ahˇ neh doˆ le-euˬ oeˬ tseˇ kʼoꞈ tiˬ kʼoꞈ ba la ngaˬ siˬ tiˬ siˬ yaw beh nah-ahˇ, kʼoeˇ tsahˇ-ahˇ aˬ yawꞈ shiˇ-euˬ meh.

³⁹ Hawˇlaˆ gawˬ jawˬ kʼoeˇ taˆ Aˬloˬ ziˇ jiˇ ngeh, aˬ yawꞈ-euˬ aˇ kʼoꞈ tiˬ yaˇ nyiˬ tseˇ smˇ kʼoꞈ byah-eu meh.

⁴⁰ Iˇsaˬleˬlaˆ tsawˇ haˬ deuˬ laˇ luꞈ-eu gaˇ kawˆ Kaˬnaˬ miˇ kʼahˬ laꞈ oˆ dzaˬ-ahˇ jawˇ-eu Aˬlaˬdaˇ sahˬpaˬ ya gaˬ-euˬ meh.

^41-49 Hawˇlaˆ gawˬ jawˬ-ahˇ neh Mawˇbaˆ miˇ kʼahˬ deh ga jaˆ gaˇ keuˆ ni, jawˇ duˬ heu deuˬ-ahˇ Iˇsaˬleˬlaˆ tsawˇ haˬ deuˬ jawˇ naˬ-euˬ meh. Zaˬlaˬmoˇnaˬ, Puˇnoˬ, Awˇboˆ, Mawˇbaˆ miˇ kaˬ Aˬbaˬleˬ pu tsoeˬ deuˬ, Diˇboˬgaˆ, Aˬlaˬmawˬdiˇbaˬlaˬdeˬ, Neˬboˬ gawˬ jawˬ dawˬ peh jaˆ-eu Aˬbaˬleˬ gawˬ jawˬ hawˇ-eu, Yeˬliˇkoˇ meuˬ-euˬ nui baˬ paw Yawˇdaˬ lawˇ baˬ kʼoeˇ paw baˬ-ahˇ jaˆ-eu Behˬjaˬshiˇmoˇ meuˬ hawˇ-eu Aˬkaˬshaˇ deh kʼawꞈ yaw kaˬ-ahˇ jaˆ-eu Mawˇbaˆ miˇ kʼahˬ deh ga, heu deuˬ meh.

Yawˇdaˬ lawˇ baˬ maˬ tsehˆ doˆ mi naˆ-ehˇ mehˬ nehˬ tsoˆ nehˬ-euˬ

⁵⁰ Yeˬliˇkoˇ meuˬ-ahˇ neh Yawˇdaˬ lawˇ baˬ nui baˬ-ahˇ jaˆ-eu Mawˇbaˆ miˇ kʼahˬ deh ga-ahˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁵¹ “Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ mehˬ nehˬ tsoˆ nehˬ-awˬ. Naw maꞈ Yawˇdaˬ lawˇ baˬ tsehˆ-awˇ Kaˬnaˬ miˇ kʼahˬ-ahˇ uˇ leˇ ngeh,

⁵² kʼoeˇ gaˇ jawˇ luꞈ-eu tsawˇ haˬ dawˬ tawˆ luꞈ-ahˇ ya teh doˆ-awˇ, aˬ yawꞈ maꞈ neh tehˆ taˬ-euˬ tahˬ pahˬ aˬ ma mawˇ kawˇ dawˬ tawˆ luꞈ hawˇ-eu, aˬ yawꞈ maꞈ-euˬ uˬ duˬ tahˬ-eu jawˇ duˬ dawˬ tawˆ luꞈ ya laˆ cawˆ jiˇ meh.

⁵³ Miˇ kʼahˬ kʼoeˇ kʼahˬ-ahˇ deuˆ geuꞈ-awˇ kʼoeˇ gaˇ jawˇ-awˬ. Aˬ jeˬ miˇ neh ehˇ naˇ, ngaˇ naw maꞈ-ahˇ miˇ kʼahˬ kʼoeˇ kʼahˬ biꞈ-eu ma.

⁵⁴ Miˇ kʼahˬ kʼoeˇ kʼahˬ Iˇsaˬleˬlaˆ tsawˇ jeuˬ deuˬ-ahˇ biꞈ nehˬ-awˇ, shehˆ tsaˬ bi tsaˬ geuꞈ-awˬ. Tsawˇ haˬ myaˬ dzehˬ-eu tsawˇ jeuˬ-ahˇ huiˬ dzehˬ-eu miˇ kʼahˬ biˇ oꞈ nehˬ-awˇ, tsawˇ haˬ cuiˆ dzehˬ-eu tsawˇ jeuˬ-ahˇ nyiˇ dzehˬ-eu miˇ kʼahˬ biˇ oꞈ nehˬ-awˬ.

⁵⁵ Ehˇ kʼawꞈ, kʼoeˇ gaˇ jawˇ luꞈ-eu tsawˇ haˬ kʼoeˇ deuˬ-ahˇ naw maꞈ maˬ teh doˆ jiˇ naˇ, kʼaˇ dzeˇ yaꞈ-euˬ tsawˇ haˬ deuˬ-aˬ, naw maꞈ-euˬ myaˆ nuiˆ-ahˇ ahˇ-eu myaˆ pawꞈ hawˇ-eu naw maꞈ-euˬ byaˇ gʼaˇ-ahˇ tsawˆ-eu daˇ ceh loꞈ-ehˇ naw maꞈ-ahˇ laˆ bahˬ tehꞈ-a.

⁵⁶ Aˬ yawꞈ maꞈ-ahˇ naw maꞈ maˬ teh doˆ naˇ, aˬ yawꞈ maꞈ-ahˇ laˆ luˬ laˆ seˇ nehˬ-eu gʼaˇ duˬ ngaˇ lehˬ hmˬ taˬ-euˬ loꞈ-ehˇ, naw maꞈ-ahˇ ngaˇ laˆ luˬ laꞈ seˇ ma lehˇ ehˇ nehˬ-awˬ.”