Bawˇtsahˬ 25 - Akha

Mawˇbaˆ tsawˇ haˬ zaˬ miˬ zaˬ deuˬ-ahˇ Iˇsaˬleˬlaˆ tsawˇ haˬ deuˬ bahˬ-euˬ

¹ Aˬkaˬshaˇ deh kʼawꞈ-ahˇ Iˇsaˬleˬlaˆ tsawˇ haˬ deuˬ jawˇ naˬ luꞈ ngeh, Iˇsaˬleˬlaˆ tsawˇ haˬ kʼaˬ dzeˇ zaˬ deuˬ, kʼoeˇ gaˇ jawˇ-eu Mawˇbaˆ tsawˇ haˬ zaˬ miˬ zaˬ deuˬ nehˬ-ehˇ yuꞈ taꞈ-euˬ meh.

² Mawˇbaˆ miˬ yehˇ-ahˇ uˬ duˬ tahˬ-eu lawˇ-eu shehˇ-eu bawˬ-iˬ gʼeh gaˇ, zaˬ miˬ zaˬ kʼoeˇ deuˬ aˬ yawꞈ maꞈ-ahˇ sheuˬ gʼeh-euˬ meh. Iˇsaˬleˬlaˆ tsawˇ haˬ deuˬ aˬ cawˬ tsawˇ jeuˬ-euˬ dzaˇ dzaˬ-awˇ, aˬ cawˬ tsawˇ jeuˬ-euˬ miˬ yehˇ-ahˇ uˬ duˬ tahˬ-euˬ meh.

³ Kʼoeˇ loꞈ-ehˇ Peˬoˇ miˬyehˇ Baˬlaˇ-ahˇ uˬ duˬ tahˬ-euˬ miˇ neh, aˬ yawꞈ maꞈ-ahˇ Sahˬpaˬ Miˬyehˇ nui ma pehˇ laˇ-euˬ meh.

⁴ Kʼoeˇ ngeh, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Ngaˬ-euˬ ehˇ dawˬ naˇ haˬ-eu laꞈ kʼoeˇ, Iˇsaˬleˬlaˆ tsawˇ haˬ aˬ yuiꞈ aˬ tsu dawˬ tawˆ luꞈ kuˇ uiˬ-awˇ, nah gʼahˇnah gaˆ-ahˇ sehꞈ jiˇ nehˬ-awˬ. Kʼoeˇ loꞈ-ehˇ jahˇ naˇ, Iˇsaˬleˬlaˆ tsawˇ haˬ deuˬ-ahˇ ngaˇ nui ma maˬ paˇ pehˇ ma.”

⁵ Aˬ yuiꞈ aˬ tsu kʼoeˇ deuˬ-ahˇ Moˇseˬ ehˇ nehˬ-eu, “Naw maꞈ yawˬ gʼaˬ na luꞈ, yawˬ ha tsawˇ jeuˬ laꞈ kʼoeˇ, Peˬoˇ miˬ yehˇ Baˬlaˇ-ahˇ uˬ duˬ kʼaˇ tahˬ-eu deuˬ-ahˇ ya sehꞈ meh.”

⁶ Moˇseˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ tsawˇ ngoeˇ ngoeˇ ngoeˇ-ehˇ jawˇ ngeh, Iˇsaˬleˬlaˆ tsawˇ haˬ tiˬ gʼaˬ aˬ yawꞈ maꞈ dawˬ tawˆ luꞈ mawˇ mawˇ-ehˇ, yawˬ ha-euˬ sehˬ gʼawˆ laꞈ kʼoeˇ Miˇdiˬyaˬ tsawˇ jeuˬ zaˬ miˬ zaˬ tiˬ gʼaˬ sheuˬ uˇ gʼeh-euˬ meh.

⁷ Kʼoeˇ loꞈ-ehˇ jahˇ gaˇ Aˬloˬ-euˬ aˬ li Eˇlaˬzaˬ gʼaˬ-euˬ aˬ li Piˇnaˬhaˇ ya mawˇ ngeh, gahˬ tuˆ tehˬ-awˇ tsawˬ tuˇ laˇ-awˇ, tsawˇ haˬ aˇ maꞈ aˇ muˇ jawˇ gaˇ neh doˆ-iˇ-euˬ meh.

⁸ Kʼaˬ dzeˇ zaˬ hawˇ-eu zaˬ miˬ zaˬ kʼoeˇ nyiˬ gʼaˬ-ahˇ sehˬ gʼawˆ laꞈ kʼoeˇ keuˆ ni caw teh-iˇ-awˇ, nyiˬ gʼaˬ luꞈ-ahˇ gahˬ neh tsawˆ sehꞈ-euˬ meh. Kʼoeˇ loꞈ-ehˇ jahˇ-eu laꞈ kʼoeˇ, Iˇsaˬleˬlaˆ tsawˇ haˬ deuˬ kʼoeˇ taˆ keuˆ le-eu luˬ-iˇ seˇ-iˇ-eu jeˬ-ahˇ laˆ naˬ-euˬ meh.

⁹ Ehˇ kʼawꞈ, tsawˇ haˬ nyiˬ muiˇ oeˬ heˇ gʼaˬ shiˇ dzeuˇ gʼaˬ-euˬ meh.

¹⁰ Moˇseˬ-ahˇ Sahˬpaˬ Miˬyehˇ ehˇ nehˬ-eu,

¹¹ “Piˇnaˬhaˇ kʼoeˇ loꞈ-ehˇ mˇ-euˬ miˇ neh, Iˇsaˬleˬlaˆ tsawˇ haˬ deuˬ-ahˇ ngaˇ nui ma maˬ paˇ pehˇ ma. Ngaˬ-ahˇ maˬ ngeuˇ naˇ, miˬyehˇ nui gʼaˬ-ahˇ uˬ duˬ tahˬ-eu jeˬ-ahˇ Piˬnaˬhaˇ maˬ haw nahˇ-a. Kʼoeˇ miˇ neh, aˬ yawꞈ maꞈ-ahˇ ngaˇ maˬ paˇ laˆ cawˆ nehˬ ni bi dzeuˇ-iˇ-euˬ ma.

¹² Mehˬ hu paw dehꞈ daˆ leꞈ-eu aˇ yamˬ dawˬ tawˆ luꞈ-ahˇ taꞈ-eu dawˬ ma saˇ jaˇ, aˬ yawꞈ nehˬ-ehˇ ngaˇ dzaˬ ma lehˇ aˬ yawꞈ-ahˇ ehˇ nehˬ-awˬ.

¹³ Aˬ yawꞈ hawˇ-eu aˬ yawꞈ-euˬ zaˬ deuˬ uˆ deuˬ-aˬ, aˬ myah luꞈ piˇ ma ya geuꞈ tehꞈ-a. Aˬ jeˬ miˇ neh ehˇ naˇ, miˬyehˇ nui taw nui gʼaˬ-ahˇ uˬ duˬ tahˬ-eu jeˬ-ahˇ aˬ yawꞈ muiˇ-awˇ, Iˇsaˬleˬlaˆ tsawˇ haˬ deuˬ-ahˇ ngaˇ iˬ baˇ pyehˬ nehˬ ni aˬ yawꞈ mˇ-euˬ meh.”

¹⁴ Miˇdiˬyaˬ tsawˇ haˬ zaˬ miˬ zaˬ kʼoeˇ gʼaˬ nehˬ-ehˇ tiˬ kawˆ loꞈ-ehˇ bi sehꞈ-euˬ Iˇsaˬleˬlaˆ tsawˇ haˬ kʼoeˇ gʼaˬ-euˬ tsawˇ myahˇ-aˬ, Suˇmoˬ tsawˇ jeuˬ laꞈ kʼoeˇ aˇ jeuˬ aˇ ca tiˬ ca-euˬ aˬ yuiꞈ geuꞈ-eu Saˬluˇ-euˬ aˬ li Zmˇliˬ pyeuꞈ-eu meh.

¹⁵ Zaˬ miˬ zaˬ kʼoeˇ gʼaˬ-euˬ tsawˇ myahˇ-aˬ, Kawˇzaˬbiˇ meh. Aˬ yawꞈ-euˬ aˬ da Zuˇlaˆ-aˬ, Miˇdiˬyaˬ tsawˇ jeuˬ laꞈ kʼoeˇ, aˇ jeuˬ aˇ ca tiˬ ca-euˬ aˬ yuiꞈ geuꞈ luꞈ-eu meh.

¹⁶ Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

¹⁷ “Miˇdiˬyaˬ tsawˇ jeuˬ-ahˇ guiˇ deuˆ-awˇ laˆ luˬ laˆ seˇ nehˬ-awˬ.

¹⁸ Aˬ jeˬ miˇ neh ehˇ naˇ, Peˬoˇ lehˇ kuˇ-eu jawˇ duˬ laꞈ kʼoeˇ aˬ yawꞈ maꞈ naw maꞈ-ahˇ mehˇ shuiˇ shuiˇ-awˇ yaw doeˇ jeˬ mˇ nehˬ laꞈ-euˬ uˬ taꞈ, Peˬoˇ lehˇ kuˇ-eu jawˇ duˬ-ahˇ naw maꞈ kʼoeˇ taˆ luˬ-iˇ seˇ-iˇ-eu jeˬ keuˆ le ngeh bi sehꞈ-euˬ Kawˇzaˬbiˇ kʼoeˇ gʼaˬ baˇ neh kʼawꞈ, aˬ yawꞈ maꞈ naw maꞈ-ahˇ yaw doeˇ jahˇ-euˬ meh.”