Bawˇtsahˬ 23 - Akha

¹ Baˬlehˇ-ahˇ Baˬlamˬ ehˇ nehˬ-eu, “Heu gaˇ lawˇ duˬ shiꞈ hmˬ tsoˆ-awˇ, Mawˇ neˇ mawˇ gaw shiꞈ mawˇ hawˇ-eu yawˇ aˬ buˬ shiꞈ mawˇ ngaˇ jawˇ gaˇ tsahˇ laꞈ-awˬ.”

² Baˬlamˬ neh kʼaˇ ehˇ nehˬ-euˬ loꞈ-ehˇ Baˬlehˇ jahˇ-awˇ, lawˇ duˬ aˬ yawꞈ hmˬ yawꞈ kʼoeˇ taˆ, mawˇ neˇ mawˇ gaw tiˬ mawˇ hawˇ-eu yawˇ aˬ buˬ tiˬ mawˇ aˬ yawꞈ nyaꞈ lawˇ-euˬ meh.

³ Kʼoeˇ naˇ, Baˬlehˇ-ahˇ Baˬlamˬ ehˇ nehˬ-eu, “Nawˬ neh lawˇ-euˬ miˬ dzaˬ dzah puiˆ-awˇ lawˇ-eu jeˬ dawˬ peh yawꞈ tawˬ. Sahˬpaˬ Miˬyehˇ ngaˬ-ahˇ tahˬ puˬ le nga loˇ lehˇ ngaˇ haw leˇ la. Aˬ yawꞈ neh ngaˬ-ahˇ kʼaˇ pah mehˬ laꞈ-euˬ jeˬ nawˬ-ahˇ ngaˇ paˇ dzawˇ nehˬ le ma.” Kʼoeˇ naˇ, aˬ yawꞈ tiˬ gʼaˬ tehꞈ-ehˇ gawˬ duˇ uˬ du le-euˬ meh.

⁴ Kʼoeˇ gaˇ, Miˬyehˇ aˬ yawꞈ-ahˇ tahˬ puˬ le-euˬ meh. Miˬyehˇ-ahˇ Baˬlamˬ ehˇ nehˬ-eu, “Lawˇ duˬ shiꞈ tsahˇ ngaˇ tsoˆ gʼaˬ-awˇ, aˬ yawꞈ tsahˇ yawꞈ kʼoeˇ taˆ, mawˇ neˇ mawˇ gaw tiˬ mawˇ hawˇ-eu yawˇ aˬ buˬ tiˬ mawˇ lawˇ-euˬ ma.”

⁵ Kʼoeˇ ngeh, aˬ joˆ-ehˇ ya ngehˬ ya tmˇ-eu gaˇ kawˆ Sahˬpaˬ Miˬyehˇ neh Baˬlamˬ-ahˇ mehˬ nehˬ-awˇ, Baˬlehˇ-ahˇ bi dzawˇ nehˬ-iˇ-eu gʼaˇ duˬ bi gʼoꞈ-iˇ-euˬ meh.

⁶ Aˬ yawꞈ gʼoꞈ-iˇ ngeh, Baˬlehˇ hawˇ-eu Mawˇbaˆ tsawˇ haˬ aˬ yuiꞈ aˬ tsu dawˬ tawˆ luꞈ, aˬ yawꞈ neh lawˇ-euˬ miˬ dzaˬ dzah puiˆ-awˇ lawˇ-eu jeˬ dawˬ peh yawꞈ luꞈ gaˇ aˬ yawꞈ ya mawˇ-euˬ meh.

⁷ Miˬyehˇ gʼaˇ duˬ ngehˬ dah-eu laꞈ kʼoeˇ, Baˬlamˬ heu loꞈ-ehˇ ehˇ-eu meh. “Mawˇbaˆ sahˬ paˬ-aˬ, Suˇliˆ miˇ kʼahˬ-ahˇ neh ngaˬ-ahˇ sheuˬ laꞈ-euˬ meh. Nahˇ ma doˆ kʼehˬ paw jaˆ-eu gawˬ jawˬ deuˬ-ahˇ neh, aˬ yawꞈ ngaˬ-ahˇ sheuˬ laꞈ-euˬ meh. Aˬ yawꞈ gʼaˇ duˬ dawˬ ngehˬ-eu laꞈ kʼoeˇ, ‘Iˇsaˬleˬlaˆ tsawˇ haˬ deuˬ-ahˇ yaˬ kʼehˇ yaˬ laˇ-awˬ’ lehˇ, aˬ yawꞈ ngaˬ-ahˇ ehˇ-eu meh.

⁸ Miˬyehˇ neh yaˬ kʼehˇ maˬ yaˬ-euˬ jeˬ-ahˇ, ngaˇ aˬ joˆ-ehˇ yaˬ kʼehˇ yaˬ nmˇ. Sahˬpaˬ Miˬyehˇ yehˬ bawˬ sehˇ lu-ehˇ maˬ ehˇ gaˇ, ngaˇ aˬ joˆ-ehˇ yehˬ bawˬ sehˇ lu-ehˇ ehˇ nmˇ.

⁹ Lo guˇ uˬ gʼmˬ-ahˇ jawˇ-awˇ, aˬ yawꞈ maꞈ-ahˇ ngaˇ mawˇ-euˬ ma. Gawˬ duˇ uˬ du daˆ-awˇ, aˬ yawꞈ maꞈ-ahˇ ngaˇ haw-euˬ ma. Aˬ yawꞈ maꞈ aˬ cawˬ-ahˇ maˬ keuˬ leˇ ni, yawˬ haˇ yawˬ ha jawˇ-eu tsawˇ jeuˬ meh. Aˬ cawˬ tsawˇ jeuˬ naˆ maˬ tseˇ yawˬ ha guiˬ lahˬ za-euˬ, aˬ yawꞈ maꞈ siˬ nya luꞈ meh.

¹⁰ Iˇsaˬleˬlaˆ-euˬ zaˬ deuˬ uˆ deuˬ-aˬ, kʼaˬ lehˇ loꞈ-ehˇ myaˬ-eu meh. Behˇ dui dui-eu aˬ yawꞈ maꞈ-ahˇ, aˬ suˇ gʼaˬ gui jiˇ coeˇ nmˇ. Miˬyehˇ-euˬ tsawˇ haˬ kʼoeˇ deuˬ nehˬ-ehˇ, ngaˬ-ahˇ ziˇ bi dehꞈ jiˇ laꞈ-awˬ. Yaw tsaˬ yaw dawˇ tsawˇ haˬ loꞈ-ehˇ, coꞈ ngehˇ ni ngaˬ-ahˇ bi shiˇ laꞈ-awˬ.”

¹¹ Kʼoeˇ ngeh, Baˬlamˬ-ahˇ Baˬlehˇ ehˇ-eu, “Nawˇ ngaˬ-ahˇ teu loꞈ-ehˇ aˬ jeˬ jahˇ nehˬ laꞈ te. Ngaˬ-ahˇ muiˇ-eu deuˬ-ahˇ yaˬ kʼehˇ bi yaˬ-eu gʼaˇ duˬ, ngaˇ nawˬ-ahˇ heu gaˇ sheuˬ laꞈ-euˬ ma. Ehˇ kʼawꞈ, nawˇ-aˬ, maˇ maˇ ni aˬ yawꞈ maꞈ-ahˇ dawˬ ngehˬ gʼeh nehˬ law hawˇ ngaˬ tawˇ.”

¹² Baˬlamˬ ehˇ-eu, “Sahˬpaˬ Miˬyehˇ neh bi ngehˬ bi tmˇ laꞈ-euˬ jeˬ tehꞈ-ehˇ ngaˇ ya ngehˬ ya tmˇ meh.”

Miˬyehˇ gʼaˇ duˬ Baˬlamˬ dawˬ ngehˬ dah-euˬ nyiˬ poˆ tiˬ poˆ

¹³ Baˬlamˬ-ahˇ Baˬlehˇ ehˇ nehˬ-eu, “Iˇsaˬleˬlaˆ tsawˇ haˬ tiˬ paˆ na deuˬ-ahˇ tehꞈ-ehˇ ya mawˇ-eu jawˇ duˬ-ahˇ ngaˬ nehˬ-ehˇ laˇ-awˬ. Kʼoeˇ gaˇ jawˇ-awˇ, ngaˬ-euˬ gʼaˇ duˬ aˬ yawꞈ maꞈ-ahˇ yaˬ kʼehˇ yaˬ-awˬ.”

¹⁴ Piˇsaˬgaˬ gawˬ jawˬ uˬ du jaˆ-eu Zoˇpymˬ deh yaˇ-ahˇ, Baˬlamˬ-ahˇ Baˬlehˇ sheuˬ gʼeh-euˬ meh. Kʼoeˇ gaˇ kʼawꞈ, lawˇ duˬ shiꞈ hmˬ aˬ yawꞈ tsoˆ-awˇ, aˬ yawꞈ hmˬ yawꞈ kʼoeˇ taˆ, mawˇ neˇ mawˇ gaw tiˬ mawˇ hawˇ-eu yawˇ aˬ buˬ tiˬ mawˇ lawˇ-euˬ meh.

¹⁵ Baˬlehˇ-ahˇ Baˬlamˬ ehˇ nehˬ-eu, “Heu gaˇ, nawˬ neh lawˇ-euˬ miˬ dzaˬ dzah puiˆ-awˇ lawˇ-eu jeˬ dawˬ peh yawꞈ tawˬ. Ngaˇ kʼoeˇ paw paˆ iˇ-awˇ Miˬyehˇ-ahˇ tahˬ puˬ leˇ la.”

¹⁶ Baˬlamˬ-ahˇ Sahˬpaˬ Miˬyehˇ tahˬ puˬ le-awˇ, aˬ joˆ-ehˇ ya ngehˬ ya tmˇ-eu gaˇ kawˆ mehˬ nehˬ gʼaˬ-awˇ, Baˬlehˇ-ahˇ bi dzawˇ nehˬ-iˇ-eu gʼaˇ duˬ bi gʼoꞈ-iˇ-euˬ meh.

¹⁷ Aˬ yawꞈ gʼoꞈ-iˇ ngeh, Baˬlehˇ hawˇ-eu Mawˇbaˆ tsawˇ haˬ aˬ yuiꞈ aˬ tsu dawˬ tawˆ luꞈ, aˬ yawꞈ neh lawˇ-euˬ miˬ dzaˬ dzah puiˆ-awˇ lawˇ-eu jeˬ dawˬ peh yawꞈ luꞈ gaˇ ya mawˇ-euˬ meh. Sahˬpaˬ Miˬyehˇ aˬ joˆ-ehˇ ehˇ ta lehˇ, Baˬlamˬ-ahˇ Baˬlehˇ naˇ haˬ-euˬ meh.

¹⁸ Kʼoeˇ ngeh, Miˬyehˇ gʼaˇ duˬ ngehˬ dah-eu laꞈ kʼoeˇ, Baˬlamˬ heu loꞈ-ehˇ ehˇ-eu meh. “Ziˇpoˬ-euˬ aˬ li Baˬlehˇ-oˇ, laˇ-awˬ. Ngaˇ ehˇ gaˇ naˇ haˬ laˇ-awˬ.

¹⁹ Miˬyehˇ-aˬ, dzaˬ myawꞈ myawꞈ nya-eu tsawˇ haˬ zaˬ-ahˇ maˬ duˇ-a. Aˬ yawꞈ-aˬ, nui ma poˆ laˆ paˇ nya-eu tsawˇ haˬ zaˬ maˬ ngeuˇ-a. Aˬ yawꞈ neh saˇ jaˇ dzaˬ taˬ-euˬ jeˬ aˬ yawꞈ mˇ-eu meh. Aˬ yawꞈ neh kʼaˇ ehˇ taˬ-euˬ loꞈ-ehˇ aˬ yawꞈ jahˇ jiˇ-eu meh.

²⁰ Dawˬ ngehˬ gʼeh nehˬ-awˬ lehˇ ngaˬ-ahˇ aˬ yawꞈ mehˬ-eu meh. Miˬyehˇ neh dawˬ ngehˬ gʼeh nehˬ-eu jeˬ-ahˇ, ngaˇ maˬ laˆ paˇ nya-a.

²¹ Iˇsaˬleˬlaˆ tsawˇ haˬ deuˬ mehˬ hu paw dehꞈ daˆ leꞈ-eu gaˇ kawˆ ngaˇ heu loꞈ-ehˇ mawˇ-euˬ ma. Guiˬ lahˬ doeˇ-eu jeˬ hawˇ-eu shaˬ-eu zahˬ-eu jeˬ, aˬ yawꞈ maꞈ kʼoeˇ taˆ maˬ paˇ keuˆ le meh. Aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ, aˬ yawꞈ maꞈ nehˬ-ehˇ jawˇ-eu meh. Aˬ yawꞈ-aˬ, aˬ yawꞈ maꞈ-euˬ sahˬ paˬ ma lehˇ, aˬ yawꞈ maꞈ guˇ-eu meh.

²² Iˇjiˇtuˆ miˇ kʼahˬ laꞈ kʼoeˇ, Miˬyehˇ aˬ yawꞈ maꞈ-ahˇ sheuˬ doˆ laꞈ-euˬ meh. Nehꞈ nyoˬ laꞈ hiˇ loꞈ-ehˇ, aˬ yawꞈ maꞈ gʼaˇ duˬ, aˬ yawꞈ guiˇ deuˆ-euˬ meh.

²³ Mah loˬ jaˬ nehꞈ zmˬ-awˇ, Iˇsaˬleˬlaˆ tsawˇ haˬ-ahˇ maˬ laˆ deuˬ nya-a. ‘Haw sheˇ. Iˇsaˬleˬlaˆ tsawˇ haˬ deuˬ-ahˇ Miˬyehˇ aˬ joˆ-ehˇ jahˇ nehˬ-eu nga’ lehˇ, aˬ cawˬ ya ehˇ gaˇ keuˆ tehꞈ-a.

²⁴ Iˇsaˬleˬlaˆ tsawˇ jeuˬ-aˬ, baoˬ huiˬ-eu aˇ laˬ jaˬ shiˇ-ahˇ duˇ-eu meh. Aˬ yawꞈ neh kawꞈ sehꞈ-euˬ jeˬ zaˬ-euˬ shiˬ dawˇ gʼaˬ-awˇ, shaˬ jiˇ maˬ kawꞈ dzaˬ jiˇ kʼoeˇ keuˆ ni aˬ yawꞈ maˬ naˬ-a.”

²⁵ Kʼoeˇ ngeh, Baˬlamˬ-ahˇ Baˬlehˇ ehˇ nehˬ-eu, “Nawˇ Iˇsaˬleˬlaˆ tsawˇ haˬ deuˬ-ahˇ yaˬ kʼehˇ maˬ yaˬ nehˬ mawꞈ naˇ kʼawꞈ, dawˬ ngehˬ maˬ gʼeh nehˬ ni jawˇ lawˬ.”

²⁶ Baˬlamˬ ehˇ-eu, “Sahˬpaˬ Miˬyehˇ neh kʼaˇ bi ngehˬ kʼaˇ bi tmˇ laꞈ-euˬ loꞈ-ehˇ tehꞈ-ehˇ ngaˇ ya ngehˬ ya tmˇ meh lehˇ ngaˇ nawˬ-ahˇ ehˇ nehˬ gʼaˬ-euˬ maˬ ngeuˇ-a loˇ.”

Miˬyehˇ gʼaˇ duˬ Baˬlamˬ dawˬ ngehˬ dah-euˬ smˬ poˆ tiˬ poˆ

²⁷ Baˬlamˬ-ahˇ Baˬlehˇ ehˇ nehˬ-eu, “Ngaˬ nehˬ-ehˇ laˇ-awˬ. Nawˬ-ahˇ ngaˇ yawˬ tsahˇ yawˬ paˇ sheuˬ gʼeh nehˬ nyaˇ. Kʼoeˇ tsahˇ-ahˇ, Miˬyehˇ nawˬ-ahˇ ngaˬ-euˬ gʼaˇ duˬ tsawˇ haˬ kʼoeˇ deuˬ kʼoeˇ taˆ yaˬ kʼehˇ bi yaˬ mawꞈ-eu baw le.”

²⁸ Kʼoeˇ naˇ, bawˇ tsahˬ bawˇ dahˇ dawˬ peh jaˆ-eu Peˬoˇ gawˬ jawˬ uˬ du, Baˬlamˬ-ahˇ Baˬlehˇ sheuˬ daˆ gʼeh-euˬ meh.

²⁹ Baˬlehˇ-ahˇ Baˬlamˬ ehˇ nehˬ-eu, “Heu gaˇ lawˇ duˬ shiꞈ hmˬ tsoˆ-awˇ, mawˇ neˇ mawˇ gaw shiꞈ mawˇ hawˇ-eu yawˇ aˬ buˬ shiꞈ mawˇ ngaˇ jawˇ gaˇ tsahˇ laꞈ-awˬ.”

³⁰ Baˬlamˬ neh kʼaˇ ehˇ nehˬ-euˬ loꞈ-ehˇ Baˬlehˇ mˇ-awˇ, lawˇ duˬ aˬ yawꞈ hmˬ yawꞈ kʼoeˇ taˆ, mawˇ neˇ mawˇ gaw tiˬ mawˇ hawˇ-eu yawˇ aˬ buˬ tiˬ mawˇ lawˇ-euˬ meh.