Bawˇtsahˬ 21 - Akha

Kaˬnaˬ tsawˇ haˬ deuˬ-ahˇ guiˇ deuˆ gʼaˬ-euˬ

¹ Kaˬnaˬ miˇ kʼahˬ laꞈ oˆ paw dzaˬ-ahˇ jawˇ-eu Kaˬnaˬ tsawˇ jeuˬ-euˬ sahˬ paˬ Aˬlaˬdaˇ-aˬ, Iˇsaˬleˬlaˆ tsawˇ haˬ deuˬ Aˬdaˬleˬ gaˇ ma caw caw-ehˇ laˇ luꞈ-eu gaˇ kawˆ ya gaˬ ngeh, guiˇ deuˆ-iˇ-awˇ, Iˇsaˬleˬlaˆ tsawˇ haˬ tiˬ paˆ na deuˬ-ahˇ nyehꞈ-euˬ meh.

² Kʼoeˇ ngeh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ heu loꞈ-ehˇ saˇ jaˇ dzaˬ-euˬ meh. “Nga maꞈ-ahˇ tsawˇ haˬ heu deuˬ-ahˇ bi gʼaˬ leˇ nehˬ laꞈ naˇ, aˬ yawꞈ maꞈ hawˇ-eu aˬ yawꞈ maꞈ-euˬ meuˬ dawˬ tawˆ luꞈ, aˬ diˇ aˬ maˇ nawˬ-ahˇ damˬ nehˬ-eu laꞈ kʼoeˇ laˆ luˬ laˆ seˇ nehˬ jiˇ ma.”

³ Aˬ yawꞈ maꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ geuꞈ-awˇ, Kaˬnaˬ tsawˇ jeuˬ-ahˇ gʼaˬ leˇ ni aˬ yawꞈ maꞈ-ahˇ caw ba nehˬ-euˬ meh. Kʼoeˇ naˇ, Kaˬnaˬ tsawˇ haˬ deuˬ hawˇ-eu aˬ yawꞈ maꞈ-euˬ meuˬ dawˬ tawˆ luꞈ-ahˇ Iˇsaˬleˬlaˆ tsawˇ haˬ deuˬ laˆ luˬ laˆ seˇ jiˇ-awˇ, jawˇ duˬ kʼoeˇ tsahˇ-ahˇ Hawˇmaˬ lehˇ kuˇ-euˬ meh.

Guiˬ shuiˇ aˇ lawˇ

⁴ Iˇsaˬleˬlaˆ tsawˇ haˬ deuˬ Hawˇlaˆ gawˬ jawˬ-ahˇ neh doˆ-iˇ-awˇ, Eˬdoˬ miˇ kʼahˬ-ahˇ gaˇ jaw jaw-eu gʼaˇ duˬ, Aˬgaˬbaˬ iˬ ma laˆ shaˆ lahˇ gʼoꞈ paw dahˇ ka-eu gaˇ ma caw caw-ehˇ iˇ-euˬ meh. Ehˇ kʼawꞈ, gaˇ pehˇ iˇ luꞈ ngeh aˬ yawꞈ maꞈ nui ma cawˆ laˇ-awˇ,

⁵ Miˬyehˇ hawˇ-eu Moˇseˬ-ahˇ iˬ baˇ taˬ-euˬ meh. Aˬ yawꞈ maꞈ ehˇ-eu, “Iˇ cuꞈ hawˇ-eu dzaˇ maˬ jaˆ-eu bawˇ tsahˬ-ahˇ bi shiˇ-eu lehˇ, Iˇjiˇtuˆ miˇ kʼahˬ laꞈ kʼoeˇ neh nga maꞈ-ahˇ nawˇ aˬ jeˬ gʼeh sheuˬ doˆ laꞈ te. Dzaˇ heu deuˬ-ahˇ nga maꞈ maˬ paˇ dzaˬ nahˇ miˇ-a.”

⁶ Kʼoeˇ ngeh, Sahˬpaˬ Miˬyehˇ aˬ yawꞈ maꞈ jawˇ gaˇ doꞈ kʼaˆ-eu aˇ lawˇ pyehˬ gʼeh leꞈ-awˇ, Iˇsaˬleˬlaˆ tsawˇ haˬ gʼawˬ mya ni aˇ lawˇ neh bi toˆ sehꞈ-eu meh.

⁷ Iˇsaˬleˬlaˆ tsawˇ haˬ deuˬ Moˇseˬ jawˇ gaˇ laˇ-awˇ ehˇ-eu, “Sahˬpaˬ Miˬyehˇ hawˇ-eu nawˬ-ahˇ iˬ baˇ taˬ-eu laꞈ kʼoeˇ nga maꞈ iˬ baˇ mˇ-euˬ ma. Aˇ lawˇ heu deuˬ byoˆ-iˇ ni Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ.” Kʼoeˇ ngeh, Iˇsaˬleˬlaˆ tsawˇ haˬ deuˬ gʼaˇ duˬ Moˇseˬ guiˬ lahˬ shaˇ-euˬ meh.

⁸ Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Guiˬ shuiˇ aˇ lawˇ mawˇ kawˇ tiˬ kawˇ tehˆ-awˇ, daˇ kawˬ ka tuˇ-awˇ bi ceuˬ-awˬ. Aˇ lawˇ kʼaˇ bi toˆ-euˬ tsawˇ haˬ deuˬ kʼoeˇ gaˇ haw ngeh, taˬ leˇ tehꞈ-a.”

⁹ Kʼoeˇ ngeh, Moˇseˬ guiˬ shuiˇ aˇ lawˇ mawˇ kawˇ tehˆ-awˇ, daˇ kawˬ ka tuˇ-awˇ bi ceuˬ-euˬ meh. Aˇ lawˇ bi toˆ-euˬ tsawˇ haˬ deuˬ kʼoeˇ gaˇ haw ngeh, taˬ leˇ-euˬ meh.

Hawˇlaˆ gawˬ jawˬ-ahˇ neh Mawˇbaˆ tsawˇ haˬ deuˬ jawˇ-eu deh kʼawꞈ-ahˇ iˇ-euˬ

¹⁰ Iˇsaˬleˬlaˆ tsawˇ haˬ deuˬ mehˬ hu paw iˇ gʼeh-awˇ, Awˇboˆ lehˇ kuˇ-eu jawˇ duˬ-ahˇ jawˇ naˬ-euˬ meh.

¹¹ Kʼoeˇ gaˇ neh naˇ, aˬ yawꞈ maꞈ paˇ doˆ-iˇ-awˇ, Mawˇbaˆ miˇ kʼahˬ-euˬ nahˇ ma doˆ kʼeh paw, bawˇ tsahˬ bawˇ dahˇ laꞈ kʼoeˇ jaˆ-eu Aˬbaˬleˬ pu coeˬ-ahˇ jawˇ naˬ-euˬ meh.

¹² Kʼoeˇ gaˇ neh naˇ, Zaˬyehˆ deh kʼawꞈ-ahˇ aˬ yawꞈ maꞈ paˇ jawˇ naˬ-euˬ meh.

¹³ Kʼoeˇ naˇ, aˬ yawꞈ maꞈ paˇ doˆ-iˇ-awˇ, Aˬmawˇliˆ miˇ kʼahˬ-ahˇ keuˆ ni jaˆ tawꞈ-eu bawˇ tsahˬ bawˇ dahˇ laꞈ kʼoeˇ, Aˬnoˬ lawˇ baˬ-euˬ laꞈ taˆ paw pyawˬ-ahˇ jawˇ naˬ-euˬ meh. (Aˬnoˬ lawˇ baˬ-aˬ, Mawˇbaˆ miˇ kʼahˬ hawˇ-eu Aˬmawˇliˆ miˇ kʼahˬ-euˬ miˇ kaˬ pyeuꞈ-eu meh.)

¹⁴ Kʼoeˇ miˇ neh, Sahˬpaˬ Miˬyehˇ-euˬ Guiˇ deuˆ-eu Sahˬ boꞈ laꞈ kʼoeˇ, Suˇpahˇ gahˬ kaˬ-ahˇ jaˆ-eu Gʼaˬhehˇbaˬ meuˬ hawˇ-eu deh kʼawꞈ deuˬ maˬ ehˇ, Aˬnoˬ lawˇ baˬ hawˇ-eu deh kʼawꞈ deuˬ maˬ ehˇ,

¹⁵ Aˇlaˆ lehˇ kuˇ-eu jawˇ duˬ hawˇ-eu Mawˇbaˆ miˇ kʼahˬ-ahˇ keuˆ ni jeˇ-awˇ, gaˇ toeˬ ui cuiˆ toeˬ toeˬ-ehˇ jaˆ-eu deh kʼawꞈ deuˬ maˬ ehˇ, boꞈ ahˇ taˬ-euˬ meh.

¹⁶ Kʼoeˇ gaˇ neh naˇ, Lah duˬ lehˇ kuˇ-eu jawˇ duˬ-ahˇ aˬ yawꞈ maꞈ iˇ-euˬ meh. Jawˇ duˬ kʼoeˇ tsahˇ-ahˇ, Moˇseˬ-ahˇ Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ-ahˇ kuˇ uiˬ-awˬ. Aˬ yawꞈ maꞈ-ahˇ ngaˇ iˇ cuꞈ bi dawˇ ma.”

¹⁷ Kʼoeˇ ngeh, Iˇsaˬleˬlaˆ tsawˇ haˬ deuˬ heu loꞈ-ehˇ caˇ dawˬ caˇ-euˬ meh. “Lah duˬ-oˇ, iˇ cuꞈ bi doˆ le-awˬ. Nga maꞈ heu loꞈ-ehˇ caˇ-eu ma.

¹⁸ Sahˬ paˬ deuˬ neh duˬ-euˬ lah duˬ, Iˇsaˬleˬlaˆ aˬ yuiꞈ aˬ tsu deuˬ neh duˬ-euˬ lah duˬ, sahˬ paˬ-euˬ jmˬ hawˇ-eu aˬ yawꞈ maꞈ-euˬ gawˬ yoeˬ yuˇ-awˇ duˬ-euˬ lah duˬ.” Bawˇ tsahˬ bawˇ dahˇ kʼoeˇ tsahˇ-ahˇ neh, Maˬtaˬnaˬ-ahˇ aˬ yawꞈ maꞈ iˇ-euˬ meh.

¹⁹ Kʼoeˇ gaˇ neh naˇ, Naˬhaˬleˬlaˇ-ahˇ aˬ yawꞈ maꞈ iˇ-awˇ, Naˬhaˬleˬlaˇ-ahˇ neh naˇ, Baˬmo-ahˇ iˇ-euˬ meh.

²⁰ Baˬmo-ahˇ neh naˇ, Mawˇbaˆ miˇ kʼahˬ-ahˇ jaˆ-eu deh kʼawꞈ-ahˇ aˬ yawꞈ maꞈ iˇ-euˬ meh. Deh kʼawꞈ kʼoeˇ kʼawꞈ-aˬ, bawˇ tsahˬ bawˇ dahˇ dawˬ peh jaˆ-eu Piˇsaˬgaˬ gawˬ jawˬ uˬ du-euˬ laꞈ oˆ paw dzeˇ jaˆ-eu meh.

Sahˬ paˬ Siˇhoˬ hawˇ-eu sahˬ paˬ Awˇgaˆ-ahˇ guiˇ deuˆ gʼaˬ-euˬ

²¹ Iˇsaˬleˬlaˆ tsawˇ haˬ deuˬ Aˬmawˇliˆ sahˬ paˬ Siˇhoˬ jawˇ gaˇ tsawˇ haˬ pyehˬ gʼeh-awˇ, heu loꞈ-ehˇ dawˬ tsaꞈ bi tsaꞈ leˇ-euˬ meh.

²² “Naw maꞈ-euˬ miˇ kʼahˬ laꞈ kʼoeˇ nga maꞈ-ahˇ bi cah tsehˆ laꞈ-awˬ. Nga maꞈ hawˇ-eu nga maꞈ-euˬ jeˬ zaˬ deuˬ gaˇ jawˬ caw caw-ehˇ tehꞈ-ehˇ cah-awˇ, naw maꞈ-euˬ deh yaˇ hawˇ-eu aˬ gaꞈ yaˇ kmˇ deuˬ-ahˇ maˬ iˇ uˇ-eu uˬ taꞈ, naw maꞈ-euˬ lah duˬ-ahˇ iˇ cuꞈ maˬ kʼawꞈ dawˇ ni cah ma. Naw maꞈ-euˬ miˇ kʼahˬ maˬ iˇ dzeuˇ kʼoeˇ keuˆ ni, gaˇ jawˬ caw caw-ehˇ tehꞈ-ehˇ cah ma.”

²³ Ehˇ kʼawꞈ, Siˇhoˬ-aˬ, Iˇsaˬleˬlaˆ tsawˇ haˬ deuˬ-ahˇ aˬ yawꞈ-euˬ miˇ kʼahˬ laꞈ kʼoeˇ maˬ bi cah tsehˆ-a. Aˬ yawꞈ-euˬ guiˇ maꞈ-ahˇ aˬ yawꞈ kuˇ uiˬ-awˇ, bawˇ tsahˬ bawˇ dahˇ laꞈ kʼoeˇ jaˆ-eu Yaˬhaˇ meuˬ-ahˇ iˇ-awˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ-iˇ-euˬ meh.

²⁴ Ehˇ kʼawꞈ, aˬ yawꞈ maꞈ tsawˇ haˬ gʼawˬ mya ni Iˇsaˬleˬlaˆ tsawˇ haˬ neh bi deuˆ sehꞈ-awˇ, aˬ yawꞈ maꞈ-euˬ miˇ kʼahˬ Aˬnoˬ lawˇ baˬ-ahˇ neh Jaˬboˆ lawˇ baˬ-ahˇ keuˆ ni Iˇsaˬleˬlaˆ tsawˇ haˬ deuˬ neh bi deuˆ geuꞈ-euˬ meh. Aˬmoˬ tsawˇ jeuˬ-euˬ miˇ kaˬ-ahˇ keuˆ ni tehꞈ-ehˇ Iˇsaˬleˬlaˆ tsawˇ haˬ deuˬ guiˇ deuˆ keuˆ-euˬ meh. Aˬ jeˬ miˇ neh ehˇ naˇ, Aˬmoˬ miˇ kʼahˬ-ahˇ guiˇ guiˇ maꞈ gʼawˬ mya ni loꞈ tsoeˬ taˬ-euˬ meh,

²⁵ Heˬshaˬboˬ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu meuˬ dawˬ tawˆ luꞈ ahˇ leˇ-ehˇ, Aˬmawˇliˆ tsawˇ haˬ-euˬ meuˬ dawˬ tawˆ luꞈ-ahˇ, Iˇsaˬleˬlaˆ tsawˇ haˬ deuˬ deuˆ gʼaˬ-awˇ, kʼoeˇ gaˇ jawˇ-euˬ meh.

²⁶ Heˬshaˬboˬ meuˬ-aˬ, Aˬmawˇliˆ sahˬ paˬ Siˇhoˬ-euˬ dzoeˬ dzaˬ nuiˇ mahˬ jaˆ-eu meuˬ pyeuꞈ-eu meh. Siˇhoˬ-aˬ, dzeuˇ laˇ ngeh Mawˇbaˆ sahˬ paˬ-ahˇ guiˇ deuˆ gʼaˬ-awˇ, Mawˇbaˆ miˇ kʼahˬ Aˬnoˬ lawˇ baˬ-ahˇ keuˆ ni deuˆ gʼaˬ-euˬ meh.

²⁷ Kʼoeˇ miˇ neh, heu loꞈ-ehˇ caˇ dawˬ caˇ taˬ-euˬ jaˆ-eu meh. “Sahˬ paˬ Siˇhoˬ-euˬ Heˬshaˬboˬ meuˬ-ahˇ laˇ-awˬ.

²⁸ Meuˬ kʼoeˇ meuˬ paˇ tsoˆ muiˬ taˬ-euˬ gaˇ aˬ dui mawˇ mawꞈ nya. Aˇ hu, Heˬshaˬboˬ meuˬ heu meuˬ-ahˇ neh, Siˇhoˬ-euˬ guiˇ maꞈ deuˬ miˬ dzaˬ loꞈ-ehˇ doˆ-iˇ-awˇ, Mawˇbaˆ miˇ kʼahˬ Aˇlaˆ meuˬ-ahˇ laˆ cawˆ-awˇ, Aˬnoˬ tahˬ mehˇ gawˬ jawˬ-ahˇ dzoeˬ-euˬ meh.

²⁹ Mawˇbaˆ tsawˇ haˬ deuˬ-oˇ, naw maꞈ gʼaˇ duˬ aˇ naˆ ni guˆ paˬ-ehˇ gʼeh-eu nga. Sheˬmoˇshaˆ-ahˇ uˬ duˬ tahˬ-eu naw maꞈ ya luˬ ya seˇ-iˇ-euˬ maˬ ngeuˇ nya loˇ. Naw maꞈ-euˬ miˬyehˇ naw maꞈ-ahˇ bi cehˆ byoˆ laꞈ-awˇ, Zaˬ miˬ zaˬ deuˬ-ahˇ Aˬmawˇliˆ sahˬ paˬ neh bi nyehꞈ geuꞈ-euˬ meh.

³⁰ Ehˇ kʼawꞈ, nymˬ-mˇ aˬ yawꞈ maꞈ-euˬ zaˬ deuˬ uˆ deuˬ-ahˇ Heˬshaˬboˬ-ahˇ neh Diˇboˬ-ahˇ doˆ ni maˬ ehˇ, Naˬshiˬ-ahˇ neh Meˬdeˬbaˬ dawˬ peh jaˆ-eu Nawˇpaˬ-ahˇ keuˆ ni maˬ ehˇ, Nga maꞈ laˆ luˬ laˆ seˇ nehˬ jiˇ-euˬ ma.”

³¹ Kʼoeˇ ngeh, Iˇsaˬleˬlaˆ tsawˇ haˬ deuˬ Aˬmawˇliˆ miˇ kʼahˬ laꞈ kʼoeˇ jawˇ luꞈ-eu meh.

³² Kʼoeˇ naˇ, Moˇseˬ tsawˇ haˬ pyehˬ gʼeh-awˇ, Yaˬzeuˬ meuˬ-ahˇ guiˇ deuˆ leˇ-eu gʼaˇ duˬ bi pyehˆ tseˇ haw leˇ-euˬ meh. Meuˬ kʼoeˇ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu meuˬ deuˬ-ahˇ Iˇsaˬleˬlaˆ tsawˇ haˬ deuˬ deuˆ gʼaˬ-awˇ, kʼoeˇ gaˇ jawˇ-eu Aˬmawˇliˆ tsawˇ haˬ deuˬ-ahˇ teh dzeh-euˬ meh.

³³ Kʼoeˇ naˇ, Iˇsaˬleˬlaˆ tsawˇ haˬ deuˬ Baˬshaˬ meuˬ paw le-eu gaˇ ma caw caw-ehˇ le-euˬ meh. Baˬshaˬ sahˬ paˬ Awˇgaˆ hawˇ-eu aˬ yawꞈ-euˬ guiˇ maꞈ deuˬ Iˇsaˬleˬlaˆ tsawˇ haˬ deuˬ-ahˇ Eˬdiˇliˇ meuˬ-ahˇ guiˇ deuˆ le-eu lehˇ oe-euˬ meh.

³⁴ Moˇseˬ-ahˇ Sahˬpaˬ Miˬyehˇ ehˇ nehˬ-eu, “Aˬ yawꞈ-ahˇ taˬ guˆ. Aˬ yawꞈ-euˬ tsawˇ haˬ dawˬ tawˆ luꞈ hawˇ-eu aˬ yawꞈ-euˬ miˇ kʼahˬ-ahˇ ngaˇ nawˬ-ahˇ bi gʼaˬ leˇ ma. Heˬshaˬboˬ meuˬ-ahˇ jawˇ-awˇ uˆ lahˇ-eu Aˬmawˇliˆ sahˬ paˬ Siˇhoˬ-ahˇ nawˬ neh kʼaˇ jahˇ nehˬ-euˬ loꞈ-ehˇ, aˬ yawꞈ-ahˇ jahˇ nehˬ-awˬ.”

³⁵ Kʼoeˇ naˇ, Awˇgaˆ maˬ ehˇ, aˬ yawꞈ-euˬ aˬ li deuˬ maˬ ehˇ, tiˬ gʼaˬ-iˬ maˬ bi dzeuˇ-iˇ ni Iˇsaˬleˬlaˆ tsawˇ haˬ deuˬ neh bi sehꞈ jiˇ-awˇ, miˇ kʼahˬ kʼoeˇ kʼahˬ-ahˇ deuˆ gʼaˬ-euˬ meh.