Bawˇtsahˬ 2 - Akha

Iˇsaˬleˬlaˆ tsawˇ jeuˬ tsawˇ ca deuˬ-ahˇ jawˇ pyawˬ biˇ nehˬ-euˬ

¹ Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ mehˬ nehˬ tsoˆ nehˬ-euˬ meh.

² Iˇsaˬleˬlaˆ tsawˇ haˬ deuˬ sehˬ gʼawˆ gʼawˆ-awˇ jawˇ ngeh, yawˬ ha-euˬ guiˇ guiˇ maꞈ-euˬ paˇ loˬ paˇ lehˇ hawˇ-eu yawˬ ha-euˬ aˇ jeuˬ-euˬ paˇ loˬ paˇ lehˇ uˬ moˆ ya jawˇ meh. Ngaˇ jawˇ-eu Sehˬ gʼawˆ jawˬ jawˬ-ehˇ aˬ yawꞈ maꞈ-euˬ sehˬ gʼawˆ ya gʼawˆ meh.

³ Yuˇdaˆ-euˬ guiˇ guiˇ maꞈ deuˬ-aˬ, yawˬ ha-euˬ guiˇ guiˇ maꞈ baw baw-ehˇ, yawˬ ha-euˬ paˇ loˬ paˇ lehˇ uˬ moˆ, nahˇ ma doˆ kʼehˬ paw pyawˬ-ahˇ sehˬ gʼawˆ gʼawˆ-awˇ ya jawˇ meh. Yuˇdaˆ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Aˬmiˇnaˬdehˇ-euˬ aˬ li Naˬshoˬ meh.

⁴ Aˬ yawꞈ-euˬ guiˇ maꞈ shiꞈ muiˇ oeˬ heˇ koꞈ yaˇ gʼaˬ byah-eu meh.

⁵ Yuˇdaˆ tsawˇ jeuˬ dawˬ peh Iˇsaˬkaˬ tsawˇ jeuˬ sehˬ gʼawˆ gʼawˆ-awˇ ya jawˇ meh. Iˇsaˬkaˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Zuˇaˆ-euˬ aˬ li Naˬdaˬneˬlaˇ meh.

⁶ Aˬ yawꞈ-euˬ guiˇ maꞈ ngaˬ muiˇ oeˬ heˇ oeˬ yaˇ gʼaˬ byah-eu meh.

⁷ Zeˬbuˬluˬ tsawˇ jeuˬ kʼawꞈ, Yuˇdaˆ tsawˇ jeuˬ dawˬ peh sehˬ gʼawˆ gʼawˆ-awˇ ya jawˇ meh. Zeˬbuˬluˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Heˬloˬ-euˬ aˬ li Eˇliˇbaˆ meh.

⁸ Aˬ yawꞈ-euˬ guiˇ maꞈ ngaˬ muiˇ shiꞈ heˇ oeˬ yaˇ gʼaˬ byah-eu meh.

⁹ Yawˬ ha-euˬ guiˇ maꞈ yawˬ ha baw baw-ehˇ, Yuˇdaˆ-euˬ taˆ-ahˇ kʼaˇ jawˇ-eu tsawˇ haˬ dawˬ tawˆ luꞈ tiˬ seh yehꞈ muiˇ koꞈ heˇ oeˬ yaˇ gʼaˬ byah-eu meh. Aˬ yawꞈ maꞈ-aˬ, aˬ cawˬ mehˬ hu doˆ-iˇ-awˇ, guiˇ daˬ ya daˬ-eu aˇ muˇ pyeuꞈ-eu meh.

¹⁰ Luˇbeˬ tsawˇ jeuˬ guiˇ maꞈ deuˬ-aˬ, laꞈ oˆ paw pyawˬ-ahˇ, aˬ yawꞈ maꞈ-euˬ paˇ loˬ paˇ lehˇ uˬ moˆ ya jawˇ meh. Luˇbeˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Sheˬduˇlaˬ-euˬ aˬ li Eˇliˇzuˇlaˆ meh.

¹¹ Aˬ yawꞈ-euˬ guiˇ maꞈ oeˬ muiˇ koꞈ heˇ ngaˬ yaˇ gʼaˬ byah-eu meh.

¹² Luˇbeˬ tsawˇ jeuˬ dawˬ peh Suˇmoˬ tsawˇ jeuˬ sehˬ gʼawˆ gʼawˆ-awˇ ya jawˇ meh. Suˇmoˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Zuˇliˇshaˬdehˇ-euˬ aˬ li Sheˬluˇmeˬlaˇ meh.

¹³ Aˬ yawꞈ-euˬ guiˇ maꞈ ngaˬ muiˇ gʼoeˬ heˇ smˬ yaˇ gʼaˬ byah-eu meh.

¹⁴ Gaˆ tsawˇ jeuˬ kʼawꞈ, Luˇbeˬ tsawˇ jeuˬ dawˬ peh ya jawˇ meh. Gaˆ tsawˇ haˬ kʼoeˇ taˆ aˬ yuiꞈ geuꞈ-eu gʼaˬ-aˬ, Doeˬlaˇ-euˬ aˬ li Eˇlaˬsaˆ meh.

¹⁵ Aˬ yawꞈ-euˬ guiˇ maꞈ oeˬ muiˇ ngaˬ heˇ koꞈ yaˇ ngaˬ tseˇ gʼaˬ byah-eu meh

¹⁶ Yawˬ ha-euˬ guiˇ maꞈ yawˬ ha baw baw-ehˇ, Luˇbeˬ-euˬ taˆ-ahˇ kʼaˇ jawˇ-eu tsawˇ haˬ dawˬ tawˆ luꞈ, tiˬ seh ngaˬ muiˇ tiˬ heˇ oeˬ yaˇ ngaˬ tseˇ gʼaˬ byah-eu meh. Aˬ yawꞈ maꞈ-aˬ, aˬ cawˬ mehˬ hu ya doˆ-iˇ-eu aˇ muˇ nyiˬ muˇ tiˬ muˇ pyeuꞈ-eu meh.

¹⁷ Kʼoeˇ naˇ, mehˬ hu paw doˆ-iˇ-eu guiˇ maꞈ nyiˬ maꞈ hawˇ-eu, mehˬ nah paw cah-eu guiˇ maꞈ nyiˬ maꞈ yaw kaˬ-ahˇ, Leˬbiˇ tsawˇ jeuˬ Sehˬ gʼawˆ baꞈ-awˇ ya doˆ-iˇ meh. Aˬ yawꞈ maꞈ jawˇ naˬ ngeh, yawˬ ha-euˬ paˇ loˬ paˇ lehˇ uˬ moˆ jawˇ pyawˬ baw baw-ehˇ jawˇ-eu loꞈ-ehˇ, doˆ-iˇ ngeh kʼawꞈ kʼoeˇ loꞈ-ehˇ jawˇ duˬ tsaˬ ni ya doˆ-iˇ meh.

¹⁸ Eˇpaˬleˬ guiˇ maꞈ deuˬ-aˬ, nahˇ ma doˆ kʼehˬ paw pyawˬ-ahˇ, aˬ yawꞈ maꞈ-euˬ paˇ loˬ paˇ lehˇ uˬ moˆ sehˬ gʼawˆ gʼawˆ-awˇ ya jawˇ meh. Eˇpaˬleˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Aˬmiˇhuˆ-euˬ aˬ li Iˇliˇshaˬmaˇ meh.

¹⁹ Aˬ yawꞈ-euˬ guiˇ maꞈ oeˬ muiˇ ngaˬ yaˇ gʼaˬ byah-eu meh.

²⁰ Eˇpaˬleˬ tsawˇ jeuˬ dawˬ peh, Maˬnaˇseˬ tsawˇ jeuˬ sehˬ gʼawˆ gʼawˆ-awˇ ya jawˇ meh. Maˬnaˇseˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Peˬdaˬzuˇ-euˬ aˬ li Gaˬmaˬleˬlaˇ meh.

²¹ Aˬ yawꞈ-euˬ guiˇ maꞈ smˬ muiˇ nyiˬ heˇ nyiˬ yaˇ gʼaˬ byah-eu meh.

²² Beˬyaˬmiˬ tsawˇ jeuˬ kʼawꞈ, Eˇpaˬleˬ tsawˇ jeuˬ dawˬ peh sehˬ gʼawˆ gʼawˆ-awˇ ya jawˇ meh. Beˬyaˬmiˬ tsawˇ haˬ kʼoeˇ taˆ aˬ yuiꞈ geuꞈ-eu gʼaˬ-aˬ, Giˇdawˇniˆ-euˬ aˬ li Aˬbiˇdaˬ meh.

²³ Aˬ yawꞈ-euˬ guiˇ maꞈ smˬ muiˇ ngaˬ heˇ oeˬ yaˇ gʼaˬ byah-eu meh.

²⁴ Yawˬ ha-euˬ guiˇ maꞈ yawˬ ha baw baw-ehˇ Eˇpaˬleˬ-euˬ taˆ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ tiˬ seh yehꞈ heˇ tiˬ yaˇ gʼaˬ byah-eu meh. Aˬ yawꞈ maꞈ-aˬ mehˬ hu paw doˆ-iˇ-eu aˇ muˇ smˬ muˇ tiˬ muˇ pyeuꞈ-eu meh.

²⁵ Daˬ-euˬ guiˇ maꞈ deuˬ-aˬ, laꞈ taˆ paw pyawˬ-ahˇ, aˬ yawꞈ maꞈ-euˬ paˇ loˬ paˇ lehˇ uˬ moˆ sehˬ gʼawˆ gʼawˆ-awˇ ya jawˇ meh. Daˬ tsawˇ haˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Aˬmiˇshaˬdehˇ-euˬ aˬ li Aˬheˇzaˬ meh.

²⁶ Aˬ yawꞈ-euˬ guiˇ maꞈ koꞈ muiˇ nyiˬ heˇ shiꞈ yaˇ gʼaˬ byah-eu meh.

²⁷ Daˬ tsawˇ jeuˬ-euˬ dawˬ peh, Aˬsaˬ tsawˇ jeuˬ sehˬ gʼawˆ gʼawˆ-awˇ ya jawˇ meh. Aˬsaˬ tsawˇ haˬ kʼoeˇ taˆ aˬ yuiꞈ geuꞈ-eu gʼaˬ-aˬ, Awˇkaˬlaˇ-euˬ aˬ li Paˬjeˬlaˇ meh.

²⁸ Aˬ yawꞈ-euˬ guiˇ maꞈ oeˬ muiˇ tiˬ heˇ ngaˬ yaˇ gʼaˬ byah-eu meh.

²⁹ Naˬtaˬliˇ tsawˇ jeuˬ kʼawꞈ, Daˬ tsawˇ jeuˬ dawˬ peh sehˬ gʼawˆ gʼawˆ-awˇ ya jawˇ meh. Naˬtaˬliˇ tsawˇ haˬ kʼoeˇ taˆ aˬ yuiꞈ geuꞈ-eu gʼaˬ-aˬ, Eˇnaˬ-euˬ aˬ li Aˬhiˇlaˬ meh.

³⁰ Aˬ yawꞈ-euˬ guiˇ maꞈ ngaˬ muiˇ smˬ heˇ oeˬ yaˇ gʼaˬ byah-eu meh.

³¹ Daˬ-euˬ taˆ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ tiˬ seh ngaˬ muiˇ shiꞈ heˇ koꞈ yaˇ gʼaˬ byah-eu meh. Aˬ yawꞈ maꞈ-aˬ, yawˬ ha-euˬ paˇ loˬ paˇ lehˇ uˬ moˆ aˬ cawˬ mehˬ nah nah saˬ ya doˆ-iˇ-eu aˇ muˇ pyeuꞈ-eu meh.

³² Aˇ muˇ baw baw-ehˇ, guiˇ guiˇ maꞈ deuˬ laꞈ kʼoeˇ tsawˇ myahˇ kʼaˇ ahˇ-eu Iˇsaˬleˬlaˆ tsawˇ haˬ dawˬ tawˆ luꞈ koꞈ seh smˬ heˇ ngaˬ yaˇ ngaˬ tseˇ gʼaˬ byah-eu meh.

³³ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Leˬbiˇ tsawˇ haˬ deuˬ-ahˇ Iˇsaˬleˬlaˆ tsawˇ haˬ nui deuˬ nehˬ-ehˇ tiˬ kawˆ loꞈ-ehˇ tsawˇ myahˇ maˬ yuˇ keuˬ-aˬ.

³⁴ Sahˬpaˬ Miˬyehˇ neh Moˇseˬ-ahˇ dawˬ kʼaˇ biꞈ nehˬ-euˬ yawˬ jeˬ na luꞈ-ahˇ, Iˇsaˬleˬlaˆ tsawˇ haˬ deuˬ mˇ-euˬ meh. Aˬ yawꞈ maꞈ jawˇ naˬ ngeh, yawˬ gʼaˬ na luꞈ yawˬ ha-euˬ paˇ loˬ paˇ lehˇ uˬ moˆ jawˇ-awˇ, aˬ yawꞈ maꞈ doˆ-iˇ ngeh yawˬ ha-euˬ aˇ jeuˬ nehˬ-ehˇ yawˬ ha doˆ-iˇ-eu meh.