Bawˇtsahˬ 19 - Akha

Mawˇ neˇ mawˇ kʼaˇ yaw neˇ dzah puiˆ-euˬ kʼaˬ lehˇ

¹ Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh. “Heu-aˬ, Sahˬpaˬ Miˬyehˇ neh biꞈ taˬ-euˬ, naw maꞈ ya caw teh-eu zahˇ sahˇ kʼoꞈ pyeuꞈ-eu meh.

² Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Tiˬ jawˇ-iˬ maˬ kʼehˇ dzaˬ haw-euˬ maˇ byawꞈ maˬ baw-eu mawˇ neˇ mawˇ kʼaˇ yaw neˇ tiˬ mawˇ tsahˇ laꞈ-awˇ,

³ piˇ ma Eˇlaˬzaˬ-ahˇ tsahˇ nehˬ-awˬ. Mawˇ neˇ kʼoeˇ mawˇ-ahˇ pu pu dzeˇ tsahˇ doˆ gʼeh-awˇ ya sehꞈ meh.

⁴ Kʼoeˇ naˇ, Eˇlaˬzaˬ gʼaˬ mawˇ neˇ kʼoeˇ mawˇ-euˬ shiˬ ui cuiˆ yuˇ-awˇ, aˬ yawꞈ-euˬ laꞈ noeˇ neh Sehˬ gʼawˆ jaˆ-eu paw ya byaˆ shehˬ meh.

⁵ Baˆ kʼoˆ, shaˬ jiˇ, shiˬ hawˇ-eu baw uˇ baw ma dawˬ tawˆ luꞈ ahˇ leˇ-ehˇ, mawˇ neˇ kʼoeˇ mawˇ mawˇ lah-ehˇ piˇ ma-euˬ mehˬ shi ya dzah puiˆ meh.

⁶ Kʼoeˇ naˇ, siˬ daˬ miˬ shuˬ, hiˇ soˆ baw nmˬ, saˬ kahˇ neˇ, heu deuˬ yuˇ-awˇ, miˬ dzaˬ-ahˇ ya dzeh puiˆ meh.

⁷ Kʼoeˇ naˇ, yawˬ ha-euˬ mehˬ tsoeˬ lehˬ tsiˬ-awˇ, aˬ yawˇ yawꞈ iˇ cuꞈ kuˬ shehˬ gʼaˬ ngeh, pu-ahˇ ya gʼoꞈ uˇ le meh. Ehˇ kʼawꞈ, aˬ yawꞈ-aˬ, uˬ ciꞈ uˬ taw paw keuˆ ni maˬ shawˇ-eu tsawˇ haˬ pyeuꞈ-eu meh.

⁸ Mawˇ neˇ kʼoeˇ mawˇ-ahˇ miˬ dzaˬ dzah puiˆ-euˬ tsawˇ haˬ kʼoeˇ gʼaˬ kʼawꞈ, yawˬ ha-euˬ mehˬ tsoeˬ ya lehˬ tsiˬ-awˇ, yawˬ haˇ yawˬ ha iˇ cuꞈ ya kuˬ shehˬ meh. Aˬ yawꞈ kʼawꞈ, uˬ ciꞈ uˬ taw paw keuˆ ni maˬ shawˇ-eu tsawˇ haˬ pyeuꞈ-eu meh.

⁹ Zahˇ sahˇ kʼoꞈ-ahˇ tsaˬ ni shawˇ-eu tsawˇ haˬ tiˬ gʼaˬ mawˇ neˇ kʼoeˇ mawˇ puiˆ-euˬ kʼaˬ lehˇ kʼoeˇ tawˆ-awˇ, pu pu dzeˇ, jawˇ duˬ yaw shawˇ tiˬ tsahˇ-ahˇ ya tawˆ taˬ meh. Iˇsaˬleˬlaˆ tsawˇ haˬ aˇ maꞈ aˇ muˇ gʼaˇ duˬ, kʼaˬ lehˇ kʼoeˇ, kʼoeˇ tsahˇ-ahˇ bi jaˆ-awˇ, iˬ baˇ shawˇ-eu zahˇ jahˇ gaˇ geuꞈ-eu iˇ cuꞈ lehˬ hmˬ ngeh ya zmˬ meh.

¹⁰ Kʼaˬ lehˇ tawˆ-eu tsawˇ haˬ kʼoeˇ gʼaˬ yawˬ ha-euˬ mehˬ tsoeˬ ya lehˬ tsiˬ meh. Ehˇ kʼawꞈ, aˬ yawꞈ-aˬ, uˬ ciꞈ uˬ taw paw keuˆ ni maˬ shawˇ-eu tsawˇ haˬ pyeuꞈ-eu meh. Zahˇ sahˇ kʼoꞈ heu hmˬ-aˬ, mehˬ hu paw dehꞈ daˆ leꞈ-eu aˇ yamˬ dawˬ tawˆ luꞈ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ maˬ ehˇ, aˬ yawꞈ maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ-ahˇ maˬ ehˇ, taꞈ-eu meh.

Tsawˇ shiˇ-ahˇ toeˬ ciˆ-eu

¹¹ “Tsawˇ shiˇ-ahˇ kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, shiꞈ nah keuˆ ni maˬ shawˇ-eu tsawˇ haˬ pyeuꞈ-eu meh.

¹² Smˬ nah aˬ yawꞈ nah hawˇ-eu shiꞈ nah aˬ yawꞈ nah-ahˇ, bi shawˇ laˇ-eu iˇ cuꞈ neh yawˬ haˇ yawˬ ha shawˇ gʼaˬ miˇ tsa, aˬ yawꞈ shawˇ laˇ-eu meh. Ehˇ kʼawꞈ, smˬ nah kʼoeˇ nah hawˇ-eu shiꞈ nah kʼoeˇ nah-ahˇ, yawˬ haˇ yawˬ ha maˬ shawˇ naˇ, shawˇ-eu tsawˇ haˬ maˬ pyeuꞈ laˇ-a.

¹³ Tsawˇ shiˇ-ahˇ toeˬ ciˆ gʼaˬ-awˇ, yawˬ haˇ yawˬ ha maˬ mˇ shawˇ-eu tsawˇ haˬ-aˬ, maˬ shawˇ-eu tsawˇ haˬ pyeuꞈ-eu meh. Aˬ jeˬ miˇ neh ehˇ naˇ, bi shawˇ laˇ-eu iˇ cuꞈ aˬ yawꞈ kʼoeˇ taˆ maˬ shehˆ daˆ-euˬ miˇ neh meh. Sahˬpaˬ Miˬyehˇ-euˬ Sehˬ gʼawˆ-ahˇ aˬ yawꞈ laˆ jawꞈ-euˬ miˇ neh, aˬ yawꞈ-ahˇ Miˬyehˇ-euˬ tsawˇ haˬ lehˇ maˬ paˇ sawˇ nya meh.

¹⁴ “Sehˬ gʼawˆ tiˬ gʼawˆ na laꞈ kʼoeˇ tsawˇ haˬ tiˬ gʼaˬ na shiˇ naˇ, tsawˇ haˬ shiˇ ngeh sehˬ gʼawˆ kʼoeˇ gʼawˆ laꞈ kʼoeˇ kʼaˇ jawˇ-euˬ tsawˇ haˬ dawˬ tawˆ luꞈ maˬ ehˇ, sehˬ gʼawˆ kʼoeˇ gʼawˆ laꞈ kʼoeˇ le uˇ-euˬ tsawˇ haˬ maˬ ehˇ, shiꞈ nah keuˆ ni maˬ shawˇ-eu tsawˇ haˬ pyeuꞈ-eu meh.

¹⁵ Sehˬ gʼawˆ kʼoeˇ gʼawˆ laꞈ kʼoeˇ kʼaˇ jaˆ-eu kʼmˬ pymˬ maˬ pymˬ tehˬ taˬ-euˬ ciˬ cuˇ hawˇ-eu oeˬ lahˬ dawˬ tawˆ luꞈ kʼawꞈ, maˬ shawˇ-eu mˇ myawˬ pyeuꞈ-eu meh.

¹⁶ Aˬ cawˬ neh bi sehꞈ-awˇ laꞈ nyiˇ paw shiˇ taˬ-euˬ tsawˇ haˬ-ahˇ maˬ ehˇ, tsawˇ haˬ-euˬ shaˬ yoeˬ-ahˇ maˬ ehˇ, lmˬ bymˇ-ahˇ maˬ ehˇ, kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, shiꞈ nah keuˆ ni maˬ shawˇ-eu tsawˇ haˬ pyeuꞈ-eu meh.

¹⁷ “Maˬ shawˇ-eu deuˬ-ahˇ mˇ shawˇ nehˬ ngeh, iˬ baˇ shawˇ-eu gʼaˇ duˬ dzah puiˆ-euˬ mawˇ neˇ mawˇ kʼaˇ yaw neˇ kʼoeˇ mawˇ-euˬ kʼaˬ lehˇ ui cuiˆ yuˇ-awˇ, oeˬ lahˬ-ahˇ dawˆ ahˇ-awˇ, cawˬ biˬ-ahˇ kʼawꞈ-euˬ iˇ cuꞈ ya shehˆ ahˇ meh.

¹⁸ Shawˇ-eu tsawˇ haˬ tiˬ gʼaˬ hiˇ soˆ baw nmˬ yuˇ-awˇ, iˇ cuꞈ kʼoeˇ laꞈ kʼoeˇ dehˬ duiˆ-awˇ, sehˬ gʼawˆ kʼoeˇ gʼawˆ-ahˇ maˬ ehˇ, sehˬ gʼawˆ laꞈ kʼoeˇ kʼaˇ jaˆ-eu jeˬ dawˬ tawˆ luꞈ-ahˇ maˬ ehˇ, sehˬ gʼawˆ kʼoeˇ gʼawˆ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ maˬ ehˇ, ya byaˆ shehˬ meh. Kʼoeˇ naˇ, tsawˇ haˬ-euˬ shaˬ yoeˬ-ahˇ maˬ ehˇ, tsawˇ shiˇ-ahˇ maˬ ehˇ, lmˬ bymˇ-ahˇ maˬ ehˇ, toeˬ ciˆ-euˬ tsawˇ haˬ-ahˇ, shawˇ-eu tsawˇ haˬ tiˬ gʼaˬ iˇ cuꞈ kʼoeˇ neh ya byaˆ shehˬ nehˬ meh.

¹⁹ Smˬ nah aˬ yawꞈ nah hawˇ-eu shiꞈ nah aˬ yawꞈ nah-ahˇ, shawˇ-eu tsawˇ haˬ tiˬ gʼaˬ maˬ shawˇ-eu tsawˇ haˬ kʼoeˇ gʼaˬ-ahˇ iˇ cuꞈ kʼoeˇ neh ya byaˆ shehˬ nehˬ meh. Shiꞈ nah aˬ yawꞈ nah-ahˇ maˬ shawˇ-eu tsawˇ haˬ kʼoeˇ gʼaˬ-ahˇ aˬ yawꞈ maꞈ mˇ shawˇ nehˬ-awˇ, tsawˇ haˬ kʼoeˇ gʼaˬ yawˬ ha-euˬ mehˬ tsoeˬ lehˬ tsiˬ-awˇ, yawˬ haˇ yawˬ ha iˇ cuꞈ ya kuˬ shehˬ meh. Kʼoeˇ naˇ, kʼoeˇ ngeh nah nahˇ ma ga ahˇ ngeh aˬ yawꞈ shawˇ laˇ-eu meh.

²⁰ “Tsawˇ haˬ tiˬ gʼaˬ na zahˇ sahˇ kʼoꞈ-ahˇ taꞈ leˇ-eu laꞈ kʼoeˇ maˬ shawˇ-eu tsawˇ haˬ pyeuꞈ laˇ ngeh, yawˬ haˇ yawˬ ha maˬ mˇ shawˇ naˇ, maˬ shawˇ-a. Aˬ jeˬ miˇ neh ehˇ naˇ, bi shawˇ laˇ-eu iˇ cuꞈ aˬ yawꞈ kʼoeˇ taˆ maˬ shehˆ daˆ-euˬ miˇ neh meh. Aˬ yawꞈ-aˬ, Sahˬpaˬ Miˬyehˇ-euˬ Sehˬ gʼawˆ-ahˇ laˆ jawꞈ-euˬ tsawˇ haˬ pyeuꞈ-eu miˇ neh, aˬ yawꞈ-ahˇ Miˬyehˇ-euˬ tsawˇ haˬ lehˇ maˬ paˇ sawˇ nehˬ nya meh.

²¹ Mehˬ hu paw dehꞈ daˆ leꞈ-eu aˇ yamˬ dawˬ tawˆ luꞈ laꞈ kʼoeˇ, zahˇ sahˇ kʼoꞈ heu hmˬ-ahˇ naw maꞈ ya caw teh meh. Bi shawˇ laˇ-eu iˇ cuꞈ byaˆ shehˬ nehˬ gʼaˬ-euˬ tsawˇ haˬ kʼoeˇ gʼaˬ kʼawꞈ, yawˬ ha-euˬ mehˬ tsoeˬ ya lehˬ tsiˬ meh. Iˇ cuꞈ kʼoeˇ-ahˇ kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, uˬ ciꞈ uˬ taw paw keuˆ ni maˬ shawˇ-eu tsawˇ haˬ pyeuꞈ-eu meh.

²² Maˬ shawˇ-eu tsawˇ haˬ neh kʼaˇ toeˬ ciˆ leˇ-euˬ aˬ geu jeˬ maˬ kaˬ, maˬ shawˇ-a. Kʼoeˇ loꞈ-ehˇ gʼeh-eu jeˬ-ahˇ paˇ toeˬ ciˆ leˇ-eu tsawˇ haˬ kʼawꞈ, uˬ ciꞈ uˬ taw paw keuˆ ni maˬ shawˇ-eu tsawˇ haˬ pyeuꞈ-eu meh.”