Bawˇtsahˬ 17 - Akha

Aˬloˬ-euˬ gawˬ yoeˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ kʼoeˇ taˆ aˬ yuiꞈ aˬ tsu geuꞈ-eu deuˬ aˬ yawꞈ gʼaˬ yawꞈ tiˬ gʼaˬ-euˬ gawˬ yoeˬ tiˬ yoeˬ doˇ-ehˇ, gawˬ yoeˬ tseˇ nyiꞈ yoeˬ yuˇ laꞈ-awˬ. Gawˬ yoeˬ aˬ yawꞈ yoeˬ yawꞈ kʼoeˇ taˆ yawˬ ha-euˬ tsawˇ myahˇ bi boꞈ-awˬ.

³ Leˬbiˇ tsawˇ jeuˬ-euˬ gawˬ yoeˬ kʼoeˇ taˆ Aˬloˬ-euˬ tsawˇ myahˇ boꞈ-awˬ. Tsawˇ jeuˬ aˬ yawꞈ jeuˬ yawꞈ laꞈ kʼoeˇ aˬ yuiꞈ geuꞈ-eu gʼaˬ, gawˬ yoeˬ tiˬ yoeˬ ya yuˇ laꞈ meh.

⁴ Gawˬ yoeˬ kʼoeˇ deuˬ ngaˇ jawˇ-eu Sehˬ gʼawˆ-ahˇ yuˇ laꞈ-awˇ, naw maꞈ-ahˇ ngaˇ tahˬ puˬ le-eu jawˇ duˬ pyeuꞈ-eu Dawˬ ma saˇ jaˇ Bahˬ keuˆ-euˬ mehˬ shi kʼoeˇ tsahˇ-ahˇ bi jaˆ-awˬ.

⁵ Ngaˬ neh tseˇ doˆ-euˬ gʼaˬ-euˬ gawˬ yoeˬ-ahˇ aˇ yehˆ yehˆ laˇ tehꞈ-a. Kʼoeˇ loꞈ-ehˇ jahˇ-eu laꞈ kʼoeˇ, Iˇsaˬleˬlaˆ tsawˇ haˬ deuˬ nawˬ-ahˇ maˬ tsehˆ leˇ ni iˬ baˇ taˬ-eu jeˬ-ahˇ ngaˇ laˆ byoˆ nehˬ ma.”

⁶ Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-awˇ, tsawˇ jeuˬ aˬ yawꞈ jeuˬ yawꞈ kʼoeˇ taˆ aˬ yuiꞈ geuꞈ-eu deuˬ gawˬ yoeˬ tiˬ gʼaˬ tiˬ yoeˬ yuˇ laꞈ-euˬ meh. Gawˬ yoeˬ dawˬ tawˆ luꞈ tseˇ nyiꞈ yoeˬ byah-awˇ, Aˬloˬ-euˬ gawˬ yoeˬ kʼawꞈ keuˬ-eu meh.

⁷ Sehˬ gʼawˆ laꞈ kʼoeˇ jaˆ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ shi, gawˬ yoeˬ kʼoeˇ deuˬ Moˇseˬ yuˇ taˬ-euˬ meh.

⁸ Yawˬ nah yawˬ Sehˬ gʼawˆ laꞈ kʼoeˇ Moˇseˬ uˇ leˇ haw ngeh, Leˬbiˇ tsawˇ jeuˬ-euˬ aˬ da yaw dzahˇ pyeuꞈ-eu Aˬloˬ-euˬ gawˬ yoeˬ-ahˇ aˇ yehˆ yehˆ laˇ-euˬ gaˇ Moˇseˬ ya mawˇ-euˬ meh. Gawˬ yoeˬ kʼoeˇ aˇ cuˬ cuˬ aˇ yehˆ yehˆ le-awˇ, Aˬlaˬmoˬ aˇ siˬ siˬ le-awˇ awꞈ laˇ taˬ-euˬ meh.

⁹ Gawˬ yoeˬ kʼoeˇ deuˬ dawˬ tawˆ luꞈ Moˇseˬ yuˇ-awˇ, Iˇsaˬleˬlaˆ tsawˇ haˬ deuˬ-ahˇ mehˬ nehˬ-euˬ meh. Kʼaˇ pyeuꞈ laˇ-euˬ jeˬ-ahˇ aˬ yawꞈ maꞈ ya mawˇ-awˇ, aˬ yuiꞈ geuꞈ-eu deuˬ aˬ yawꞈ gʼaˬ yawꞈ, yawˬ ha-euˬ gawˬ yoeˬ yawˬ ha yuˇ kʼoꞈ-euˬ meh.

¹⁰ Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Aˬloˬ-euˬ gawˬ yoeˬ-ahˇ Dawˬ ma saˇ jaˇ Bahˬ keuˆ mehˬ shi paˇ yuˇ taˬ-iˇ-awˬ. Puiˬ-eu tsawˇ haˬ deuˬ iˬ baˇ taˬ-eu dawˬ ngehˬ-eu maˬ naˬ leˇ naˇ ya shiˇ-eu gaˇ kawˆ, gawˬ yoeˬ kʼoeˇ yoeˬ saˇ kiˇ pyeuꞈ-eu meh.”

¹¹ Kʼoeˇ ngeh, Sahˬpaˬ Miˬyehˇ neh dawˬ kʼaˇ biꞈ nehˬ-euˬ loꞈ-ehˇ Moˇseˬ mˇ-euˬ meh.

¹² Iˇsaˬleˬlaˆ tsawˇ haˬ deuˬ Moˇseˬ-ahˇ ehˇ-eu, “Nga maꞈ heu loꞈ-ehˇ ziˇ ya jiˇ meh loˇ.

¹³ Sehˬ gʼawˆ dawˬ peh kʼaˇ le-eu tsawˇ haˬ aˬ geu gʼaˬ kʼawꞈ ya shiˇ-eu ngeuˇ naˇ, nga maꞈ dawˬ tawˆ luꞈ shiˇ-euˬ gaˇ duˇ-eu ngaˇ.”