Bawˇtsahˬ 13 - Akha

Tsawˇ haˬ pyehˬ gʼeh-awˇ bi kʼoeˬ sho haw leˇ-euˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ ngaˇ biꞈ nehˬ-eu lehˇ gʼeh-eu Kaˬnaˬ miˇ kʼahˬ-ahˇ bi pyehˆ tseˇ haw leˇ-eu gʼaˇ duˬ, tsawˇ jeuˬ tseˇ nyiꞈ jeuˬ, aˬ yawꞈ jeuˬ yawꞈ laꞈ kʼoeˇ, aˬ yuiꞈ aˬ tsu tiˬ gʼaˬ tseˇ doˆ-awˇ bi le-awˬ.”

³ Sahˬpaˬ Miˬyehˇ neh dawˬ biꞈ-euˬ loꞈ-ehˇ, tsawˇ haˬ kʼoeˇ deuˬ-ahˇ, Paˬlaˬ bawˇ tsahˬ bawˇ dahˇ laꞈ kʼoeˇ neh Moˇseˬ pyehˬ gʼeh-euˬ meh.

⁴ Heu-aˬ, tsawˇ haˬ kʼoeˇ deuˬ-euˬ tsawˇ myahˇ deuˬ meh. Luˇbeˬ tsawˇ jeuˬ laꞈ kʼoeˇ, Zaˬkuˬlaˇ-euˬ aˬ li Shaˬmeuˬ

⁵ Suˇmoˬ tsawˇ jeuˬ laꞈ kʼoeˇ, Hawˇliˬ-euˬ aˬ li Shaˬpaˇ

⁶ Yuˇdaˆ tsawˇ jeuˬ laꞈ kʼoeˇ, Yeˬpuˬnehˇ-euˬ aˬ li Gaˬlehˆ

⁷ Iˇsaˬkaˬ tsawˇ jeuˬ laꞈ kʼoeˇ, Yoˆsehˆ-euˬ aˬ li Iˇgaˬlaˇ

⁸ Eˇpaˬleˬ tsawˇ jeuˬ laꞈ kʼoeˇ, Nuˬ-euˬ aˬ li Awˇsheˬ

⁹ Beˬyaˬmiˬ tsawˇ jeuˬ laꞈ kʼoeˇ, Laˬpuˇ-euˬ aˬ li Paˬlaˬtiˇ

¹⁰ Zeˬbuˬluˬ tsawˇ jeuˬ laꞈ kʼoeˇ, Sawˇdi-euˬ aˬ li Gaˬdeˬlaˇ

¹¹ Maˬnaˇseˬ tsawˇ jeuˬ laꞈ kʼoeˇ, Suˇsiˬ-euˬ aˬ li Gaˬdiˆ

¹² Daˬ tsawˇ jeuˬ laꞈ kʼoeˇ, Geˬmaˬliˇ-euˬ aˬ li Aˬmeˬlaˆ

¹³ Aˬsaˬ tsawˇ jeuˬ laꞈ kʼoeˇ, Miˇkeˬlaˇ-euˬ aˬ li Seˬduˇlaˆ

¹⁴ Naˬtaˬliˇ tsawˇ jeuˬ laꞈ kʼoeˇ, Gʼawˬpaˬsiˇ-euˬ aˬ li Naˬbiˬ

¹⁵ Gaˆ tsawˇ jeuˬ laꞈ kʼoeˇ, Maˬciˇ-euˬ aˬ li Geuˬlaˇ

¹⁶ Heu deuˬ-aˬ, miˇ kʼahˬ kʼoeˇ kʼahˬ-ahˇ bi kʼoeˬ sho haw leˇ-eu gʼaˇ duˬ, Moˇseˬ neh pyehˬ gʼeh-euˬ tsawˇ haˬ deuˬ meh. Nuˬ-euˬ aˬ li Awˇsheˬ-ahˇ, Yawˇshuˆ lehˇ aˬ yawꞈ myahˇ paˇ nehˬ-euˬ meh.

¹⁷ Tsawˇ haˬ kʼoeˇ deuˬ-ahˇ pyehˬ gʼeh ngeh, Moˇseˬ heu loꞈ-ehˇ tsaꞈ nehˬ-awˇ pyehˬ gʼeh-euˬ meh. “Heu gaˇ neh laꞈ taˆ paw le gʼeh leꞈ-awˇ, Kaˬnaˬ miˇ kʼahˬ laꞈ oˆ dzaˬ-ahˇ le uˇ-awˇ, gawˬ jawˬ gawˬ duˇ jaˆ-eu yaw goˇ paw paˇ daˆ leˇ-awˬ.

¹⁸ Aˬ joˆ-ehˇ gʼeh-eu miˇ kʼahˬ pyeuꞈ-eu gaˇ kawˆ maˬ ehˇ, tsawˇ haˬ aˇ myaˆ ni jawˇ-eu gaˇ kawˆ maˬ ehˇ, tsawˇ haˬ kʼoeˇ deuˬ aˇ naˆ ni gʼaˬ kʼaˆ-eu gaˇ kawˆ maˬ ehˇ, pyehˆ tseˇ duˬ-awˬ.

¹⁹ Miˇ kʼahˬ kʼoeˇ kʼahˬ muiˬ-eu nga loˇ, doeˇ-eu nga loˇ lehˇ maˬ ehˇ, kʼoeˇ gaˇ jawˇ-eu tsawˇ haˬ deuˬ meuˬ meuˬ lahˇ gawˬ-awˇ jawˇ-eu nga loˇ, maˬ gawˬ ni jawˇ-eu nga loˇ lehˇ maˬ ehˇ, pyehˆ tseˇ duˬ-awˬ.

²⁰ Miˇ tsaˬ miˇ muiˬ muiˬ-awˇ, aˇ bawˇ sahˬ kʼaˆ jeˬ nga loˇ lehˇ pyehˆ tseˇ duˬ-awˬ. Kʼoeˇ naˇ, miˇ kʼahˬ kʼoeˇ kʼahˬ-ahˇ jaˆ-eu aˇ siˬ aˇ lu ui cuiˆ maˬ ngehˇ ni yuˇ kʼoꞈ laꞈ law.” (Aˇ yamˬ kʼoeˇ yamˬ-aˬ, aˬ gaꞈ aˇ siˬ awꞈ dahˬ beh-eu aˇ yamˬ pyeuꞈ-eu meh.)

²¹ Kʼoeˇ naˇ, tsawˇ haˬ kʼoeˇ deuˬ laꞈ taˆ paw le gʼeh leꞈ-awˇ, laꞈ oˆ paw dzeˇ dzaˬ-ahˇ jaˆ-eu Ziˇnaˆ lehˇ kuˇ-eu bawˇ tsahˬ bawˇ dahˇ-ahˇ neh, laˬ taˆ paw jaˆ-eu Haˬmaˬ meuˬ-ahˇ le-eu gaˇ ma dawˬ peh jaˆ-eu Leˬhawˇbaˆ meuˬ-ahˇ keuˆ ni, miˇ kʼahˬ kʼoeˇ-ahˇ pyehˆ tseˇ haw leˇ-euˬ meh.

²² Miˇ kʼahˬ kʼoeˇ kʼahˬ-euˬ laꞈ oˆ dzaˬ-ahˇ jeˬ huˬ le-awˇ, huiˬ dui goˇ dui dui-eu Aˬnaˬkaˆ tsawˇ jeuˬ-euˬ zaˬ deuˬ uˆ deuˬ pyeuꞈ-eu Aˬhiˇmaˬ aˇ jeuˬ, Sheˬshaiˇ aˇ jeuˬ hawˇ-eu Taˬlaˬmehˇ aˇ jeuˬ deuˬ jawˇ-eu Heˬbyoˬ meuˬ-ahˇ le keuˆ-euˬ meh. (Heˬbyoˬ meuˬ-aˬ, Iˇjiˇtuˆ miˇ kʼahˬ laꞈ kʼoeˇ jaˆ-eu Zoˇnaˆ meuˬ taꞈ-ehˇ shiꞈ kʼoꞈ huˬ-ehˇ teˬ taˬ-euˬmeuˬ pyeuꞈ-eu meh.)

²³ Eˇshaˬkawˇlaˆ deh kʼawꞈ-ahˇ aˬ yawꞈ maꞈ iˇ keuˆ ngeh, aˬ gaꞈ aˇ siˬ aˇ puˇ tiˬ puˇ tehꞈ-ehˇ tsoꞈ-eu aˬ gaꞈ uˬ pyaˬ tiˬ pyaˬ aˬ yawꞈ maꞈ coeˇ tsehˆ-euˬ meh. Aˬ gaꞈ aˇ puˇ kʼoeˇ kah dui dui-eu miˇ neh, tsawˇ haˬ nyiˬ gʼaˬ daˇ kawˬ cawˬ ahˇ-awˇ ya baꞈ-eu meh. Aˇ ka uˆ aˇ siˬ hawˇ-eu siˬ guˬ aˇ siˬ kʼawꞈ, aˬ yawꞈ maꞈ ui cuiˆ yuˇ kʼoꞈ gʼeh-euˬ meh.

²⁴ (Iˇsaˬleˬlaˆ tsawˇ haˬ kʼoeˇ deuˬ neh coeˇ tsehˆ-euˬ aˬ gaꞈ aˇ siˬ aˇ puˇ kʼoeˇ puˇ-ahˇ dawˬ daˬ daˬ-awˇ, jawˇ duˬ kʼoeˇ tsahˇ-ahˇ Eˇshaˬkawˇlaˆ lehˇ kuˇ-euˬ meh.

²⁵ Oeˬ tseˇ nah keuˆ ni miˇ kʼahˬ kʼoeˇ kʼahˬ-ahˇ pyehˆ tseˇ haw gʼaˬ ngeh jawˇ, kʼoeˬ sho leˇ-euˬ tsawˇ haˬ kʼoeˇ deuˬ gʼoꞈ le-euˬ meh.

²⁶ Paˬlaˬ bawˇ tsahˬ bawˇ dahˇ laꞈ kʼoeˇ, Kaˬdeˬshaˇ lehˇ kuˇ-eu jawˇ duˬ-ahˇ, Moˇseˬ, Aˬloˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ jawˇ gaˇ aˬ yawꞈ maꞈ gʼoꞈ keuˆ le-euˬ meh. Aˬ yawꞈ maꞈ neh kʼaˇ ya mawˇ yaꞈ-euˬ jeˬ gaˇ kawˆ dzawˇ mehˬ-awˇ, aˬ yawꞈ maꞈ neh yuˇ kʼoꞈ leꞈ-euˬ aˇ siˬ deuˬ kʼawꞈ, mehˬ nehˬ-euˬ meh.

²⁷ Aˬ yawꞈ maꞈ Moˇseˬ-ahˇ ehˇ nehˬ-eu, “Miˇ kʼahˬ kʼoeˇ kʼahˬ-ahˇ nga maꞈ pyehˆ tseˇ haw-awˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ pyeuꞈ-eu gaˇ kawˆ pyehˆ tseˇ duˬ-euˬ ma. Aˇ siˬ heu deuˬ kʼawꞈ, kʼoeˇ gaˇ-euˬ aˇ siˬ meh.

²⁸ Ehˇ kʼawꞈ, kʼoeˇ gaˇ jawˇ-eu tsawˇ haˬ deuˬ gʼaˬ kʼaˆ dui dui-awˇ, aˬ yawꞈ maꞈ-euˬ meuˬ deuˬ kʼawꞈ, huiˬ dui dui-awˇ, meuˬ meuˬ lahˇ yaw muiˬ paˬ-ehˇ gawˬ ziꞈ taˬ-euˬ meh. Kʼoeˇ naˆ tehꞈ-ehˇ maˬ ngeuˇ ni, huiˬ dui goˇ dui dui-eu tsawˇ haˬ deuˬ-euˬ zaˬ deuˬ uˆ deuˬ kʼawꞈ kʼoeˇ gaˇ jawˇ luꞈ gaˇ ya mawˇ-euˬ ma.

²⁹ Aˬmaˬlehˇ tsawˇ haˬ deuˬ miˇ kʼahˬ kʼoeˇ kʼahˬ laꞈ oˆ dzaˬ-ahˇ jawˇ luꞈ-eu meh. Heˬtaˆ tsawˇ jeuˬ, Yeˬbuˇ tsawˇ jeuˬ hawˇ-eu Aˬmawˇliˆ tsawˇ jeuˬ deuˬ-aˬ, gawˬ jawˬ gawˬ duˇ-ahˇ jawˇ-awˇ, Kaˬnaˬ tsawˇ jeuˬ-aˬ, Gʼahˇ ceh-euˬ Iˬ ma laˆ shaˆ-euˬ dawˬ peh Yawˇdaˬ lawˇ baˬ caw caw-ehˇ jawˇ-eu meh.”

³⁰ Moˇseˬ-euˬ dawˬ peh uiˬ leˇ taˬ-awˇ jawˇ-eu tsawˇ haˬ kʼoeˇ deuˬ-ahˇ “Ciˬ cuˇ ni jawˇ sheˇ” lehˇ Gaˬlehˆ ehˇ nehˬ-euˬ meh. Kʼoeˇ naˇ, aˬ yawꞈ ehˇ-eu, “Nymˬ-mˇ, miˇ kʼahˬ kʼoeˇ kʼahˬ-ahˇ aˬ dui guiˇ deuˆ-awˇ yuˇ geuꞈ kaˇ-euˇ. Miˇ kʼahˬ kʼoeˇ kʼahˬ-ahˇ aˬ dui deuˆ gʼaˬ ma.”

³¹ Ehˇ kʼawꞈ, Gaˬlehˆ nehˬ-ehˇ le-euˬ tsawˇ haˬ deuˬ ehˇ-eu, “Maˬ ngeuˇ-a. Aˬ yawꞈ maꞈ-ahˇ aˬ dui guiˇ maˬ deuˆ gʼaˬ nya-a. Kʼoeˇ gaˇ jawˇ-eu tsawˇ haˬ kʼoeˇ deuˬ, aˬ dui naˆ maˬ tseˇ gʼaˬ kʼaˆ dzehˬ-eu meh.”

³² Kʼoeˇ naˇ, aˬ yawꞈ maꞈ neh pyehˆ tseˇ leˇ-euˬ miˇ kʼahˬ gaˇ kawˆ, Iˇsaˬleˬlaˆ tsawˇ haˬ deuˬ-ahˇ maˬ ngeuˇ-eu jeˬ-ehˇ aˬ yawꞈ maꞈ ja byah gʼeh-euˬ meh. Aˬ yawꞈ maꞈ ehˇ-eu, “Kʼoeˇ gaˇ jawˇ-eu tsawˇ haˬ deuˬ dzaˬ loꞈ ni tehꞈ-ehˇ kʼawꞈ, miˇ kʼahˬ kʼoeˇ kʼahˬ laꞈ kʼoeˇ dzaˬ dzaˬ dawˇ dawˇ maˬ jaˆ-a. Nga maꞈ neh mawˇ yaꞈ-euˬ tsawˇ haˬ yawˬ gʼaˬ na luꞈ, caˇ gawˬ goˇ dui dui-eu meh.

³³ Aˬnaˬkaˆ-euˬ zaˬ deuˬ uˆ deuˬ pyeuꞈ-eu huiˬ dui goˇ dui dui-eu tsawˇ haˬ deuˬ-ahˇ kʼawꞈ nga maꞈ mawˇ yaꞈ-euˬ ma. Aˬ dui yawˬ haˇ yawˬ ha paˇ haw ngeh, nyehˇ bahˇ hui ni tehꞈ-ehˇ ahˇ gaˇ duˇ nya. Aˬ yawꞈ maꞈ aˬ dui-ahˇ paˇ haw law hawˇ kʼawꞈ, kʼoeˇ hui tehꞈ nga lehˇ duˇ tehꞈ-a.”