Bawˇtsahˬ 12 - Akha

Kʼehˬ-eu kʼaˆ-eu jeˬ-ahˇ Miˇliˬyaˬ ya daˬ-euˬ

¹ Kuˇshaˆ tsawˇ jeuˬ zaˬ miˬ zaˬ-ahˇ Moˇseˬ sheuˬ-euˬ miˇ neh, Miˇliˬyaˬ hawˇ-eu Aˬloˬ aˬ nyaꞈ aˬ yawꞈ-ahˇ iˬ baˇ taˬ-euˬ meh.

² Aˬ yawꞈ nyaꞈ ehˇ-eu, “Moˇseˬ-ahˇ tehꞈ-ehˇ gʼoe-awˇ Sahˬpaˬ Miˬyehˇ dawˬ ngehˬ ta loˇ. Nga nyaꞈ-ahˇ gʼoe-awˇ dawˬ maˬ ngehˬ-a loˇ” lehˇ aˬ yawꞈ nyaꞈ ehˇ-eu meh. Aˬ yawꞈ nyaꞈ kʼoeˇ loꞈ-ehˇ ehˇ gaˇ Sahˬpaˬ Miˬyehˇ ya gaˬ-euˬ meh.

³ (Moˇseˬ-aˬ, nui ma nahˬ yu ni gʼeh-awˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ laꞈ kʼoeˇ, aˬ cawˬ naˆ maˬ tseˇ nui nahˬ nui yu ahˇ-eu tsawˇ haˬ tiˬ gʼaˬ pyeuꞈ-eu meh.)

⁴ “Naw maꞈ smˇ gʼaˬ ngaˇ jawˇ-eu Sehˬ gʼawˆ-ahˇ laˇ-awˬ” lehˇ, Moˇseˬ, Aˬloˬ hawˇ-eu Miˇliˬyaˬ aˬ ha smˇ gʼaˬ-ahˇ Sahˬpaˬ Miˬyehˇ ja pyuˬ ni ehˇ nehˬ-euˬ meh. Kʼoeˇ ngeh, aˬ yawꞈ maꞈ smˇ gʼaˬ kʼoeˇ gaˇ le-euˬ meh.

⁵ Mˬ dmˇ kʼawˇ zeuˇ laꞈ kʼoeˇ Sahˬpaˬ Miˬyehˇ zaꞈ le-awˇ, Sehˬ gʼawˆ-euˬ gʼoˆ kʼehˬ-ahˇ yawꞈ-awˇ, Aˬloˬ hawˇ-eu Miˇliˬyaˬ-ahˇ kuˇ-euˬ meh. Kʼoeˇ ngeh, aˬ yawꞈ nyaꞈ mehˬ hu paw jiˆ doˆ leˇ-euˬ meh.

⁶ Sahˬpaˬ Miˬyehˇ ehˇ-eu, “Ngaˇ ehˇ gaˇ naˇ haˬ-awˬ. Naw maꞈ laꞈ kʼoeˇ Miˬyehˇ gʼaˇ duˬ ngehˬ dah-eu deuˬ jawˇ naˇ, yaw sahˇ laꞈ kʼoeˇ aˬ yawꞈ maꞈ-ahˇ ngaˇ pah mehˬ nehˬ-awˇ, yuꞈ maˆ maˆ-eu laꞈ kʼoeˇ ngaˇ dawˬ ngehˬ cawˬ ma.

⁷ Ehˇ kʼawꞈ, ngaˬ-euˬ zaˬ kʼaˆ Moˇseˬ-ahˇ ngaˇ dawˬ ngehˬ cawˬ ngeh, kʼoeˇ loꞈ-ehˇ maˬ ngeuˇ. Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ dawˬ tawˆ luꞈ-ahˇ haw-eu pyaˆ-eu gaˇ heu, aˬ yawꞈ-ahˇ ngaˇ a nehˬ taˬ-euˬ ma.

⁸ Kʼoeˇ miˇ neh, aˬ yawꞈ-ahˇ ngaˇ dawˬ ngehˬ cawˬ ngeh, myaˆ pyawˬ ciˬ daˬ-awˇ, bya cehˆ ni ngehˬ cawˬ-eu ma. Dawˬ jaw dawˬ yehˆ maˬ zmˬ. Ngaˬ-euˬ seuˆ dzeuꞈ aˇ gʼehˇ kʼawꞈ, aˬ yawꞈ mawˇ haw-euˬ meh. Ngaˬ-euˬ zaˬ kʼaˆ Moˇseˬ-ahˇ iˬ baˇ taˬ-eu dawˬ, naw nyaꞈ aˬ joˆ-ehˇ ngehˬ peuˬ-eu nya.”

⁹ Kʼoeˇ naˇ, Sahˬpaˬ Miˬyehˇ aˬ yawꞈ nyaꞈ-ahˇ nui ma peh-awˇ gʼoꞈ daˆ leˇ-euˬ meh.

¹⁰ Sehˬ gʼawˆ kʼoeˇ taˆ jaˆ-eu mˬ dmˇ gʼoꞈ daˆ leˇ ngeh, Miˇliˬyaˬ-euˬ gʼawˇ mawˇ-ahˇ nyawˬ naˇ byah-awˇ, ngehˇ loꞈ-ehˇ pyuˇ deuˬ ni pyeuꞈ laˇ-euˬ meh. Miˇliˬyaˬ-ahˇ Aˬloˬ haw gʼeh ngeh, nyawˬ naˇ byah taˬ-euˬ gaˇ ya mawˇ-awˇ,

¹¹ Moˇseˬ-ahˇ Aˬloˬ heu loꞈ-ehˇ ehˇ nehˬ-euˬ meh. “Nga nyaꞈ maˬ shaˇ noeˬ ni mˇ lehˬ-euˬ iˬ baˇ heu baˬ da neh, heu loꞈ-ehˇ gʼeh-eu kʼehˬ-eu kʼaˆ-eu jeˬ taˬ bi keuˆ le laꞈ.

¹² Dehꞈ le ngeh neh shaˬ jiˇ tiˬ paˆ maˬ tsoꞈ-ehˇ yaw shiˇ-ehˇ dehꞈ le-euˬ loꞈ-ehˇ Miˇliˬyaˬ-ahˇ taˬ bi pyeuꞈ-iˇ nehˬ laꞈ.”

¹³ Kʼoeˇ ngeh, “Miˬyehˇ-oˇ, aˬ yawꞈ-euˬ naˇ gawˇ bi taˬ leˇ nehˬ laꞈ-awˬ” lehˇ, Sahˬpaˬ Miˬyehˇ-ahˇ Moˇseˬ guˇ-euˬ meh.

¹⁴ Sahˬpaˬ Miˬyehˇ ehˇ-eu, “Aˬ yawꞈ-euˬ aˬ da neh aˬ yawꞈ-euˬ myaˆ pyawˬ-ahˇ duˬ kʼaˬ kʼa daˆ nehˬ law nmˇ-aˬ, shiꞈ nah keuˆ ni aˬ yawꞈ ya shaꞈ dawˇ-eu maˬ ngeuˇ-a loˇ. Shiꞈ nah keuˆ ni aˬ yawꞈ-ahˇ pu laꞈ nyiˇ paw teh dzeh-awˇ, shiꞈ nah byah laˆ naˇ paˇ bi gʼoꞈ laˇ nya tehꞈ-a.”

¹⁵ Miˇliˬyaˬ-aˬ, shiꞈ nah keuˆ ni pu laꞈ nyiˇ paw bi teh dzeh-euˬ meh. Aˬ yawꞈ-ahˇ maˬ bi gʼoꞈ uˇ laˇ kʼoeˇ keuˆ ni, Iˇsaˬleˬlaˆ tsawˇ haˬ deuˬ gaˇ ma maˬ doˆ-iˇ ni jawˇ-euˬ meh.

¹⁶ Kʼoeˇ naˇ, Haˬzeˬloˆ lehˇ kuˇ-euˬ jawˇ duˬ-ahˇ neh aˬ yawꞈ maꞈ doˆ-iˇ-awˇ, Paˬlaˬ bawˇ tsahˬ bawˇ dahˇ-ahˇ jawˇ-euˬ meh.