Bawˇtsahˬ 11 - Akha

Taˬbeˬlaˬ lehˇ kuˇ-euˬ jawˇ duˬ

¹ Iˇsaˬleˬlaˆ tsawˇ haˬ deuˬ yawˬ ha ya shaˬ ya zahˬ-eu gaˇ kawˆ, Sahˬpaˬ Miˬyehˇ mehˬ shi toˇ-eu meh. Aˬ yawꞈ maꞈ kʼoeˇ loꞈ-ehˇ toˇ-eu Sahˬpaˬ Miˬyehˇ ya gaˬ ngeh nui ma pehˇ laˇ-awˇ, Iˇsaˬleˬlaˆ tsawˇ haˬ deuˬ kʼoeˇ taˆ miˬ dzaˬ pyehˬ gʼeh leꞈ-eu meh. Miˬ dzaˬ kʼoeˇ aˬ yawꞈ maꞈ jawˇ gaˇ doꞈ laˇ-awˇ, taˆ-euˬ gaˇ dzeˇ dzeˇ saˬ paw jawˇ-eu tsawˇ haˬ tiˬ paˆ na deuˬ bi puiˆ sehꞈ-euˬ meh.

² Iˇsaˬleˬlaˆ tsawˇ haˬ deuˬ Moˇseˬ-ahˇ caw ba le-awˬ lehˇ guˇ-awˇ, Moˇseˬ Sahˬpaˬ Miˬyehˇ-ahˇ guiˬ lahˬ shaˇ ngeh, miˬ dzaˬ kʼoeˇ miˆ-iˇ-euˬ meh.

³ Kʼoeˇ miˇ neh, jawˇ duˬ kʼoeˇ tsahˇ-ahˇ Taˬbeˬlaˬ lehˇ kuˇ-euˬ meh. Aˬ jeˬ miˇ neh ehˇ naˇ, kʼoeˇ tsahˇ-ahˇ Sahˬpaˬ Miˬyehˇ-euˬ miˬ dzaˬ aˬ yawꞈ maꞈ jawˇ gaˇ doˆ le-euˬ meh.

Aˬ yuiꞈ aˬ tsu shiꞈ tseˇ gʼaˬ-ahˇ Moˇseˬ tseˇ doˆ-euˬ

⁴ Iˇsaˬleˬlaˆ tsawˇ haˬ deuˬ nehˬ-ehˇ tiˬ kawˆ loꞈ-ehˇ gaˇ ma doˆ-iˇ luꞈ-eu boeˇ miˬ siˬ kʼaˬ tiˬ deuˬ jawˇ-eu meh. Boeˇ miˬ siˬ kʼaˬ kʼoeˇ deuˬ shaˬ jiˇ mehꞈ dui dui laˇ taˬ-euˬ meh. Iˇsaˬleˬlaˆ tsawˇ haˬ deuˬ kʼawꞈ, heu loꞈ-ehˇ toˇ-eu meh. “Shaˬ jiˇ ya dzaˬ law nmˇ-aˬ, gʼaˬ-eu miˇ-a.

⁵ Iˇjiˇtuˆ miˇ kʼahˬ laꞈ kʼoeˇ jawˇ ngeh, kʼaˇ dzaˬ mawꞈ-eu ngaˬ shaˬ deuˬ aˇ poeˬ maˬ jiˇ ni ya dzaˬ ya dzaˬ-ehˇ jawˇ-euˬ ma. Aˬ dui neh dzaˬ yaꞈ-euˬ siˬ kʼoˬ, deh namˬ, sehˇ guˬ, sehˇ bawˬ, sehˇ puˇ, kʼoeˇ deuˬ-ahˇ noeˬ mawˇ dui dui nya.

⁶ Ehˇ kʼawꞈ, nymˬ-mˇ aˬ dui gʼaˬ maˬ paˇ ahˇ miˇ-a. Heu gaˇ dzaˬ paˬ-ehˇ gʼeh-eu tiˬ jeˬ-iˬ maˬ jaˆ law hawˇ ngaˬ. Nah doˆ le ngeh maˬnaˆ kaˬ muˇ kʼoeˇ dzaˬ-eu maˬ ngeuˇ naˇ tiˬ jeˬ-iˬ maˬ paˇ ya mawˇ haw ngaˇ.”

⁷ Maˬnaˆ aˇ siˬ kʼoeˇ-aˬ, ya sawˇ aˇ nuiˆ-ahˇ duˇ-awˇ, yaw pyuˇ pyuˇ-awˇ shuiˇ la la-eu meh.

^8-9 Iˇsaˬleˬlaˆ tsawˇ haˬ deuˬ doe doe-ehˇ maˬnaˆ kaˬ muˇ kʼoeˇ gʼoˆ uiˬ-awˇ, lo lehˬ neh lehˬ-awˇ maˬ ehˇ, tahˬ tsmˇ-ahˇ tahˬ-awˇ maˬ ehˇ, laˆ loeˇ-euˬ meh. Kʼoeˇ naˇ, puꞈ-awˇ kaˬ muˇ aˇ yaˆ jahˇ-euˬ meh. Kʼoeˇ-aˬ, saˬ loˬ tsiˇ neh jahˇ-euˬ kaˬ muˇ loꞈ-ehˇ kuiˇ-eu meh. Uˬ ciꞈ paw aˬ yawꞈ maꞈ jawˇ gaˇ ceuˬ ga ngeh, maˬnaˆ aˇ siˬ kʼoeˇ kʼawꞈ ga keuˬ le-eu meh.

¹⁰ Iˇsaˬleˬlaˆ tsawˇ haˬ deuˬ yawˬ ha-euˬ gʼoˆ kʼehˬ dawˬ peh uiˬ leˇ uiˬ leˇ-ehˇ yawꞈ-awˇ toˇ luꞈ-eu dawˬ-ahˇ Moˇseˬ ya gaˬ ngeh, nui ma cawˆ dui dui-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ aˬ yawꞈ maꞈ-ahˇ nui ma pehˇ-eu meh.

¹¹ Sahˬpaˬ Miˬyehˇ-ahˇ aˬ yawꞈ ehˇ nehˬ-eu, “Aˬ jeˬ miˇ neh nawˇ ngaˬ-ahˇ heu naˆ naˆ-ehˇ bi shaˬ nehˬ laꞈ te. Aˬ jeˬ miˇ neh nawˇ ngaˬ-ahˇ nui ma maˬ saˇ te. Aˬ jeˬ miˇ neh tsawˇ haˬ heu deuˬ dawˬ tawˆ luꞈ-ahˇ haw-eu pyaˆ-eu gaˇ heu nawˇ ngaˬ-ahˇ ciˬ pi nehˬ laꞈ te.

¹² Aˬ yawꞈ maꞈ-ahˇ ngaˇ beh-euˬ maˬ ngeuˇ. Ngaˬ neh bi dehꞈ le-euˬ kʼawꞈ maꞈ ngeuˇ. Zaˬ-ahˇ bo saˆ-eu zaˬ miˬ zaˬ tiˬ gʼaˬ zaˬ nahˬ-ahˇ ciˬ luꞈ-eu loꞈ-ehˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ nawˬ neh saˇ jaˇ dzaˬ taˬ-euˬ miˇ kʼahˬ-ahˇ, gaˇ pehˇ kahˇ li ni aˬ yawꞈ maꞈ-ahˇ ngaˬ-euˬ aˬ laꞈ laꞈ kʼoeˇ ciˬ-awˇ iˇ-awˬ lehˇ aˬ jeˬ miˇ neh nawˇ ngaˬ-ahˇ kʼehˇ te.

¹³ Tsawˇ haˬ heu deuˬ gʼaˇ duˬ shaˬ jiˇ tiˬ loꞈ aˬ geu gaˇ ngaˇ laˬ doˆ laˬ-iˇ nmˇ. Aˬ yawꞈ maꞈ ngoeˇ ngoeˇ-ehˇ shaˬ jiˇ shaˇ luꞈ meh.

¹⁴ Tsawˇ haˬ heu deuˬ dawˬ tawˆ luꞈ-ahˇ ngaˇ tiˬ gʼaˬ tehꞈ-ehˇ maˬ sheuˬ gʼeh nya nya. Kʼaˆ behˆ heu-ahˇ ngaˇ maˬ gʼaˬ leˇ nya.

¹⁵ Heu loꞈ-ehˇ tehꞈ-ehˇ ngaˬ-ahˇ bi mˇ te lehˇ ngeuˇ naˇ, ngaˬ-ahˇ gʼawˬ shaˬ gaˬ-eu laꞈ kʼoeˇ nymˬ-mˇ mi naˆ-ehˇ bi shiˇ nehˬ laꞈ-awˬ. Nawˇ kʼehˬ nehˬ kʼaˆnehˬ laꞈ-eu heu-ahˇ ngaˇ maˬ paˇ ya daˬ-aˇ.”

¹⁶ Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇsaˬleˬlaˆ tsawˇ haˬ laꞈ kʼoeˇ, aˬ yuiꞈ aˬ tsu loꞈ-ehˇ aˬ cawˬ taˬ huiˬ-awˇ yaw zeu baw-eu tsawˇ haˬ shiꞈ tseˇ gʼaˬ kuˇ uiˬ-awˇ, ngaˇ jawˇ-eu Sehˬ gʼawˆ-ahˇ sheuˬ laꞈ-awˇ, nawˬ-euˬ dawˬ peh yawꞈ-awˬ lehˇ ehˇ nehˬ-awˬ.

¹⁷ Ngaˇ zaꞈ le-awˇ, nawˬ-ahˇ kʼoeˇ gaˇ dawˬ ngehˬ cawˬ le-awˇ, ngaˬ neh nawˬ-ahˇ biꞈ taˬ-euˬ yaw sahˇ tiˬ paˆ deuˬ yuˇ-awˇ, aˬ yawꞈ maꞈ-ahˇ biꞈ nehˬ ma. Kʼoeˇ naˇ, tsawˇ haˬ heu deuˬ-ahˇ sheuˬ gʼeh-eu nawˬ-euˬ gaˇ-ahˇ aˬ yawꞈ maꞈ caw ba-awˇ, gaˇ kʼoeˇ nawˬ-ahˇ tehꞈ-ehˇ maˬ paˇ daˇ ni pyeuꞈ-iˇ tehꞈ-a.

¹⁸ Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ni shawˬ nah gʼaˇ duˬ yawˬ haˇ yawˬ ha muiˬ laˇ shawˇ laˇ ni mˇ-awˬ. Naw maꞈ shaˬ jiˇ ya dzaˬ tehꞈ-a. Naw maꞈ ngoeˇ ngoeˇ-ehˇ, shaˬ jiˇ ya dzaˬ law nmˇ-aˬ lehˇ ehˇ-eu hawˇ-eu, Iˇjiˇtuˆ miˇ kʼahˬ laꞈ kʼoeˇ jawˇ ngeh kʼaˇ boe law miˇ-a lehˇ ehˇ gaˇ Sahˬpaˬ Miˬyehˇ ya gaˬ gʼaˬ-euˬ meh. Nymˬ-mˇ poˆ jawˇ-aˬ, Sahˬpaˬ Miˬyehˇ naw maꞈ-ahˇ shaˬ jiˇ biꞈ laꞈ-awˇ, naw maꞈ ya dzaˬ tehꞈ-a.

¹⁹ Tiˬ nah loˇ, nyiˬ nah loˇ, ngaˬ nah loˇ, tseˇ nah loˇ, nyiˬ tseˇ nah loˇ lehˇ tehꞈ-ehˇ naw maꞈ ya dzaˬ-eu jeˬ maˬ ngeuˇ-a.

²⁰ Ba la tiˬ siˬ siˬ lah ni naw maꞈ ya dzaˬ tehꞈ-a. Naw maꞈ-euˬ naˇ mehˇ-ahˇ shaˬ jiˇ doˆ le gaˇ keuˆ-awˇ, shaˬ jiˇ-ahˇ naw maꞈ nui daˆ daˆ laˇ ngeh keuˆ ni ya dzaˬ tehꞈ-a. Naw maꞈ nehˬ-ehˇ jawˇ luꞈ-eu Sahˬpaˬ Miˬyehˇ-ahˇ naw maꞈ byehˇ dzeh-awˇ, Iˇjiˇtuˆ miˇ kʼahˬ laꞈ kʼoeˇ neh maˬ doˆ le law nmˇ-aˬ gʼaˬ law hawˇ miˇ-a lehˇ aˬ yawꞈ mehˬ shi naw maꞈ toˇ-eu miˇ neh, kʼoeˇ loꞈ-ehˇ pyeuꞈ laˇ tehꞈ-a lehˇ aˬ yawꞈ maꞈ-ahˇ ehˇ nehˬ-awˬ.”

²¹ Sahˬpaˬ Miˬyehˇ-ahˇ Moˇseˬ ehˇ nehˬ-eu, “Tsawˇ haˬ koꞈ seh gʼaˬ-ahˇ ngaˇ sheuˬ gʼeh luꞈ-eu ma. Aˬ yawꞈ maꞈ ba la tiˬ siˬ dzaˬ loꞈ-eu shaˬ jiˇ nawˇ biꞈ ma lehˇ ehˇ te loˇ.

²² Aˬ yawꞈ maꞈ dzaˬ dehˆ dawˇ dehˆ ni mawˇ neˇ hawˇ-eu yawˇ sehꞈ loꞈ coeˇ tehꞈ-a loˇ. Iˬ ma laˆ shaˆ laꞈ kʼoeˇ kʼaˇ jawˇ-eu ngaˬ shaˬ dawˬ tawˆ luꞈ nyehꞈ jiˇ kʼawꞈ, aˬ yawꞈ maꞈ gʼaˇ duˬ loꞈ leˇ tehꞈ-a loˇ.”

²³ Sahˬpaˬ Miˬyehˇ ehˇ-eu, “Ngaˬ-euˬ baoˬ neh maˬ mˇ pyeuꞈ nya-eu jeˬ jaˆ ta loˇ. Maˬ pyeuꞈ laˇ nya nga loˇ lehˇ nymˬ-mˇ naw maꞈ ya mawˇ tehꞈ-a.”

²⁴ Kʼoeˇ naˇ, Moˇseˬ doˆ-iˇ-awˇ, Sahˬpaˬ Miˬyehˇ neh ehˇ-euˬ dawˬ deuˬ Iˇsaˬleˬlaˆ tsawˇ haˬ deuˬ-ahˇ dzawˇ nehˬ-euˬ meh. Aˬ yuiꞈ aˬ tsu deuˬ laꞈ kʼoeˇ, shiꞈ tseˇ gʼaˬ-ahˇ aˬ yawꞈ kuˇ uiˬ-awˇ, Sehˬ gʼawˆ jawˬ jawˬ-ehˇ bi yawꞈ-eu meh.

²⁵ Kʼoeˇ ngeh, mˬ dmˇ laꞈ kʼoeˇ Sahˬpaˬ Miˬyehˇ zaꞈ le-awˇ, aˬ yawꞈ-ahˇ dawˬ ngehˬ cawˬ-euˬ meh. Moˇseˬ-ahˇ biꞈ taˬ-euˬ yaw sahˇ tiˬ paˆ deuˬ aˬ yawꞈ yuˇ-awˇ, aˬ yuiꞈ aˬ tsu kʼoeˇ shiꞈ tseˇ gʼaˬ-ahˇ biꞈ-euˬ meh. Aˬ yawꞈ maꞈ kʼoeˇ taˆ yaw sahˇ keuˆ le ngeh, Miˬyehˇ gʼaˇ duˬ ngehˬ dah-eu deuˬ loꞈ-ehˇ aˬ yawꞈ maꞈ guˇ-eu meh. Ehˇ kʼawꞈ, tiˬ kʼehˬ laˇ kʼehˇ tehꞈ-ehˇ aˬ yawꞈ maꞈ guˇ-euˬ meh.

²⁶ Aˬ yuiꞈ aˬ tsu kʼoeˇ shiꞈ tseˇ gʼaˬ laꞈ kʼoeˇ, Eˇlaˬdaˇ hawˇ-eu Meˬdaˇ aˬ nyaꞈ-aˬ, Sahˬpaˬ Miˬyehˇ jawˇ-eu Sehˬ gʼawˆ-ahˇ maˬ le ni, yawˬ ha-euˬ sehˬ gʼawˆ laꞈ kʼoeˇ jawˇ yaꞈ-euˬ meh. Kʼoeˇ gaˇ, sehˬ gʼawˆ laꞈ kʼoeˇ aˬ yawꞈ nyaꞈ kʼoeˇ taˆ yaw sahˇ keuˆ le-awˇ, aˬ yawꞈ nyaꞈ kʼawꞈ, Miˬyehˇ gʼaˇ duˬ ngehˬ dah-eu deuˬ loꞈ-ehˇ guˇ-euˬ meh.

²⁷ Eˇlaˬdaˇ hawˇ-eu Meˬdaˇ aˬ nyaꞈ kʼoeˇ loꞈ-ehˇ jahˇ luꞈ-eu gaˇ kawˆ tsaꞈ gaˬ leˇ-eu gʼaˇ duˬ, zaˬ guˬ tiˬ gʼaˬ Moˇseˬ jawˇ gaˇ cehˆ coeˬ coeˬ gʼeh-euˬ meh.

²⁸ Kʼoeˇ ngeh, zaˬ guˬ pyeuꞈ ngeh neh Moˇseˬ-ahˇ caw ba-euˬ gʼaˬ pyeuꞈ-eu Nuˬ-euˬ aˬ li Yawˇshuˆ gʼaˬ, “Aˬ yawꞈ nyaꞈ-ahˇ laˆ naˬ-awˬ” lehˇ Moˇseˬ-ahˇ ehˇ nehˬ-euˬ meh.

²⁹ Moˇseˬ ehˇ-eu, “Ngaˬ-euˬ doˇ daˇ nawˇ myaˆ naˆ te loˇ. Sahˬpaˬ Miˬyehˇ-euˬ tsawˇ haˬ dawˬ tawˆ luꞈ-ahˇ Sahˬpaˬ Miˬyehˇ yaw sahˇ biꞈ nehˬ-awˇ, aˬ yawꞈ maꞈ dawˬ tawˆ luꞈ Miˬyehˇ gʼaˇ duˬ ngehˬ dah-eu deuˬ loꞈ-ehˇ guˇ gaˇ ngaˇ gaˬ mawꞈ-eu ma.”

³⁰ Kʼoeˇ naˇ, Iˇsaˬleˬlaˆ tsawˇ haˬ deuˬ-euˬ aˬ yuiꞈ aˬ tsu kʼoeˇ shiꞈ tseˇ gʼaˬ aˬ yawꞈ maꞈ-euˬ sehˬ gʼawˆ-ahˇ gʼoꞈ-iˇ jiˇ-euˬ meh.

Sahˬpaˬ Miˬyehˇ neh hahˬ zaˬ laˬ ma pyehˬ gʼeh leꞈ-eu

³¹ Ja pyuˬ ni, Sahˬpaˬ Miˬyehˇ jaˬ lehˇ bi baw laˇ-awˇ, iˬ ma laˆ shaˆ paw neh hahˬ zaˬ laˬ ma deuˬ bi hehˇ ahˇ laꞈ-euˬ meh. Hahˬ zaˬ laˬ ma kʼoeˇ deuˬ-aˬ, miˇ tsaˬ-ahˇ neh nyiˬ caˆ ehˇ gʼaˬ ni goˇ gaˇ neh tehꞈ-ehˇ zaw laꞈ-eu meh. Iˇsaˬleˬlaˆ tsawˇ haˬ jawˇ naˬ luꞈ-eu jawˇ duˬ-ahˇ hahˬ zaˬ laˬ ma kʼoeˇ deuˬ ga taˬ le-awˇ, aˬ yawꞈ maꞈ jawˇ-eu jawˬ jawˬ-ehˇ tiˬ nah zoˬ zaˇ gaˇ ma kaˬ gaˇ keuˆ ni ga byah jiˇ-euˬ meh.

³² Kʼoeˇ ngeh nah nah ga-ehˇ hawˇ-eu, kʼoeˇ ngeh miˇ miˇ lah-ehˇ uˬ taꞈ, yawˬ nah yawˬ nah ga-ehˇ, Iˇsaˬleˬlaˆ tsawˇ haˬ deuˬ hahˬ zaˬ laˬ ma nyehꞈ nyehꞈ-ehˇ jawˇ-euˬ meh. Yawˬ gʼaˬ na luꞈ koꞈ yaˇ jawꞈ-i maˬ teˬ ni nyehꞈ uiˬ-euˬ meh. Kʼoeˇ naˇ, aˬ yawꞈ maꞈ jawˇ-eu jawˬ jawˬ-ehˇ lawꞈ-awˇ, shaˬ koˆ koˆ-euˬ meh.

³³ Aˬ yawꞈ maꞈ shaˬ jiˇ maˬ dzaˬ jiˇ-euˬ gʼawˬ mya ni dzeˇ luꞈ ngeh, Sahˬpaˬ Miˬyehˇ aˬ yawꞈ maꞈ-ahˇ nui ma pehˇ-awˇ, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le-euˬ meh.

³⁴ Jawˇ duˬ kʼoeˇ tsahˇ-ahˇ, Giˇbyoˆ Haˬtaˬbaˬ lehˇ kuˇ-euˬ meh. Aˬ jeˬ miˇ neh ehˇ naˇ, shaˬ jiˇ-ahˇ mehˇ juiˇ juiˇ-eu tsawˇ haˬ deuˬ-ahˇ kʼoeˇ gaˇ duˬ pahˬ-euˬ meh.

³⁵ Iˇsaˬleˬlaˆ tsawˇ haˬ deuˬ kʼoeˇ gaˇ neh paˇ luˆ-iˇ-awˇ, Haˬzeˬloˬ lehˇ kuˇ-eu jawˇ duˬ-ahˇ paˇ jawˇ naˬ-euˬ meh.