Bawˇtsahˬ 10 - Akha

Pyuˇ daˇ heh

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Iˇsaˬleˬlaˆ tsawˇ haˬ deuˬ-ahˇ kuˇ uiˬ ngeh zmˬ-eu gʼaˇ duˬ maˬ ehˇ, mehˬ hu paw iˇ-eu lehˇ gʼeh ngeh zmˬ-eu gʼaˇ duˬ maˬ ehˇ, pyuˇ daˇ heh nyiˬ hmˬ jahˇ-awˬ.

³ Daˇ heh kʼoeˇ nyiˬ hmˬ luꞈ, tiˬ poˆ tehꞈ-ehˇ teˇ saˇ gʼawˬ mahˇ ni baw yeu gʼeh ngeh, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ, ngaˇ jawˇ-eu Sehˬ gʼawˆ gʼoˆ kʼehˬ-ahˇ nawˬ-euˬ dawˬ peh ya uiˬ laˇ jiˇ meh.

⁴ Ehˇ kʼawꞈ, daˇ heh tiˬ hmˬ tehꞈ-ehˇ baw naˇ, Iˇsaˬleˬlaˆ tsawˇ jeuˬ tsawˇ ca deuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ tehꞈ-ehˇ nawˇ jawˇ gaˇ ya uiˬ laˇ meh.

⁵ Teˇ tsehˆ teˇ tsehˆ-ehˇ baw laˇ naˇ, nahˇ ma doˆ kʼehˬ paw pyawˬ-ahˇ jawˇ-eu tsawˇ jeuˬ deuˬ ya luˆ-iˇ meh.

⁶ Teˇ tsehˆ teˇ tsehˆ-ehˇ nyiˬ poˆ tiˬ poˆ paˇ baw doˆ laˇ naˇ, laꞈ oˆ paw pyawˬ-ahˇ jawˇ-eu tsawˇ jeuˬ deuˬ ya luˆ-iˇ meh. Teˇ tsehˆ teˇ tsehˆ-ehˇ baw-eu teˇ saˇ kʼoeˇ-aˬ, sehˬ gʼawˆ gʼawˆ-awˇ jawˇ naˬ luꞈ-eu luˆ-iˇ-awˬ lehˇ ehˇ mawꞈ-eu meh.

⁷ Ehˇ kʼawꞈ, tsawˇ haˬ aˇ maꞈ aˇ muˇ-ahˇ kuˇ uiˬ ngeh, teˇ saˇ gʼawˬ mahˇ ni ya baw yeu gʼeh meh.

⁸ Piˇ ma geuꞈ luꞈ-eu Aˬloˬ-euˬ aˬ li deuˬ daˇ heh kʼoeˇ ya baw meh. “Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu hmˬ-ahˇ aˬ myah luꞈ ya caw teh meh.

⁹ Naw maꞈ yawˬ haˇ yawˬ ha ka kʼoꞈ-eu gʼaˇ duˬ, naw maꞈ-ahˇ guiˇ deuˆ le-eu muiˇ-eu deuˬ nehˬ-ehˇ naw maꞈ miˇ kʼahˬ laꞈ kʼoeˇ guiˇ deuˆ ceh ceh ngeh, daˇ heh kʼoeˇ yuˇ-awˇ guiˇ deuˆ-eu daˇ heh teˇ saˇ baw-awˬ. Kʼoeˇ ngeh, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ caw ba le-awˇ, muiˇ-eu deuˬ-euˬ aˬ laꞈ laꞈ kʼoeˇ naw maꞈ-ahˇ ka kʼoꞈ nehˬ ma.

¹⁰ La loˆ la tsehˆ lah-eu Bawˬ-iˬ hawˇ-eu zahˇ sahˇ kʼoꞈ-ahˇ taꞈ-eu bawˬ-iˬ nui deuˬ gʼeh-eu byawˬ-eu aˇ yamˬ laꞈ kʼoeˇ, miˬ dzaˬ dzah puiˆ-awˇ lawˇ-eu jeˬ hawˇ-eu cawˬ cawˬ taꞈ-eu lawˇ-eu jeˬ naw maꞈ lawˇ ngeh, daˇ heh ya baw meh. Kʼoeˇ-aˬ, naw maꞈ-euˬ Miˬyehˇ mehˬ shi naw maꞈ-ahˇ bi noeˬ mawˇ-eu jeˬ pyeuꞈ-eu meh.”

Iˇsaˬleˬlaˆ tsawˇ haˬ deuˬ Siˇnaˆ bawˇ tsahˬ bawˇ dahˇ-ahˇ neh doˆ-iˇ-euˬ

¹¹ Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ-awˇ, nyiˬ kʼoꞈ tiˬ kʼoꞈ ba la nyiˬ siˬ tiˬ siˬ nyiˬ tseˇ nah-ahˇ, Sahˬpaˬ Miˬyehˇ jawˇ-eu Sehˬ gʼawˆ kʼoeˇ taˆ jaˆ-eu mˬ dmˇ kʼoeˇ, kʼoeˇ taˆ paw daˆ leˇ-euˬ meh.

¹² Kʼoeˇ ngeh, Iˇsaˬleˬlaˆ tsawˇ haˬ deuˬ luˆ-iˇ-awˇ, Siˇnaˆ bawˇ tsahˬ bawˇ dahˇ laꞈ kʼoeˇ neh doˆ-iˇ-euˬ meh. Kʼoeˇ naˇ, Paˬlaˬ lehˇ kuˇ-eu bawˇ tsahˬ bawˇ dahˇ-ahˇ naˬ-iˇ-euˬ meh.

¹³ Moˇseˬ-ahˇ gʼoe-awˇ Sahˬpaˬ Miˬyehˇ dawˬ biꞈ ngeh, aˬ yawꞈ maꞈ aˇ dahˬ beh-awˇ doˆ-iˇ-eu meh.

¹⁴ Aˬ yawꞈ maꞈ kʼaˇ luˆ-iˇ ngeh, yawˬ ha jawˇ duˬ tsaˬ ni jawˇ-awˇ, doˆ-iˇ-eu meh. Aˬmiˇnaˬdehˇ-euˬ aˬ li Naˬshoˬ uˆ lahˇ-eu Yuˇdaˆ tsawˇ jeuˬ-euˬ taˆ-euˬ paˇ loˬ paˇ lehˇ uˬ moˆ kʼaˇ jawˇ-eu guiˇ maꞈ deuˬ, guiˇ maꞈ tiˬ maꞈ saˇ-iˬ tiˬ maꞈ aˬ cawˬ mehˬ hu doˆ-iˇ-euˬ meh.

¹⁵ Iˇsaˬkaˬ tsawˇ jeuˬ-ahˇ Zawˇlaˆ-euˬ aˬ li Neˬdaˬneˬlaˇ uˆ lahˇ-awˇ,

¹⁶ Zeˬbuˬluˬ tsawˇ jeuˬ-ahˇ Heˬloˬ-euˬ aˬ li Eˇliˇbaˆ uˆ lahˇ-euˬ meh.

¹⁷ Kʼoeˇ naˇ, Sehˬ gʼawˆ pyaˆ-awˇ baꞈ-eu tsawˇ haˬ deuˬ pyeuꞈ-eu Geˬlaˬshoˬ aˇ jeuˬ hawˇ-eu Meˬlaˬliˇ aˇ jeuˬ deuˬ ya doˆ-iˇ-eu meh.

¹⁸ Kʼoeˇ naˇ, Sheˬduˇ-euˬ aˬ li Eˇliˇzuˇlaˆ uˆ lahˇ-eu Luˇbeˬ tsawˇ jeuˬ-euˬ taˆ-euˬ paˇ loˬ paˇ lehˇ uˬ moˆ kʼaˇ jawˇ-eu guiˇ maꞈ deuˬ, tiˬ maꞈ saˇ-iˬ tiˬ maꞈ ya doˆ-iˇ-eu meh.

¹⁹ Suˇmoˬ tsawˇ jeuˬ-ahˇ Zuˇliˇshaˬdehˇ-euˬ aˬ li Sheˬluˇmeˬlaˇ uˆ lahˇ-awˇ,

²⁰ Gaˆ tsawˇ jeuˬ-ahˇ Doeˬlaˇ-euˬ aˬ li Eˇlaˬsaˆ uˆ lahˇ-eu meh.

²¹ Kʼoeˇ naˇ, Leˬbiˇ tsawˇ jeuˬ pyeuꞈ-eu Kawˇhaˆ aˇ jeuˬ deuˬ, muiˬ-eu shawˇ-eu keu ka deuˬ baꞈ-awˇ ya doˆ-iˇ-eu meh. Ya jawˇ naˬ-eu jawˇ duˬ yawˬ tsahˇ yawˬ-ahˇ aˬ yawꞈ maꞈ paˇ iˇ keuˆ ngeh, Sehˬ gʼawˆ gʼoˆ tsoꞈ gʼaˬ taˬ-awˇ jaˆ-eu meh.

²² Kʼoeˇ naˇ, Aˬmiˇhuˆ-euˬ aˬ li Eˇliˇshaˬmaˇ uˆ lahˇ-eu Eˇpaˬleˬ tsawˇ jeuˬ-euˬ taˆ-euˬ paˇ loˬ paˇ lehˇ uˬ moˆ kʼaˇ jawˇ-eu guiˇ maꞈ deuˬ, tiˬ maꞈ saˇ-iˬ tiˬ maꞈ ya doˆ-iˇ-eu meh.

²³ Maˬnaˇseˬ tsawˇ jeuˬ-ahˇ Peˬdaˬzuˇ-euˬ aˬ li Gaˬmaˬleˬlaˇ uˆ lahˇ-awˇ,

²⁴ Beˬyaˬmiˬ tsawˇ jeuˬ-ahˇ Giˇdawˇniˆ-euˬ aˬ li Aˬbiˇdaˬ uˆ lahˇ-eu meh.

²⁵ Dawˬ tawˆ luꞈ-euˬ mehˬ nah nah saˬ jawˇ-eu taˆ pyeuꞈ-eu, Aˬmiˇshaˬdehˇ-euˬ aˬ li Aˬheˇzaˬ uˆ lahˇ-eu Daˬ tsawˇ haˬ-euˬ taˆ-euˬ paˇ loˬ paˇ lehˇ uˬ moˆ kʼaˇ jawˇ-eu guiˇ maꞈ deuˬ, tiˬ maꞈ saˇ-iˬ tiˬ maꞈ aˬ cawˬ mehˬ nah nah saˬ doˆ-iˇ-eu meh.

²⁶ Aˬsaˬ tsawˇ jeuˬ-ahˇ Awˇkaˬlaˇ-euˬ aˬ li Paˬjeˬlaˇ uˆ lahˇ-awˇ,

²⁷ Naˬtaˬliˇ tsawˇ jeuˬ-ahˇ Eˇnaˬ-euˬ aˬ li Aˬhiˇlaˬ uˆ lahˇ-eu meh.

²⁸ Iˇsaˬleˬlaˆ tsawˇ haˬ deuˬ naˬ luꞈ-eu kʼaˇ doˆ-iˇ ngeh, guiˇ maꞈ tiˬ maꞈ saˇ-iˬ tiˬ maꞈ kʼoeˇ loꞈ-ehˇ ya doˆ-iˇ-eu meh.

²⁹ Miˇdiˬyaˬ tsawˇ jeuˬ Yeˬdaˬyoˇ-euˬ aˬ li pyeuꞈ-eu Moˇseˬ-euˬ oeˇ kʼaˬ Hawˇbaˆ-ahˇ Moˇseˬ ehˇ nehˬ-eu, “Sahˬpaˬ Miˬyehˇ nga maꞈ-ahˇ biꞈ ma lehˇ ehˇ taˬ-euˬ miˇ kʼahˬ-ahˇ nga maꞈ le-eu gʼaˇ duˬ, doˆ-iˇ-eu lehˇ lehˬ hmˬ taˬ-euˬ ma. Iˇsaˬleˬlaˆ tsawˇ haˬ deuˬ bi baw bi za le ma lehˇ aˬ yawꞈ saˇ jaˇ dzaˬ taˬ-euˬ meh. Kʼoeˇ miˇ neh ngaˬ nehˬ-ehˇ nawˇ laˇ-awˬ. Nga maꞈ-euˬ baw le za le-eu guiˬ lahˬ nawˬ-ahˇ biˇ nehˬ ma.”

³⁰ Hawˇbaˆ ehˇ-eu, “Nawˬ nehˬ-ehˇ ngaˇ maˬ laˇ. Ngaˬ-euˬ miˇ kʼahˬ-ahˇ ngaˬ-euˬ tsawˇ haˬ jawˇ gaˇ ngaˇ gʼoꞈ-iˇ ma.”

³¹ Moˇseˬ ehˇ-eu, “Nga maꞈ-ahˇ taˬ gʼawˬ-iˇ nehˬ laꞈ. Bawˇ tsahˬ bawˇ dahˇ laꞈ kʼoeˇ aˬ geu tsahˇ-ahˇ jawˇ naˬ nya-eu nawˇ siˬ nya-awˇ, nga maꞈ-ahˇ nawˇ gaˇ ma sheuˬ mehˬ nya meh.

³² Nga maꞈ nehˬ-ehˇ nawˇ laˇ naˇ, Sahˬpaˬ Miˬyehˇ neh nga maꞈ-ahˇ biꞈ nehˬ laꞈ-euˬ guiˬ lahˬ dawˬ tawˆ luꞈ nawˬ-ahˇ biˇ nehˬ ma.”

Iˇsaˬleˬlaˆ tsawˇ haˬ deuˬ doˆ-iˇ-euˬ

³³ Iˇsaˬleˬlaˆ tsawˇ haˬ deuˬ muiˬ-eu shawˇ-eu gawˬ jawˬ pyeuꞈ-eu Siˇnaˆ gawˬ jawˬ-ahˇ neh doˆ-iˇ ngeh, smˬ nah gaˇ ma iˇ gʼeh-euˬ meh. Aˬ yawꞈ maꞈ jawˇ naˬ-eu jawˇ duˬ mawˇ nya-eu gʼaˇ duˬ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ aˬ myah luꞈ aˬ yawꞈ maꞈ-euˬ mehˬ hu paw tehꞈ-ehˇ iˇ luꞈ-eu meh.

³⁴ Aˬ yawꞈ poˆ yawꞈ aˬ yawꞈ maꞈ kʼaˇ luˆ-iˇ ngeh, nah gʼahˇ paw Sahˬpaˬ Miˬyehˇ-euˬ mˬ dmˇ aˬ yawꞈ maꞈ kʼoeˇ taˆ jaˆ-eu meh.

³⁵ Dawˬ ma saˇ jaˇ Bahˬ keuˆkʼoeˇ kʼaˇ baꞈ luˆ gʼeh ngeh, “Sahˬpaˬ Miˬyehˇ-oˇ, tuˇ-awˬ. Nawˬ-ahˇ muiˇ-eu deuˬ-ahˇ teh byaˆ-awˇ, nawˬ-ahˇ bye-eu deuˬ bi cehˆ byoˆ jiˇ-awˬ” lehˇ Moˇseˬ ehˇ-eu meh.

³⁶ Kʼoeˇ naˇ bahˬ keuˆ kʼoeˇ kʼaˇ baꞈ naˬ ngeh, “Sahˬpaˬ Miˬyehˇ-oˇ, aˇ heˇ aˇ muiˇ byah-eu Iˇsaˬleˬlaˆ tsawˇ haˬ deuˬ-euˬ nymˇ jiˇ jaˆ gaˇ gʼoꞈ le-awˬ” lehˇ aˬ yawꞈ paˇ ehˇ-eu meh.