Aˇ dahˬ 48 - Akha

Eˇpaˬleˬ hawˇ-eu Maˬnaˇseˬ-ahˇ Yaˬkoˆ dawˬ ngehˬ gʼeh nehˬ-euˬ

¹ Aˇ nah aˇ yamˬ ui cuiˆ myahˇ laˇ ngeh, aˬ yawꞈ aˬ da jawˇ saˇ maˬ doˆ-eu gaˇ kawˆ Yoˇsehˆ ya gaˬ-euˬ meh. Kʼoeˇ miˇ neh, aˬ yawꞈ-euˬ aˬ li Maˬnaˇseˬ hawˇ-eu Eˇpaˬleˬ aˬ nyaꞈ nmˇ-ahˇ sheuˬ-awˇ, aˬ yawꞈ-euˬ aˬ da Yaˬkoˆ-ahˇ haw le-euˬ meh.

² Aˬ yawꞈ-euˬ aˬ li Yoˇsehˆ aˬ yawꞈ-ahˇ haw le-euˬ gaˇ kawˆ Yaˬkoˆ ya gaˬ ngeh, gʼaˬ kʼaˇ jaˆ-eu shaˇ-eu laꞈ kʼoeˇ, yuꞈ zaˇ kʼoeˇ taˆ tuˇ laˇ-awˇ nuiˇ-euˬ meh.

³ Kʼoeˇ ngeh, Yoˇsehˆ-ahˇ Yaˬkoˆ ehˇ nehˬ-eu, “Kaˬnaˬ miˇ kʼahˬ laꞈ kʼoeˇ jaˆ-eu Luˇzaˆ meuˬ-ahˇ, Baoˬ huiˬ-eu Miˬyehˇ ngaˬ-euˬ mehˬ shi doˆ le-awˇ, ngaˬ-ahˇ guiˬ lahˬ biꞈ nehˬ laꞈ-euˬ meh.

⁴ Aˬ yawꞈ ngaˬ-ahˇ ehˇ-eu, ‘Nawˬ-euˬ zaˬ nawˬ-euˬ uˆ deuˬ tsawˇ jeuˬ gʼawˬ mya jeuˬ pyeuꞈ laˇ ni, aˬ yawꞈ maꞈ-ahˇ ngaˇ bi jeuˬ bi o le ma. Miˇ kʼahˬ heu kʼahˬ, mˬ maˬ maˬ byaˆ zaˇ ziˇ nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ tsehˆ nehˬ ma’ lehˇ ehˇ-eu meh.

⁵ “Yoˇsehˆ-oˇ, Iˇjiˇtuˆ miˇ kʼahˬ laꞈ kʼoeˇ ngaˇ maˬ oe keuˆ mi naˆ-ehˇ heu gaˇ dehꞈ le-euˬ nawˬ li heu nyiˬ li kʼawꞈ, ngaˬ-euˬ zaˬ pyeuꞈ-eu ma. Luˇbeˬ hawˇ-eu Suˇmoˬ aˬ nyaꞈ nmˇ ngaˬ li pyeuꞈ-eu loꞈ-ehˇ, Eˇpaˬleˬ hawˇ-eu Maˬnaˇseˬ aˬ nyaꞈ nmˇ kʼawꞈ ngaˬ li pyeuꞈ-eu ma.

⁶ Heu taꞈ naˇ, nawˇ aˬ li gʼawˬ mya li paˇ jawˇ le kʼawꞈ, aˬ yawꞈ maꞈ-ahˇ ngaˬ-euˬ zaˬ lehˇ maˬ paˇ sawˇ ma. Aˬ yawꞈ maꞈ-ahˇ oꞈ-eu jeˬ biˇ deuˬ-aˬ, Eˇpaˬleˬ hawˇ-eu Maˬnaˇseˬ-ahˇ taꞈ-awˇ, aˬ yawꞈ nyaꞈ aˬ yawꞈ maꞈ-ahˇ biꞈ tehꞈ-a.

⁷ Nawˬ ma Laˬkeˬlaˇ baˬ da neh ngaˇ heu loꞈ-ehˇ jahˇ ma. Maˬsoˬpoˬtaˬmiˇ miˇ kʼahˬ-ahˇ neh gʼoꞈ le-awˇ, Kaˬnaˬ miˇ kʼahˬ Eˇpaˬlaˇ meuˬ-ahˇ yaw kʼaˆ-ehˇ maˬ kaˬ gaˇ oe keuˆ ngeh, nawˬ ma shiˇ-euˬ miˇ neh ngaˇ noeˬ shaˬ dui dui-euˬ ma. Eˇpaˬlaˇ meuˬ-ahˇ iˇ-eu gaˇ ma gaˇ dzeˇ aˬ yawꞈ-ahˇ ngaˇ baꞈ pahˬ yaꞈ-euˬ ma.” (Eˇpaˬlaˇ meuˬ-ahˇ, nymˬ-mˇ Behˬlehˬhehˬ meuˬ lehˇ kuˇ-eu meh.)

⁸ Yoˇsehˆ-euˬ aˬ li kʼoeˇ nyiˬ li-ahˇ Yaˬkoˆ ya mawˇ ngeh, “Aˬ li heu nyiˬ li aˬ suˇ gʼaˬ-euˬ aˬ li-a” lehˇ naˇ haˬ-euˬ meh.

⁹ “Aˬ li heu nyiˬ li-aˬ, Iˇjiˇtuˆ miˇ kʼahˬ laꞈ kʼoeˇ Miˬyehˇ neh ngaˬ-ahˇ biꞈ laꞈ-euˬ ngaˬ-euˬ zaˬ deuˬ ma” lehˇ, Yoˇsehˆ ehˇ kʼoꞈ nehˬ-euˬ meh. “Aˬ yawꞈ nyaꞈ nmˇ-ahˇ ngaˇ jawˇ gaˇ sheuˬ laꞈ-awˬ. Ngaˇ dawˬ ngehˬ gʼeh nehˬ la” lehˇ Yaˬkoˆ ehˇ-eu meh.

¹⁰ Yaˬkoˆ tsawˇ mawˬ mawˬ dui dui laˇ-euˬ miˇ neh, myaˆ nuiˆ yaw muiˬ paˬ-ehˇ maˬ mawˇ nya-a. Yoˇsehˆ-euˬ aˬ li kʼoeˇ nyiˬ li-ahˇ aˬ yawꞈ jawˇ gaˇ sheuˬ laꞈ ngeh, aˬ yawꞈ ciˬ-awˇ mehˬ cuˇ cuˇ nehˬ-euˬ meh.

¹¹ “Nawˬ-ahˇ tiˬ jawˇ-iˬ maˬ paˇ ya mawˇ-eu duˇ lehˇ ngaˇ noeˬ jiˇ gʼaˬ-euˬ kʼawꞈ, nawˬ-ahˇ tehꞈ-ehˇ maˬ ngeuˇ-ehˇ, nawˬ-euˬ zaˬ deuˬ-ahˇ kʼawꞈ Miˬyehˇ ngaˬ-ahˇ paˇ bi mawˇ laꞈ-euˬ nga” lehˇ, Yoˇsehˆ-ahˇ Yaˬkoˆ ehˇ nehˬ-euˬ meh.

¹² Kʼoeˇ ngeh, aˬ yawꞈ-euˬ aˬ li kʼoeˇ nyiˬ li-ahˇ, aˬ yawꞈ aˬ da-euˬ bawˇ kʼahˇ laꞈ kʼoeˇ neh Yoˇsehˆ ciˬ doˆ-awˇ, aˬ yawꞈ aˬ da-euˬ mehˬ shi pawˬ tsuiꞈ pawˬ dmˬ dmˬ-awˇ, miˇ tsa awˆ byaˆ-euˬ meh.

¹³ Yoˇsehˆ-aˬ, Eˇpaˬleˬ-ahˇ Yaˬkoˆ-euˬ aˇ caˇ paw bi jawˇ-awˇ, Maˬnaˇseˬ-ahˇ Yaˬkoˆ-euˬ aˇ maˇ paw bi jawˇ tsaˬ taˬ-euˬ meh.

¹⁴ Ehˇ kʼawꞈ, Yaˬkoˆ aˬ laꞈ kaˇ teˇ baꞈ teˇ-awˇ, aˬ nyiˇ gʼaˬ pyeuꞈ-eu Eˇpaˬleˬ-euˬ uˬ duˬ kʼoeˇ taˆ aˇ maˇ laꞈ baꞈ daˆ-awˇ, aˬ yuiꞈ gʼaˬ pyeuꞈ-eu Maˬnaˇseˬ-euˬ uˬ duˬ kʼoeˇ taˆ aˇ caˇ laꞈ baꞈ daˆ nehˬ-euˬ meh.

¹⁵ Kʼoeˇ naˇ, Yaˬkoˆ neh Yoˇsehˆ-ahˇ heu loꞈ-ehˇ dawˬ ngehˬ gʼeh nehˬ-euˬ meh. “Ngaˬ bawˇ Aˬbyaˬhaˬ hawˇ-eu ngaˬ da Iˇtsaˆ uˬ duˬ tahˬ-euˬ Miˬyehˇ, aˬ li heu nyiˬ li-ahˇ guiˬ lahˬ biꞈ luꞈ-uˇ. Iˬ nah keuˆ ni ngaˬ-ahˇ sheuˬ gʼeh luꞈ-eu Miˬyehˇ, aˬ yawꞈ nyaꞈ-ahˇ dawˬ ngehˬ gʼeh nehˬ luꞈ-uˇ.

¹⁶ Guˆ-eu gaˆ-eu jeˬ laꞈ kʼoeˇ ngaˬ-ahˇ sheuˬ buˬ-euˬ Miˬyehˇ-euˬ gʼaˬ kʼehˇ, aˬ yawꞈ nyaꞈ-ahˇ guiˬ lahˬ biꞈ luꞈ-uˇ. Aˬ li heu nyiˬ li baˬ da neh, ngaˬ-euˬ tsawˇ myahˇ maˬ ehˇ, ngaˬ bawˇ Aˬbyaˬhaˬ-euˬ tsawˇ myahˇ maˬ ehˇ, ngaˬ da Iˇtsaˆ-euˬ tsawˇ myahˇ maˬ ehˇ, tiˬ jawˇ-iˬ maˬ byoˆ-iˇ ni jaˆ yaꞈ luꞈ-uˇ. Aˬ yawꞈ nyaꞈ nmˇ zaˬ gʼawˬ mya ni jawˇ le-awˇ, aˬ yawꞈ maꞈ-euˬ zaˬ deuˬ uˆ deuˬ, myaˬ dui dui le luꞈ-uˇ.”

¹⁷ Eˇpaˬleˬ-euˬ uˬ duˬ kʼoeˇ taˆ Yaˬkoˆ-euˬ aˇ maˇ laꞈ baꞈ daˆ taˬ-euˬ gaˇ Yoˇsehˆ ya mawˇ ngeh, nui ma maˬ saˇ-a. Kʼoeˇ miˇ neh, Maˬnaˇseˬ-euˬ uˬ duˬ kʼoeˇ taˆ aˇ maˇ laꞈ bi baꞈ daˆ paˇ-eu lehˇ, Eˇpaˬleˬ-euˬ uˬ duˬ kʼoeˇ taˆ baꞈ daˆ taˬ-euˬ aˬ yawꞈ-euˬ aˬ laꞈ-ahˇ Yoˇsehˆ yuˇ-euˬ meh.

¹⁸ “Nawˇ aˬ laꞈ baꞈ daˆ taˬ-euˬ maˬ tsaˬ nga da-oˇ. Heu gʼaˬ aˬ li aˬ yuiꞈ gʼaˬ meh. Heu gʼaˬ-euˬ uˬ duˬ kʼoeˇ taˆ nawˬ-euˬ aˇ maˇ laꞈ baꞈ daˆ paˇ-awˬ” lehˇ, Yaˬkoˆ-ahˇ Yoˇsehˆ ehˇ nehˬ-euˬ meh.

¹⁹ Ehˇ kʼawꞈ, Yoˇsehˆ ehˇ gaˇ Yaˬkoˆ maˬ naˇ haˬ-ehˇ, “Ngaˇ siˬ nya ma li-oˇ. Ngaˇ siˬ nya ma. Maˬnaˇseˬ-euˬ zaˬ deuˬ uˆ deuˬ kʼawꞈ, huiˬ-eu tsawˇ jeuˬ pyeuꞈ laˇ tehꞈ-a. Ehˇ kʼawꞈ, aˬ nyiˇ gʼaˬ aˬ yawꞈ naˆ maˬ tseˇ huiˬ dzehˬ-awˇ, aˬ nyiˇ gʼaˬ-euˬ zaˬ deuˬ uˆ deuˬ huiˬ dui myaˬ dui dui-eu tsawˇ jeuˬ deuˬ pyeuꞈ laˇ tehꞈ-a” lehˇ ehˇ-eu meh.

²⁰ Kʼoeˇ ngeh nah, aˬ li kʼoeˇ nyiˬ li-ahˇ Yaˬkoˆ heu loꞈ-ehˇ dawˬ ngehˬ gʼeh nehˬ-euˬ meh. “Iˇsaˬleˬlaˆ tsawˇ haˬ deuˬ tiˬ gʼaˬ tiˇ gʼaˬ dawˬ ngehˬ gʼeh nehˬ ngeh, naw nyaꞈ-euˬ tsawˇ myahˇ ya kuˇ tehꞈ-a. Aˬ yawꞈ maꞈ tiˬ gʼaˬ tiˇ gʼaˬ guiˬ lahˬ biꞈ ngeh, Eˇpaˬleˬ hawˇ-eu Maˬnaˇseˬ aˬ nyaꞈ nmˇ-ahˇ duˇ ni, Miˬyehˇ naw maꞈ-ahˇ guiˬ lahˬ biꞈ luꞈ-uˇ lehˇ ya ehˇ tehꞈ-a.” Yaˬkoˆ-aˬ, Eˇpaˬleˬ-euˬ tsawˇ myahˇ-ahˇ jeˬ huˬ ehˇ-awˇ, Maˬnaˇseˬ-ahˇ naˆ maˬ tseˇ Eˇpaˬleˬ-ahˇ taˬ huiˬ nehˬ-euˬ meh.

²¹ Kʼoeˇ naˇ, Yoˇsehˆ-ahˇ Yaˬkoˆ ehˇ nehˬ-eu, “Nawˇ mawˇ luꞈ-eu loꞈ-ehˇ, ngaˇ ziˇ jiˇ-eu dawˬ peh peh laˇ-euˬ miˇ-a. Ehˇ kʼawꞈ, nawˬ-euˬ aˬ poeˬ aˬ bawˇ deuˬ-euˬ miˇ kʼahˬ-ahˇ, Miˬyehˇ nawˬ-ahˇ sheuˬ kʼoꞈ gʼeh nehˬ laꞈ tehꞈ-a.

²² Kaˆ hawˇ-eu mi cehˇ baꞈ-awˇ, Aˬmawˇliˆ tsawˇ jeuˬ-ahˇ ngaˬ neh deuˆ za taˬ-euˬ Sheˬkmˬ lehˇ kuˇ-eu miˇ kʼahˬ kʼoeˇ kʼahˬ, nawˬ-euˬ aˇ doˆ deuˬ-ahˇ ngaˇ biꞈ-eu lehˇ gʼeh-eu maˬ ngeuˇ. Nawˬ-ahˇ biꞈ-eu lehˇ gʼeh-eu ma.”