Aˇ dahˬ 13 - Akha

Aˬbyaˬ hawˇ-eu Lawˇtaˬ gʼawˬ-iˇ-euˬ

¹ Aˬbyaˬ-aˬ, aˬ yawꞈ kʼaˇ jaˆ-eu jeˬ dawˬ tawˆ luꞈ yuˇ-awˇ, aˬ yawꞈ-euˬ miˬ zaˬ nehˬ-ehˇ Iˇjiˇtuˆ miˇ kʼahˬ laꞈ kʼoeˇ neh doˆ laˇ-awˇ, Kaˬnaˬ miˇ kʼahˬ laꞈ oˆ paw dzaˬ-ahˇ gʼoꞈ daˆ leˇ-euˬ meh. Lawˇtaˬ kʼawꞈ, aˬ yawꞈ-euˬ mehˬ nah caw teh leꞈ-euˬ meh.

² Aˬbyaˬ-aˬ, yawˇ maˬ ehˇ, ciꞈ myehꞈ maˬ ehˇ, mawˇ neˇ maˬ ehˇ, myaˬ dui dui-awˇ, pyuˇ shuiˇ jaˆ dui dui-eu smˇ muiˬ aˬ da tiˬ gʼaˬ pyeuꞈ-eu meh.

³ Jawˇ duˬ kʼoeˇ tsahˇ-ahˇ aˬ yawꞈ paˇ byehˇ dzeh yaꞈ-awˇ, tiˬ gaˇ saˇ-iˬ tiˬ gaˇ jawˇ jawˇ-ehˇ, Beˬdeˬlaˇ meuˬ paw le daˆ gʼeh leꞈ-euˬ meh. Beˬdeˬlaˇ meuˬ hawˇ-eu Aˬiˇ meuˬ yaw kaˬ-ahˇ jaˆ-eu, yaw beh aˬ yawꞈ sehˬ gʼawˆ gʼawˆ-awˇ tiˬ poˆ jawˇ haw-euˬ jawˇ duˬ-ahˇ, aˬ yawꞈ le keuˆ-euˬ meh.

⁴ Jawˇ duˬ kʼoeˇ tsahˇ-aˬ, dzeuˇ laˇ ngeh aˬ yawꞈ neh lawˇ duˬ tiˬ hmˬ tsoˆ taˬ yaꞈ-euˬ jawˇ duˬ pyeuꞈ-eu meh. Kʼoeˇ gaˇ Sahˬpaˬ Miˬ yehˇ-ahˇ aˬ yawꞈ uˬ duˬ tahˬ-euˬ meh.

⁵ Lawˇtaˬ gʼaˬ kʼawꞈ, yawˇ maˬ ehˇ, ciꞈ myehꞈ maˬ ehˇ, mawˇ neˇ maˬ ehˇ, gʼawˬ mya ni jawˇ-awˇ, yawˬ ha-euˬ nymˇ jiˇ yawˬ ha baw-eu uˬ taꞈ, zaˬ kʼaˆ kʼawꞈ cu taˬ-euˬ meh.

⁶ Aˬ nyaꞈ uiˬ zaˬ jeˬ zaˬ aˇ dzehˬ myaˬ dzeuˇ-eu miˇ neh, nyiˬ gʼaˬ luꞈ tiˬ gaˇ tehꞈ-ehˇ jawˇ-eu gʼaˇ duˬ, jeˬ zaˬ jawˇ kʼahˬ maˬ jeˇ-a.

⁷ Kʼoeˇ miˇ neh, Aˬbyaˬ-euˬ jeˬ zaˬ bo-eu tsawˇ haˬ deuˬ hawˇ-eu, Lawˇtaˬ-euˬ jeˬ zaˬ bo-eu tsawˇ haˬ deuˬ yaw kaˬ, tiˬ kʼehˬ maˬ taˬ ni dawˬ ja doˆ-eu meh. Aˇ yamˬ kʼoeˇ yamˬ-ahˇ, Kaˬnaˬ tsawˇ jeuˬ hawˇ-eu Paˬyehˆ tsawˇ jeuˬ kʼawꞈ, miˇ kʼahˬ kʼoeˇ kʼahˬ laꞈ kʼoeˇ jawˇ luꞈ-eu meh.

⁸ Kʼoeˇ ngeh, Lawˇtaˬ-ahˇ Aˬbyaˬ ehˇ nehˬ-eu, “Aˇ nyaꞈ-aˬ, aˬ uiˬ hawˇ-eu aˬ duˇ lehˇ gʼeh-eu miˇ neh, nawˬ-euˬ tsawˇ haˬ hawˇ-eu ngaˬ-euˬ tsawˇ haˬ yaw kaˬ dawˬ ja bi laˆ doˆ-eu maˬ muiˬ-a.

⁹ Teu miˇ neh aˇ nyaꞈ uiˬ zaˬ jawˇ gʼawˬ kaˇ-euˇ. Nawˇ geuꞈ mawꞈ-eu miˇ tsaˬ pehˇ tsahˇ-ahˇ nawˇ jeˬ huˬ toeˬ ceh-awˬ. Aˇ nyaꞈ tiˬ gʼaˬ tiˬ paw jawˇ-iˇ kaˇ-euˇ.”

¹⁰ Miˇ kʼahˬ kʼoeˇ kʼahˬ doe doe-ehˇ Lawˇtaˬ jawˇ duˬ nawˬ haw-iˇ ngeh, Zoˇlaˆ meuˬ-ahˇ le-eu gaˇ ma kahˇ li jaˆ-eu Yawˇdaˬ lawˇ baˬ lawˇ deh kʼoeˇ baˬ ma baˬ dawˬ tawˆ luꞈ, Sahˬpaˬ Miˬyehˇ-euˬ yaˇ kmˇ loꞈ-ehˇ maˬ ehˇ, Iˇjiˇtuˆ miˇ kʼahˬ loꞈ-ehˇ maˬ ehˇ, iˇ cuꞈ jaˆ loꞈ-eu jawˇ duˬ pyeuꞈ gaˇ ya mawˇ-euˬ meh. (Aˇ yamˬ kʼoeˇ yamˬ laꞈ kʼoeˇ, Sawˇdoˬ meuˬ hawˇ-eu Gawˇmawˇlaˆ meuˬ-ahˇ Sahˬpaˬ Miˬyehˇ maˬ laˆ cawˆ-aˬ siˬ.)

¹¹ Kʼoeˇ naˇ, Lawˇtaˬ gʼaˬ Yawˇdaˬ lawˇ baˬ lawˇ deh kʼoeˇ baˬ ma baˬ dawˬ tawˆ luꞈ geuꞈ ma lehˇ tsaˬ-awˇ, nahˇ ma doˆ kʼehˬ paw jawˇ-iˇ-euˬ meh. Kʼoeˇ gaˇ neh naˇ, aˬ nyaꞈ uiˬ zaˬ tiˬ gʼaˬ tiˬ paw jawˇ gʼawˬ-euˬ meh.

¹² Aˬbyaˬ gʼaˬ Kaˬnaˬ miˇ kʼahˬ-ahˇ jawˇ yaꞈ-awˇ, Lawˇtaˬ gʼaˬ Sawˇdoˬ meuˬ dawˬ peh sehˬ gʼawˆ gʼawˆ-awˇ, Yawˇdaˬ lawˇ baˬ gawˆ cawˬ jaˆ-eu meuˬ deuˬ-ahˇ jawˇ duˬ dah-euˬ meh.

¹³ Sawˇdoˬ meuˬ laꞈ kʼoeˇ jawˇ-eu tsawˇ haˬ deuˬ-aˬ, Sahˬpaˬ Miˬyehˇ mehˬ shi iˬ baˇ mˇ-awˇ, haiˬ-eu tsawˇ haˬ deuˬ tehꞈ-ehˇ pyeuꞈ luꞈ-eu meh.

Aˬbyaˬ Heˬbyoˬ meuˬ-ahˇ jawˇ leˇ-euˬ

¹⁴ Lawˇtaˬ doˆ-iˇ dzeuˇ ngeh jawˇ, Aˬbyaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Nawˇ jawˇ gaˇ jawˇ-awˇ miˇ ma oeˬ coeˇ oeˬ pyawˬ-ahˇ haw gʼeh-iˬ sheˇ.

¹⁵ Nawˬ neh kʼaˇ haw mawˇ jiˇ-euˬ miˇ kʼahˬ dawˬ tawˆ luꞈ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ biꞈ-eu lehˇ ngaˇ lehˬ hmˬ taˬ-euˬ ma. Miˇ kʼahˬ heu kʼahˬ-aˬ, mˬ maˬ maˬ byaˆ zaˇ ziˇ naw maꞈ-euˬ miˇ kʼahˬ pyeuꞈ tehꞈ-a.

¹⁶ Nawˬ-euˬ zaˬ nawˬ-euˬ uˆ deuˬ-ahˇ, tsawˇ haˬ tiˬ gʼaˬ-iˬ maˬ gui jiˇ coeˇ gaˇ keuˆ ni ngaˇ bi jeuˬ bi o le ma. Miˇ tsaˬ kʼaˇ shuiꞈ-ahˇ maˬ gui jiˇ nya-eu loꞈ-ehˇ, nawˬ-euˬ zaˬ nawˬ-euˬ uˆ deuˬ-ahˇ maˬ gui jiˇ nya-aˇ.

¹⁷ Nawˇ iˇ-awˇ, miˇ kʼahˬ kʼahˬ lah ni cah doe haw-iˇ-awˬ. Aˬ jeˬ miˇ neh ehˇ naˇ, miˇ kʼahˬ heu kʼahˬ kʼahˬ lah ni nawˬ-ahˇ biꞈ-eu lehˇ, ngaˇ lehˬ hmˬ taˬ-euˬ ma” lehˇ ehˇ nehˬ-euˬ meh.

¹⁸ Kʼoeˇ naˇ, Aˬbyaˬ luˆ-iˇ-awˇ, Heˬbyoˬ meuˬ dawˬ peh jaˆ-eu Mamˬliˬ aˇ bawˇ bawˇ yaˇ dawˬ peh sehˬ gʼawˆ gʼawˆ-awˇ jawˇ-euˬ meh. Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, lawˇ duˬ tiˬ tsahˇ kʼoeˇ gaˇ aˬ yawꞈ tsoˆ-euˬ meh.