Aˇ dahˬ 11 - Akha

Miˇ tsaˬ kʼoeˇ taˆ dawˬ gʼawˬ mya jeˬ baw laˇ-euˬ

¹ Aˇ dahˬ beh ngeh, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ, dawˬ tiˬ jeˬ tehꞈ-ehˇ ngehˬ-euˬ meh.

² Aˬ yawꞈ maꞈ jawˇ duˬ maˬ ziꞈ leˇ dah-ehˇ, nahˇ ma doˆ kʼehˬ paw doe doe-ehˇ pawˇ pawˇ-ehˇ jawˇ luꞈ ngeh, Baˬbuˇloˬ miˇ kʼahˬ laꞈ kʼoeˇ deh saˇ tiˬ tsahˇ iˇ zaˬ-awˇ, kʼoeˇ gaˇ jawˇ duˬ dah-euˬ meh.

³ Kʼoeˇ ngeh jawˇ, “Oe uiˬ-awˬ. Aˬ dui maꞈ tsaˬ byaˆ tehˆ-awˇ puiˆ kaˇ-euˇ” lehˇ, aˬ yawꞈ maꞈ tiˬ gʼaˬ tiˇ gʼaˬ cawˬ-euˬ meh. Kʼoeˇ naˇ, aˬ yawꞈ maꞈ tsaˬ byaˆ jaˆ laˇ-awˇ, tsaˬ byaˆ gawˬ ngeh tiˬ siˬ tiˇ siˬ bi tsehꞈ ziꞈ leˇ nya-eu aˇ dziˬ tiˬ jeˬ kʼawꞈ jaˆ laˇ-euˬ meh.

⁴ “Aˬ dui maꞈ maˬ ya gʼawˬ maˬ ya gʼehˇ-iˇ-eu gʼaˇ duˬ maˬ ehˇ, tsawˇ myahˇ doˆ-awˇ kʼahˬ sehˇ jaˆ-eu tsawˇ haˬ deuˬ pyeuꞈ laˇ-eu gʼaˇ duˬ maˬ ehˇ, meuˬ tiˬ meuˬ teˬ-awˇ, mˬ-ahˇ tuˆ-eu nymˇ nymˇ ma tiˬ nymˇ gawˬ kaˇ-euˇ” lehˇ, aˬ yawꞈ maꞈ ehˇ-eu meh.

⁵ Kʼoeˇ naˇ, Sahˬpaˬ Miˬyehˇ zaꞈ ka le-awˇ, tsawˇ haˬ kʼoeˇ deuˬ neh gawˬ taˬ-euˬ meuˬ kʼoeˇ meuˬ hawˇ-eu nymˇ nymˇ ma kʼoeˇ nymˇ-ahˇ haw le-euˬ meh.

⁶ Sahˬpaˬ Miˬyehˇ ehˇ-eu, “Haw sheˇ. Tsawˇ haˬ heu deuˬ tsawˇ jeuˬ tiˬ jeuˬ tehꞈ-ehˇ pyeuꞈ-awˇ, dawˬ tiˬ jeˬ tehꞈ-ehˇ ngehˬ-eu miˇ neh, heu loꞈ-ehˇ mˇ doˆ nya-eu nga. Heu-aˬ, aˇ dahˬ beh-eu tehꞈ nga siˬ. Gʼawˬ myahˇ maˬ gʼeh-ehˇ aˬ yawꞈ maꞈ kʼaˇ mˇ mawꞈ-eu jeˬ mˇ nya-eu aˇ tiˆ keuˆ laˇ-eu nga.

⁷ Aˬ yawꞈ maꞈ tiˬ gʼaˬ neh ngehˬ-euˬ dawˬ tiˬ gʼaˬ maˬ gʼoˆ siˬ nya-ehˇ bi pyeuꞈ-iˇ-eu gʼaˇ duˬ, aˬ dui zaꞈ ka-iˇ-awˇ, aˬ yawꞈ maꞈ-euˬ dawˬ-ahˇ laˆ bahˬ laˆ baˆ nehˬ kaˇ-euˇ.”

⁸ Kʼoeˇ naˇ, Sahˬpaˬ Miˬyehˇ neh tsawˇ haˬ kʼoeˇ deuˬ-ahˇ miˇ kʼahˬ doe ni bi jawˇ byaˆ jiˇ-euˬ miˇ neh, aˬ yawꞈ maꞈ meuˬ kʼoeˇ meuˬ maˬ paˇ teˬ ni byehˇ byoˆ-euˬ meh.

⁹ Meuˬ kʼoeˇ meuˬ-ahˇ Baˬbuˇloˬ lehˇ kuˇ-euˬ meh. Aˬ jeˬ miˇ neh ehˇ naˇ, meuˬ kʼoeˇ meuˬ laꞈ kʼoeˇ tsawˇ haˬ zaˬ deuˬ dawˬ maˬ ngehˬ cawˬ taꞈ nya ni, aˬ yawꞈ maꞈ-euˬ dawˬ-ahˇ Sahˬpaˬ Miˬyehˇ laˆ bahˬ laˆ baˆ nehˬ-awˇ, aˬ yawꞈ maꞈ-ahˇ miˇ kʼahˬ doe ni bi jawˇ byaˆ jiˇ-euˬ meh.

Sheˬmaˆ-euˬ zaˬ deuˬ uˆ deuˬ

¹⁰ Heu deuˬ-aˬ, Sheˬmaˆ-euˬ zaˬ deuˬ uˆ deuˬ meh. Miˇ tsaˬ-ahˇ iˇ cuꞈ dahˬ pymˬ gʼaˬ-awˇ nyiˬ kʼoꞈ keuˆ laˇ ngeh, Sheˬmaˆ tiˬ yaˇ kʼoꞈ kʼawˆ laˇ-euˬ meh. Kʼoeˇ ngeh kʼoꞈ, aˬ yawꞈ Aˬpaˬshaˇ lehˇ myahˇ-euˬ aˬ li tiˬ li jawˇ le-euˬ meh.

¹¹ kʼoeˇ sawˇ miˇ tsa aˬ yawꞈ ngaˬ yaˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

¹² Aˬpaˬshaˇ smˬ tseˇ ngaˬ kʼoꞈ kʼawˆ ngeh, Sheˬlahˬ lehˇ myahˇ-euˬ aˬ li tiˬ li jawˇ le-euˬ meh.

¹³ kʼoeˇ sawˇ miˇ tsa aˬ yawꞈ oeˬ yaˇ smˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

¹⁴ Sheˬlahˬ smˬ tseˇ kʼoꞈ kʼawˆ ngeh, Eˬbaˬ lehˇ myahˇ-euˬ aˬ li tiˬ li jawˇ le-euˬ meh.

¹⁵ Kʼoeˇ sawˇ miˇ tsa aˬ yawꞈ oeˬ yaˇ smˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

¹⁶ Eˬbaˬ smˬ tseˇ oeˬ kʼoꞈ kʼawˆ ngeh, Pehˇlehˆ lehˇ myahˇ-euˬ aˬ li tiˬ li jawˇ le-euˬ meh.

¹⁷ Kʼoeˇ sawˇ miˇ tsa aˬ yawꞈ oeˬ yaˇ smˬ tseˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

¹⁸ Pehˇlehˆ smˬ tseˇ kʼoꞈ kʼawˆ ngeh, Yeˬuˇ lehˇ myahˇ-euˬ aˬ li tiˬ li jawˇ le-euˬ meh.

¹⁹ Kʼoeˇ sawˇ miˇ tsa aˬ yawꞈ nyiˬ yaˇ gʼoeˬ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

²⁰ Yeˬuˇ smˬ tseˇ nyiꞈ kʼoꞈ kʼawˆ ngeh, Seˬlawˇ lehˇ myahˇ-euˬ aˬ li tiˬ li jawˇ le-euˬ meh.

²¹ Kʼoeˇ sawˇ miˇ tsa aˬ yawꞈ nyiˬ yaˇ shiꞈ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

²² Seˬlawˇ smˬ tseˇ kʼoꞈ kʼawˆ ngeh, Naˬkawˬ lehˇ myahˇ-euˬ aˬ li tiˬ li jawˇ le-euˬ meh.

²³ Kʼoeˇ sawˇ miˇ tsa aˬ yawꞈ nyiˬ yaˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

²⁴ Naˬkawˬ nyiˬ tseˇ gʼoeˬ kʼoꞈ kʼawˆ ngeh, Teˬlah lehˇ myahˇ-euˬ aˬ li tiˬ li jawˇ le-euˬ meh.

²⁵ Kʼoeˇ sawˇ miˇ tsa aˬ yawꞈ tiˬ yaˇ tseˇ gʼoeˬ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.

²⁶ Teˬlah shiꞈ tseˇ kʼoꞈ dzehˬ-iˇ ngeh, Aˬbyaˬ, Naˬkawˬ, Haˬlaˬ aˬ ha smˬ mehˇ nmˇ-euˬ aˬ da pyeuꞈ laˇ-euˬ meh.

Teˬlah-euˬ zaˬ deuˬ uˆ deuˬ

²⁷ Heu deuˬ-aˬ, Aˬbyaˬ, Naˬkawˬ, Haˬlaˬ aˬ ha mehˇ nmˇ-euˬ aˬ da pyeuꞈ-eu Teˬlah-euˬ zaˬ deuˬ uˆ deuˬ meh. Haˬlaˬ-aˬ, Lawˇtaˬ-euˬ aˬ da meh.

²⁸ Haˬlaˬ-aˬ, aˬ yawꞈ-euˬ aˬ da maˬ shiˇ mi naˆ-ehˇ, aˬ yawꞈ dehꞈ le-euˬ jawˇ duˬ pyeuꞈ-eu, Baˬbuˇloˬ miˇ kʼahˬ laꞈ kʼoeˇ jaˆ-eu Uˇlaˆ meuˬ-ahˇ shiˇ-euˬ meh.

²⁹ Aˬbyaˬ-aˬ, Saˬlehˇ-ahˇ sheuˬ dahˬ dzaˬ-awˇ, Naˬkawˬ gʼaˬ Haˬlaˬ-euˬ aˬ buˇ Miˇlaˬkah-ahˇ sheuˬ dahˬ dzaˬ-euˬ meh. Haˬlaˬ-aˬ, Iˇsaˬkah-euˬ aˬ da kʼawꞈ pyeuꞈ-eu meh.

³⁰ Saˬlehˇ-aˬ, maˬ baw aˬ ma meh.

³¹ Teˬlah-aˬ, aˬ yawꞈ-euˬ aˬ li Aˬbyaˬ, Haˬlaˬ-euˬ aˬ li aˬ yawꞈ-euˬ oeˬ paˬ Lawˇtaˬ, Aˬbyaˬ-euˬ miˬ zaˬ pyeuꞈ-eu aˬ yawꞈ-euˬ kuiˬ ma Saˬlehˇ aˬ ha maꞈ-ahˇ sheuˬ-awˇ, Baˬbuˇloˬ miˇ kʼahˬ Uˇlaˆ meuˬ-ahˇ neh doˆ le-awˇ, Kaˬnaˬ miˇ kʼahˬ-ahˇ jawˇ-iˇ-euˬ meh. Haˬlaˬ meuˬ-ahˇ keuˆ ni aˬ yawꞈ maꞈ iˇ gʼeh-awˇ, kʼoeˇ gaˇ jawˇ duˬ dah-euˬ meh.

³² Teˬlah nyiˬ yaˇ ngaˬ kʼoꞈ kʼawˆ ngeh, meuˬ kʼoeˇ meuˬ laꞈ kʼoeˇ ziˇ jiˇ-euˬ meh.