Aˇ dahˬ 1 - Akha

Mˬ beh miˇ beh beh-euˬ

¹ Aˇ dahˬ beh ngeh, mˬ hawˇ-eu miˇ-ahˇ Miˬyehˇ beh-euˬ meh.

² Miˇ tsaˬ tahˬ kʼawˇ-aˬ, pyawˬ naˬ maˬ siˬ laˇ ni, yaw bahˬ yaw lahˇ-ehˇ ciˬ cuˇ ni jaˆ luꞈ-eu meh. Yawˬ jeˬ na luꞈ kʼoeˇ taˆ iˬ ma laˆ shaˆ iˇ cuꞈ dahˬ pymˬ taˬ-awˇ, zahˇ tsui ni jaˆ-euˬ meh. Kʼoeˇ ngeh, Miˬyehˇ-euˬ baoˬ iˇ cuꞈ kʼoeˇ taˆ cah luꞈ-eu meh.

³ Kʼoeˇ naˇ, Miˬyehˇ dawˬ biꞈ-awˇ, “Yaw shehꞈ jaˆ le-awˬ” lehˇ ehˇ ngeh, yaw shehꞈ jaˆ le-euˬ meh.

⁴ Kʼoeˇ gaˇ ya mawˇ ngeh, Miˬyehˇ nui kʼahˇ shiˇ-euˬ meh. Kʼoeˇ naˇ, yaw shehꞈ hawˇ-eu yaw zahˇ-ahˇ Miˬyehˇ biˇ paˆ nehˬ-awˇ, bi gʼawˬ-iˇ-euˬ meh.

⁵ Yaw shehꞈ-ahˇ “Nah gʼahˇ”, yaw zahˇ-ahˇ “Uˬ ciꞈ” lehˇ, aˬ yawꞈ myahˇ nehˬ-euˬ meh. Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, yaw beh nah dzeuˇ-iˇ-euˬ meh.

⁶ Kʼoeˇ naˇ, “Iˇ cuꞈ nyiˬ paˆ-ehˇ paˆ-iˇ-awˇ bi gʼawˬ-iˇ-eu gʼaˇ duˬ, kaˬ lawˆ baw le-awˬ” lehˇ Miˬyehˇ dawˬ biꞈ ngeh, kaˬ lawˆ baw le-euˬ meh.

⁷ Kaˬ lawˆ kʼoeˇ hmˬ-euˬ kʼoeˇ taˆ paw jaˆ-eu iˇ cuꞈ hawˇ-eu, uˬ moˆ paw jaˆ-eu iˇ cuꞈ-ahˇ Miˬyehˇ biˇ paˆ nehˬ-euˬ meh.

⁸ Kaˬ lawˆ kʼoeˇ hmˬ-ahˇ, “Mˬ” lehˇ Miˬyehˇ myahˇ nehˬ-euˬ meh. Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, nyiˬ nah tiˬ nah dzeuˇ-iˇ-euˬ meh.

⁹ Kʼoeˇ naˇ, Iˇ cuꞈ maˬ dahˬ-eu pehˇ tsahˇ bi baw laˇ-eu gʼaˇ duˬ, mˬ-euˬ uˬ moˆ paw jaˆ-eu iˇ cuꞈ deuˬ tiˬ paw dzeˇ coeˇ-ahˇ tehꞈ-ehˇ uiˬ-iˇ-awˬ lehˇ Miˬyehˇ dawˬ biꞈ ngeh, kʼoeˇ loꞈ-ehˇ pyeuꞈ laˇ-euˬ meh.

¹⁰ Iˇ cuꞈ maˬ dahˬ-eu pehˇ tsahˇ-ahˇ, “Miˇ tsaˬ” lehˇ aˬ yawꞈ myahˇ nehˬ-awˇ, iˇ cuꞈ uiˬ-iˇ taˬ-euˬ gaˇ, “Iˬ ma laˆ shaˆ” lehˇ aˬ yawꞈ myahˇ nehˬ-euˬ meh. Kʼoeˇ gaˇ ya mawˇ ngeh, Miˬyehˇ nui kʼahˇ shiˇ-euˬ meh.

¹¹ Kʼoeˇ naˇ, Aˇ siˬ kʼaˇ siˬ le nya-awˇ, aˇ nuiˆ kʼaˇ nuiˆ le nya-eu aˇ bawˇ deuˬ hawˇ-eu, sahˬ lahˬ aˇ bawˇ dawˬ tawˆ luꞈ miˇ tsaˬ kʼoeˇ taˆ dehꞈ laˇ-awˬ lehˇ Miˬyehˇ dawˬ biꞈ ngeh, kʼoeˇ loꞈ-ehˇ pyeuꞈ laˇ-euˬ meh.

¹² Miˇ tsaˬ kʼoeˇ taˆ sahˬ lahˬ aˇ bawˇ deuˬ dehꞈ laˇ-euˬ gaˇ Miˬyehˇ ya mawˇ ngeh, nui kʼahˇ shiˇ-euˬ meh.

¹³ Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, smˬ nah tiˬ nah dzeuˇ-iˇ-euˬ meh.

¹⁴ Kʼoeˇ naˇ, “Uˬ ciꞈ nah gʼahˇ biˇ paˆ-eu gʼaˇ duˬ maˬ ehˇ, aˇ nah aˇ yamˬ, aˇ kʼoꞈ aˇ la hawˇ-eu, lawˇ-eu shehˇ-eu aˇ yamˬ aˇ law toꞈ nya-eu gʼaˇ duˬ maˬ ehˇ, mˬ kʼoeˇ taˆ yaw shehꞈ jaˆ le-awˬ.

¹⁵ Yaw shehꞈ kʼoeˇ deuˬ miˇ tsaˬ kʼoeˇ taˆ bya le-awˬ” lehˇ Miˬyehˇ dawˬ biꞈ ngeh, kʼoeˇ loꞈ-ehˇ pyeuꞈ laˇ-euˬ meh.

¹⁶ Aˬ cawˬ naˆ maˬ tseˇ huiˬ dzehˬ-eu yaw shehꞈ nyiˬ hmˬ pyeuꞈ-eu, nahˇ ma hawˇ-eu ba la-ahˇ Miˬyehˇ beh-awˇ, nah hawˇ-eu miˇ-ahˇ bi uˆ lahˇ-euˬ meh. Aˬ guiˇ deuˬ-ahˇ kʼawꞈ aˬ yawꞈ beh-euˬ meh.

¹⁷ Miˇ tsaˬ kʼoeˇ taˆ yaw shehꞈ bi bya-eu gʼaˇ duˬ maˬ ehˇ,

¹⁸ Nah hawˇ-eu miˇ-ahˇ bi uˆ lahˇ-eu gʼaˇ duˬ maˬ ehˇ, yaw shehꞈ hawˇ-eu yaw zahˇ-ahˇ bi biˇ paˆ-eu gʼaˇ duˬ maˬ ehˇ, yaw shehꞈ kʼoeˇ deuˬ-ahˇ mˬ kʼoeˇ taˆ Miˬyehˇ bi jaˆ-euˬ meh. Kʼoeˇ gaˇ aˬ yawꞈ ya mawˇ ngeh, nui kʼahˇ shiˇ-euˬ meh.

¹⁹ Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, oeˬ nah tiˬ nah dzeuˇ-iˇ-euˬ meh.

²⁰ Kʼoeˇ naˇ, “Iˇ cuꞈ laꞈ kʼoeˇ kʼaˇ dehꞈ kʼaˇ jawˇ nya-eu jeˬ iˇ cuꞈ laꞈ kʼoeˇ byah laˇ-awˇ, yaw goˇ-ahˇ zaw-eu aˇ jiˇ deuˬ jaˬ lehˇ laꞈ kʼoeˇ byah laˇ-awˬ” lehˇ, Miˬyehˇ dawˬ biꞈ-euˬ meh.

²¹ Iˬ ma laˆ shaˆ laꞈ kʼoeˇ uˇ-eu gʼawˇ mawˇ huiˬ dui dui-eu aˇ mawˇ deuˬ-ahˇ maˬ ehˇ, iˇ cuꞈ laꞈ kʼoeˇ uˇ-eu yaw dehꞈ kʼaˇ dehꞈ-eu jeˬ dawˬ tawˆ luꞈ-ahˇ maˬ ehˇ, aˇ jiˇ kʼaˇ ngeuˇ-eu dawˬ tawˆ luꞈ-ahˇ maˬ ehˇ, Miˬyehˇ beh-euˬ meh.

²² Kʼoeˇ deuˬ-ahˇ ya mawˇ ngeh, aˬ yawꞈ nui kʼahˇ shiˇ-euˬ meh. “Iˇ cuꞈ laꞈ kʼoeˇ kʼaˇ uˇ-eu boeˬ boeˬ luˆ luˆ dawˬ tawˆ luꞈ myaˬ laˇ behˇ laˇ-awˇ, iˬ ma laˆ shaˆ laꞈ kʼoeˇ byah laˇ-awˬ. Aˇ jiˇ deuˬ kʼawꞈ myaˬ laˇ behˇ laˇ-awˬ” lehˇ, aˬ yawꞈ dawˬ ngehˬ gʼeh nehˬ-euˬ meh.

²³ Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, ngaˬ nah tiˬ nah dzeuˇ-iˇ-euˬ meh.

²⁴ Kʼoeˇ naˇ, “Bawˇ tsahˬ jeˬ zaˬ deuˬ maˬ ehˇ, cu nya-eu jeˬ zaˬ yaw yah deuˬ maˬ ehˇ, jeˬ zaˬ kʼaˇ ngeuˇ-eu jeˬ yaw huiˬ yaw nyiˇ dawˬ tawˆ luꞈ miˇ tsaˬ kʼoeˇ taˆ jawˇ laˇ-awˬ” lehˇ Miˬyehˇ dawˬ biꞈ ngeh, kʼoeˇ loꞈ-ehˇ pyeuꞈ laˇ-euˬ meh.

²⁵ Kʼoeˇ loꞈ-ehˇ, jeˬ zaˬ kʼaˇ ngeuˇ-eu dawˬ tawˆ luꞈ-ahˇ aˬ yawꞈ beh gʼaˬ jiˇ-euˬ meh. Kʼoeˇ gaˇ ya mawˇ ngeh, aˬ yawꞈ nui kʼahˇ shiˇ-euˬ meh.

²⁶ Kʼoeˇ naˇ, “Aˬ dui maꞈ-euˬ aˇ gʼehˇ-ahˇ duˇ-eu tsawˇ haˬ zaˬ deuˬ-ahˇ beh kaˇ-euˇ. Aˬ yawꞈ maꞈ aˬ dui-ahˇ duˇ-awˇ, ngaˬ shaˬ ngaˬ deˇ deuˬ kʼoeˇ taˆ maˬ ehˇ, bawˇ tsahˬ jeˬ zaˬ hawˇ-eu cu nya-eu jeˬ zaˬ yaw yah deuˬ yaw huiˬ yaw nyiˇ dawˬ tawˆ luꞈ kʼoeˇ taˆ maˬ ehˇ, baoˬ jaˆ tehꞈ-a” lehˇ Miˬyehˇ ehˇ-eu meh.

²⁷ Kʼoeˇ naˇ, tsawˇ haˬ zaˬ-ahˇ Miˬyehˇ beh-euˬ meh. Tsawˇ haˬ zaˬ-ahˇ aˬ yawꞈ beh ngeh, aˬ yawꞈ-ahˇ duˇ ni beh-euˬ meh. Zaˬ miˬ zaˬ hawˇ-eu kʼaˬ dzeˇ zaˬ aˬ yawꞈ beh-euˬ meh.

²⁸ Kʼoeˇ naˇ, heu loꞈ-ehˇ dawˬ ngehˬ gʼeh-awˇ guiˬ lahˬ biꞈ nehˬ-euˬ meh. “Jeuˬ le o le-awˬ. Naw maꞈ-euˬ zaˬ deuˬ miˇ tsaˬ kʼoeˇ taˆ byah laˇ-awˇ, miˇ tsaˬ-ahˇ uˆ lahˇ luꞈ-uˇ. Ngaˬ shaˬ ngaˬ deˇ, ho zaˬ nga jiˇ hawˇ-eu, bawˇ tsahˬ jeˬ zaˬ deuˬ-ahˇ haw-eu pyaˆ-eu gʼaˇ duˬ, ngaˇ naw maꞈ-ahˇ gaˇ biꞈ-eu ma.

²⁹ Naw maꞈ bi dzaˬ bi dawˇ-eu gʼaˇ duˬ, dzaˬ la gʼo cehˇ, aˇ siˬ aˇ lu hawˇ-eu, sahˬ lahˬ gʼawˬ daˇ deuˬ naw maꞈ-ahˇ ngaˇ biꞈ taˬ gʼaˬ-euˬ ma.

³⁰ Ehˇ kʼawꞈ, bawˇ tsahˬ jeˬ zaˬ hawˇ-eu ho zaˬ nga jiˇ dawˬ tawˆ luꞈ bi dzaˬ-eu gʼaˇ duˬ, yaˇ moꞈ deuˬ hawˇ-eu aˇ paꞈ tsoꞈ myaˬ-eu baw duˆ aˇ bawˇ deuˬ ngaˇ biꞈ taˬ-euˬ ma” lehˇ ehˇ nehˬ-euˬ meh. Miˬyehˇ kʼoeˇ loꞈ-ehˇ ehˇ gʼaˬ ngeh, aˬ yawꞈ neh kʼaˇ ehˇ-euˬ loꞈ-ehˇ pyeuꞈ laˇ-euˬ meh.

³¹ Miˬyehˇ-aˬ, yawˬ ha neh mˇ gʼaˬ taˬ-euˬ gaˇ deuˬ-ahˇ haw-awˇ, nui kʼahˇ shiˇ dui dui-euˬ meh. Uˬ ciꞈ kʼoeˇ miˇ buˬ-iˇ-awˇ uˬ shawˬ keuˆ le ngeh, koꞈ nah tiˬ nah dzeuˇ-iˇ-euˬ meh.