Aˬmoˆ 6 - Akha

Iˇsaˬleˬlaˆ miˇ kʼahˬ ya luˬ ya seˇ-iˇ tehꞈ-a

¹ Aˬ cawˬ-euˬ ziꞈ duˬ gʼoe duˬ huiˬ-eu mahˇ-eu Iˇsaˬleˬlaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ pyeuꞈ-eu, Ziˇoˬ gawˬ jawˬ kʼoeˇ taˆ saˇ lehˆ ni dehꞈ luꞈ-eu deuˬ hawˇ-eu, tiˬ gaˇ-iˬ guˆ kʼaˇ maˬ za ma lehˇ noeˬ-eu Saˬmaˬliˆ meuˬ laꞈ kʼoeˇ jawˇ luꞈ-eu deuˬ-oˇ, naw maꞈ gʼaˇ duˬ aˇ naˆ ni guˆ kʼaˇ za-eu nga.

² Kaˬlaˬneˬ meuˬ-ahˇ iˇ-awˇ haw-iˇ-awˬ. Kʼoeˇ naˇ, huiˬ-eu Haˬmaˆ meuˬ-ahˇ iˇ-awˇ, Gaˬdaˇ meuˬ-ahˇ iˇ ka gʼeh-awˬ. Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ naˆ maˬ tseˇ miˇ kʼahˬ kʼoeˇ kʼahˬ muiˬ dzehˬ nga loˇ lehˇ haw-iˇ-awˬ. Aˬ yawꞈ maꞈ-euˬ miˇ kʼahˬ naw maꞈ-euˬ miˇ kʼahˬ naˆ maˬ tseˇ jeˇ ta loˇ.

³ Luˬ-iˇ seˇ-iˇ-eu aˇ nah keuˆ le luꞈ meh lehˇ ehˇ gaˇ naw maꞈ maˬ jah-a. Ehˇ kʼawꞈ, naw maꞈ-euˬ dehꞈ jeˬ dehꞈ kawˆ-ahˇ haw ngeh, aˇ nah kʼoeˇ nah yaw kawˇ-ehˇ keuˆ le ni mˇ luꞈ gaˇ duˇ-eu meh.

⁴ Nahˬ yu ni gʼeh-eu ja ciˬ kʼoeˇ taˆ yuꞈ niˇ gʼa-awˇ, muiˬ dui dui-eu mawˇ neˇ hawˇ-eu yawˇ shaˬ jiˇ dzaˬ luꞈ-eu naw maꞈ deuˬ, aˇ naˆ ni noeˬ shaˬ paˬ-ehˇ gʼeh-eu nga.

⁵ Daˬbiˇ caˇ dawˬ yuˇ doˆ-awˇ deuˇ-mˬ diˬ niˇ gʼa-eu loꞈ-ehˇ, naw maꞈ kʼawꞈ kʼoeˇ loꞈ-ehˇ jahˇ mawꞈ-eu meh.

⁶ Naw maꞈ naˬ bo bo ma-ahˇ neh aˬ gaꞈ dzaˇ uiˇ dawˇ-awˇ, muiˬ dui dui-eu tsiˇ yaw saw jeˬ zmˬ-eu meh. Ehˇ kʼawꞈ, Iˇsaˬleˬlaˆ miˇ kʼahˬ luˬ-iˇ seˇ-iˇ gaˇ naw maꞈ tsawˇ ngoeˇ maˬ ngoeˇ nehˬ-a.

⁷ Kʼoeˇ miˇ neh, naw maꞈ-ahˇ aˬ cawˬ jeˬ hu bi nyehꞈ byoˆ gʼeh tehꞈ-a. Naw maꞈ dzaˬ byawˬ dawˇ byawˬ byawˬ-eu jeˬ aˇ saˬ ya saˬ tehꞈ-a.

⁸ Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ maˇ jawˆ ni ehˇ taˬ-euˬ meh. “Iˇsaˬleˬlaˆ tsawˇ haˬ nui ma huiˬ gaˇ mahˇ gaˇ ngaˇ maˬ haw nahˇ nya. Aˬ yawꞈ maꞈ dehꞈ byawˬ-eu gʼaˇ duˬ laˆ saˆ muiˬ taˬ-euˬ nymˇ nymˇ ma deuˬ-ahˇ ngaˇ maˬ haw nahˇ nya. Aˬ yawꞈ maꞈ-euˬ meuˬ meuˬ ma hawˇ-eu kʼoeˇ gaˇ kʼaˇ jaˆ-eu yawˬ jeˬ na luꞈ, muiˇ-eu deuˬ-euˬ aˬ laꞈ laꞈ kʼoeˇ ngaˇ a nehˬ ma.”

⁹ Nymˇ tiˬ nymˇ laꞈ kʼoeˇ maˬ shiˇ jiˇ-euˬ tsawˇ haˬ tseˇ gʼaˬ uiˬ leˇ-awˇ jawˇ naˇ, paˇ ya shiˇ jiˇ tehꞈ-a.

¹⁰ Tsawˇ haˬ baꞈ pahˬ gaˇ aˬ yuiꞈ geuꞈ-eu shiˇ-euˬ tsawˇ haˬ-euˬ aˬ yuiꞈ aˬ nyiˇ kʼoeˇ gʼaˬ, tsawˇ shiˇ-ahˇ nymˇ laꞈ nyiˇ baꞈ doˆ tehꞈ-a. Aˬ yuiꞈ aˬ nyiˇ kʼoeˇ gʼaˬ, nymˇ laꞈ kʼoeˇ paw maˬ shiˇ-ehˇ dzeˇ-eu gʼaˬ-ahˇ “Nawˬ nehˬ-ehˇ tsawˇ haˬ tiˬ gʼaˬ na jawˇ ta siˬ loˇ” lehˇ naˇ haˬ ngeh, “Tiˬ gʼaˬ-iˬ maˬ paˇ jawˇ meh” lehˇ ehˇ kʼoꞈ nehˬ-eu dawˬ-ahˇ ya gaˬ tehꞈ-a. Kʼoeˇ ngeh, aˬ yuiꞈ aˬ nyiˇ kʼoeˇ gʼaˬ, “Ciˬ cuˇ ni jawˇ-awˬ. Sahˬpaˬ Miˬyehˇ-euˬ tsawˇ myahˇ maˬ ya kuˇ ni aˇ nyaꞈ yaw kʼaˆ kʼaˆ-ehˇ ya yahˇ meh” lehˇ ehˇ nehˬ tehꞈ-a.

¹¹ Sahˬpaˬ Miˬyehˇ dawˬ biꞈ ngeh, nymˇ yaw huiˬ yaw nyiˇ dawˬ tawˆ luꞈ pyaˆ-iˇ shaˆ-iˇ jiˇ tehꞈ-a.

¹² Kʼaˬ lo lo gahˬ kʼoeˇ taˆ mahˬ pyehˬ teh sehˇ nya ta loˇ. Tsawˇ haˬ zaˬ iˬ ma laˆ shaˆ-ahˇ mawˇ neˇ neh deh ma tsehˬ nya ta loˇ. Ehˇ kʼawꞈ, naw maꞈ-aˬ, yaw tsaˬ yaw dawˇ jeˬ-ahˇ doꞈ bi pyeuꞈ-iˇ-awˇ, tsaˬ-eu jeˬ-ahˇ lehˬ-eu jeˬ pyeuꞈ-iˇ ni sheu pyawˆ-eu meh.

¹³ Loˇdeˬbaˬ‘Loˇdeˬbaˬ’ lehˇ ehˇ-eu dawˬ tsuiꞈ-aˬ, ‘Jaˬ myawꞈ’ lehˇ ehˇ mawꞈ-eu meh.* meuˬ-ahˇ deuˆ gʼaˬ ma lehˇ naw maꞈ kʼahˬ sehˇ jehˆ-eu meh. Kaˬneˬ‘Kaˬneˬ’ lehˇ ehˇ-eu-aˬ, ‘uˬ coeˇ’-ahˇ ehˇ-eu meh. Dawˬ tsuiꞈ-aˬ, ‘gʼaˬ kʼaˆ-eu’ lehˇ ehˇ mawꞈ-euˬ meh.* meuˬ-ahˇ deuˆ gʼaˬ nya ni nga maꞈ gʼaˬ kʼaˆ luꞈ ma lehˇ naw maꞈ lmˬ-eu meh.

¹⁴ Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ aˬ yawꞈ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ deuˬ-oˇ, naw maꞈ miˇ kʼahˬ-ahˇ bi deuˆ gʼaˬ-eu gʼaˇ duˬ aˬ cawˬ miˇ kʼahˬ-euˬ guiˇ maꞈ tiˬ maꞈ ngaˇ pyehˬ gʼeh leꞈ ma. Laꞈ taˆ paw Haˬmaˆ gʼaˬ lahˇ-ahˇ neh laꞈ oˆ paw Aˬlaˬbahˬ deh kʼawꞈ-ahˇ doˆ ni, guiˇ maꞈ kʼoeˇ maꞈ naw maꞈ kʼoeˇ taˆ uˆ lahˇ tehꞈ-a.”