Aˬmoˆ 4 - Akha

¹ Dzaˇ yaw muiˬ ya dzaˬ-eu miˇ neh tsuˇ dui dui-eu Baˬshaˬ meuˬ-ahˇ jawˇ-eu mawˇ neˇ mawˇ ma-ahˇ duˇ-eu Saˬmaˬliˆ meuˬ-ahˇ jawˇ-eu zaˬ miˬ zaˬ deuˬ-oˇ, naˇ haˬ sheˇ. Gʼaˬ baˬ-eu deuˬ-ahˇ naw maꞈ yehˬ bawˬ-ehˇ jahˇ nehˬ-awˇ, yaw shaˬ zaˬ deuˬ kʼoeˇ taˆ naw maꞈ kʼaˆ dzaˬ-euˬ meh. Naw maꞈ-euˬ kʼaˬ dzeˇ zaˬ deuˬ-ahˇ, jiˇ baˬ ciˬ laꞈ sheˇ lehˇ naw maꞈ kʼehˇ-eu meh.

² Baoˬ huiˬ-eu Sahˬpaˬ Miˬyehˇ-aˬ, muiˬ-eu shawˇ-eu gʼaˬ pyeuꞈ-eu loꞈ-ehˇ, heu loꞈ-ehˇ saˇ jaˇ dzaˬ taˬ-euˬ meh. “Aˬ cawˬ naw maꞈ-ahˇ shmˇ kuˆ seuˬ ceuˬ-awˇ tsahˇ byoˆ gʼeh-eu aˇ nah keuˆ le tehꞈ-a. Naw maꞈ yawˬ gʼaˬ na luꞈ ngaˬ juiꞈ-ahˇ paꞈ leˇ-euˬ ngaˬ shaˬ-ahˇ duˇ tehꞈ-a.

³ Dawˬ peh kʼaˇ jaˆ-eu kaˇ pyawˇ maˇ pehꞈ-ahˇ bi gʼeu gʼeh-awˇ, laꞈ nyiˇ bi biˬ doˆ tehꞈ-a.”

Iˇsaˬleˬlaˆ miˇ kʼahˬ Sahˬpaˬ Miˬyehˇ mehˬ-eu tsoˆ-eu jeˬ-ahˇ maˬ dzaw geuꞈ-eu

⁴ Dawˬ tawˆ kʼoeˇ taˆ uˆ lahˇ-eu gʼaˬ pyeuꞈ-eu Sahˬpaˬ Miˬyehˇ ehˇ-eu, “Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ-oˇ, naw maꞈ iˬ baˇ maˬ mˇ-ehˇ maˬ jawˇ tehˬ coeˇ te lehˇ ngeuˇ naˇ, Beˬdeˬlaˇ meuˬ-ahˇ jaˆ-eu muiˬ-eu shawˇ-eu jawˇ duˬ-ahˇ le-awˇ mˇ leˇ-awˬ. Giˇlaˇgaˬlaˇ meuˬ-ahˇ le-awˇ, iˬ baˇ kʼaˇ mˇ coeˇ-eu mˇ leˇ-awˬ. Aˬ yawꞈ shawˬ yawꞈ lawˇ-eu gʼaˇ duˬ jeˬ zaˬ tsahˇ laꞈ-awˇ, smˬ nah tiˬ poˆ tseˇ bymˇ tiˬ bymˇ yuˇ laꞈ-awˬ.

⁵ Miˬyehˇ-euˬ guiˬ lahˬ-ahˇ noeˬ keuˆ-eu laꞈ kʼoeˇ kaˬ muˇ lawˇ-awˬ. Kʼoeˇ uˬ taꞈ-ehˇ, nui ma keuˆ-eu laꞈ kʼoeˇ lawˇ-eu jeˬ lawˇ-awˇ kʼahˬ sehˇ jehˆ-awˬ. Naw maꞈ kʼoeˇ loꞈ-ehˇ mˇ mawꞈ-eu maˬ ngeuˇ loˇ.

⁶ Naw maꞈ-euˬ meuˬ dawˬ tawˆ luꞈ kʼoeˇ taˆ mehꞈ-eu shuꞈ-eu jeˬ keuˆ le ni mˇ-euˬ gʼaˬ ngaˇ ma. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a.

⁷ Naw maꞈ dzaˬ la gʼo cehˇ ka taˬ-euˬ iˇ cuꞈ loˬ dui dui ngeh ngaˇ mˬ gʼmˇ bi gʼmˇ-euˬ ma. Meuˬ tiˬ meuˬ-ahˇ uˬ yehˇ bi yehˇ le-awˇ, yawˬ meuˬ yawˬ-ahˇ maˬ bi yehˇ le ni ngaˇ jahˇ-euˬ ma. Deh yaˇ tiˬ kawˬ-ahˇ uˬ yehˇ yehˇ shehˬ kʼawꞈ, yawˬ kawˬ yawˬ gui coˇ ni jaˆ-eu meh.

⁸ Meuˬ gʼawˬ mya meuˬ-ahˇ jawˇ-eu tsawˇ haˬ deuˬ iˇ cuꞈ mehꞈ-eu laꞈ kʼoeˇ gʼaˬ baˬ laˇ taˬ-awˇ, iˇ cuꞈ ya mawˇ tehꞈ-a lehˇ noeˬ-eu meuˬ tiˬ meuˬ-ahˇ aˬ yawꞈ maꞈ le-eu meh. Ehˇ kʼawꞈ, kʼoeˇ gaˇ iˇ cuꞈ tiˬ dehˆ maˬ ya dawˇ-a. Kʼoeˇ naˆ naˆ-ehˇ pyeuꞈ laˇ taˬ-euˬ kʼawꞈ, ngaˇ jawˇ gaˇ naw maꞈ maˬ gʼoꞈ poˆ laˇ-a.

⁹ “Naw maꞈ dzaˬ la gʼo cehˇ ka taˬ-euˬ shiˇ jiˇ ni, lahˇ dui dui-eu jaˬ lehˇ ngaˇ pyehˬ gʼeh leꞈ-euˬ ma. Naw maꞈ-euˬ yaˇ kmˇ deuˬ, aˬ gaꞈ yaˇ kmˇ deuˬ, siˬ guˬ aˇ bawˇ deuˬ hawˇ-eu saˬ loˬ aˇ bawˇ deuˬ-ahˇ nyehˇ bahˇ neh bi dzaˬ byoˆ jiˇ-euˬ ma. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a.

¹⁰ “Iˇjiˇtuˆ miˇ kʼahˬ kʼoeˇ taˆ bi keuˆ le-euˬ loꞈ-ehˇ gʼeh-eu yaw jaw naˇ-eu naˇ gawˇ gawˇ ma naw maꞈ kʼoeˇ taˆ ngaˇ bi keuˆ le-euˬ ma. Naw maꞈ-euˬ aˬ li zaˬ guˬ deuˬ-ahˇ guiˇ deuˆ-eu laꞈ kʼoeˇ ngaˇ bi shiˇ-awˇ, naw maꞈ-euˬ mahˬ deuˬ ngaˇ teh byoˆ gʼeh-euˬ ma. Naw maꞈ-euˬ taˆ laꞈ kʼoeˇ shiˇ taˬ-awˇ ga-eu tsawˇ haˬ deuˬ-euˬ yaw buꞈ naw maꞈ-euˬ naˇ mehˇ tiˬ teuˇ bi behꞈ laꞈ-euˬ ma. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a.

¹¹ “Sawˇdoˬ meuˬ hawˇ-eu Gawˇmawˇlaˆ meuˬ-ahˇ ngaˇ laˆ cawˆ nehˬ-euˬ loꞈ-ehˇ, naw maꞈ tiˬ paˆ na deuˬ-ahˇ ngaˇ laˆ cawˆ nehˬ-euˬ ma. Naw maꞈ laꞈ kʼoeˇ kʼaˇ dzeuˇ-iˇ-euˬ deuˬ-aˬ, miˬ dzaˬ puiˆ luꞈ gaˇ gʼeu doˆ-euˬ doꞈ luꞈ-eu daˇ kawˬ-ahˇ duˇ-eu meh. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a” lehˇ Sahˬpaˬ Miˬyehˇ ehˇ-eu meh.

¹² “Kʼoeˇ miˇ neh, Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ-oˇ, naw maꞈ-ahˇ ngaˇ kʼehˬ nehˬ kʼaˆ nehˬ-eu lehˇ gʼeh-eu ma. Ngaˇ kʼoeˇ loꞈ-ehˇ kʼehˬ-eu kʼaˆ-eu lehˇ lehˬ hmˬ taˬ-euˬ miˇ neh, ngaˬ neh yaˇ kʼaˬ daˇ-euˬ gaˇ daˬ-eu gʼaˇ duˬ naw maꞈ yaw muiˬ paˬ-ehˇ lehˬ hmˬ taˬ-awˬ.”

¹³ Gawˬ jawˬ tehˆ-euˬ, Miˬyehˇ neh meh. Jaˬ lehˇ beh-euˬ Miˬyehˇ neh meh. Yawꞈ-euˬ nui noeˬ tsawˇ-ahˇ mehˬ-awˇ, nah gʼahˇ uˬ ciꞈ laˆ pyeuꞈ nya-awˇ, mˬ-ahˇ jawˇ-awˇ miˇ-ahˇ dzoeˬ-eu, Yawꞈ-euˬ tsawˇ myahˇ Baoˬ huiˬ Miˬyehˇ, Sahˬpaˬ Miˬyehˇ lehˇ kuˇ-eu meh.