Aˬmoˆ 3 - Akha

¹ Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ-oˇ, naˇ haˬ sheˇ. Naw maꞈ tsawˇ jeuˬ jeuˬ lah ni-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ gʼaˬ pyeuꞈ-eu Sahˬpaˬ Miˬyehˇ neh naw maꞈ-euˬ gaˇ kawˆ heu loꞈ-ehˇ ehˇ taˬ-euˬ meh.

² “Miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ laꞈ kʼoeˇ, naw maꞈ-ahˇ tehꞈ-ehˇ ngaˇ myaˆ pyawˬ pyuˇ-awˇ ngehˬ gʼeh nehˬ-euˬ ma. Kʼoeˇ miˇ neh naw maꞈ iˬ baˇ mˇ ngeh ngaˬ-euˬ nui ma-ahˇ zaw dui dui laˇ-awˇ, kʼoeˇ loꞈ-ehˇ iˬ baˇ mˇ-euˬ aˇ poeˬ naw maꞈ-ahˇ ngaˇ ya kʼehˬ nehˬ meh.”

Miˬyehˇ gʼaˇ duˬ ngehˬ dah-eu gʼaˬ-euˬ gaˇ

³ Tsawˇ haˬ nyiˬ gʼaˬ mehˬ bawˬ maˬ mˇ dzoeˇ taˬ naˇ, tiˬ kawˆ loꞈ-ehˇ iˇ taꞈ laˇ taꞈ nya meh loˇ.

⁴ Aˇ laˬ jaˬ shiˇ tiˬ mawˇ aˬ yawꞈ kawꞈ sehꞈ dzaˬ-eu lehˇ gʼeh-eu bawˇ tsahˬ jeˬ zaˬ maˬ tahˬ puˬ le-euˬ gaˇ, bawˇ tsahˬ-ahˇ lmˬ meh loˇ. Huiˬ loˆ laˇ-euˬ aˇ laˬ jaˬ shiˇ zaˬ tiˬ mawˇ tiˬ jeˬ paˬ maˬ kawꞈ sehꞈ taˬ-euˬ gaˇ, lo kʼahˬ-ahˇ uˇ-awˇ lmˬ meh loˇ.

⁵ Sehˬ toˆ-ahˇ aˬ iˬ maˬ ahˇ-ehˇ kʼmˇ taˬ-euˬ gaˇ, aˇ jiˇ paꞈ leˇ nya meh loˇ. Sehˬ toˆ-ahˇ tiˬ jeˬ paˬ neh maˬ laˆ pyeuˆ-euˬ gaˇ, aˬ yawˇ yawꞈ pyeuˆ-iˇ nya meh loˇ.

⁶ Tsawˇ haˬ maˬ bi tsawˬ guˆ-iˇ ni meuˬ laꞈ kʼoeˇ guiˇ deuˆ-eu daˇ heh baw mahˇ nya meh loˇ. Sahˬpaˬ Miˬyehˇ neh maˬ jahˇ-euˬ gaˇ, luˬ-iˇ seˇ-iˇ-eu jeˬ meuˬ kʼoeˇ taˆ keuˆ le nya meh loˇ.

⁷ Baoˬ huiˬ-eu Sahˬpaˬ Miˬyehˇ-aˬ, aˬ yawꞈ-euˬ zaˬ kʼaˆ pyeuꞈ-eu Miˬyehˇ gʼaˇ duˬ ngehˬ dah-eu deuˬ-ahˇ maˬ pah mehˬ nehˬ ni tiˬ jeˬ-iˬ maˬ mˇ dzeuˇ-a.

⁸ Aˇ laˬ jaˬ shiˇ joeˬ laˇ ngeh, aˬ suˇ gʼaˬ maˬ guˆ ni jawˇ tehˬ coeˇ ta. Baoˬ huiˬ-eu Sahˬpaˬ Miˬyehˇ dawˬ ngehˬ ngeh, aˬ yawꞈ-euˬ dawˬ maˬ tsaꞈ gaˬ-iˇ ni aˬ suˇ gʼaˬ jawˇ tehˬ coeˇ ta.

Saˬmaˬliˆ meuˬ ya luˬ ya seˇ-iˇ tehꞈ-a

⁹ Iˇjiˇtuˆ miˇ kʼahˬ hawˇ-eu Aˬshaˬdoˇ meuˬ-ahˇ sahˬ paˬ-euˬ hawˇ nymˇ deuˬ laꞈ kʼoeˇ jawˇ-eu deuˬ-ahˇ heu loꞈ-ehˇ ehˇ gaˬ nehˬ-awˬ. “Saˬmaˬliˆ meuˬ jawˬ jawˬ-ehˇ jaˆ-eu gawˬ duˇ-ahˇ uiˬ leˇ-awˇ, Saˬmaˬliˆ meuˬ laꞈ kʼoeˇ maˬ tsaˬ maˬ tsahˇ leˇ-ehˇ bahˬ gʼa luꞈ gaˇ hawˇ-eu tiˬ gʼaˬ tiˇ gʼaˬ nawˬ dzaˬ kʼaˆ dzaˬ luꞈ gaˇ haw-awˬ.”

¹⁰ Sahˬpaˬ Miˬyehˇ ehˇ-eu, “Tsawˇ haˬ heu deuˬ-aˬ, aˬ yawꞈ maꞈ-euˬ kuˆ lawˆ-ahˇ maˬ tsaˬ maˬ dawˇ-eu laꞈ kʼoeˇ ceh geuꞈ kʼaˆ geuꞈ taˬ-euˬ myawˬ gahˬ deuˬ baꞈ byah taˬ-euˬ meh. Yaw sui yaw dawˇ dawˇ-ehˇ dehꞈ-eu gaˇ kawˆ aˬ yawꞈ maꞈ maˬ siˬ nya-a.

¹¹ Kʼoeˇ miˇ neh, muiˇ-eu deuˬ aˬ yawꞈ maꞈ-euˬ miˇ kʼahˬ-ahˇ loꞈ jawˬ-awˇ, ziꞈ dah ni jaˆ-eu aˬ yawꞈ maꞈ-euˬ taˆ-ahˇ laˆ cawˆ-awˇ, aˬ yawꞈ maꞈ-euˬ kuˆ lawˆ laꞈ kʼoeˇ jaˆ-eu myawˬ gahˬ deuˬ baꞈ geuꞈ jiˇ tehꞈ-a.”

¹² Sahˬpaˬ Miˬyehˇ ehˇ-eu, “Aˇ laˬ jaˬ shiˇ neh bi kawꞈ sehꞈ dzaˬ-euˬ yawˇ tiˬ mawˇ-euˬ aˬ kuiˇ nyiˬ kahˬ hawˇ-eu naˬ paꞈ tiˬ pyawˬ tehꞈ-ehˇ, yawˇ bo-eu gʼaˬ mawˇ kʼoꞈ-euˬ loꞈ-ehˇ, nymˬ-mˇ muiˬ-eu ja ciˬ kʼoeˇ taˆ saˇ lehˆ ni dehꞈ byawˬ luꞈ-eu Saˬmaˬliˆ meuˬ-ahˇ jawˇ-eu tsawˇ haˬ deuˬ laꞈ kʼoeˇ, ui cuiˆ tehꞈ-ehˇ ya buˬ ya law-iˇ tehꞈ-a.”

¹³ Baoˬ huiˬ dui dui-eu Sahˬpaˬ Miˬyehˇ ehˇ-eu, “Dawˬ heu deuˬ-ahˇ naˇ haˬ-awˇ, Yaˬkoˆ-euˬ zaˬ deuˬ uˆ deuˬ-ahˇ tsaꞈ nehˬ-iˇ-awˬ.

¹⁴ Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ iˬ baˇ mˇ-euˬ miˇ neh, aˬ yawꞈ maꞈ-ahˇ ngaˇ kʼehˬ nehˬ ngeh nah, Beˬdeˬlaˇ meuˬ-ahˇ jaˆ-eu lawˇ duˬ kʼoeˇ deuˬ-ahˇ ngaˇ laˆ cawˆ ma. Lawˇ duˬ aˬ yawꞈ hmˬ yawꞈ-euˬ laꞈ coeˇ-ahˇ tsoꞈ-eu uˬ coeˇ dawˬ tawˆ luꞈ kʼehꞈ-iˇ jiˇ-awˇ, miˇ tsaˬ-ahˇ ga-iˇ tehꞈ-a.

¹⁵ Tsahˬ gaˆ yamˬ-ahˇ jawˇ-eu gʼaˇ duˬ hawˇ-eu jawˇ la yamˬ-ahˇ jawˇ-eu gʼaˇ duˬ lehˇ tsoˆ baw taˬ-euˬ nymˇ dawˬ tawˆ luꞈ-ahˇ ngaˇ laˆ cawˆ ma. Ya ma juiˇ neh laˆ muiˬ taˬ-euˬ nymˇ deuˬ coˬ pyaˆ coˬ shaˆ tehꞈ-a. Nymˇ yaw huiˬ yawˬ nymˇ na luꞈ ya cawˆ-iˇ tehꞈ-a.”