2 Tiˆmoˇseˬ 3 - Akha

Aˇ saˬ saˬ-eu aˇ nah aˇ yamˬ

¹ Aˇ saˬ saˬ-eu aˇ nah a yamˬ laꞈ kʼoeˇ shaˬ dui dui-eu aˇ yamˬ keuˆ le tehꞈ-a lehˇ siˬ nya-awˬ.

² Tsawˇ haˬ zaˬ deuˬ-aˬ, yawˬ ha gʼaˇ duˬ tehꞈ-ehˇ shaˇ noe-eu, pyuˇ-ahˇ mehˇ juiˇ juiˇ-eu, kʼahˬ sehˇ jehˆ-eu, nui ma huiˬ-eu mahˇ-eu, aˬ cawˬ-ahˇ yehˬ bawˬ sehˇ lu-ehˇ ehˇ-eu, aˬ da aˬ ma-euˬ ehˇ dawˬ maˬ naˇ haˬ-eu, guiˬ lahˬ-ahˇ maˬ siˬ nya-eu, uˬ duˬ tahˬ-eu zahˇ sahˇ kʼoꞈ-ahˇ maˬ taˬ huiˬ-eu,

³ gʼawˬ shaˬ gaˬ-eu maˬ siˬ nya-eu, aˬ cawˬ-ahˇ maˬ dehꞈ tsaˬ-eu, ja bu ja doeˇ-eu, dawꞈ-eu ceh-eu, guˆ laˇ paˬ-ehˇ zuiˆ-eu, yaw muiˬ jeˬ-ahˇ muiˇ-eu,

⁴ saˇ jaˇ puiˬ-eu, nui ma-ahˇ maˬ noeˬ-eu, nui ma huiˬ-eu, Miˬyehˇ-ahˇ gaˬ-eu naˆ maˬ tseˇ byawˬ gʼa mo gʼa-eu jeˬ-ahˇ gaˬ-eu,

⁵ uˬ duˬ tahˬ-eu zahˇ sahˇ kʼoˬ-ahˇ laꞈ nyiˇ paw tehꞈ-ehˇ caw teh-awˇ kʼoeˇ-euˬ baoˬ-ahˇ maˬ ha geuꞈ-eu, heu loꞈ-ehˇ gʼeh-eu tsawˇ haˬ deuˬ pyeuꞈ laˇ tehꞈ-a. Kʼoeˇ loꞈ-ehˇ gʼeh-eu tsawˇ haˬ deuˬ-ahˇ gaˇ jaw jaw-awˬ.

⁶ Aˬ yawꞈ maˬ tiˬ paˆ na deuˬ aˬ cawˬ-euˬ nymˇ-ahˇ iˇ-awˇ, iˬ baˇ kʼaˆ behˆ kah-awˇ shiˬ shaˬ jiˇ nui loˆ gʼawˬ mya jeˬ mehˬ nah caw teh luꞈ-eu gʼaˬ baˬ-eu zaˬ mi zaˬ deuˬ-ahˇ shuiˇ tawˆ geuꞈ-eu meh.

⁷ Zaˬ miˬ zaˬ kʼoeˇ deuˬ-aˬ, aˇ naˆ ni mehˬ nehˬ kʼawꞈ yaw tsaˬ yaw dawˇ jeˬ-ahˇ tiˬ jawˇ-iˬ maˬ siˬ nya laˇ-a.

⁸ Yaˬneˬ hawˇ-eu Yaˬbeˬ aˬ nyaꞈ Moˇseˬ mehˬ gaˇ maˬ naˇ haˬ geuꞈ-euˬ loꞈ-ehˇ, tsawˇ haˬ kʼoeˇ deuˬ yaw tsaˬ yaw dawˇ jeˬ-ahˇ maˬ ha geuꞈ-a. Aˬ yawꞈ maꞈ-euˬ shaˇ noeˬ nya-eu nui ma gaˇ maˬ mˇ ni naˬ leˇ jiˇ-awˇ, jah-eu jeˬ-ahˇ smˬ-iˇ-euˬ tsawˇ haˬ pyeuꞈ-eu meh.

⁹ Ehˇ kʼawꞈ, aˬ yawꞈ maꞈ gʼawˬ mahˇ ni iˇ gʼeh kʼaˇ maˬ za-a. Aˬ jeˬ miˇ neh ehˇ naˇ, aˬ yawꞈ maꞈ aˇ naˆ ni dzawˬ-eu gaˇ kawˆ tsawˇ haˬ yawˬ gʼaˬ na luꞈ siˬ duˬ mawˇ duˬ tehꞈ-a. Kʼoeˇ-aˬ, Yaˬneˬ hawˇ-eu Yaˬbeˬ aˬ nyaꞈ pyeuꞈ dzeuˇ yaꞈ-euˬ gaˇ duˇ-eu meh.

Aˇsaˬ saˬ-eu mehˬ-eu tsoˆ-eu dawˬ

¹⁰ Ehˇ kʼawꞈ nawˇ-aˬ, ngaˬ-euˬ mehˬ nah caw teh-awˇ dzaw geuꞈ luꞈ-eu tsawˇ haˬ pyeuꞈ-eu meh. Ngaˬ neh mehˬ-euˬ tsoˆ-euˬ jeˬ, ngaˬ neh dehꞈ mehˬ jawˇ mehˬ-euˬ jeˬ, ngaˬ neh noeˬ-euˬ jeˬ, ngaˬ-euˬ jah-eu jeˬ, ngaˬ-euˬ nui ma mahˇ-eu jeˬ, ngaˬ-euˬ gʼoeˇ-eu gaˬ-eu jeˬ, ngaˇ daˬ coeˇ oˇ coeˇ-eu jeˬ,

¹¹ kʼehˬ-eu kʼaˆ-eu jeˬ-ahˇ ya daˬ-euˬ jeˬ, ya shaˬ ya zahˬ-euˬ jeˬ, heu deuˬ-ahˇ nawˇ dzaw geuꞈ-euˬ meh. Aˬdiˇawˬ meuˬ, Iˇgawˇniˇ meuˬ, Loˇdaˬlaˇ meuˬ, heu deuˬ laꞈ kʼoeˇ ngaˬ-euˬ kʼoeˇ taˆ aˬ joˆ-ehˇ keuˆ le-awˇ, guˆ dui dui laˇ paˬ-ehˇ gʼeh-eu kʼehˬ-eu kʼaˆ-eu jeˬ-ahˇ ngaˇ aˇ naˆ ni daˬ dzeuˇ oˇ dzeuˇ-euˬ gaˇ kawˆ nawˇ siˬ nya meh. Yeˬsuˇ ngaˬ-ahˇ bi buˬ-iˇ laꞈ-euˬ meh.

¹² Yeˬsuˇ Ka li laꞈ kʼoeˇ Miˬyehˇ-ahˇ yaw zeu baw baw-ehˇ kʼaˇ dehꞈ-eu tsawˇ haˬ yawˬ gʼaˬ na luꞈ kʼehˬ-eu kʼaˆ-eu jeˬ-ahˇ ya daˬ tehꞈ-a.

¹³ Haiˬ-eu tsawˇ haˬ deuˬ hawˇ-eu jaˬ myawꞈ mehˇ shuiˇ deuˬ-aˬ, ngehˬ jawˇ ngehˬ doeˇ dzehˬ laˇ-awˇ, aˬ cawˬ-ahˇ mehˇ shuiˇ shuiˇ-eu loꞈ-ehˇ yawˬ ha-ahˇ mehˇ shuiˇ bi shuiˇ gaˇ ya daˬ tehꞈ-a.

¹⁴ Ehˇ kʼawꞈ nawˇ-aˬ, nawˬ-ahˇ mehˬ nehˬ-euˬ loꞈ-ehˇ ziꞈ dah ni jah duˬ taˬ-euˬ yaw tsaˬ yaw dawˇ jeˬ-ahˇ maˬ byehˇ dzeh ni tuˆ tehˬ taˬ-awˬ. Nawˬ-ahˇ mehˬ nehˬ tsoˆ nehˬ-euˬ tsawˇ haˬ deuˬ aˬ suˇ gʼaˬ-a lehˇ nawˇ siˬ nya meh.

¹⁵ Nawˇ nyiˇ ngeh neh Muiˬ-eu shawˇ-eu Jaˇliꞈ-ahˇ siˬ nya-euˬ gaˇ taˬ ngehˇ. Jaˇliꞈ kʼoeˇ-aˬ, Yeˬsuˇ Ka li-ahˇ jah-eu laꞈ kʼoeˇ ka kʼoꞈ-eu jeˬ za ni sheuˬ gʼeh-eu zaˬ siˬ tsawˇ gahˇ nawˬ-ahˇ biꞈ nehˬ laꞈ-euˬ meh.

¹⁶ Jaˇliꞈ dawˬ kawˬ dawˬ tawˆ luꞈ Miˬyehˇ neh bi noeˬ doˆ-eu laꞈ kʼoeˇ boꞈ doˆ taˬ-euˬ jeˬ pyeuꞈ-awˇ, yaw tsaˬ yaw dawˇ jeˬ mehˬ-eu tsoˆ-eu gʼaˇ duˬ maˬ ehˇ, iˬ baˇ-ahˇ toeˬ mehˬ-eu gʼaˇ duˬ maˬ ehˇ, maˬ tsaˬ-eu jeˬ-ahˇ mehˬ paˇ tsoˆ paˇ-eu gʼaˇ duˬ maˬ ehˇ, yaw tsaˬ yaw dawˇ dawˇ-ehˇ dehꞈ ni mehˬ-eu tsoˆ-eu gʼaˇ duˬ maˬ ehˇ, gaˇ dahˇ tsoeˬ dui dui-eu meh.

¹⁷ Kʼoeˇ baˬ da neh, Miˬyehˇ gaˇ mˇ-eu tsawˇ haˬ-aˬ, byah dui nya dui dui-eu tsawˇ haˬ pyeuꞈ-awˇ, yaw muiˬ jeˬ dawˬ tawˆ luꞈ-ahˇ mˇ nya ni Jaˇliꞈ dawˬ kawˬ-ahˇ gʼoe-awˇ dzaw bym taˬ-euˬ tsawˇ haˬ pyeuꞈ-eu meh.