2 Tiˆmoˇseˬ 2 - Akha

Yeˬsuˇ Ka li-euˬ saˇ jaˇ ziꞈ-eu yehˇ

¹ Ngaˬ li-oˇ, Yeˬsuˇ Ka li laꞈ kʼoeˇ aˬ dui za taˬ-euˬ guiˬ lahˬ yaw dzahˇ baˬ da neh gʼaˬ ahˇ-awˬ.

² Tsawˇ kaˬ gʼawˬ mya ni-euˬ mehˬ shi ngaˬ neh nawˬ-ahˇ mehˬ nehˬ tsoˆ nehˬ-euˬ dawˬ kʼoeˇ deuˬ yuˇ-awˇ, aˬ cawˬ-ahˇ mehˬ nehˬ tsoˆ nehˬ nya-eu jah coeˇ paˬ-ehˇ gʼeh-eu tsawˇ haˬ deuˬ-ahˇ a nehˬ-awˬ.

³ Yeˬsuˇ Ka li-euˬ saˇ jaˇ ziꞈ-eu yehˇ tiˬ gʼaˬ loꞈ-ehˇ, kʼehˬ-eu kʼaˆ-eu jeˬ-ahˇ nawˬ-euˬ shaˬ bymˇ nawˇ daˬ-awˬ.

⁴ Guiˇ mˇ luꞈ-eu yehˇ aˬ geu gʼaˬ maˬ kaˬ, guiˇ maꞈ kʼoeˇ taˆ uˆ lahˇ luꞈ-eu yaw huiˬ gʼaˬ-euˬ nui kʼahˇ mˇ byah mawꞈ-eu miˇ neh, miˇ kʼahˬ zaˬ deuˬ mˇ-eu shaˇ-eu loꞈ-ehˇ maˬ mˇ ni ya dzahˬ tehˬ-eu meh.

⁵ Cehˆ ceh ceh-eu tsawˇ haˬ tiˬ gʼaˬ-aˬ, niˇ gʼa-eu zahˇ sahˇ kʼoꞈ-ahˇ maˬ caw teh naˇ laꞈ sawˬ maˬ za nya-a.

⁶ Leh jeh dui dui-eu deh ma mˇ-eu tsawˇ haˬ tiˬ gʼaˬ-aˬ, keuˆ le-euˬ cehˇ laꞈ kʼoeˇ yawˬ ha-ahˇ oꞈ-eu shaˬ bymˇ aˬ cawˬ jeˬ hu za-eu meh.

⁷ Ngaˇ ehˇ luꞈ-eu gaˇ kawˆ heu deuˬ-ahˇ yaw muiˬ paˬ-ehˇ shaˇ sawˇ haw-awˬ. Aˬ jeˬ miˇ neh ehˇ naˇ, kʼoeˇ deuˬ dawˬ tawˆ luꞈ-ahˇ nawˇ gʼoˆ shaw nya ni, Sahˬpaˬ Yeˬsuˇ caw ba tehꞈ-a.

⁸ Ngaˬ neh mehˬ-euˬ Laˬ kʼaˬ cehˇ-eu Guiˬ lahˬ dawˬ laꞈ kʼoeˇ ehˇ taˬ-euˬ loꞈ-ehˇ, Daˬbiˇ-euˬ tsuiꞈ-ahˇ taꞈ-eu shiˇ-euˬ gaˇ gʼoꞈ dehꞈ laˇ-euˬ gʼaˬ pyeuꞈ-eu Yeˬsuˇ Ka li-ahˇ noeˬ keuˆ-awˬ.

⁹ Laˬ kʼaˬ cehˇ-eu Guiˬ lahˬ dawˬ mehˬ-eu baˬ da neh, kʼehˬ-eu kʼaˆ-eu jeˬ-ahˇ ngaˇ ya daˬ-awˇ, smˇ kʼoeˬ tahˇ joe loꞈ-ehˇ shmˇ caˆ neh bi paꞈ gaˇ keuˆ-euˬ ma. Ehˇ kʼawꞈ, Miˬyehˇ-euˬ dawˬ-ahˇ shmˇ caˆ neh maˬ paꞈ tawꞈ nya-a.

¹⁰ Kʼoeˇ miˇ neh, Miˬyehˇ neh tseˇ doˆ-euˬ tsawˇ haˬ deuˬ gʼaˇ duˬ, yawˬ jeˬ na luꞈ-ahˇ ngaˇ daˬ-eu ma. Yeˬsuˇ Ka li baˬ da neh aˬ dui za-euˬ ka kʼoꞈ-eu jeˬ-ahˇ aˬ yawꞈ maꞈ za-awˇ, mˬ maˬ maˬ byaˆ zaˇ ziˇ yaw shehꞈ kʼahˬ sehˇ bi doˆ laˇ nya ni, kʼoeˇ loꞈ-ehˇ daˬ-eu ma.

¹¹ Tsaˬ dui dui-eu dawˬ-aˬ, heu loꞈ-ehˇ meh. “Aˬ dui aˬ yawꞈ nehˬ-ehˇ shiˇ naˇ, aˬ yawꞈ nehˬ-ehˇ ya dehꞈ tehꞈ-a.

¹² Aˬ dui daˬ dzeuˇ oˇ dzeuˇ coeˇ naˇ, aˬ yawꞈ nehˬ-ehˇ ya dzoeˬ tehꞈ-a. Aˬ dui aˬ yawꞈ-ahˇ byehˇ dzeh naˇ, aˬ yawꞈ aˬ dui-ahˇ byehˇ tehꞈ-a.

¹³ Aˬ dui saˇ jaˇ maˬ ziꞈ law kʼawꞈ, aˬ yawꞈ saˇ jaˇ ziꞈ dui dui meh. Aˬ jeˬ miˇ neh ehˇ naˇ, aˬ yawꞈ saˇ jaˇ ziꞈ-eu miˇ neh, yawˬ haˇ yawˬ ha maˬ byehˇ dzeh-a.”

Miˬyehˇ nui kʼahˇ shiˇ-eu gaˇ mˇ zaˬ

¹⁴ Nawˬ-euˬ tsawˇ haˬ deuˬ-ahˇ gaˇ kawˆ heu ja mehˬ nehˬ-awˇ, dawˬ-ahˇ taꞈ leˇ-eu gaˇ kawˆ tsawˇ pyehˇ pyehˇ-awˇ maˬ ya ja dzaˬ-eu gʼaˇ duˬ Miˬyehˇ mehˬ shi yaw kʼaˆ kʼaˆ-ehˇ mehˬ nehˬ-awˬ. Kʼoeˇ loꞈ-ehˇ gʼeh-eu jeˬ-aˬ, gaˇ dahˇ maˬ tsoeˬ-eu uˬ taꞈ, ya gaˬ-eu tsawˇ haˬ deuˬ-ahˇ bi luˬ bi seˇ-iˇ-eu tehꞈ meh.

¹⁵ Yawˬ ha-euˬ gaˇ mˇ-eu gʼaˇ duˬ maˬ shaꞈ dawˇ-eu gaˇ mˇ zaˬ loꞈ-ehˇ maˬ ehˇ, Miˬyehˇ-euˬ yaw tsaˬ yaw dawˇ jeˬ gaˇ kawˆ dawˇ coe ni mehˬ-eu tsawˇ haˬ loꞈ-ehˇ maˬ ehˇ, Miˬyehˇ nui kʼahˇ shiˇ dui dui-eu tsawˇ haˬ tiˬ gʼaˬ pyeuꞈ laˇ ni leh jeh dui dui-awˬ.

¹⁶ Gaˇ dahˇ maˬ tsoeˬ-eu gaˇ kawˆ ja uˇ-eu jeˬ-ahˇ gaˇ jaw jaw-awˬ. Kʼoeˇ-aˬ, tsawˇ haˬ zaˬ deuˬ Miˬyehˇ-ahˇ gaˇ mahˇ kaˬ-iˇ ni jahˇ gaˇ duˇ-eu meh.

¹⁷ Kʼoeˇ loꞈ-ehˇ mehˬ-eu tsoˆ-eu kʼoeˇ-aˬ, shaˬ jiˇ-ahˇ dzaˬ joˆ dzeh-eu maˇ kʼehˬ maˇ naˇ-ahˇ duˇ-eu meh. Kʼoeˇ loꞈ-ehˇ mehˬ-eu tsoˆ-eu tsawˇ haˬ nyiˬ gʼaˬ-aˬ, Huˬmiˬnehˇ hawˇ-eu Piˇlehˇ aˬ nyaꞈ meh.

¹⁸ Aˬ dui gʼoꞈ dehꞈ laˇ-eu jeˬ keuˆ le dzeuˇ-euˬ meh lehˇ ehˇ-eu laꞈ kʼoeˇ, yaw tsaˬ yaw dawˇ gaˇ ma-ahˇ aˬ yawꞈ maꞈ byehˇ dzeh-awˇ, tsawˇ haˬ tiˬ paˆ na deuˬ-euˬ jah-eu nui ma bi cawˆ-iˇ-eu meh.

¹⁹ Ehˇ kʼawꞈ, Miˬyehˇ neh dawˬ pehˬ ziꞈ dah ni gawˬ taˬ-euˬ jeˬ-ahˇ aˬ yawꞈ maꞈ maˬ laˆ luˆ nya-a. Dawˬ pehˬ kʼoeˇ-euˬ kʼoeˇ taˆ, “Yawˬ ha-euˬ tsawˇ haˬ deuˬ-ahˇ Sahˬpaˬ Miˬyehˇ siˬ nya meh” lehˇ boꞈ taˬ-awˇ, “Sahˬpaˬ Miˬyehˇ-euˬ tsawˇ haˬ ma lehˇ kʼaˇ ehˇ-eu deuˬ maˬ tsaˬ maˬ dawˇ-eu jeˬ maˬ mˇ ni ya byehˇ dzeh meh” lehˇ boꞈ taˬ-euˬ meh.

²⁰ Nymˇ nymˇ ma tiˬ nymˇ laꞈ kʼoeˇ kʼmˬ maˬ oeˬ tsaꞈ gʼawˬ mya ni jaˆ-eu meh. Tiˬ deuˬ na-aˬ, pyuˇ hawˇ-eu shuiˇ neh tehˆ taˬ-awˇ, tiˬ deuˬ na-aˬ, daˇ kawˬ hawˇ-eu miˇ tsaˬ neh jahˇ taˬ-euˬ meh. Tiˬ deuˬ na-aˬ, bawˬ-iˬ gʼeh ngeh zmˬ-eu gʼaˇ duˬ pyeuꞈ-awˇ, tiˬ deuˬ na-aˬ, aˬ myah myah zmˬ-eu gʼaˇ duˬ pyeuꞈ-eu meh.

²¹ Tsawˇ haˬ tiˬ gʼaˬ na, yaw haiˬ jeˬ kʼoeˇ deuˬ dawˬ tawˆ luꞈ-ahˇ yawˬ haˇ yawˬ ha shawˇ dzeh jiˇ naˇ, huiˬ-eu gaˇ gʼaˇ duˬ aˬ yawꞈ-ahˇ zmˬ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, yaw sahˇ gʼaˬ-ahˇ gʼawˇ mawˇ aˬ nehˬ taˬ-euˬ gaˇ dahˇ tsoeˬ-eu jeˬ pyeuꞈ-awˇ, yaw muiˬ jeˬ mˇ-eu gʼaˇ duˬ bi zmˬ-eu lehˇ lehˬ hmˬ dah taˬ-euˬ jeˬ pyeuꞈ-eu meh.

²² Zaˬ guˬ deuˬ nui kʼahˇ jaˆ-eu jeˬ-ahˇ gaˇ jaw jaw-awˇ, Sahˬpaˬ Yeˬsuˇ-ahˇ caw ba nehˬ laꞈ lehˇ kuˇ luꞈ-eu nui ma shawˇ jehˆ ni gʼeh-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ, yaw tsaˬ yaw dawˇ jeˬ , jah-eu jeˬ, gʼoeˇ-eu gaˬ-eu jeˬ, tsaˬ leˇ dzoeˇ leˇ-eu jeˬ, heu deuˬ gʼaˇ duˬ leh jeh dui dui-awˬ.

²³ Ehˇ kʼawꞈ, gaˇ dahˇ maˬ tsoeˬ-eu tsawˇ pyehˇ pyehˇ-eu jeˬ-ahˇ gaˇ mahˇ kaˬ gaˇ neh gaˇ jaw jaw-awˬ. Kʼoeˇ deuˬ-aˬ, iˬ dehˬ iˬ ceh-ahˇ uˬ duˬ duˬ leˇ meh lehˇ nawˇ siˬ nya meh.

²⁴ Sahˬpaˬ Yeˬsuˇ-euˬ zaˬ kʼaˆ-aˬ, aˬ cawˬ nehˬ-ehˇ maˬ ya ceh dzaˬ-a. Aˬ yawꞈ-aˬ, tsawˇ haˬ yawˬ gʼaˬ na luꞈ-ahˇ gʼawˬ shaˬ ya gaˬ-awˇ, nui ma gʼawˬ mahˇ ni taˬ nya-eu muiˬ dui dui-eu mehˬ-eu tsoˆ-eu saˬ laˬ ya bi pyeuꞈ meh.

²⁵ Yawˬ ha-ahˇ nui ma maˬ tsaˬ-eu tsawˇ haˬ deuˬ-ahˇ nui ma gʼawˬ mahˇ ni taˬ-awˇ mehˬ paˇ tsoˆ paˇ nya-eu tsawˇ haˬ ya bi pyeuꞈ meh. Aˬ jeˬ miˇ neh ehˇ naˇ, Miˬyehˇ aˬ yawꞈ maꞈ-ahˇ bi noeˬ paˇ-awˇ, yaw tsaˬ yaw dawˇ jeˬ-ahˇ bi siˬ nya laˇ gaˇ noeˬ tmˬ kʼaˇ za-eu meh.

²⁶ Kʼoeˇ ngeh jawˇ, aˬ yawꞈ maꞈ nui ma-ahˇ noeˬ laˇ-awˇ, aˬ yawꞈ maꞈ-ahˇ kʼmˇ paꞈ-awˇ aˬ yawꞈ-euˬ nui noeˬ bi geuꞈ-euˬ Nehꞈ sahˬ paˬ-euˬ lahˇ ju-ahˇ aˬ yawꞈ maꞈ teuˆ lehˆ doˆ nya tehꞈ-a.