2 Teˇsaˬloˇni 2 - Akha

Haiˬ dui dui-eu Gʼaˬ

¹ Aˬ yuiꞈ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li zaꞈ le-eu gaˇ kawˆ hawˇ-eu aˬ dui aˬ yawꞈ jawˇ gaˇ ya uiˬ leˇ-eu gaˇ kawˆ-ahˇ taꞈ leˇ-awˇ, naw maꞈ-ahˇ ngaˇ heu loꞈ-ehˇ shaˇ-eu ma.

² Sahˬpaˬ Yeˬsuˇ-euˬ Aˇnah keuˆ le gʼaˬ-euˬ meh lehˇ aˬ cawˬ ehˇ gaˇ naw maꞈ yaw awˇ laꞈ-ehˇ taˬ noeˬ bahˬ. Nui ma yaw tsaˇ taˬ tsaˇ. Nga maꞈ dawˬ mehˬ mehˬ ngeh kʼoeˇ loꞈ-ehˇ ehˇ-eu meh lehˇ aˬ cawˬ naw maꞈ-ahˇ tsaꞈ nehˬ laˇ-eu baw tehꞈ-a. Maˬ ngeuˇ naˇ, nga maꞈ sahˬ boꞈ boꞈ-awˇ kʼoeˇ loꞈ-ehˇ ehˇ-eu meh lehˇ tsaꞈ laˇ tehꞈ-a.

³ Aˬ geu gʼaˬ aˬ joˆ-ehˇ mehˇ shuiˇ shuiˇ laˇ-eu maˬ kaˬ, maˬ bi shuiˇ tawˆ ni yahˇ-awˬ. Aˬ jeˬ miˇ neh ehˇ naˇ, tsawˇ haˬ gʼawˬ mya ni Miˬyehˇ-ahˇ puiˬ-eu aˇ saˬ saˬ-eu poˆ keuˆ le gʼaˬ-awˇ, shiˬ buiˇ lah ma-ahˇ ya iˇ-eu Haiˬ dui dui-eu Gʼaˬ doˆ le gʼaˬ miˇ tsa maˬ ngeuˇ naˇ Sahˬpaˬ Yeˬsuˇ-euˬ Aˇ nah maˬ keuˆ le-aˇ.

⁴ Tsawˇ haˬ zaˬ uˬ duˬ kʼaˇ tahˬ-eu yaw sahˇ hawˇ-eu miˬ yehˇ deuˬ-ahˇ aˬ yawꞈ muiˇ-awˇ, kʼoeˇ deuˬ dawˬ tawˆ luꞈ kʼoeˇ taˆ aˬ yawꞈ huiˬ dzehˬ-eu geuꞈ tehꞈ-a. Miˬyehˇ-euˬ Uˬ duˬ tahˬ nymˇ nymˇ ma-ahˇ keuˆ ni aˬ yawꞈ uˇ leˇ-awˇ nuiˇ-eu laꞈ kʼoeˇ, yawˬ haˇ yawˬ ha Miˬyehˇ tsaˬ geuꞈ tehꞈ-a.

⁵ Ngaˇ naw maꞈ nehˬ-ehˇ jawˇ ngeh, gaˇ kawˆ heu deuˬ dawˬ tawˆ luꞈ ehˇ nehˬ gʼaˬ-euˬ ngehˇ jiˇ teˬ loˇ.

⁶ Nymˬ-mˇ mi naˆ-ehˇ kʼoeˇ loꞈ-ehˇ maˬ pyeuꞈ laˇ-euˬ heu-aˬ, gaˇ kawˆ tiˬ hmˬ jaˆ-eu baˬ da neh meh. Gaˇ kawˆ kʼoeˇ hmˬ-ahˇ naw maꞈ siˬ nya meh. Aˇ yamˬ tsaˬ laˇ ngeh, Haiˬ dui dui-eu Gʼaˬ doˆ le tehꞈ-a.

⁷ Yaw haiˬ jeˬ kʼoeˇ-aˬ, nymˬ-mˇ mi naˆ-ehˇ gaˇ mˇ luꞈ-eu meh. Pyeuꞈ laˇ-eu lehˇ bymˬ luꞈ-eu kʼoeˇ-ahˇ laˆ tsoeˬ taˬ-euˬ gʼaˬ-ahˇ Miˬyehˇ maˬ yuˇ dzeh kʼoeˇ keuˆ ni maˬ pyeuꞈ doˆ laˇ nya-aˇ.

⁸ Kʼoeˇ ngeh jawˇ, Haiˬ dui dui-eu gʼaˬ-ahˇ bya cehˆ ni ya mawˇ tehꞈ-a. Ehˇ kʼawꞈ, Sahˬpaˬ Yeˬsuˇ oe ngeh a yawꞈ-euˬ kʼaˬ meh-euˬ saꞈ neh Haiˬ dui dui-eu Gʼaˬ-ahˇ baw sehꞈ-awˇ, aˬ yawꞈ-euˬ yaw sehꞈ kʼahˬ sehˇ naˇ guiˇ guiˇ-eu kʼoeˇ neh laˆ piˬ laˆ byoˆ nehˬ tehꞈ-a.

⁹ Haiˬ dui dui-eu kʼoeˇ Gʼaˬ nehꞈ Sahˬdaˬ-euˬ baoˬ pi leꞈ-awˇ, maˬ ngeuˇ-eu zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ dawˬ tawˆ luꞈ jahˇ mehˬ tehꞈ-a.

¹⁰ Maˬ tsaˬ maˬ dawˇ-eu jaˬ myawꞈ mehˇ shuiˇ yawˬ jeˬ na luꞈ aˬ yawꞈ zmˬ-awˇ, ya luˬ ya seˇ-iˇ-eu yaw duˬ baw-eu tsawˇ haˬ deuˬ-ahˇ myawꞈ za shuiˇ za tehꞈ-a. Tsawˇ haˬ kʼoeˇ deuˬ ya luˬ ya seˇ-iˇ tehꞈ-a. Aˬ jeˬ miˇ neh ehˇ naˇ, ka kʼoꞈ-eu jeˬ biꞈ-eu yaw tsaˬ yaw dawˇ dawˬ-ahˇ aˬ yawꞈ maꞈ maˬ gʼoeˇ-a. Maˬ ha geuꞈ-a.

¹¹ Kʼoeˇ miˇ neh, Miˬ yehˇ neh maˬ ngeuˇ-eu baoˬ-ahˇ kʼehˇ gʼeh-awˇ, maˬ ngeuˇ-eu jeˬ-ahˇ jah leˇ ni aˬ yawꞈ maꞈ laꞈ kʼoeˇ gaˇ bi mˇ-euˬ meh.

¹² Kʼoeˇ ngeh jawˇ, yaw tsaˬ yaw dawˇ dawˬ-ahˇ maˬ jah ni iˬ baˇ mˇ gaˇ kʼaˇ cehˇ gʼa-euˬ tsawˇ haˬ deuˬ-aˬ, Miˬyehˇ yaˇ kʼaˬ daˇ nehˬ gaˇ ya daˬ tehꞈ-a.

Ka kʼoꞈ-eu jeˬ za ni Miˬyehˇ naw maꞈ-ahˇ tseˇ doˆ-euˬ

¹³ Aˬ yuiꞈ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ gaˬ-eu tsawˇ haˬ deuˬ pyeuꞈ-eu naw maꞈ gʼaˇ duˬ Miˬyehˇ-euˬ guiˬ lahˬ-ahˇ nga maꞈ maˬ ja ceuˬ-ehˇ tiˬ kʼehˬ-iˬ maˬ jawˇ coeˇ nya. Aˬ jeˬ miˇ neh ehˇ naˇ, Yaw sahˇ Miˬyehˇ-euˬ baoˬ baˬ da neh naw maꞈ-ahˇ bi muiˬ bi shawˇ laˇ-awˇ, yaw tsaˬ yaw dawˇ-ahˇ naw maꞈ jah-eu baˬ da neh ka kʼoꞈ-eu jeˬ bi za-eu gʼaˇ duˬ, mˬ hawˇ-eu miˇ maˬ beh mi naˆ-ehˇ naw maꞈ-ahˇ Miˬyehˇ tseˇ doˆ taˬ-euˬ meh.

¹⁴ Naw maꞈ kʼoeˇ loꞈ-ehˇ bi pyeuꞈ laˇ-eu gʼaˇ duˬ, nga maꞈ neh naw maꞈ-ahˇ mehˬ-euˬ Laˬ kʼaˬ cehˇ-eu Guiˬ lah dawˬ-ahˇ gʼoe-awˇ naw maꞈ-ahˇ Miˬyehˇ kuˇ-euˬ meh. Aˬ dui-euˬ Sahˬpaˬ Yeˬsuˇ Ka li-euˬ yaw shehꞈ kʼahˬ sehˇ-ahˇ naw maꞈ za nya ni, Miˬyehˇ neh naw maꞈ-ahˇ kuˇ-euˬ jeˬ pyeuꞈ-eu meh.

¹⁵ Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, jah-eu laꞈ kʼoeˇ ziꞈ dah ni dehꞈ-awˇ, nga maꞈ dawˬ mehˬ mehˬ-awˇ maˬ ehˇ, sahˬ boꞈ boꞈ-awˇ maˬ ehˇ, naw maꞈ-ahˇ mehˬ nehˬ tsoˆ nehˬ-euˬ yaw tsaˬ yaw dawˇ dawˬ-ahˇ ziꞈ dah ni tuˆ tehˬ taˬ-awˬ.

¹⁶ Aˬ dui-euˬ Sahˬpaˬ Yeˬsuˇ Ka li hawˇ-eu, aˬ myah luꞈ nui ma kʼaˬ duˬ ni gʼeh-awˇ noeˬ tmˬ-eu jeˬ laꞈ kʼoeˇ ziꞈ nya-eu guiˬ lahˬ yaw dzahˇ biꞈ laꞈ-eu gʼaˬ pyeuꞈ-eu aˬ dui-ahˇ gaˬ-eu Aˬda Miˬyehˇ,

¹⁷ naw maꞈ yaw muiˬ jeˬ mˇ nya shaˇ nya ngehˬ nya tmˇ nya ni gʼaˬ biꞈ-awˇ, naw maꞈ-euˬ nui ma ziꞈ dah ni jaˆ nya ni ngehˬ gʼeh luꞈ-uˇ.