2 Saˬmeuˬlaˆ 18 - Akha

Aˬbaˇsaˬloˬ shiˇ-euˬ

¹ Sahˬ paˬ Daˬbiˇ-aˬ, aˬ yawꞈ-euˬ tsawˇ haˬ dawˬ tawˆ luꞈ-ahˇ tiˬ gaˇ kuˇ uiˬ-awˇ, aˇ heˇ gʼaˬ, aˇ yaˇ gʼaˬ lehˇ aˇ muˇ muˇ nehˬ-awˇ, aˬ yuiꞈ geuꞈ-eu deuˬ tseˇ doˆ-awˇ bi uˆ lahˇ-euˬ meh.

² Kʼoeˇ naˇ, aˇ muˇ muˇ ma smˬ muˇ biˇ-awˇ, Yoˇbaˬ, Yoˇbaˬ-euˬ aˬ nyiˇ Aˬbiˇshaiˇ hawˇ-eu Gaˬdaˇ meuˬ-ahˇ jawˇ-awˇ laˇ-euˬ Iˇtehˇ aˬ ha smˇ gʼaˬ-ahˇ, tiˬ gʼaˬ tiˬ muˇ sheuˬ-awˇ bi doˆ-iˇ-euˬ meh. “Ngaˬ-euˬ gʼawˇ mawˇ kʼawꞈ naw maꞈ nehˬ-ehˇ iˇ ma” lehˇ, aˬ yawꞈ-euˬ tsawˇ haˬ deuˬ-ahˇ sahˬ paˬ ehˇ nehˬ-euˬ meh.

³ Ehˇ kʼawꞈ, aˬ yawꞈ maꞈ ehˇ-eu, “Nawˇ nga maꞈ nehˬ-ehˇ maˬ iˇ nya-a. Nga maꞈ guiˇ deuˆ-eu maˬ gʼaˬ leˇ-ehˇ cehˆ byaˆ kʼawꞈ, aˬ yawꞈ maꞈ gʼaˇ duˬ ehˇ nyaꞈ maˬ nyeuˆ-a. Nga maꞈ tiˬ paˆ paˆ bi sehꞈ jiˇ gaˇ keuˆ kʼawꞈ, aˬ yawꞈ maꞈ gʼaˇ duˬ jiˇ jeuˬ maˬ ahˇ-a. Ehˇ kʼawꞈ, nawˇ-aˬ, nga maꞈ tiˬ muiˇ gʼaˬ tawˬ-eu meh. Teu miˇ neh, meuˬ heu meuˬ laꞈ kʼoeˇ nawˇ jawˇ yaꞈ-awˇ, nga maꞈ-ahˇ caw jaw nehˬ laꞈ naˇ muiˬ dzehˬ tehꞈ-a.”

⁴ Kʼoeˇ ngeh, “Naw maꞈ neh muiˬ meh lehˇ noeˬ-euˬ jeˬ-ahˇ ngaˇ geuꞈ ma” lehˇ sahˬ paˬ ehˇ-eu meh. Kʼoeˇ naˇ, aˬ yawꞈ-euˬ tsawˇ haˬ deuˬ aˇ heˇ gʼaˬ, aˇ yaˇ gʼaˬ lehˇ aˇ muˇ muˇ-awˇ doˆ-iˇ ngeh, meuˬ-euˬ lahˇ kʼehˬ dawˬ peh aˬ yawꞈ yawꞈ luꞈ-eu meh.

⁵ Yoˇbaˬ, Aˬbiˇshaiˇ hawˇ-eu Iˇtehˇ aˬ ha smˇ gʼaˬ-ahˇ, “Ngaˬ-euˬ myaˆ pyawˬ-ahˇ haw-eu laꞈ kʼoeˇ, aˬ li zaˬ guˬ Aˬbaˇsaˬloˬ-ahˇ maˬ sehꞈ ni taˬ nehˬ de” lehˇ dawˬ biꞈ-euˬ meh. Aˬ yawꞈ-euˬ gaˇ mˇ-eu yaw huiˬ yaw mahˇ kʼoeˇ deuˬ-ahˇ Daˬbiˇ kʼoeˇ loꞈ-ehˇ ehˇ nehˬ gaˇ, yehˇ dawˬ tawˆ luꞈ ya gaˬ-euˬ meh.

⁶ Daˬbiˇ-euˬ tsawˇ haˬ deuˬ deh ga-ahˇ doˆ-iˇ-awˇ, Eˇpaˬleˬ bawˇ tsahˬ-ahˇ, Iˇsaˬleˬlaˆ tsawˇ haˬ deuˬ nehˬ-ehˇ deuˆ ceh ceh-euˬ meh. Daˬbiˇ-euˬ tsawˇ haˬ deuˬ neh Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-euˬ meh.

⁷ Guiˇ deuˆ gʼaˬ-euˬ kʼoeˇ poˆ guˆ dui dui laˇ paˬ-ehˇ gʼeh-awˇ, kʼoeˇ ngeh nah laꞈ kʼoeˇ tehꞈ-ehˇ tsawˇ haˬ nyiˬ muiˇ gʼaˬ bi deuˆ sehꞈ-euˬ meh.

⁸ Miˇ kʼahˬ kʼoeˇ tsahˇ yawˬ gaˇ na luꞈ doe ni guiˇ deuˆ byah gʼeh-awˇ, guiˇ deuˆ gaˇ bi deuˆ sehꞈ-euˬ myaˆ maˬ tseˇ, bawˇ tsahˬ-ahˇ shiˇ byoˆ-euˬ myaˬ dzehˬ-eu meh.

⁹ Daˬbiˇ-euˬ tsawˇ haˬ tiˬ paˆ na deuˬ-ahˇ, Aˬbaˇsaˬloˬ ja pyuˬ ni ya tahˬ puˬ-euˬ meh. Aˬbaˇsaˬloˬ mahˬ shaˆ lawˬ dziˬ luꞈ-awˇ, mahˬ shaˆ lawˬ kʼoeˇ mawˇ tsuiꞈ kaˆ aˇ bawˇ uˬ moˆ coeˬ uˇ gʼeh ngeh, aˬ yawꞈ-euˬ uˬ duˬ tsuiꞈ kaˆ aˇ bawˇ uˬ laꞈ-ahˇ coeˬ tehˬ-awˇ, mahˬ shaˆ lawˬ kʼoeˇ mawˇ coeˬ doˆ gʼeh-eu nehˬ-ehˇ, Aˬbaˇsaˬloˬ tsuiꞈ kaˆ aˇ bawˇ uˬ laꞈ-ahˇ ngeuˬ yaꞈ-euˬ meh.

¹⁰ Daˬbiˇ-euˬ tsawˇ haˬ tiˬ gʼaˬ Yoˇbaˬ jawˇ gaˇ iˇ-awˇ, “Aˬbaˇsaˬloˬ tsuiꞈ kaˆ aˇ bawˇ-ahˇ ngeuˬ luꞈ-eu ngaˇ mawˇ yaꞈ-euˬ ma” lehˇ ehˇ nehˬ-euˬ meh.

¹¹ Yoˇbaˬ ehˇ-eu, “Nawˇ aˬ yawꞈ-ahˇ mawˇ-euˬ jeˬ maˇ-iˬ, aˬ jeˬ miˇ neh tiˬ poˆ tehꞈ-ehˇ maˬ sehꞈ yaꞈ teˬ. Nawˇ aˬ yawꞈ-ahˇ sehꞈ yaꞈ law nmˇ-aˬ, pyuˇ maˇ byaˆ tseˇ byaˆ hawˇ-eu, guiˇ deuˆ-eu tsawˇ haˬ deuˬ zmˬ-eu joꞈ paꞈ tiˬ kahˇ ngaˇ nawˬ-ahˇ biꞈ-eu ma tawˇ.”

¹² Tsawˇ haˬ kʼoeˇ gʼaˬ ehˇ-eu, “Nawˇ ngaˬ-ahˇ pyuˇ maˇ byaˆ tiˬ heˇ byaˆ biꞈ laꞈ kʼawꞈ, sahˬ paˬ-euˬ aˬ li-ahˇ laꞈ noeˇ neh tehꞈ-ehˇ kʼawꞈ ngaˇ maˬ toeˬ ciˆ leˇ. Nawˇ hawˇ-eu, Aˬbiˇshaiˇ, Iˇtehˇ nawˬ ha smˇ gʼaˬ-ahˇ, ‘Ngaˬ-euˬ myaˆ pyawˬ-ahˇ haw-eu laꞈ kʼoeˇ, zaˬ guˬ Aˬbaˇsaˬloˬ-ahˇ maˬ sehꞈ ni taˬ nehˬ de’ lehˇ, sahˬ paˬ dawˬ biꞈ-eu nga maꞈ dawˬ tawˆ luꞈ gaˬ jiˇ-euˬ ma.

¹³ Sahˬ paˬ-euˬ ehˇ dawˬ-ahˇ ngaˇ maˬ naˇ haˬ geuꞈ-ehˇ, Aˬbaˇsaˬloˬ-ahˇ ngaˇ sehꞈ law nmˇ-aˬ, sahˬ paˬ-euˬ mehˬ shi tiˬ jeˬ-iˬ maˬ zaꞈ taˬ nya-eu loꞈ-ehˇ, gaˇ kawˆ kʼoeˇ sahˬ paˬ-ahˇ siˬ leˇ ngeh, nawˇ ngaˬ-euˬ gʼaˇ duˬ maˬ caw ngehˬ maˬ caw tmˇ nehˬ laꞈ ni byehˇ tehꞈ-a.”

¹⁴ Kʼoeˇ ngeh, “Ngaˇ nawˬ nehˬ-ehˇ ja ja-ehˇ jawˇ-eu aˇ yamˬ maˬ jaˆ” lehˇ Yoˇbaˬ ehˇ-awˇ, gahˬ smˬ kahˇ yuˇ-awˇ, tsuiꞈ kaˆ aˇ bawˇ-ahˇ yaw dehꞈ-ehˇ ngeuˬ luꞈ-eu Aˬbaˇsaˬloˬ-euˬ kʼahˬ-ahˇ joeˬ tsoˆ gʼeh-euˬ meh.

¹⁵ Kʼoeˇ naˇ, Yoˇbaˬ-euˬ yehˇ tseˇ gʼaˬ ga uˇ le-awˇ, Aˬbaˇsaˬloˬ-ahˇ sehꞈ-euˬ meh.

¹⁶ Kʼoeˇ naˇ, guiˇ deuˆ-eu naˬ-eu gʼaˇ duˬ, Yoˇbaˬ neh daˇ heh bi baw-awˇ aˬ yawꞈ-euˬ yehˇ deuˬ Iˇsaˬleˬlaˆ tsawˇ haˬ deuˬ-ahˇ maˬ paˇ teh ni gʼoꞈ laˇ jiˇ-euˬ meh.

¹⁷ Aˬbaˇsaˬloˬ-euˬ gʼawˇ mawˇ-ahˇ, bawˇ tsahˬ-ahˇ jaˆ-eu naꞈ dui dui-eu duˬ kʼahˬ tiˬ kʼahˬ-ahˇ aˬ yawꞈ maꞈ biˬ ahˇ-awˇ, kʼaˬ lo gahˬ tehˬ-euˬ meh. Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ, yawˬ ha-euˬ nymˇ-ahˇ yawˬ ha cehˆ gʼoꞈ jiˇ-euˬ meh.

¹⁸ Aˬbaˇsaˬloˬ yawˬ dehꞈ dehꞈ ngeh, aˬ yawꞈ-ahˇ bi noeˬ keuˆ-eu gʼaˇ duˬ, sahˬ paˬ-euˬ deh kʼawꞈ lehˇ kuˇ-eu jawˇ duˬ-ahˇ kʼaˬ lo ka tuˇ yaꞈ-euˬ meh. Aˬ jeˬ miˇ neh ehˇ naˇ, aˬ yawꞈ zaˬ maˬ jawˇ-eu miˇ neh, aˬ yawꞈ-euˬ tsawˇ myahˇ maˬ bi byoˆ-iˇ ni pi ka gʼeh-eu gʼaˬ maˬ jawˇ-a. Aˬ yawꞈ neh ka tuˇ yaꞈ-euˬ kʼaˬ lo kʼoeˇ-ahˇ, aˬ yawꞈ-euˬ tsawˇ myahˇ myahˇ nehˬ-awˇ, iˬ nah keuˆ ni Aˬbaˇsaˬloˬ-ahˇ noeˬ keuˆ-eu kʼaˬ lo kʼawˇ zeuˇ lehˇ kuˇ luꞈ-eu meh.

Aˬbaˇsaˬloˬ shiˇ-euˬ gaˇ kawˆ Daˬbiˇ ya gaˬ-euˬ

¹⁹ Kʼoeˇ naˇ, Zaˬdoˆ-euˬ aˬ li Aˬhiˇmaˆ gʼaˬ Yoˇbaˬ-ahˇ ehˇ nehˬ-eu, “Ngaˬ-ahˇ sahˬ paˬ jawˇ gaˇ bi cehˆ gʼoꞈ gʼeh laꞈ-awˇ, muiˇ-eu deuˬ-euˬ aˬ laꞈ laꞈ kʼoeˇ Sahˬpaˬ Miˬyehˇ neh aˬ yawꞈ-ahˇ ka kʼoꞈ nehˬ gʼaˬ-euˬ gaˇ kawˆ, laˬ kʼaˬ cehˇ-eu dawˬ bi tsaꞈ gaˬ-iˇ laꞈ-awˬ.”

²⁰ Yoˇbaˬ ehˇ-eu, “Iˬ nah-aˬ, laˬ kʼaˬ cehˇ-eu dawˬ heu nawˇ ya tsaꞈ gaˬ-leˇ-eu aˇ nah maˬ ngeuˇ-a. Yawˬ nah yawˬ tsaꞈ gaˬ-iˇ lawˬ. Iˬ nah sahˬ paˬ aˬ li shiˇ-euˬ aˇ nah pyeuꞈ-eu miˇ neh, nawˇ kʼoeˇ loꞈ-ehˇ mˇ-eu maˬ tsaˬ-a.”

²¹ Kʼoeˇ naˇ, Yoˇbaˬ-euˬ zaˬ kʼaˆ pyeuꞈ-eu Kuˇshaˆ tsawˇ jeuˬ tiˬ gʼaˬ-ahˇ, “Sahˬ paˬ jawˇ gaˇ le-awˇ, nawˬ neh kʼaˇ ya mawˇ-euˬ jeˬ dzawˇ gaˬ-leˇ-awˬ” lehˇ Yoˇbaˬ ehˇ nehˬ-euˬ meh. Zaˬ kʼaˆ kʼoeˇ gʼaˬ aˬ yawꞈ-ahˇ yaw zeu baw nehˬ yaꞈ-awˇ, cehˆ coeˬ coeˬ doˆ gʼeh-euˬ meh.

²² Aˬhiˇmaˆ ehˇ-eu, “Aˬ jeˬ pyeuꞈ kʼawꞈ ehˬ-ehˇ ngeuˇ-iˬ. Ngaˬ-ahˇ gaˇ kawˆ heu bi tsaꞈ gaˬ leˇ laꞈ-awˬ.” Yoˇbaˬ ehˇ-eu, “Aˬ li-oˇ, aˇ poeˬ tiˬ jeˬ-iˬ maˬ za-eu gaˇ-ahˇ, aˬ jeˬ miˇ neh nawˇ teu naˆ naˆ-ehˇ mˇ mawꞈ-eu nya.”

²³ Aˬhiˇmaˆ ehˇ-eu, “Aˬ jeˬ pyeuꞈ kʼawꞈ ehˬ-ehˇ ngeuˇ-iˬ. Ngaˇ le-eu ma.” Kʼoeˇ ngeh poˆ jawˇ, “Toˆ-ehˇ ngeuˇ naˇ le-awˬ tawˇ” lehˇ, Yoˇbaˬ aˬ yawꞈ-ahˇ ehˇ nehˬ-euˬ meh. Kʼoeˇ ngeh, Yawˇdaˬ lawˇ baˬ deh kʼawꞈ gaˇ ma caw caw-ehˇ Aˬhiˇmaˆ cehˆ ka gʼeh-awˇ, gʼawˬ myahˇ maˬ gʼeh-ehˇ zaˬ kʼaˆ kʼoeˇ gʼaˬ-ahˇ cehˆ dzeuˇ-euˬ meh.

²⁴ Meuˬ-euˬ lahˇ kʼehˬ laꞈ kʼoeˇ tiˆ hawˇ-eu laꞈ nyiˇ tiˆ yaw kaˬ-ahˇ Daˬbiˇ nuiˇ luꞈ-eu meh. Meuˬ-euˬ lahˇ kʼehˬ-ahˇ loꞈ-eu gʼaˬ meuˬ meuˬ lahˇ kʼoeˇ taˆ daˆ laˇ-awˇ, lahˇ kʼehˬ-euˬ nymˇ mˬ kʼoeˇ taˆ yawꞈ luꞈ-eu meh. Aˬ yawꞈ haw gʼeh-iˬ ngeh, tsawˇ haˬ tiˬ gʼaˬ tehꞈ-ehˇ cehˆ laꞈ luꞈ gaˇ ya mawˇ-euˬ meh.

²⁵ Sahˬ paˬ-ahˇ aˬ yawꞈ kuˇ gaˬ-awˇ, gaˇ kawˆ kʼoeˇ ehˇ nehˬ ngeh, “Tiˬ gʼaˬ tehꞈ-ehˇ cehˆ gʼoꞈ laꞈ-eu ngeuˇ naˇ, laˬ kʼaˬ ya cehˇ-eu gaˇ kawˆ cehˆ tsaꞈ gaˬ laˇ-euˬ tehꞈ-a” lehˇ sahˬ paˬ ehˇ-eu meh. Tsawˇ haˬ kʼoeˇ gʼaˬ tiˬ jawˇ saˇ-i tiˬ jawˇ dawˬ peh cehˆ peh laꞈ luꞈ-eu meh.

²⁶ Kʼoeˇ ngeh, yawˬ gʼaˬ yawˬ paˇ cehˆ gʼoꞈ laꞈ luꞈ gaˇ lahˇ kʼehˬ kʼoeˇ taˆ loꞈ luꞈ-eu gʼaˬ ya mawˇ-awˇ, laˇ gʼoˆ-ahˇ loꞈ luꞈ-eu gʼaˬ-ahˇ kuˇ-awˇ, “Haw sheˇ. Tsawˇ haˬ yawˬ gʼaˬ yawˬ paˇ cehˆ gʼoꞈ laꞈ luꞈ nga” lehˇ ehˇ nehˬ-euˬ meh. “Kʼoeˇ gʼaˬ kʼawꞈ, laˬ kʼaˬ ya cehˇ-eu gaˇ kawˆ cehˆ gaˬ laˇ-euˬ tehꞈ-a” lehˇ sahˬ paˬ ehˇ-eu meh.

²⁷ “Mehˬ hu cehˆ luꞈ-eu gʼaˬ Zaˬdoˆ-euˬ aˬ li Aˬhiˇmaˆ-ahˇ duˇ nga” lehˇ, lahˇ kʼehˬ-ahˇ loꞈ-eu gʼaˬ ehˇ ngeh, “Aˬ yawꞈ tsawˇ haˬ yaw muiˬ tiˬ gʼaˬ meh. Laˬ kʼaˬ ya cehˇ-eu gaˇ kawˆ cehˆ gaˬ laˇ-euˬ tehꞈ-a” lehˇ sahˬ paˬ ehˇ-eu meh.

²⁸ Aˬhiˇmaˆ-aˬ, sahˬ paˬ-ahˇ dawˬ cawˬ puˬ nehˬ-awˇ, sahˬ paˬ-euˬ meh shi miˇ tsa awˆ byaˆ-awˇ, “Sahˬ paˬ-oˇ, nawˬ-ahˇ puiˬ-eu tsawˇ haˬ deuˬ-ahˇ bi gʼaˬ leˇ nehˬ laꞈ-euˬ, nawˬ-eu Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ” lehˇ ehˇ-eu meh.

²⁹ Sahˬ paˬ ehˇ-eu, “Ngaˬ li Aˬbaˇsaˬloˬ tiˬ jeˬ-iˬ maˬ gʼeh-aˬ loˇ.” Aˬhiˇmaˆ ehˇ-eu, “Sahˬ paˬ-oˇ, Yoˇbaˬ ngaˬ-ahˇ pyehˬ gʼeh laꞈ ngeh, yaw kʼaˆ-ehˇ luiˬ gʼa luꞈ-eu meh. Ehˇ kʼawꞈ yaw duˬ duˬ-ehˇ tiˬ jeˬ-iˬ maˬ siˬ laˇ-aˬ siˬ.”

³⁰ Kʼoeˇ naˇ, “Kʼoeˇ paw dzeˇ yawꞈ tawˬ-iˇ-awˬ” lehˇ Aˬhiˇmaˆ-ahˇ sahˬ paˬ ehˇ nehˬ ngeh, Aˬhiˇmaˆ kʼoeˇ gaˇ yawꞈ-iˇ-euˬ meh.

³¹ Kʼoeˇ ngeh, Kuˇshaˆ tsawˇ jeuˬ zaˬ kʼaˆ kʼoeˇ gʼaˬ cehˆ keuˆ laꞈ-awˇ, “Sahˬ paˬ-oˇ, nawˬ-euˬ gʼaˇ duˬ laˬ kʼaˬ cehˇ-eu dawˬ ngaˇ tsaꞈ gaˬ laˇ-euˬ ma. Iˬ nah nawˬ-ahˇ puiˬ-eu tsawˇ haˬ dawˬ tawˆ luꞈ kʼoeˇ taˆ, Sahˬpaˬ Miˬyehˇ nawˬ-ahˇ bi gʼaˬ leˇ jiˇ-euˬ meh” lehˇ ehˇ-eu meh.

³² Sahˬ paˬ ehˇ-eu, “Ngaˬ li Aˬbaˇsaˬloˬ tiˬ jeˬ-iˬ maˬ gʼeh-aˬ loˇ.” Zaˬ kʼaˆ kʼoeˇ gʼaˬ ehˇ-eu, “Sahˬ paˬ-oˇ, nawˬ-ahˇ muiˇ-awˇ puiˬ-eu tsawˇ haˬ deuˬ kʼoeˇ taˆ, zaˬ guˬ kʼoeˇ gʼaˬ kʼoeˇ taˆ keuˆ le-euˬ jeˬ bi keuˆ le luꞈ-uˇ.”

³³ Kʼoeˇ ngeh, sahˬ paˬ noeˬ shaˬ dui dui-awˇ, meuˬ-euˬ lahˇ kʼehˬ laˇ gʼoˆ laꞈ taˆ jaˆ-eu jawˇ duˬ-ahˇ le uˇ-awˇ ngoeˇ-euˬ meh. Aˬ yawꞈ daˆ leˇ leꞈ-euˬ nehˬ-ehˇ, “Ngaˬ li Aˬbaˇsaˬloˬ-oˇ. Ngaˬ li-oˇ. Ngaˬ li Aˬbaˇsaˬloˬ-oˇ. Aˬ jeˬ miˇ neh nawˬ-euˬ dah zaˇ ngaˬ-ahˇ maˬ bi shiˇ laꞈ ta. Ngaˬ li Aˬbaˇsaˬloˬ-oˇ” lehˇ, dawˬ kawˬ kawˬ kawˬ-ehˇ ngoeˇ-euˬ meh.