2 Saˬmeuˬlaˆ 14 - Akha

Aˬbaˇsaˬloˬ ya gʼoꞈ laˇ ni Yoˇbaˬ tsawˇ gahˇ gahˇ-euˬ

¹ Sahˬ paˬ Daˬbiˇ-euˬ nui ma laꞈ kʼoeˇ Aˬbaˇsaˬloˬ-ahˇ yaw kʼaˆ-ehˇ noeˬ luꞈ-eu gaˇ kawˆ, Zeˬluˇyaˆ-euˬ aˬ li Yoˇbaˬ siˬ nya-euˬ meh.

² Kʼoeˇ miˇ neh, Teˬkawˬ meuˬ-ahˇ jawˇ-eu tsawˇ gahˇ ahˇ-eu zaˬ miˬ zaˬ tiˬ gʼaˬ-ahˇ bi sheuˬ laˬ-iˇ-euˬ meh. Zaˬ miˬ zaˬ kʼoeˇ gʼaˬ laˇ keuˆ ngeh, Yoˇbaˬ heu loꞈ-ehˇ ehˇ nehˬ-euˬ meh. “Nawˇ tsawˇ ngoeˇ ngoeˇ-eu geuꞈ-awˇ, tsawˇ ngoeˇ ngoeˇ-eu deuˬ dm-eu mehˬ tsoeˬ dm-awˇ, uˬ duˬ tsehˇ kahˇ kʼawꞈ maˬ kaˆ juˇ ni bi jaˆ-awˬ. Nawˬ-euˬ aˇ gʼehˇ seuˆ dzeuꞈ dawˬ tawˆ luꞈ, aˇ yamˬ gʼawˬ myahˇ ni tsawˇ ngoeˇ ngoeˇ ngoeˇ-ehˇ jawˇ-euˬ zaˬ miˬ zaˬ tiˬ gʼaˬ-ahˇ laˆ duˇ-awˬ.

³ Kʼoeˇ naˇ, sahˬ paˬ jawˇ gaˇ le-awˇ, ngaˬ neh mehˬ nehˬ-eu loꞈ-ehˇ ehˇ leˇ-awˬ” lehˇ ehˇ nehˬ-awˇ, aˬ joˆ-ehˇ ya ehˇ leˇ-eu gaˇ kawˆ mehˬ nehˬ-euˬ meh.

⁴ Zaˬ miˬ zaˬ kʼoeˇ gʼaˬ sahˬ paˬ jawˇ gaˇ le-awˇ, miˇ tsa awˆ byaˆ-awˇ yaw zeu baw nehˬ-eu laꞈ kʼoeˇ, “Sahˬ paˬ-oˇ, ngaˬ-ahˇ gʼawˬ shaˬ gaˬ-awˇ caw ba nehˬ laꞈ-awˬ” lehˇ ehˇ nehˬ-euˬ meh.

⁵ “Nawˇ aˬ jeˬ loˬ te” lehˇ, sahˬ paˬ aˬ yawꞈ-ahˇ ehˇ nehˬ ngeh, zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ, ngaˇ-aˬ, kʼaˬ dzeˇ zaˬ maˬ baw-eu shaˬ dui dui-eu miˬ coeˬ miˬ ma tiˬ gʼaˬ ma.

⁶ Ngaˇ aˬ li nyiˬ li jawˇ-awˇ, tiˬ nah keuˆ laˇ ngeh, aˬ yawꞈ nyaꞈ nmˇ deh yaˇ-ahˇ ceh dzaˬ-euˬ meh. Kaˬ piˇ nehˬ-eu gʼaˬ maˬ jawˇ-eu miˇ neh, tiˬ gʼaˬ neh yawˬ gʼaˬ yawˬ-ahˇ sehꞈ-euˬ meh.

⁷ Ngaˬ-euˬ aˬ yuiꞈ aˬ nyiˇ deuˬ ngaˇ jawˇ gaˇ oe-awˇ, aˬ yawꞈ-eu mehˇ nmˇ-ahˇ sehꞈ-euˬ ngaˬ li-ahˇ aˬ yawꞈ maꞈ paˇ sehꞈ poˆ nehˬ-eu gʼaˇ duˬ, aˬ yawꞈ maꞈ-ahˇ a nehˬ laꞈ-awˬ lehˇ ehˇ-eu meh. Aˬ yawꞈ maꞈ kʼoeˇ loꞈ-ehˇ maˇ diˇ jahˇ nehˬ laꞈ te lehˇ ngeuˇ naˇ, ngaˇ-aˬ, aˬ li tiˬ li-iˬ maˬ paˇ jawˇ ni ya dehꞈ meh. Ngaˬ-euˬ noeˬ tmˬ duˬ-ahˇ aˬ yawꞈ maꞈ laˆ cawˆ-euˬ uˬ taꞈ ngaˬ-euˬ kʼaˬ dzeˇ zaˬ-euˬ tsawˇ myahˇ pi-eu aˬ li aˇ yoeˬ maˬ ceuˬ-ehˇ bi pyeuꞈ-iˇ ni aˬ yawꞈ maꞈ jahˇ-eu lehˇ gʼeh-eu meh.”

⁸ Sahˬ paˬ ehˇ-eu, “Iˇ kahˇ-ahˇ gʼoꞈ-iˇ-awˬ. Gaˇ kawˆ heu hmˬ ngaˇ haw nehˬ ma.”

⁹ Teˬkawˬ meuˬ-ahˇ jawˇ-eu zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ, iˬ baˇ heu nawˇ hawˇ-eu nawˬ-euˬ nymˇ jiˇ kʼoeˇ taˆ maˬ bi jaˆ ni, ngaˇ hawˇ-eu ngaˬ da-euˬ nymˇ jiˇ kʼoeˇ taˆ jaˆ luꞈ-uˇ.”

¹⁰ Sahˬ paˬ ehˇ-eu, “Tsawˇ haˬ tiˬ gʼaˬ na nawˬ-ahˇ laˆ bahˬ laˇ naˇ, ngaˇ jawˇ gaˇ sheuˬ laꞈ-awˬ. Aˬ yawꞈ nawˬ-ahˇ tiˬ jawˇ-iˬ maˬ paˇ ya laˆ bahˬ ni ngaˇ jahˇ nehˬ ma.”

¹¹ Zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ shiˇ dzeuˇ-euˬ ngaˬ li gʼaˇ duˬ laꞈ poˆ ya poˆ-eu ngaˬ-euˬ aˬ yuiꞈ aˬ nyiˇ kʼoeˇ gʼaˬ dehꞈ luꞈ-eu ngaˬ li-ahˇ sehꞈ-eu laꞈ kʼoeˇ huiˬ dzehˬ-eu iˬ baˇ maˬ ya bi mˇ ni, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ.” Sahˬ paˬ ehˇ-eu, “Nawˬ li-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ maˬ bi byoˆ-iˇ lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ saˇ jaˇ dzaˬ-eu ma.”

¹² Kʼoeˇ naˇ, “Sahˬ paˬ-oˇ, ngaˬ-ahˇ tiˬ jeˬ paˇ bi ehˇ laꞈ siˬ” lehˇ zaˬ miˬ zaˬ kʼoeˇ gʼaˬ paˇ ehˇ ngeh, “Ehˇ nya tehꞈ-a” lehˇ sahˬ paˬ ehˇ kʼoꞈ nehˬ-euˬ meh.

¹³ Zaˬ miˬ zaˬ kʼoeˇ gʼaˬ ehˇ-eu, “Aˬ jeˬ miˇ neh Miˬyehˇ-euˬ tsawˇ jeuˬ-ahˇ nawˇ mˇ lehˬ te. Aˬ cawˬ miˇ kʼahˬ-ahˇ cehˆ jawˇ-iˇ-euˬ nawˬ li-ahˇ nawˇ maˬ bi gʼoꞈ laˇ-eu miˇ neh, nymˬ-mˇ tseuˆ tseuˆ hawˇ-eu nawˬ neh ehˇ taˬ-euˬ dawˬ-ahˇ nawˇ maˬ caw teh gaˇ duˇ-eu meh.

¹⁴ Aˬ dui dawˬ tawˆ luꞈ ya shiˇ tehꞈ-a. Aˬ dui-aˬ, miˇ tsaˬ-ahˇ shehˆ dzeh-awˇ maˬ paˇ tawˆ kʼoꞈ geuꞈ nya-eu iˇ cuꞈ-ahˇ duˇ-eu meh. Shiˇ dzeuˇ-euˬ tsawˇ haˬ deuˬ-ahˇ, Miˬyehˇ maˬ bi gʼoꞈ dehꞈ laˇ-a. Ehˇ kʼawꞈ, aˬ cawˬ miˇ kʼahˬ-ahˇ cehˆ jawˇ-iˇ-euˬ tsawˇ haˬ tiˬ gʼaˬ gʼoꞈ laˇ nya ni, sahˬ paˬ gaˇ ma pah nehˬ nya tehꞈ-a.

¹⁵ Sahˬ paˬ-oˇ, aˬ cawˬ ngaˬ-ahˇ guˆ tsiˬ nyehꞈ-eu miˇ neh, nawˬ-ahˇ ngaˇ dawˬ ya ngehˬ cawˬ laˇ-euˬ jeˬ pyeuꞈ-eu ma. Ngaˬ neh shaˇ-euˬ jeˬ-ahˇ nawˇ mˇ nehˬ laꞈ-eu duˇ lehˇ yawˬ haˇ yawˬ ha noeˬ-awˇ, nawˬ-ahˇ dawˬ ngehˬ cawˬ laˇ-euˬ ma.

¹⁶ Ngaˬ-euˬ dawˬ-ahˇ nawˇ naˇ haˬ nehˬ laꞈ-eu laꞈ kʼoeˇ, ngaˬ li-ahˇ maˬ ehˇ, ngaˬ-ahˇ maˬ ehˇ, Sahˬpaˬ Miˬyehˇ neh aˬ yawꞈ-euˬ tsawˇ jeuˬ-ahˇ jeˬ biˇ biꞈ nehˬ taˬ-euˬ miˇ tsaˬ laꞈ kʼoeˇ maˬ ya jawˇ ni sehꞈ-eu lehˇ gʼeh-eu gʼaˬ-euˬ aˬ laꞈ laꞈ kʼoeˇ, ngaˬ-ahˇ nawˇ ka kʼoꞈ nehˬ laꞈ tehꞈ-a lehˇ ngaˇ noeˬ-euˬ ma.

¹⁷ Ngaˬ-euˬ saˇ jaˇ baˬ da neh, ngaˇ guˆ kʼaˇ maˬ za ni ya dehꞈ tehꞈ-a lehˇ yawˬ haˇ yawˬ ha ehˇ-euˬ ma. Aˬ jeˬ miˇ neh ehˇ naˇ, sahˬ paˬ nawˇ-aˬ, Miˬyehˇ-euˬ mˬ taˆ gʼaˬ kʼehˇ-ahˇ duˇ-awˇ, yaw muiˬ yaw doeˇ tseˇ paˆ nya-eu meh. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ nehˬ-ehˇ jawˇ luꞈ-uˇ.”

¹⁸ Sahˬ paˬ ehˇ-eu, “Ngaˇ nawˬ-ahˇ tiˬ jeˬ naˇ haˬ nyaˇ. Nawˇ dawˇ coe ni ehˇ kʼoꞈ nehˬ laꞈ lawˬ.” Zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ, nawˇ kʼaˇ naˇ haˬ mawꞈ-eu jeˬ naˇ haˬ-awˬ.”

¹⁹ Sahˬ paˬ aˬ yawꞈ-ahˇ naˇ haˬ-eu, “Yoˇbaˬ neh nawˬ-ahˇ heu loꞈ-ehˇ bi ehˇ laˇ-euˬ maˬ ngeuˇ-a loˇ.” Zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ, nawˬ neh kʼaˇ naˇ haˬ-euˬ jeˬ-ahˇ gaˇ jaw maˬ jaw-ehˇ dawˇ coe ni ehˇ kʼoꞈ nehˬ ma lehˇ, yaw muiˬ yaw shawˇ jeˬ dawˬ tawˆ luꞈ mehˬ shi ngaˇ kamˬ-eu ma. Aˬ joˆ-ehˇ ya mˇ ya shaˇ-awˇ, aˬ joˆ-ehˇ ya ngehˬ ya tmˇ-eu gaˇ kawˆ ngaˬ-ahˇ mehˬ nehˬ laꞈ-euˬ gʼaˬ-aˬ, maˇ maˇ ni nawˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Yoˇbaˬ meh.

²⁰ Ehˇ kʼawꞈ, nymˬ-mˇ pyeuꞈ luꞈ-eu gaˇ kawˆ heu bi muiˬ laˇ-eu gʼaˇ duˬ aˬ yawꞈ heu loꞈ-ehˇ mˇ-euˬ meh. Sahˬ paˬ nawˇ-aˬ, Miˬyehˇ-euˬ mˬ taˆ gʼaˬ kʼehˇ loꞈ-ehˇ tsawˇ gahˇ ahˇ-awˇ, kʼaˇ pyeuꞈ laˇ-euˬ jeˬ dawˬ tawˆ luꞈ-ahˇ siˬ nya mawˇ nya law hawˇ nga.”

²¹ Kʼoeˇ naˇ, Yoˇbaˬ-ahˇ sahˬ paˬ ehˇ nehˬ-eu, “Nawˇ bi mˇ mawꞈ-eu loꞈ-ehˇ ngaˇ mˇ ma lehˇ noeˬ tsehˆ gʼaˬ-euˬ ma. Nawˇ iˇ-awˇ, zaˬ guˬ Aˬbaˇsaˬloˬ-ahˇ sheuˬ kʼoꞈ laˬ-iˇ-awˬ.”

²² Daˬbiˇ-euˬ mehˬ shi Yoˇbaˬ miˇ tsa awˆ byaˆ-awˇ, yaw zeu baw nehˬ-eu laꞈ kʼoeˇ, “Sahˬ paˬ-oˇ, Miˬyehˇ nawˬ-ahˇ guiˬ lahˬ biꞈ luꞈ-uˇ. Nawˇ ngaˬ-ahˇ nui ma tsaˬ-eu gaˇ kawˆ nymˬ-mˇ ngaˇ siˬ duˬ-euˬ ma. Aˬ jeˬ miˇ neh ehˇ naˇ, ngaˬ neh shaˇ-euˬ dawˬ-ahˇ nawˇ naˇ haˬ geuꞈ nehˬ laꞈ-euˬ meh” lehˇ ehˇ nehˬ-euˬ meh.

²³ Kʼoeˇ naˇ, Geˬshuˇlaˆ meuˬ-ahˇ aˬ yawꞈ iˇ-awˇ, Aˬbaˇsaˬloˬ-ahˇ Yeˬluˇsaˬlehˬ meuˬ-ahˇ sheuˬ kʼoꞈ laꞈ-euˬ meh.

²⁴ Ehˇ kʼawꞈ, Aˬbaˇsaˬloˬ-ahˇ sahˬ paˬ-euˬ hawˇ nymˇ laꞈ kʼoeˇ maˬ ya bi jawˇ-eu gʼaˇ duˬ, sahˬ paˬ neh dawˬ biꞈ taˬ-euˬ meh. “Aˬ yawꞈ-ahˇ maˬ mawˇ mawꞈ nya” lehˇ sahˬ paˬ ehˇ-eu miˇ neh, Aˬbaˇsaˬloˬ gʼaˬ yawˬ ha-euˬ nymˇ-ahˇ jawˇ-awˇ, sahˬ paˬ jawˇ gaˇ maˬ laˇ mawˇ-a.

Aˬbaˇsaˬloˬ-ahˇ Daˬbiˇ ha geuꞈ-euˬ

²⁵ Iˇsaˬleˬlaˆ miˇ kʼahˬ laꞈ kʼoeˇ, Aˬbaˇsaˬloˬ loꞈ-ehˇ seuˆ dzeuꞈ aˇ gʼehˇ muiˬ-awˇ, tsawˇ myahˇ doˆ-eu tsawˇ haˬ tiˬ gʼaˬ-iˬ maˬ jawˇ-a. Uˬ duˬ-ahˇ neh aˬ kuiˇ pehˬ zaˬ-ahˇ keuˆ ni, ehˇ kʼaˇ za-eu tiˬ tsahˇ-iˬ maˬ jaˆ-a.

²⁶ Aˬ yawꞈ-euˬ uˬ duˬ tsehˇ kahˇ mehˇ dui dui-awˇ, uˬ duˬ tsehˇ kahˇ mahˇ le ngeh yaw kah kah-eu miˇ neh, tiˬ kʼoꞈ tiˬ poˆ ya tehꞈ dzeh-eu meh. Uˬ duˬ tsehˇ kahˇ kʼoeˇ, sahˬ paˬ-euˬ hawˇ nymˇ laꞈ kʼoeˇ zmˬ luꞈ-eu kaˇ-ahˇ tsaˬ ni saˆ haw ngeh, tiˬ jawꞈ-i nyiˬ kaˇ dzehˬ ni byah-eu meh.

²⁷ Aˬbaˇsaˬloˬ-aˬ, aˬ li smˬ li hawˇ-eu, Taˬmaˬ lehˇ myahˇ-euˬ pyawˬ naˬ aˇ gʼehˇ muiˬ dui dui-eu aˬ buˇ tiˬ buˇ jawˇ-eu meh.

²⁸ Aˬbaˇsaˬloˬ-aˬ, sahˬ paˬ-euˬ myaˆ pyawˬ-ahˇ maˬ ya mawˇ ni, Yeˬluˇsaˬlehˬ meuˬ laꞈ kʼoeˇ nyiˬ kʼoꞈ jawˇ byah-euˬ meh.

²⁹ Kʼoeˇ naˇ, aˬ yawꞈ-euˬ dah zaˇ sahˬ paˬ jawˇ gaˇ bi le-eu gʼaˇ duˬ, Yoˇbaˬ-ahˇ aˬ yawꞈ bi kuˇ-iˇ-euˬ meh. Ehˇ kʼawꞈ, Yoˇbaˬ aˬ yawꞈ jawˇ gaˇ maˬ laˇ-a. Tiˬ poˆ paˇ bi kuˇ poˆ-iˇ kʼawꞈ, Yoˇbaˬ maˬ laˇ ni jawˇ-euˬ meh.

³⁰ Kʼoeˇ miˇ neh, Aˬbaˇsaˬloˬ aˬ yawꞈ-euˬ zaˬ kʼaˆ deuˬ-ahˇ ehˇ nehˬ-eu, “Haw sheˇ. Ngaˬ-euˬ deh yaˇ dawˬ peh jaˆ-eu Yoˇbaˬ-euˬ deh yaˇ-ahˇ cehˇ dehꞈ luꞈ-eu maˬ ngeuˇ nga loˇ. Iˇ-awˇ miˬ dzaˬ keuˬ dzeh nehˬ-awˬ.”

³¹ Kʼoeˇ naˇ, Aˬbaˇsaˬloˬ-euˬ nymˇ-ahˇ Yoˇbaˬ iˇ-awˇ, “Aˬ jeˬ miˇ neh nawˬ-euˬ zaˬ kʼaˆ deuˬ neh ngaˬ-euˬ deh yaˇ-ahˇ miˬ dzaˬ bi keuˬ teˬ” lehˇ naˇ haˬ-euˬ meh.

³² Aˬbaˇsaˬloˬ ehˇ-eu, “Nawˬ-ahˇ ngaˇ bi kuˇ laˬ-iˇ kʼawꞈ, nawˇ maˬ laˇ-eu miˇ neh, kʼoeˇ loꞈ-ehˇ bi jahˇ-euˬ ma. Ngaˬ-euˬ dah zaˇ nawˬ-ahˇ sahˬ paˬ jawˇ gaˇ bi le-awˇ, heu loꞈ-ehˇ bi ehˇ leˇ mawꞈ-eu ma. ‘Aˬ jeˬ miˇ neh ngaˬ-ahˇ Geˬshuˇlaˆ meuˬ-ahˇ neh heu gaˇ kuˇ kʼoꞈ-awˇ bi jawˇ laꞈ teˬ. Kʼoeˇ gaˇ jawˇ law nmˇ-aˬ, ngaˬ-euˬ gʼaˇ duˬ muiˬ dzehˬ tehꞈ-a’ lehˇ bi ehˇ leˇ mawꞈ-eu ma.” Aˬbaˇsaˬloˬ paˇ ehˇ-eu, “Ngaˇ sahˬ paˬ jawˇ gaˇ le mawˇ nya ni nawˇ shaˇ noeˬ nehˬ laꞈ-awˬ. Ngaˇ iˬ baˇ ahˇ naˇ kʼawꞈ, aˬ yawꞈ ngaˬ-ahˇ sehꞈ luꞈ-uˇ.”

³³ Sahˬ paˬ Daˬbiˇ jawˇ gaˇ Yoˇbaˬ le-awˇ, Aˬbaˇsaˬloˬ neh kʼaˇ bi ehˇ-euˬ jeˬ dzawˇ nehˬ leˇ-euˬ meh. Kʼoeˇ ngeh, sahˬ paˬ neh Aˬbaˇsaˬloˬ-ahˇ bi kuˇ laˬ-iˇ-awˇ, Aˬbaˇsaˬloˬ laˇ-awˇ, sahˬ paˬ-euˬ mehˬ shi miˇ tsa awˆ byaˆ-eu laꞈ kʼoeˇ, yaw zeu baw nehˬ-euˬ meh. Aˬbaˇsaˬloˬ-ahˇ sahˬ paˬ mehˬ cuˇ cuˇ-awˇ ha geuꞈ nehˬ-euˬ meh.