2 Saˬmeuˬlaˆ 13 - Akha

Aˬmaˬnoˬ hawˇ-eu Taˬmaˬ

¹ Daˬbiˇ-euˬ aˬ li Aˬbaˇsaˬloˬ-aˬ, Taˬmaˬ lehˇ myahˇ-euˬ aˇ gʼehˇ muiˬ dui dui-eu dmˇ ma miˬ daꞈ tiˬ gʼaˬ jawˇ-eu meh. Aˬ ma yawˬ ma yawˬ-euˬ zaˬ pyeuꞈ-eu Aˬmaˬnoˬ lehˇ myahˇ-euˬ Daˬbiˇ-euˬ aˬ li tiˬ li-aˬ, aˬ yawꞈ-euˬ dmˇ ma kʼoeˇ gʼaˬ-ahˇ mawꞈ dui dui leˇ-eu meh.

² Aˬmaˬnoˬ-aˬ, aˬ yawꞈ-euˬ gʼawˇ mawˇ jawˇ saˇ maˬ doˆ-ehˇ pyeuꞈ-iˇ ngeh keuˆ ni, Taˬmaˬ-ahˇ mawꞈ leˇ sehꞈ taˬ-euˬ meh. Aˬ jeˬ miˇ neh ehˇ naˇ, Taˬmaˬ-aˬ, miˬ daꞈ daꞈ shuiꞈ tiˬ gʼaˬ pyeuꞈ-eu loꞈ-ehˇ, kʼaˬ dzeˇ zaˬ jawˇ gaˇ maˬ bi doˆ le ni bi jawˇ-euˬ miˇ neh, aˬ yawꞈ-ahˇ za ni jahˇ-eu maˬ awˬ-a.

³ Daˬbiˇ-euˬ aˇ doˆ Shaˬmahˇ-euˬ aˬ li Yawˇnaˬdehˇ lehˇ myahˇ-euˬ Aˬmaˬnoˬ-euˬ cawˬ tiˬ gʼaˬ jawˇ-eu meh.

⁴ Aˬ yawꞈ-aˬ, gahˇ dui dui-eu tsawˇ haˬ tiˬ gʼaˬ meh. Aˬmaˬnoˬ-ahˇ Yawˇnaˬdehˇ ehˇ nehˬ-eu, “Nawˇ-aˬ, sahˬ paˬ zaˬ yo tiˬ gʼaˬ pyeuꞈ kʼawꞈ, nah doˆ le ngeh nyoeˬ kʼeuˇ ni tehꞈ-ehˇ jawˇ-eu nga tawˇ. Aˬ jeˬ gʼeh ta.” Aˬmaˬnoˬ ehˇ-eu, “Ngaˬ-euˬ mehˇ nmˇ Aˬbaˇsaˬloˬ-euˬ dmˇ ma Taˬmaˬ-ahˇ ngaˇ mawꞈ dui dui leˇ nya.”

⁵ Aˬmaˬnoˬ-ahˇ Yawˇnaˬdehˇ ehˇ nehˬ-eu, “Nawˇ pyaˬ-eu jahˇ geuꞈ-awˇ yuꞈ zaˇ-ahˇ yuꞈ leˇ-awˇ jawˇ-awˬ. Nawˬ da nawˬ-ahˇ haw laˇ naˇ, heu loꞈ-ehˇ ehˇ nehˬ-awˬ. ‘Ngaˬ-euˬ dmˇ ma Taˬmaˬ-ahˇ ngaˇ jawˇ gaˇ bi oe-awˇ, ngaˇ dzaˬ-eu tiˬ jeˬ paˬ bi jahˇ nehˬ le-awˬ. Ngaˇ mawˇ gaˇ aˬ yawꞈ-ahˇ dzaˇ bi jahˇ le-awˇ, aˬ yawꞈ-euˬ aˬ laꞈ neh ngaˬ-ahˇ bi dzaˬ le-awˬ’ lehˇ nawˬ da-ahˇ ehˇ nehˬ-awˬ tawˇ.”

⁶ Kʼoeˇ naˇ, Aˬmaˬnoˬ pyaˬ-eu jahˇ geuꞈ-awˇ, yuꞈ zaˇ-ahˇ yuꞈ leˇ-euˬ meh. Sahˬ paˬ Daˬbiˇ aˬ yawꞈ-ahˇ haw le ngeh, heu loꞈ-ehˇ ehˇ nehˬ-euˬ meh. “Taˬmaˬ-ahˇ heu gaˇ bi oe-awˇ, ngaˇ mawˇ gaˇ kaˬ muˇ bi jahˇ-awˇ, kaˬ muˇ kʼoeˇ aˬ yawꞈ yuˇ-awˇ ngaˬ-ahˇ bi dzaˬ le nehˬ laꞈ.”

⁷ Kʼoeˇ naˇ, sahˬ paˬ-euˬ hawˇ nymˇ laꞈ kʼoeˇ jawˇ luꞈ-eu Taˬmaˬ-ahˇ, “Nawˬ-euˬ aˬ mahˇ aˬ da Aˬmaˬnoˬ-euˬ nymˇ-ahˇ-iˇ-awˇ, dzaˇ ui cuiˆ jahˇ nehˬ-iˇ-awˬ” lehˇ, Daˬbiˇ tsaꞈ gʼeh-euˬ meh.

⁸ Aˬ yawꞈ-euˬ aˬ mahˇ aˬ da Aˬmaˬnoˬ-euˬ nymˇ-ahˇ Taˬmaˬ iˇ ngeh, Aˬmaˬnoˬ gʼaˬ yuꞈ zaˇ-ahˇ yuꞈ luꞈ gaˇ ya mawˇ-euˬ meh. Aˬ yawꞈ kaˬ muˇ yaw jmˬ lehˬ hmˬ-awˇ, Aˬmaˬnoˬ mawˇ gaˇ kaˬ muˇ jahˇ nehˬ-euˬ meh.

⁹ Kʼoeˇ naˇ, mui za laꞈ kʼoeˇ laˆ jaꞈ-euˬ kaˬ muˇ kʼoeˇ, Aˬmaˬnoˬ-ahˇ bi dzaˬ-eu lehˇ aˬ yawꞈ yuˇ doˆ nehˬ-euˬ meh. Ehˇ kʼawꞈ, Aˬmaˬnoˬ maˬ dzaˬ-ehˇ, “Tsawˇ haˬ yawˬ gʼaˬ na luꞈ laꞈ nyiˇ bi doˆ-iˇ jiˇ-awˬ” lehˇ ehˇ-eu miˇ neh, kʼoeˇ gaˇ jawˇ-eu tsawˇ haˬ dawˬ tawˆ luꞈ laꞈ nyiˇ doˆ-iˇ jiˇ-euˬ meh.

¹⁰ Kʼoeˇ ngeh, “Kaˬ muˇ teu ngaˬ-euˬ yuꞈ zaˇ-ahˇ yuˇ laꞈ-awˇ, nawˬ-euˬ aˬ laꞈ neh ngaˬ-ahˇ bi dzaˬ laꞈ-awˬ” lehˇ, Taˬmaˬ-ahˇ Aˬmaˬnoˬ ehˇ nehˬ-euˬ meh. Taˬmaˬ gʼeh, kaˬ muˇ kʼoeˇ yuˇ-awˇ, Aˬmaˬnoˬ yuꞈ gaˇ iˇ-euˬ meh.

¹¹ Aˬ yawꞈ kaˬ muˇ kʼoeˇ ciˬ gʼeh nehˬ ngeh, Aˬmaˬnoˬ aˬ yawꞈ-ahˇ gʼeu tehˬ-awˇ, “Ngaˬ nehˬ-ehˇ yuꞈ laˇ-awˬ” lehˇ ehˇ nehˬ-euˬ meh.

¹² Taˬmaˬ ehˇ-eu, “Taˬ gʼeh. Heu loꞈ-ehˇ gʼeh-eu jawꞈ dui dui-eu jeˬ taˬ mˇ nehˬ laꞈ. Heu-aˬ, bahˬ dui dui-eu tiˬ jeˬ meh.

¹³ Ngaˇ aˬ joˆ-ehˇ jahˇ-awˇ, aˬ cawˬ-eu mehˬ shi myaˆ pyawˬ ciˬ doˆ saˇ nmˇ. Nawˇ kʼawꞈ Iˇsaˬleˬlaˆ miˇ kʼahˬ laꞈ kʼoeˇ daˬ ga dui dui tehꞈ-a. Sahˬpaˬ-ahˇ yaw muiˬ paˬ-ehˇ ehˇ mehˬ nehˬ naˇ, nawˇ ngaˬ-ahˇ ya sheuˬ-eu yaw duˬ baw tehꞈ-a.”

¹⁴ Ehˇ kʼawꞈ, Aˬmaˬnoˬ gʼaˬ maˬ naˇ haˬ-ehˇ, Taˬmaˬ naˆ maˬ tseˇ aˬ yawꞈ gʼaˬ kʼaˆ dzehˬ-eu miˇ neh, Taˬmaˬ-ahˇ dawꞈ-awˇ, yehˬ bawˬ-ehˇ gʼeh nehˬ-euˬ meh.

¹⁵ Kʼoeˇ loꞈ-ehˇ gʼeh gʼaˬ ngeh jawˇ, Taˬmaˬ-ahˇ Aˬmaˬnoˬ tiˬ pawꞈ-iˬ maˬ haw nahˇ-a. Yaw beh gaˬ-euˬ naˆ maˬ tseˇ, nymˬ-mˇ bye-eu kʼoeˇ aˇ dzehˬ dzeuˇ-eu miˇ neh, “Doˆ-iˇ-awˬ” lehˇ teh-euˬ meh.

¹⁶ Taˬmaˬ ehˇ-eu, “Ngaˇ maˬ doˆ-iˇ. Nymˬ-mˇ nawˇ ngaˬ-ahˇ teh dzeh-eu heu-aˬ, uˬ soe nawˇ ngaˬ-ahˇ yehˬ bawˬ-ehˇ gʼeh nehˬ laꞈ-euˬ naˆ maˬ tseˇ iˬ baˇ huiˬ dzehˬ-eu meh.”

¹⁷ Ehˇ kʼawꞈ, Taˬmaˬ-euˬ ehˇ dawˬ-ahˇ Aˬmaˬnoˬ maˬ naˇ haˬ-a. Aˬ yawꞈ-euˬ zaˬ kʼaˆ tiˬ gʼaˬ-ahˇ Aˬmaˬnoˬ kuˇ-awˇ, “Zaˬ miˬ zaˬ heu gʼaˬ-ahˇ ngaˇ mawˇ gaˇ dzuˇ dzuˇ-ehˇ maˬ bi jawˇ ni, laꞈ nyiˇ tsahˇ dzeh ha-iˇ-awˇ, laˇ gʼoˆ kaꞈ kaꞈ tehˬ-awˬ” lehˇ ehˇ nehˬ-euˬ meh.

¹⁸ Zaˬ kʼaˆ kʼoeˇ gʼaˬ Taˬmaˬ-ahˇ laꞈ nyiˇ gʼeu doˆ gʼeh-awˇ, laˇ gʼoˆ kaꞈ kaꞈ tehˬ-euˬ meh. Taˬmaˬ-aˬ, kʼoeˇ ngeh ziˇ-ahˇ sahˬ paˬ zaˬ miˬ miˬ daꞈ deuˬ dm-eu, myawˬ guˇ gʼawˬ mya ni guꞈ tsoꞈ taˬ-euˬ pehˇ kʼahˬ dm luꞈ-eu meh.

¹⁹ Aˬ yawꞈ-euˬ uˬ duˬ-ahˇ kʼaˬ lehˇ tawˆ daˆ-awˇ, aˬ yawꞈ-euˬ pehˇ kʼahˬ gʼeu pyaˬ gʼeu shaˇ-awˇ, aˬ yawꞈ-euˬ myaˆ pyawˬ-ahˇ laꞈ kʼawˆ kʼawˆ kaˬ-eu laꞈ kʼoeˇ, ngoeˇ ngoeˇ-ehˇ iˇ gʼeh-euˬ meh.

²⁰ Taˬmaˬ-euˬ aˬ mahˇ aˬ da Aˬbaˇsaˬloˬ Taˬmaˬ-ahˇ mawˇ-awˇ, “Nawˬ-euˬ aˬ mahˇ aˬ da Aˬmaˬnoˬ nawˬ-ahˇ yehˬ bawˬ sehˇ lu-ehˇ gʼeh nehˬ laꞈ taˬ loˇ. Ngaˬ-euˬ dmˇ ma-oˇ, kʼoeˇ loꞈ-ehˇ pyeuꞈ laˇ-euˬ baˬ da neh aˇ dzehˬ-ehˇ taˬ noeˬ shaˬ. Aˬ yawꞈ nawˬ-euˬ aˬ mahˇ aˬ da pyeuꞈ-eu miˇ neh, gaˇ kawˆ heu tiˬ gʼaˬ-ahˇ-iˬ maˬ ja nehˬ ni jawˇ-awˬ” lehˇ ehˇ nehˬ-euˬ meh. Taˬmaˬ-aˬ, cawˬ maˬ baw ni Aˬbaˇsaˬloˬ-euˬ nymˇ-ahˇ nui ma shaˬ zahˬ mˇ mˇ-ehˇ jawˇ-euˬ meh.

²¹ Kʼoeˇ loꞈ-ehˇ pyeuꞈ laˇ-euˬ gaˇ kawˆ sahˬ paˬ Daˬbiˇ-ahˇ gaˬ leˇ ngeh nui ma pehˇ dui dui-euˬ meh.

²² Aˬbaˇsaˬloˬ gʼaˬ gʼeh, aˬ yawꞈ-euˬ dmˇ ma tsi tsi ni gʼeh-eu Taˬmaˬ-ahˇ, Aˬmaˬnoˬ neh kʼoeˇ loꞈ-ehˇ jahˇ nehˬ-euˬ miˇ neh, Aˬmaˬnoˬ-ahˇ bye dui dui-awˇ, dawˬ maˬ ngehˬ cawˬ ni jawˇ-euˬ meh.

Aˬbaˇsaˬloˬ neh Aˬmaˬnoˬ-ahˇ laꞈ poˆ poˆ kʼoꞈ nehˬ-euˬ

²³ Nyiˬ kʼoꞈ myahˇ laˇ ngeh, Aˬbaˇsaˬloˬ-aˬ, Eˇpaˬleˬ meuˬ dawˬ peh Baˬlaˇhaˬzoˬ pu-ahˇ aˬ yawꞈ-euˬ yawˇ deuˬ-ahˇ caꞈ hm tehˬ luꞈ-awˇ, sahˬ paˬ-euˬ aˬ li kʼaˇ ngeuˇ-eu dawˬ tawˆ luꞈ kʼoeˇ gaˇ oe-eu gʼaˇ duˬ aˬ yawꞈ kuˇ-euˬ meh.

²⁴ Sahˬ paˬ Daˬbiˇ jawˇ gaˇ aˬ yawꞈ le-awˇ, “Sahˬ paˬ-oˇ, ngaˬ-euˬ yawˇ deuˬ-ahˇ ngaˇ caꞈ hm tehˬ luꞈ-eu ma. Nawˇ hawˇ-eu nawˬ-euˬ gaˇ mˇ-eu yaw huiˬ yaw mahˇ deuˬ oe-awˇ, ngaˬ nehˬ-ehˇ bawˬ-iˬ gʼeh le-awˬ” lehˇ ehˇ nehˬ-euˬ meh.

²⁵ “Ngaˬ li-oˇ, ngaˇ maˬ paˇ oe ma. Nga maꞈ dawˬ tawˆ luꞈ oe naˇ, nawˬ-euˬ gʼaˇ duˬ yaw shaˬ nga” lehˇ, Aˬbaˇsaˬloˬ-ahˇ sahˬ paˬ ehˇ nehˬ-euˬ meh. Aˬbaˇsaˬloˬ kuˇ dui dui kʼawꞈ, aˬ yawꞈ maˬ iˇ nehˬ ni, Aˬbaˇsaˬloˬ-ahˇ bi gʼoꞈ-iˇ-euˬ meh.

²⁶ “Toˆ-ehˇ maˇ-iˬ, ngaˬ-euˬ mehˇ nmˇ Aˬmaˬnoˬ-ahˇ bi oe ma loˇ” lehˇ Aˬbaˇsaˬloˬ ehˇ ngeh, “Aˬ jeˬ baˬ da neh Aˬmaˬnoˬ-ahˇ ya bi oe ta” lehˇ sahˬ paˬ ehˇ-eu meh.

²⁷ Ehˇ kʼawꞈ, Aˬbaˇsaˬloˬ gʼaˬ tiˬ kʼehˬ maˬ taˬ ni ehˇ-eu miˇ neh, Aˬmaˬnoˬ hawˇ-eu aˬ yawꞈ-euˬ aˬ li dawˬ tawˆ luꞈ-ahˇ, Aˬbaˇsaˬloˬ-euˬ mehˬ nah bi iˇ gʼeh-euˬ meh. Kʼoeˇ naˇ, Aˬbaˇsaˬloˬ neh sahˬ paˬ deuˬ dzaˬ-eu dzaˬ byawˇ byawˇ ma lehˬ hmˬ-euˬ meh.

²⁸ Aˬbaˇsaˬloˬ-aˬ, aˬ yawꞈ-euˬ zaˬ kʼaˆ deuˬ-ahˇ heu loꞈ-ehˇ mehˬ gahˇ taˬ-euˬ meh. “Aˬmaˬnoˬ gʼaˬ aˬ geu ngeh dzaˬ yehꞈ dawˇ yehꞈ nga loˇ lehˇ yaw muiˬ paˬ-ehˇ haw coeˇ taˬ-awˇ, aˬ yawꞈ-ahˇ sehꞈ-awˬ lehˇ ngaˇ ehˇ naˇ, tiˬ poˆ tehꞈ-ehˇ sehꞈ-awˬ. Tiˬ jeˬ-iˬ taˬ guˆ. Yawˬ jeˬ na luꞈ ngaˇ kamˬ ma. Maˬ nyi naˬ ni nui ma yaw tsehˆ tsehˆ-ehˇ noeˬ-awˇ mˇ-awˬ.”

²⁹ Aˬbaˇsaˬloˬ neh mehˬ nehˬ taˬ-euˬ loꞈ-ehˇ, aˬ yawꞈ-euˬ zaˬ kʼaˆ deuˬ neh Aˬmaˬnoˬ-ahˇ sehꞈ-euˬ meh. Kʼoeˇ ngeh, Daˬbiˇ-euˬ aˬ li dawˬ tawˆ luꞈ, yawˬ ha-euˬ mahˬ tahˬ laˆ-ahˇ yawˬ ha biˬ dziˬ-awˇ cehˆ jiˇ-euˬ meh.

³⁰ Aˬ yawꞈ maꞈ iˇ kahˇ-ahˇ gʼoꞈ leˇ luꞈ ngeh, “Nawˬ-euˬ aˬ li dawˬ tawˆ luꞈ Aˬbaˇsaˬloˬ neh sehꞈ jiˇ-awˇ, tiˬ gʼaˬ-iˬ maˬ paˇ jawˇ meh” lehˇ, Daˬbiˇ-ahˇ aˬ cawˬ tsaꞈ gaˬ laˇ-euˬ meh.

³¹ Kʼoeˇ ngeh, sahˬ paˬ Daˬbiˇ tsawˬ tuˇ laˇ-awˇ, noeˬ shaˬ dui dui-eu laꞈ kʼoeˇ aˬ yawꞈ-euˬ mehˬ tsoeˬ gʼeu pyaˬ gʼeu shaˇ-awˇ, miˇ tsa joe-euˬ meh. Aˬ yawꞈ nehˬ-ehˇ jawˇ luꞈ-eu zaˬ kʼaˆ deuˬ kʼawꞈ, yawˬ ha-euˬ mehˬ tsoeˬ yawˬ ha gʼeu pyaˬ-euˬ meh.

³² Ehˇ kʼawꞈ, Daˬbiˇ-euˬ aˇ doˆ Shaˬmahˇ-euˬ aˬ li Yawˇnaˬdehˇ ehˇ-eu, “Sahˬ paˬ-oˇ, nawˬ-euˬ aˬ li dawˬ tawˆ luꞈ-ahˇ maˬ sehꞈ-aˬ. Aˬmaˬnoˬ tiˬ gʼaˬ tehꞈ-ehˇ bi sehꞈ-euˬ meh. Aˬbaˇsaˬloˬ-euˬ dmˇ ma Taˬmaˬ-ahˇ Aˬmaˬnoˬ neh yehˬ bawˬ-ehˇ gʼeh nehˬ-euˬ miˇ neh, yaw beh neh Aˬmaˬnoˬ-ahˇ Aˬbaˇsaˬloˬ kʼoeˇ loꞈ-ehˇ jahˇ kʼoꞈ nehˬ mawꞈ-eu shaˬ-eu meh.

³³ Kʼoeˇ miˇ neh, nawˬ-euˬ aˬ li dawˬ tawˆ luꞈ bi sehꞈ byoˆ jiˇ mehˬ lehˇ aˬ cawˬ ehˇ gaˇ taˬ jah. Aˬmaˬnoˬ tiˬ gʼaˬ shiˇ-euˬ tehꞈ meh.”

³⁴ Kʼoeˇ ngeh jawˇ, Aˬbaˇsaˬloˬ cehˆ byoˆ-euˬ meh. Kʼoeˇ naˇ, Hawˇloˬneˬ pu paw neh oe-euˬ gaˇ ma caw caw-ehˇ, gawˬ duˇ-ahˇ tsawˇ haˬ tiˬ deuˬ zaꞈ ka le gaˇ, loꞈ luꞈ-eu yehˇ tiˬ gʼaˬ ya mawˇ-awˇ, sahˬ paˬ jawˇ gaˇ le-awˇ, aˬ yawꞈ neh kʼaˇ ya mawˇ-euˬ loꞈ-ehˇ ehˇ gaˬ leˇ-euˬ meh.

³⁵ “Uˬ soe ngaˬ neh ehˇ-euˬ loꞈ-ehˇ, tsawˇ haˬ kʼoeˇ deuˬ-aˬ, iˇ kahˇ gʼoꞈ le luꞈ-eu nawˬ-euˬ aˬ li deuˬ meh” lehˇ, Daˬbiˇ-ahˇ Yawˇnaˬdehˇ ehˇ nehˬ-euˬ meh.

³⁶ Aˬ yawꞈ kʼoeˇ loꞈ-ehˇ ehˇ gʼaˬ-euˬ tiˬ dehˬ, Daˬbiˇ-euˬ aˬ li deuˬ gʼoꞈ uˇ le-euˬ meh. Aˬ yawꞈ maꞈ ngoeˇ-awˇ, Daˬbiˇ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ kʼawꞈ, yaw kʼaˆ-ehˇ ngoeˇ-euˬ meh.

³⁷ Aˬbaˇsaˬloˬ-aˬ, Aˬmiˇhuˆ-euˬ aˬ li pyeuꞈ-eu Geˬshuˇlaˆ sahˬ paˬ Taˬlaˬmehˇ jawˇ gaˇ cehˆ jawˇ-iˇ-euˬ meh. Ehˇ kʼawꞈ, sahˬ paˬ Daˬbiˇ-aˬ, aˬ yawꞈ-euˬ aˬ li Aˬmaˬnoˬ-ahˇ noeˬ-eu laꞈ kʼoeˇ, yawˬ nah na luꞈ ngoeˇ ngoeˇ-ehˇ jawˇ-euˬ meh.

³⁸ Aˬbaˇsaˬloˬ-aˬ, Geˬshuˇlaˆ meuˬ-ahˇ cehˆ leˇ-awˇ, smˇ kʼoꞈ jawˇ-euˬ meh.

³⁹ Sahˬ paˬ Daˬbiˇ-euˬ nui ma laꞈ kʼoeˇ, Aˬmaˬnoˬ-ahˇ noeˬ-eu byoˆ-iˇ-awˇ, Aˬbaˇsaˬloˬ-ahˇ noeˬ-eu maˬ jawˇ tehˬ coeˇ-a.