2 Saˬmeuˬlaˆ 1 - Akha

Sawˇluˆ shiˇ-euˬ gaˇ kawˆ Daˬbiˇ ya siˬ-euˬ

¹ Sawˇluˆ shiˇ dzeuˇ gʼaˬ ngeh, Aˬmaˬlehˇ tsawˇ haˬ deuˬ-ahˇ Daˬbiˇ guiˇ deuˆ gʼaˬ-awˇ gʼoꞈ keuˆ laˇ-awˇ, Ziˇkaˬlehˆ meuˬ-ahˇ nyiˬ nah jawˇ-euˬ meh.

² Yawˬ nah yawˬ, Sawˇluˆ-euˬ taˆ-ahˇ jawˇ-eu zaˬ guˬ tiˬ gʼaˬ aˬ yawꞈ jawˇ gaˇ oe keuˆ-euˬ meh. Zaˬ guˬ kʼoeˇ gʼaˬ yawˬ ha-euˬ mehˬ tsoeˬ cehˬ pyaˬ cehˬ shaˇ-awˇ, uˬ duˬ-ahˇ miˇ tsaˬ jehˆ daˆ taˬ-euˬ laꞈ kʼoeˇ, noeˬ shaˬ dui dui-eu gaˇ kawˆ bi siˬ bi mawˇ le-euˬ meh. Daˬbiˇ jawˇ gaˇ aˬ yawꞈ le-awˇ, miˇ tsa awˆ byaˆ-eu laꞈ kʼoeˇ yaw zeu baw nehˬ-euˬ meh.

³ “Nawˇ aˬ geu gaˇ neh oe teˬ” lehˇ, aˬ yawꞈ-ahˇ Daˬbiˇ naˇ haˬ ngeh, “Iˇsaˬleˬlaˆ taˆ laꞈ kʼoeˇ neh cehˆ buˬ-awˇ oe-euˬ ma” lehˇ, aˬ yawꞈ ehˇ kʼoꞈ nehˬ-euˬ meh.

⁴ “Aˬ joˆ-ehˇ pyeuꞈ laˇ-euˬ gaˇ kawˆ ngaˬ-ahˇ dzawˇ nehˬ laꞈ sheˇ” lehˇ Daˬbiˇ naˇ haˬ ngeh, zaˬ guˬ kʼoeˇ gʼaˬ ehˇ-eu, “Aˬ dui maꞈ-euˬ guiˇ maꞈ deuˬ guiˇ deuˆ luꞈ gaˇ neh cehˆ byaˆ jiˇ-awˇ, aˬ dui maꞈ-euˬ tsawˇ haˬ gʼawˬ mya gʼaˬ aˬ cawˬ neh bi sehꞈ-euˬ meh. Sawˇluˆ hawˇ-eu Yawˇnaˆshaˬ aˬ nyaꞈ da zaˬ kʼawꞈ, aˬ cawˬ neh bi sehꞈ-euˬ meh.”

⁵ Daˬbiˇ ehˇ-eu, “Sawˇluˆ hawˇ-eu Yawˇnaˆshaˬ aˬ nyaꞈ da zaˬ shiˇ-euˬ meh lehˇ nawˇ aˬ diˇ siˬ duˬ ma loˇ.”

⁶ Aˬ yawꞈ ehˇ-eu, “Giˇlaˬbaoˬ gawˬ jawˬ-ahˇ ngaˇ cehˆ keuˆ ngeh, Sawˇluˆ aˬ yawꞈ-euˬ gawˬ yoeˬ-ahˇ gʼoˆ toˆ shaˇ-awˇ yawꞈ luꞈ-awˇ, muiˇ-eu deuˬ-euˬ mahˬ laˆ lawˬ deuˬ hawˇ-eu mahˬ dziˬ luꞈ-eu yehˇ deuˬ aˬ yawꞈ jawˇ gaˇ jiˆ peh laˇ luꞈ gaˇ ya mawˇ-euˬ ma.

⁷ Kʼoeˇ ngeh, aˬ yawꞈ ngaˇ jawˇ paw ciˬ pyawˇ leꞈ-awˇ, ngaˬ-ahˇ haw mawˇ-awˇ kuˇ-eu miˇ neh, ngaˇ gʼeh aˬ yawꞈ-ahˇ guˇ cawˬ nehˬ-euˬ ma.

⁸ ‘Nawˇ aˬ suˇ gʼaˬ te’ lehˇ aˬ yawꞈ ngaˬ-ahˇ naˇ haˬ ngeh, ‘Ngaˇ Aˬmaˬlehˇ tsawˇ haˬ ma’ lehˇ ehˇ kʼoꞈ nehˬ-euˬ ma.

⁹ Kʼoeˇ naˇ, ‘Laˇ-awˇ ngaˬ-ahˇ sehꞈ laˇ sheˇ. Ngaˇ aˇ dzehˬ bi deuˆ tahˬ dzeuˇ-euˬ miˇ neh, maˬ paˇ dehꞈ-iˇ coeˇ miˇ-a’ lehˇ ehˇ-eu meh.

¹⁰ Aˬ jeˬ lehˇ ehˇ kʼawꞈ, aˬ yawꞈ coˬ dzeh-iˇ-eu nehˬ-ehˇ shiˇ tsehˆ-eu ngaˇ lehˇ siˬ duˬ-awˇ, le-awˇ aˬ yawꞈ-ahˇ sehꞈ-euˬ ma. Kʼoeˇ naˇ, aˬ yawꞈ kʼoˆ luꞈ-eu sahˬ paˬ uˬ kʼoˆ hawˇ-eu aˬ yawꞈ duꞈ luꞈ-eu laꞈ duꞈ lehˆ doˆ-awˇ, nawˇ jawˇ gaˇ yuˇ laꞈ-euˬ ma.”

¹¹ Kʼoeˇ ngeh, Daˬbiˇ noeˬ shaˬ dui dui-eu laꞈ kʼoeˇ, yawˬ ha dm luꞈ-eu mehˬ tsoeˬ cehˬ pyaˬ-euˬ meh. Aˬ yawꞈ-euˬ tsawˇ haˬ dawˬ tawˆ luꞈ kʼawꞈ, kʼoeˇ loꞈ-ehˇ jahˇ-euˬ meh.

¹² Sawˇluˆ gʼaˇ duˬ maˬ ehˇ, Yawˇnaˆshaˬ gʼaˇ duˬ maˬ ehˇ, Sahˬpaˬ Miˬyehˇ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ gʼaˇ duˬ maˬ ehˇ, aˬ yawꞈ maꞈ noeˬ shaˬ-awˇ tsawˇ ngoeˇ ngoeˇ-eu laꞈ kʼoeˇ, uˬ ciꞈ paw keuˆ ni maˬ dzaˬ maˬ dawˇ ni jawˇ-euˬ meh. Aˬ jeˬ miˇ neh ehˇ naˇ, guiˇ deuˆ gaˇ tsawˇ haˬ gʼawˬ mya ni bi deuˆ sehꞈ-euˬ meh.

¹³ Kʼoeˇ naˇ, dawˬ tsaꞈ tsaꞈ gaˬ le-euˬ zaˬ guˬ kʼoeˇ gʼaˬ-ahˇ, “Nawˇ aˬ gaˇ jawˇ te” lehˇ, Daˬbiˇ naˇ haˬ ngeh, “Ngaˇ-aˬ, naw maꞈ-euˬ miˇ kʼahˬ laꞈ kʼoeˇ jawˇ luꞈ-eu Aˬmaˬlehˇ tsawˇ haˬ ma” lehˇ ehˇ-eu meh.

¹⁴ “Sahˬpaˬ Miˬyehˇ neh tseˇ doˆ taˬ-euˬ sahˬ paˬ tiˬ gʼaˬ-ahˇ nawˇ aˬ joˆ-ehˇ sehꞈ peuˬ-eu nya” lehˇ, zaˬ guˬ kʼoeˇ gʼaˬ-ahˇ Daˬbiˇ ehˇ nehˬ-euˬ meh.

¹⁵ Kʼoeˇ naˇ, Daˬbiˇ aˬ yawꞈ-euˬ tsawˇ haˬ tiˬ gʼaˬ-ahˇ kuˇ-awˇ, “Tsawˇ haˬ heu gʼaˬ-ahˇ sehꞈ-awˬ” lehˇ ehˇ nehˬ ngeh, Aˬmaˬlehˇ tsawˇ haˬ kʼoeˇ gʼaˬ-ahˇ sehꞈ-euˬ meh.

¹⁶ Aˬmaˬlehˇ tsawˇ haˬ kʼoeˇ gʼaˬ-ahˇ Daˬbiˇ ehˇ nehˬ-eu, “Nawˬ-euˬ kʼoeˇ taˆ heu loꞈ-ehˇ keuˆ le ni, nawˇ mˇ-euˬ meh. Sahˬpaˬ Miˬyehˇ neh tseˇ doˆ taˬ-eu sahˬ paˬ tiˬ gʼaˬ-ahˇ nawˬ neh sehꞈ-euˬ ma lehˇ nawˇ ehˇ doˆ-eu laꞈ kʼoeˇ, yawˬ ha kʼoeˇ taˆ shiˇ-eu jeˬ keuˆ le ni nawˇ saˇ kiˇ kamˬ-euˬ meh.”

Sawˇluˆ hawˇ-eu Yawˇnaˆshaˬ gʼaˇ duˬ Daˬbiˇ tsawˇ ngoeˇ ngoeˇ-euˬ

¹⁷ Daˬbiˇ heu loꞈ-ehˇ dawˬ caˇ caˇ-awˇ, Sawˇluˆ hawˇ-eu Yawˇnaˆshaˬ gʼaˇ duˬ tsawˇ ngoeˇ ngoeˇ-euˬ meh.

¹⁸ Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ caˇ dawˬ heu bymˇ caˇ nya laˇ ni ya mehˬ nehˬ meh lehˇ aˬ yawꞈ ehˇ-eu meh. (Jaˬshaˬ sahˬ boꞈ laꞈ kʼoeˇ, caˇ dawˬ heu bymˇ boꞈ ahˇ taˬ-euˬ meh.)

¹⁹ “Iˇsaˬleˬlaˆ nawˬ-euˬ kʼahˬ sehˇ, gawˬ jawˬ kʼoeˇ taˆ bi sehꞈ-euˬ meh. Baoˬ huiˬ dui dui-eu yehˇ kʼoeˇ deuˬ, aˬ joˆ-ehˇ bi sehꞈ byoˆ jiˇ taˬ.

²⁰ Gaˬ daˇ meuˬ-ahˇ taˬ ja gaˬ-iˇ. Aˬshaˇgaˬloˇ meuˬ-euˬ laꞈ kʼoeˇ, gaˇ ma doe ni taˬ dzawˇ gaˬ-iˇ. Kʼoeˇ loꞈ-ehˇ ja gaˬ dzawˇ gaˬ naˇ, Piˇliˇtiˆ lawˇ ciꞈ zaˬ deuˬ-euˬ, aˬ buˇ deuˬ laˬ kʼaˬ cehˇ tehꞈ-a.

²¹ Giˇlaˬbaoˬ gawˬ jawˬ deuˬ kʼoeˇ taˆ, uˬ yehˇ hawˇ-eu ceuˬ maˬ jaˆ-ehˇ, sahˬ lahˬ maˬ dehꞈ ni jaˆ luꞈ-uˇ. Aˬ jeˬ miˇ neh nga lehˇ ehˇ naˇ, baoˬ huiˬ dui dui-eu yehˇ pyeuꞈ-eu, Sawˇluˆ neh baꞈ-euˬ dehˬ daˬ duˬ, shmˇ kaw tehꞈ-ehˇ kʼoeˇ gaˇ ga-eu, aˇ naˆ ni daˬ ga-eu jeˬ nga.

²² Yawˇnaˆshaˬ-euˬ shiˬ mehꞈ-eu kaˆ, tsawˇ haˬ sehꞈ dehˆ-euˬ maˬ baw-ehˇ, Sawˇluˆ-euˬ guiˇ deuˆ-eu mi cehˇ, shaˬ jiˇ dzaˬ dehˆ-euˬ maˬ baw-a.

²³ Sawˇluˆ hawˇ-eu Yawˇnaˆshaˬ-ahˇ, gaˬ dui dui nya gʼoeˇ dui dui nya. Aˬ nyaꞈ dehꞈ ngeh maˬ gʼawˬ-iˇ-ehˇ, shiˇ ngeh kʼawꞈ maˬ gʼawˬ-iˇ kʼmˬ-aˇ. Kʼaˬ dzeˇ dzeˇ ma maˬ tseˇ kawˇ-awˇ, aˇ laˬ jaˬ shiˇ maˬ tseˇ kʼaˆ meh.

²⁴ Iˇsaˬleˬlaˆ aˬ buˇ deuˬ-oˇ, Sawˇluˆ gʼaˇduˬ tsawˇngoeˇngoeˇ-awˬ. Aˇ poeˬ kʼaˆ-eu paˇ neˇ mehˬ tsoeˬ, aˬ yawꞈ naw maꞈ-ahˇ bi dm-awˇ, shuiˇ neh jahˇ taˬ-euˬ myawˬ guˇ deuˬ, naw maꞈ-ahˇ bi geuꞈ laꞈ-euˬ meh.

²⁵ Nui ma kʼaˬ dui dui-eu yehˇ deuˬ, guiˇ deuˆ luꞈ ngeh bi sehꞈ-euˬ meh. Gawˬ jawˬ yaw goˇ jaˆ-eu tsahˇ-ahˇ, Yawˇnaˆshaˬ shiˇ-awˇ ga-eu meh.

²⁶ Ngaˬ-euˬ mehˇ nmˇ Yawˇnaˆshaˬ-oˇ, nawˬ-ahˇ noeˬ-eu maˬ jiˇ leˇnya. Ngaˬ-euˬ dawˬ peh nawˇ jawˇ luꞈ ngeh, ngaˇ laˬ kʼaˬ cehˇ dui dui-euˬ ma. Nawˬ neh ngaˬ-ahˇ gaˬ-euˬ kʼoeˇ-aˬ, zaˬ miˬ zaˬ gaˬ-eu naˆ maˬtseˇ, maˬ ehˇ jiˇ coeˇ ni myaˬ-eu meh.

²⁷ Kʼaˬ duˬ ni gʼeh-eu yehˇ kʼoeˇ deuˬ, guiˇ deuˆ gaˇ bi sehꞈ byoˆ jiˇ-awˇ, guiˇ deuˆ gaˇ zmˬ-euˬ keu ka deuˬ, cawˆ jiˇ-awˇ maˬ paˇ zmˬ nya meh.”