2 Sahˬpaˬ 9 - Akha

Yeˬhuˇ-ahˇ Iˇsaˬleˬlaˆ miˇ kʼahˬ-euˬ sahˬ paˬ ka nehˬ-euˬ

¹ Aˇ yamˬ kʼoeˇ yamˬ laꞈ kʼoeˇ, Miˬyehˇ gʼaˇ duˬ ngehˬ dah-eu zaˬ guˬ tiˬ gʼaˬ-ahˇ Eˇliˇshehˇ kuˇ-awˇ, heu loꞈ-ehˇ ehˇ nehˬ-euˬ meh. “Lehˬ hmˬ-awˇ Giˇlaˆ miˇ kʼahˬ Laˬmoˆ meuˬ-ahˇ le-awˬ. Saˬ loˬ tsiˇ ciˬ cuˇ heu siˬ kʼawꞈ pi gʼeh-awˬ.

² Nawˇ kʼoeˇ gaˇ le keuˆ naˇ, Nmˇshiˇ-euˬ oeˬ paˬ pyeuꞈ-eu Yeˬhawˇshaˬpaˇ-euˬ aˬ li Yeˬhuˇ-ahˇ poˆ mawˇ-awˇ, aˬ yawꞈ-euˬ cawˬ deuˬ nehˬ-ehˇ sheuˬ gʼawˬ-awˇ, ciˬ cuˇ ni gʼeh-eu kuˆ lawˆ tiˬ lawˆ-ahˇ sheuˬ ahˇ gʼeh-awˬ.

³ Aˬ yawˬ-euˬ uˬ duˬ-ahˇ saˬ loˬ tsiˇ heu shehˆ daˆ nehˬ-awˇ, ‘Ngaˇ nawˬ-ahˇ Iˇsaˬleˬlaˆ sahˬ paˬ ka nehˬ-eu ma lehˇ, Sahˬpaˬ Miˬyehˇ ehˇ-eu meh’ lehˇ ehˇ nehˬ-awˬ. Kʼoeˇ naˇ, yaw kawˇ-ehˇ gʼoꞈ le-awˬ.”

⁴ Kʼoeˇ ngeh, Miˬyehˇ gʼaˇ duˬ ngehˬ dah-eu zaˬ guˬ kʼoeˇ gʼaˬ, Giˇlaˆ miˇ kʼahˬ Laˬmoˆ meuˬ-ahˇ le-euˬ meh.

⁵ Aˬ yawꞈ kʼoeˇ gaˇ le keuˆ ngeh, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ uiˬ leˇ-awˇ jawˇ gaˇ ya mawˇ-awˇ, “Yaw huiˬ yaw mahˇ gʼaˬ-oˇ, ngaˇ nawˬ-ahˇ tsaꞈ gaˬ paˬ-ehˇ gʼeh-eu jeˬ jaˆ-eu ma” lehˇ ehˇ nehˬ-euˬ meh. “Nga maꞈ heu myaˆ ni jawˇ gaˇ aˬ geu gʼaˬ-ahˇ nawˇ ehˇ te” lehˇ, Yeˬhuˇ ehˇ ngeh, “Nawˬ-ahˇ ehˇ-eu ma” lehˇ aˬ yawꞈ ehˇ kʼoꞈ nehˬ-euˬ meh.

⁶ Kʼoeˇ naˇ, aˬ yawꞈ nyaꞈ-ehˇ kuˆ lawˆ tiˬ lawˆ-ahˇ uˇ leˇ-awˇ, Miˬyehˇ gʼaˇ duˬ ngehˬ dah-eu zaˬ guˬ kʼoeˇ gʼaˬ Yeˬhuˇ-euˬ uˬ duˬ-ahˇ tsiˇ shehˆ daˆ nehˬ-awˇ ehˇ-eu, “Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ kʼoeˇ taˆ, ngaˇ nawˬ-ahˇ sahˬ paˬ ka nehˬ-eu ma.

⁷ Ngaˬ-euˬ gʼaˇ duˬ ngehˬ dah-eu deuˬ hawˇ-eu ngaˬ-euˬ zaˬ kʼaˆ deuˬ-ahˇ sehꞈ-euˬ gʼaˬ pyeuꞈ-eu Yeˬzaˬbeˬlaˇ-ahˇ ngaˇ paˇ kʼehˬ poˆ nehˬ-eu gʼaˇ duˬ, Aˬhaˆ-euˬ aˬ li pyeuꞈ-eu nawˬ-euˬ sahˬ paˬ-ahˇ nawˇ ya sehꞈ meh.

⁸ Aˬhaˆ-euˬ nymˇ jiˇ hawˇ-eu aˬ yawꞈ-euˬ zaˬ deuˬ uˆ deuˬ dawˬ tawˆ luꞈ ya bi shiˇ jiˇ meh. Aˬ yawꞈ-euˬ nymˇ jiˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ, huiˬ zaˬ nyiˇ zaˬ maˬ tseˇ ni ngaˇ sehꞈ jiˇ-eu lehˇ gʼeh-eu ma.

⁹ Iˇsaˬleˬlaˆ sahˬ paˬ Yeˬyawˇbamˬ-euˬ nymˇ jiˇ hawˇ-eu, Iˇsaˬleˬlaˆ sahˬ paˬ Baˬshaˬ-euˬ nymˇ jiˇ kʼoeˇ taˆ ngaˬ neh jahˇ nehˬ-euˬ loꞈ-ehˇ, aˬ yawꞈ-euˬ nymˇ jiˇ-ahˇ jahˇ nehˬ ma.

¹⁰ Yeˬzaˬbeˬlaˇ-ahˇ baꞈ pahˬ nehˬ-eu gʼaˬ maˬ jawˇ ni, Yeˬzaˬleˬlaˇ meuˬ dawˬ peh aˬ kuiˬ neh bi dzaˬ jiˇ tehꞈ-a’ lehˇ ehˇ-eu meh.” Miˬyehˇ gʼaˇ duˬ ngehˬ dah-eu zaˬ guˬ kʼoeˇ gʼaˬ-aˬ, kʼoeˇ loꞈ-ehˇ ehˇ gʼaˬ naˇ doˆ-iˇ-awˇ, cehˆ byoˆ-euˬ meh.

¹¹ Aˬ yawꞈ-euˬ cawˬ yaw huiˬ yaw mahˇ kʼoeˇ deuˬ jawˇ gaˇ Yeˬhuˇ gʼoꞈ leˇ ngeh, “Aˬ jeˬ gʼeh ta. Tsawˇ haˬ kʼoeˇ gʼaˬ nawˬ-ahˇ aˬ jeˬ ehˇ laˇ taˬ” lehˇ aˬ yawꞈ-ahˇ naˇ haˬ-euˬ meh. “Tsawˇ haˬ kʼoeˇ gʼaˬ aˬ jeˬ ehˇ-eu naw maꞈ siˬ nya meh” lehˇ aˬ yawꞈ ehˇ kʼoꞈ nehˬ-euˬ meh.

¹² “Nga maꞈ maˬ siˬ nya nya, Nga maꞈ-ahˇ tiˬ poˆ ehˇ nehˬ laꞈ sheˇ” lehˇ aˬ yawꞈ maꞈ tiˬ poˆ paˇ naˇ haˬ ngeh, “Ngaˇ nawˬ-ahˇ Iˇsaˬleˬlaˆ sahˬ paˬ ka nehˬ-eu ma lehˇ Sahˬpaˬ Miˬyehˇ ehˇ-eu gaˇ kawˆ, aˬ yawꞈ ngaˬ-ahˇ ehˇ gaˬ laˇ-euˬ meh” lehˇ, Yeˬhuˇ ehˇ kʼoꞈ nehˬ-euˬ meh.

¹³ Kʼoeˇ ngeh, yaw huiˬ yaw mahˇ kʼoeˇ deuˬ yawˬ ha-euˬ pehˇ kʼehˬ pehˇ mahˇ lehˆ-awˇ, Yeˬhuˇ bi yawꞈ-eu gʼaˇ duˬ dawˬ dzm uˬ gʼmˬ-ahˇ kʼawˬ-awˇ, daˇ heh baw-awˇ, “Yeˬhuˇ sahˬ paˬ pyeuꞈ-eu meh” lehˇ guˇ-euˬ meh.

Sahˬ paˬ Yoˇlamˬ-ahˇ Yeˬhuˇ neh sehꞈ-euˬ

¹⁴ Kʼoeˇ naˇ, Nmˇshiˇ-euˬ oeˬ paˬ pyeuꞈ-eu Yeˬhawˇshaˬpaˇ-euˬ aˬ li Yeˬhuˇ-aˬ, sahˬ paˬ Yoˇlamˬ-ahˇ puiˬ-euˬ meh. Kʼoeˇ ngeh yamˬ-ahˇ, Giˇlaˆ miˇ kʼahˬ-ahˇ jaˆ-eu Laˬmoˆ meuˬ kʼoeˇ meuˬ Suˇliˆ sahˬ paˬ Haˬzeˬlaˇ-euˬ laꞈ-ahˇ maˬ ya ahˇ leˇ ni, Yoˇlamˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ meuˬ kʼoeˇ meuˬ-ahˇ loꞈ piˇ luꞈ-eu meh.

¹⁵ Ehˇ kʼawꞈ, Suˇliˆ sahˬ paˬ Haˬzeˬlaˇ nehˬ-ehˇ deuˆ ceh ceh ngeh, Yoˇlamˬ-ahˇ Suˇliˆ tsawˇ haˬ deuˬ neh bi deuˆ tahˬ-awˇ, jawˇ saˇ doˆ laˇ ni Yeˬzaˬleˬlaˇ meuˬ-ahˇ gʼoꞈ jawˇ-iˇ-euˬ meh. Kʼoeˇ ngeh, Yeˬhuˇ-euˬ cawˬ yaw huiˬ yaw mahˇ kʼoeˇ deuˬ-ahˇ Yeˬhuˇ ehˇ nehˬ-eu, “Naw maꞈ ngaˇ jawˇ paw pyawˬ ma lehˇ ngeuˇ naˇ, tsawˇ haˬ tiˬ gʼaˬ-iˬ Laˬmoˆ meuˬ-ahˇ neh cehˆ doˆ-awˇ Yeˬzaˬleˬlaˇ meuˬ-ahˇ gaˇ kawˆ heu maˬ ya tsaꞈ gaˬ-iˇ ni, yaw kʼaˆ kʼaˆ-ehˇ yahˇ-awˬ.”

¹⁶ Kʼoeˇ naˇ, Yeˬhuˇ-aˬ, aˬ yawꞈ-euˬ mahˬ laˆ lawˬ-ahˇ dziˬ leˇ-awˇ, Yeˬzaˬleˬlaˇ meuˬ-ahˇ iˇ-euˬ meh. Kʼoeˇ ngeh, Yoˇlamˬ jawˇ saˇ yaw muiˬ paˬ-ehˇ maˬ doˆ laˇ dah-ehˇ, Yuˇdaˆ sahˬ paˬ Aˬhaˬziˇ kʼawꞈ, aˬ yawꞈ jawˇ gaˇ dawˬ deh gʼa laˇ-awˇ jawˇ luꞈ-eu meh.

¹⁷ Yeˬhuˇ hawˇ-eu aˬ yawꞈ-euˬ tsawˇ haˬ oe luꞈ gaˇ, Yeˬzaˬleˬlaˇ meuˬ-ahˇ loꞈ-eu gʼaˬ ya mawˇ ngeh, “Tsawˇ haˬ tiˬ deuˬ oe luꞈ nga” lehˇ guˇ-eu meh. Kʼoeˇ ngeh, “Mahˬ dziˬ luꞈ-eu tsawˇ haˬ tiˬ gʼaˬ pyehˬ gʼeh-awˇ, yaw muiˬ oe-eu nga loˇ, yaw doeˇ oe-eu nga loˇ lehˇ, bi pyehˆ tseˇ haw-iˇ-awˬ” lehˇ Yoˇlamˬ ehˇ-eu meh.

¹⁸ Mahˬ dziˬ-eu tsawˇ haˬ kʼoeˇ gʼaˬ Yeˬhuˇ jawˇ gaˇ iˇ-awˇ, “Nawˇ yaw muiˬ jeˬ mˇ le teˬ loˇ lehˇ, sahˬ paˬ bi naˇ haˬ le-euˬ meh” lehˇ ehˇ nehˬ ngeh, “Nawˬ-ahˇ tiˬ jeˬ-iˬ maˬ taꞈ. Ngaˬ-euˬ naˇ kʼah paw jawˇ-awˬ” lehˇ Yeˬhuˇ ehˇ-eu meh. “Mahˬ dziˬ-awˇ bi iˇ-euˬ gʼaˬ tsawˇ haˬ kʼoeˇ deuˬ jawˇ gaˇ iˇ keuˆ-euˬ kʼawꞈ, maˬ gʼoꞈ poˆ laˇ nga” lehˇ, meuˬ lahˇ kʼehˬ-ahˇ loꞈ-eu gʼaˬ ehˇ-eu meh.

¹⁹ Kʼoeˇ naˇ, mahˬ dziˬ-eu tsawˇ haˬ nyiˬ gʼaˬ tiˬ gʼaˬ Yeˬhuˇ jawˇ gaˇ bi iˇ-awˇ, “Nawˇ yaw muiˬ jeˬ mˇ le teˬ loˇ” lehˇ naˇ haˬ ngeh, “Nawˬ-ahˇ tiˬ jeˬ-iˬ maˬ taꞈ. Ngaˬ-euˬ naˇ kʼah paw jawˇ-awˬ” lehˇ Yeˬhuˇ ehˇ-eu meh.

²⁰ Meuˬ lahˇ kʼehˬ-ahˇ loꞈ-eu kʼoeˇ gʼaˬ ehˇ-eu “Mahˬ dziˬ-awˇ bi iˇ-euˬ gʼaˬ, tsawˇ haˬ kʼoeˇ deuˬ jawˇ gaˇ iˇ keuˆ-euˬ kʼawꞈ, maˬ gʼoꞈ poˆ laˇ nga. Tsawˇ haˬ kʼoeˇ muˇ-euˬ aˬ yuiꞈ geuꞈ-eu gʼaˬ-aˬ, Yeˬhuˇ mahˬ laˆ lawˬ teh gaˇ duˇ ni, mahˬ laˆ lawˬ aˇ dzehˬ-ehˇ teh kawˇ teh kawˇ-ehˇ laˇ luꞈ nga.”

²¹ Kʼoeˇ ngeh, “Ngaˬ-euˬ mahˬ laˆ lawˬ lehˬ hmˬ-awˬ” lehˇ Yoˇlamˬ ehˇ-eu meh. Mahˬ laˆ lawˬ lehˬ hmˬ gʼaˬ ngeh, Iˇsaˬleˬlaˆ sahˬ paˬ Yoˇlamˬ hawˇ-eu Yuˇdaˆ sahˬ paˬ Aˬhaˬziˇ aˬ nyaꞈ, yawˬ ha-euˬ mahˬ laˆ lawˬ-ahˇ yawˬ ha dziˬ leˇ-awˇ, Yeˬhuˇ-ahˇ tahˬ puˬ-iˇ-euˬ meh. Naˬboˆ-euˬ deh yaˇ deh dzeˇ aˬ yawꞈ nyaꞈ aˬ yawꞈ-ahˇ tahˬ pu-euˬ meh.

²² Yeˬhuˇ-ahˇ Yoˇlamˬ mawˇ-awˇ, “Yaw muiˬ jeˬ mˇ le-euˬ ma loˇ” lehˇ naˇ haˬ-euˬ meh. Yeˬhuˇ ehˇ-eu, “Nawˬ ma Yeˬsaˬbeˬlaˇ neh aˇ dahˬ beh taˬ yaꞈ-euˬ tahˬ pahˬ aˬ ma mawˇ kawˇ-ahˇ uˬ duˬ tahˬ-eu jeˬ hawˇ-eu, jaˬ nehꞈ ja maw kʼoeˇ deuˬ kʼaˇ jaˆ kʼoeˇ keuˆ ni, gaˇ kawˆ yaw muiˬ maˬ jaˆ kʼmˬ-aˇ.”

²³ Kʼoeˇ ngeh, Yoˇlamˬ gʼaˬ, “Aˬhaˬziˇ-oˇ, Yeˬhuˇ ngaˬ-ahˇ puiˬ-euˬ ngaˇ” lehˇ guˇ-awˇ, mahˬ laˆ lawˬ teh pyawˇ-awˇ cehˆ-euˬ meh.

²⁴ Yeˬhuˇ kaˆ yuˇ-awˇ, gʼaˬ kʼaˇ jaˆ-eu shaˇ-awˇ Yoˇlamˬ-euˬ dahˇ teˇ-ahˇ beuˆ-euˬ meh. Kaˆ myaˬ kʼoeˇ Yoˇlamˬ-euˬ nui ma-ahˇ beuˆ coˆ doˆ-awˇ, mahˬ laˆ lawˬ kʼoeˇ taˆ coˬ lah-awˇ, shiˇ-euˬ meh.

²⁵ Yeˬhuˇ-euˬ gʼaˬ zaˬ pyeuꞈ-eu Biˇdaˬkaˬ-ahˇ Yeˬhuˇ ehˇ nehˬ-eu, “Yoˇlamˬ-ahˇ baꞈ-awˇ, Naˬboˆ-euˬ deh yaˇ-ahˇ baꞈ dzeh-iˇ-awˬ. Sahˬ paˬ Yoˇlamˬ-euˬ aˬ da sahˬ paˬ Aˬhaˆ-euˬ mehˬ nah aˇ nyaꞈ mahˬ dziˬ-awˇ cah ngeh, Sahˬpaˬ Miˬyehˇ neh Aˬhaˆ-ahˇ ehˇ nehˬ-euˬ dawˬ-ahˇ nawˇ maˬ noeˬ nya loˇ.

²⁶ ‘Miˇ nah Naˬboˆ hawˇ-eu aˬ yawꞈ-euˬ aˬ li-ahˇ sehꞈ-euˬ ngaˇ mawˇ-euˬ ma. Deh yaˇ heu kawˬ laꞈ kʼoeˇ nawˬ-ahˇ kʼawꞈ, heu gaˇ kʼehˬ nehˬ ma’ lehˇ ehˇ-euˬ maˬ ngeuˇ-a loˇ. Kʼoeˇ miˇ neh, Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ byah laˇ ni, Yoˇlamˬ-ahˇ Naˬboˆ-euˬ deh yaˇ laꞈ kʼoeˇ baꞈ dzeh-awˬ.”

Yeˬhuˇ neh sahˬ paˬ Aˬhaˬziˇ-ahˇ sehꞈ-eu

²⁷ Kʼoeˇ loꞈ-ehˇ pyeuꞈ luꞈ gaˇ sahˬ paˬ Aˬhaˬziˇ ya mawˇ ngeh, mahˬ laˆ lawˬ dziˬ-awˇ, Behˬhaˬgaˬ paw cehˆ-euˬ meh. Yeˬhuˇ gʼaˬ aˬ yawꞈ-euˬ mehˬ nah teh-awˇ, “Aˬ yawꞈ-ahˇ gʼeh sehꞈ-awˬ” lehˇ, aˬ yawꞈ-euˬ tsawˇ haˬ deuˬ-ahˇ dawˬ biꞈ-euˬ meh. Kʼoeˇ naˇ, Eˇbaˬleˬ meuˬ dawˬ peh jaˆ-eu Guˇluˆ meuˬ-ahˇ le-eu gaˇ ma caw caw-ehˇ, aˬ yawꞈ mahˬ laˆ lawˬ teh-awˇ sehˇ daˆ leꞈ ngeh, aˬ yawꞈ maꞈ aꞈ yawꞈ-ahˇ beuˆ zaw-euˬ meh. Ehˇ kʼawꞈ, Meˬgiˇdoˬ meuˬ-ahˇ keuˆ ni aˬ yawꞈ le gʼeh leꞈ-awˇ, kʼoeˇ gaˇ shiˇ tsehˆ leˇ-euˬ meh.

²⁸ Aˬ yawꞈ-euˬ gaˇ mˇ-eu yaw huiˬ yaw mahˇ deuˬ neh aˬ yawꞈ-ahˇ mahˬ laˆ lawˬ laꞈ kʼoeˇ baꞈ ahˇ-awˇ, Yeˬluˇsaˬlehˬ meuˬ-ahˇ tawˬ kʼoꞈ gʼeh-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh.

²⁹ Aˬhaˆ-euˬ aˬ li Yoˇlamˬ Iˇsaˬleˬlaˆ miˇ kʼahˬ-ahˇ uˆ lahˇ luꞈ-eu tseˇ kʼoꞈ tiˬ kʼoꞈ-ahˇ, Aˬhaˬziˇ Yuˇdaˆ sahˬ paˬ pyeuꞈ laˇ-euˬ meh.

Yeˬsaˬbeˬlaˇ-ahˇ sehꞈ-euˬ

³⁰ Kʼoeˇ naˇ, Yeˬzaˬleˬlaˇ meuˬ-ahˇ Yeˬhuˇ le-euˬ meh. Gaˇ kawˆ kʼoeˇ Yeˬsaˬbeˬlaˇ ya gaˬ ngeh, myaˆ nuiˆ hawˇ-eu uˬ duˬ tsehˇ kahˇ laˆ muiˬ-awˇ, sahˬ paˬ-euˬ hawˇ nymˇ laˇ gʼoˆ zaˬ-ahˇ yawꞈ-awˇ, gaˇ ma paw ciꞈ pyawˇ-awˇ jawˇ-eu meh.

³¹ Meuˬ lahˇ kʼehˬ laꞈ kʼoeˇ Yeˬhuˇ uˇ laˇ ngeh, “Yawˬ ha-euˬ sahˬ paˬ-ahˇ sehꞈ-euˬ Zmˇliˬ-oˇ, nawˇ heu gaˇ aˬ jeˬ gʼeh laˇ teˬ” lehˇ, Yeˬsaˬbeˬlaˇ guˇ-eu meh.

³² Yeˬhuˇ baꞈ leuˇ-awˇ, “Ngaˇ jawˇ paw aˬ suˇ gʼaˬ pyawˬ nmˇ” lehˇ guˇ ngeh, sahˬ paˬ-euˬ gaˇ mˇ-eu yaw huiˬ yaw mahˇ nyiˬ gʼaˬ smˇ gʼaˬ byah ni, laˇ gʼoˆ gʼoˆ zaˬ-ahˇ cu hu le-euˬ meh.

³³ “Aˬ yawꞈ-ahˇ biˬ ka leꞈ-awˬ” lehˇ, aˬ yawꞈ maꞈ-ahˇ Yeˬhuˇ ehˇ nehˬ ngeh, aˬ yawꞈ maꞈ Yeˬsaˬbeˬlaˇ-ahˇ biˬ ka-awˇ, kaˇ pyawˇ hawˇ-eu mahˬ-ahˇ aˬ yawꞈ-euˬ shiˬ teuˆ lehꞈ-euˬ meh. Kʼoeˇ ngeh, Yeˬhuˇ mahˬ laˆ lawˬ teh-awˇ, aˬ yawꞈ-ahˇ lehˬ pyehˆ-euˬ meh.

³⁴ Kʼoeˇ naˇ, sahˬ paˬ-euˬ hawˇ nymˇ-ahˇ Yeˬhuˇ le uˇ-awˇ, dzaˬ-euˬ dawˇ-euˬ meh. Aˬ yawꞈ dzaˬ dehˆ dawˇ dehˆ gʼaˬ ngeh, “Zaˬ miˬ zaˬ teu gʼaˬ-ahˇ baꞈ pahˬ nehˬ-awˬ. Aˬ yawꞈ sahˬ paˬ zaˬ miˬ tiˬ gʼaˬ meh” lehˇ ehˇ-eu meh.

³⁵ Ehˇ kʼawꞈ, tsawˇ haˬ kʼoeˇ deuˬ Yeˬsaˬbeˬlaˇ-ahˇ baꞈ pahˬ-eu lehˇ iˇ ngeh, uˬ duˬ kmˬ hawˇ-eu, aˬ kuiˇ aˬ laꞈ shaˬ yoeˬ tehꞈ-ehˇ dzeˇ gaˇ ya mawˇ-euˬ meh.

³⁶ Gaˇ kawˆ kʼoeˇ Yeˬhuˇ-ahˇ aˬ yawꞈ maꞈ dzawˇ nehˬ leˇ ngeh, Yeˬhuˇ ehˇ-eu, “Sahˬpaˬ Miˬyehˇ neh aˬ yawꞈ-euˬ zaˬ kʼaˆ Eˇliˇyaˆ-ahˇ gʼoe-awˇ heu loꞈ-ehˇ ehˇ taˬ-euˬ jaˆ-eu meh. ‘Yeˬzaˬleˬlaˇ meuˬ laꞈ kʼoeˇ, Yeˬsaˬbeˬlaˇ-euˬ gʼawˇ mawˇ-ahˇ aˬ kuiˬ dzaˬ tehꞈ-a.

³⁷ Aˬ yawꞈ-ahˇ tsawˇ haˬ tiˬ gʼaˬ-iˬ maˬ haw siˬ nya-ehˇ pyeuꞈ-iˇ ngeh keuˆ ni, aˬ yawꞈ-euˬ shaˬ jiˇ tiˬ gaˇ tiˬ jehꞈ-ehˇ, aˬ nyoˬ mawˇ neˇ keˬ loꞈ-ehˇ ga tehꞈ-a’ lehˇ ehˇ taˬ-euˬ jaˆ-eu meh.”