2 Sahˬpaˬ 8 - Akha

Suˇneˬ meuˬ-ahˇ jawˇ-eu zaˬ miˬ zaˬ kʼoeˇ gʼaˬ deh ma za kʼoꞈ-euˬ

¹ Eˇliˇshehˇ neh bi gʼoꞈ dehꞈ laˇ-euˬ aˬ li kʼoeˇ li-euˬ aˬ ma pyeuꞈ-eu Suˇneˬ meuˬ-ahˇ jawˇ-eu zaˬ miˬ zaˬ kʼoeˇ gʼaˬ-ahˇ Eˇliˇshehˇ ehˇ nehˬ-eu,, “Nawˬ-euˬ nymˇ kʼahˬ zaˬ deuˬ sheuˬ-awˇ tiˬ gaˇ paw jawˇ-iˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ miˇ kʼahˬ heu kʼahˬ-ahˇ laˆ cawˆ-eu lehˇ gʼeh-eu meh.”

² Eˇliˇshehˇ-euˬ dawˬ-ahˇ zaˬ miˬ zaˬ kʼoeˇ gʼaˬ naˇ haˬ geuꞈ-awˇ, aˬ yawꞈ-euˬ nymˇ kʼahˬ zaˬ deuˬ sheuˬ-awˇ, Piˇliˇtiˆ miˇ kʼahˬ-ahˇ shiꞈ kʼoꞈ byah ni jawˇ-iˇ-euˬ meh.

³ Shiꞈ kʼoꞈ byah laˇ ngeh, Iˇsaˬleˬlaˆ miˇ kʼahˬ-ahˇ aˬ yawꞈ paˇ gʼoꞈ laˇ-awˇ, sahˬ paˬ jawˇ gaˇ le-awˇ, aˬ yawꞈ-euˬ nymˇ hawˇ-eu miˇ tsaˬ za kʼoꞈ mawꞈ nya lehˇ shaˇ leˇ-euˬ meh.

⁴ Eˇliˇshehˇ-euˬ zaˬ kʼaˆ Geˬhaˬziˇ-ahˇ sahˬ paˬ dawˬ ngehˬ cawˬ luꞈ gaˇ aˬ yawꞈ ya mawˇ-euˬ meh. Eˇliˇshehˇ neh mˇ-euˬ zahˬ leˇ paˬ-ehˇ gʼeh-eu gaˇ deuˬ gaˇ kawˆ sahˬ paˬ naˇ haˬ luꞈ-eu meh.

⁵ Shiˇ-euˬ tsawˇ haˬ tiˬ gʼaˬ-ahˇ Eˇliˇshehˇ neh bi gʼoꞈ dehꞈ laˇ-euˬ gaˇ kawˆ, sahˬ paˬ-ahˇ Geˬhaˬziˇ dzawˇ nehˬ luꞈ ngeh, zaˬ miˬ zaˬ kʼoeˇ gʼaˬ aˬ yawꞈ-euˬ nymˇ hawˇ-eu miˇ tsaˬ za kʼoꞈ mawꞈ-eu gaˇ kawˆ, sahˬ paˬ-ahˇ shaˇ leˇ-euˬ meh. Kʼoeˇ ngeh, sahˬ paˬ-ahˇ Geˬhaˬziˇ ehˇ nehˬ-eu, “Sahˬpaˬ-oˇ, ngaˇ ehˇ luꞈ-eu zaˬ miˬ zaˬ kʼoeˇ gʼaˬ heu gʼaˬ meh. Eˇliˇshehˇ neh bi gʼoꞈ dehꞈ laˇ-euˬ aˬ li kʼoeˇ-aˬ, aˬ yawꞈ-euˬ aˬ li heu li meh.”

⁶ Gaˇ kawˆ kʼoeˇ zaˬ miˬ zaˬ kʼoeˇ gʼaˬ-ahˇ sahˬ paˬ naˇ haˬ ngeh, zaˬ miˬ zaˬ kʼoeˇ gʼaˬ dzawˇ nehˬ-euˬ meh. Kʼoeˇ ngeh, yaw huiˬ yaw mahˇ tiˬ gʼaˬ-ahˇ sahˬ paˬ kuˇ-awˇ ehˇ nehˬ-eu, “Zaˬ miˬ zaˬ heu gʼaˬ-ahˇ kʼaˇ taꞈ-eu jeˬ dawˬ tawˆ luꞈ biꞈ kʼoꞈ nehˬ-awˇ, miˇ kʼahˬ heu kʼahˬ-ahˇ aˬ yawꞈ maˬ jawˇ ni doˆ-iˇ-euˬ shiꞈ kʼoꞈ laꞈ kʼoeˇ, aˬ yawꞈ-euˬ deh yaˇ-ahˇ kʼaˇ ka za-euˬ cehˇ aˇ poeˬ kʼawꞈ biꞈ kʼoꞈ nehˬ-awˬ.”

Eˇliˇshehˇ hawˇ-eu Suˇliˆ sahˬ paˬ Beˬhaˬdaˇ

⁷ Daˬmaˬsehˇ meuˬ-ahˇ Eˇliˇshehˇ le-euˬ meh. Kʼoeˇ ngeh, Suˇliˆ sahˬ paˬ naˇ luꞈ-eu meh. Eˇliˇshehˇ laˇ taˬ-awˇ jawˇ-eu gaˇ kawˆ sahˬ paˬ-ahˇ aˬ cawˬ ehˇ nehˬ ngeh,

⁸ aˬ yawꞈ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Haˬzeˬlaˇ-ahˇ ehˇ nehˬ-eu, “Miˬyehˇ gʼaˇ duˬ ngehˬ dah-eu kʼoeˇ gʼaˬ-ahˇ laꞈ sawˬ biꞈ-iˇ-awˇ, ngaˬ-euˬ naˇ gawˇ heu taˬ leˇ nya ngaˇ loˇ lehˇ, Sahˬpaˬ Miˬyehˇ-ahˇ bi naˇ haˬ haw sheˇ.”

⁹ Kʼoeˇ ngeh, Daˬmaˬsehˇ meuˬ-ahˇ doˆ-eu muiˬ dui dui-eu myawˬ gahˬ deuˬ, law taw oeˬ tseˇ mawˇ kʼoeˇ taˆ Haˬzeˬlaˇ kaꞈ daˆ-awˇ, Eˇliˇshehˇ jawˇ gaˇ iˇ-euˬ meh. Eˇliˇshehˇ-ahˇ aˬ yawꞈ ya mawˇ ngeh heu loꞈ-ehˇ ehˇ nehˬ-euˬ meh. “Nawˬ-euˬ zaˬ kʼaˆ pyeuꞈ-eu sahˬ paˬ Beˬhaˬdaˇ ngaˬ-ahˇ pyehˬ gʼeh leꞈ-awˇ, aˬ yawꞈ-euˬ naˇ gawˇ taˬ leˇ nya meh loˇ lehˇ bi naˇ haˬ le-euˬ meh.”

¹⁰ Eˇliˇshehˇ ehˇ-eu, “Aˬ yawꞈ ya shiˇ tehꞈ-a lehˇ, Sahˬpaˬ Miˬyehˇ ngaˬ-ahˇ pah mehˬ laꞈ gʼaˬ-euˬ meh. Ehˇ kʼawꞈ, aˬ yawꞈ jawˇ gaˇ gʼoꞈ leˇ-awˇ, taˬ leˇ tehꞈ-a lehˇ ehˇ nehˬ leˇ-awˬ.”

¹¹ Kʼoeˇ naˇ, Haˬzeˬlaˇ maˬ jawˇ tehˬ coeˇ-ehˇ pyeuꞈ laˇ ngeh keuˆ ni, Haˬzeˬlaˇ-ahˇ Eˇliˇshehˇ haw tsoˆ taˬ-euˬ meh. Kʼoeˇ ngeh, Eˇliˇshehˇ myaˆ biˇ yoeˇ le-euˬ meh.

¹² “Nawˇ aˬ jeˬ miˇ neh ngoeˇ te” lehˇ, Eˇliˇshehˇ-ahˇ Haˬzeˬlaˇ naˇ haˬ ngeh, Eˇliˇshehˇ ehˇ-eu, “Iˇsaˬleˬlaˆ tsawˇ haˬ deuˬ-ahˇ nawˇ yaw haiˬ jeˬ mˇ nehˬ tehꞈ-a lehˇ ngaˇ siˬ nya-eu miˇ neh ngoeˇ-eu ma. Aˬ yawꞈ maꞈ neh ziꞈ dah ni tsoˆ taˬ-euˬ nymˇ-ahˇ nawˇ miˬ dzaˬ dzah-awˇ, aˬ yawꞈ maꞈ-euˬ zaˬ guˬ deuˬ-ahˇ nawˇ deuˆ sehꞈ-eu uˬ taꞈ, aˬ yawꞈ maꞈ-euˬ zaˬ yaw nyiˇ deuˬ-ahˇ miˇ tsa ciˬ jeˬ nehˬ-awˇ, aˬ nyiˇ pi luꞈ-eu zaˬ miˬ zaˬ deuˬ-ahˇ uˬ maˆ ceuꞈ paˆ nehˬ tehꞈ-a.”

¹³ Haˬzeˬlaˇ ehˇ-eu, “Ngaˇ-aˬ, tiˬ gaˇ-iˬ deuˬ leˇ-eu tsawˇ haˬ maˬ ngeuˇ. Kʼoeˇ naˆ naˆ-ehˇ baoˬ ahˇ-eu tsawˇ haˬ ngaˇ aˬ joˆ-ehˇ pyeuꞈ laˇ nya nmˇ.” Eˇliˇshehˇ ehˇ-eu, “Nawˇ Suˇliˆ sahˬ paˬ pyeuꞈ laˇ tehꞈ-a lehˇ, Sahˬpaˬ Miˬyehˇ ngaˬ-ahˇ pah mehˬ nehˬ laꞈ gʼaˬ-euˬ meh.”

¹⁴ Kʼoeˇ naˇ, Eˇliˇshehˇ jawˇ gaˇ neh Haˬzeˬlaˇ doˆ-iˇ-awˇ, sahˬ paˬ jawˇ gaˇ gʼoꞈ leˇ-euˬ meh. “Eˇliˇshehˇ aˬ jeˬ ehˇ ta” lehˇ aˬ yawꞈ-ahˇ sahˬ paˬ naˇ haˬ ngeh, “Nawˇ aˬ diˇ aˬ maˇ jawˇ saˇ doˆ laˇ tehꞈ-a lehˇ, aˬ yawꞈ ngaˬ-ahˇ ehˇ-eu meh” lehˇ ehˇ kʼoꞈ nehˬ-euˬ meh.

¹⁵ Ehˇ kʼawꞈ, yawˬ nah yawˬ Haˬzeˬlaˇ aˇ bui yuˇ-awˇ, iˇ cuꞈ-ahˇ dehˬ duiˆ-awˇ, sahˬ paˬ-euˬ myaˆ pyawˬ-ahˇ dehˬ kaˬ-awˇ bi shiˇ-euˬ meh. Kʼoeˇ naˇ, Beˬhaˬdaˇ-euˬ dah zaˇ Haˬzeˬlaˇ gʼaˬ Suˇliˆ sahˬ paˬ pyeuꞈ laˇ-euˬ meh.

Yuˇdaˆ sahˬ paˬ Yeˬhawˇlamˬ

¹⁶ Aˬhaˆ-euˬ aˬ li Yoˇlamˬ gʼaˬ Iˇsaˬleˬlaˆ miˇ kʼahˬ kʼoeˇ taˆ sahˬ paˬ geuꞈ-awˇ uˆ lahˇ luꞈ-eu ngaˬ kʼoꞈ tiˬ kʼoꞈ-ahˇ, Yeˬhawˇshaˬpaˇ-euˬ aˬ li Yeˬhawˇlamˬ gʼaˬ Yuˇdaˆ sahˬ paˬ pyeuꞈ laˇ-euˬ meh.

¹⁷ Aˬ yawꞈ smˬ tseˇ nyiꞈ kʼoꞈ kʼawˆ ngeh, sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ yehꞈ kʼoꞈ keuˆ ni uˆ lahˇ-euˬ meh.

¹⁸ Aˬ yawꞈ-euˬ miˬ zaˬ-aˬ, Aˬhaˆ-euˬ aˬ buˇ pyeuꞈ-awˇ, Aˬhaˆ-euˬ nymˇ jiˇ-ahˇ duˇ ni, Iˇsaˬleˬlaˆ sahˬ paˬ deuˬ neh mˇ-euˬ iˬ baˇ mehˬ nah aˬ yawꞈ caw teh-euˬ meh. Sahˬpaˬ Miˬyehˇ mehˬ shi yaw haiˬ jeˬ aˬ yawꞈ mˇ-euˬ meh.

¹⁹ Ehˇ kʼawꞈ, Yuˇdaˆ miˇ kʼahˬ-ahˇ Sahˬpaˬ Miˬyehˇ maˬ laˆ cawˆ mawꞈ-a. Aˬ jeˬ miˇ neh ehˇ naˇ, “Nawˬ-euˬ zaˬ nawˬ-euˬ uˆ deuˬ aˬ myah luꞈ dzoeˬ dzaˬ oꞈ tehꞈ-a” lehˇ, aˬ yawꞈ-euˬ zaˬ kʼaˆ Daˬbiˇ-ahˇ aˬ yawꞈ saˇ jaˇ dzaˬ taˬ-euˬ jaˆ-eu meh.

²⁰ Yeˬhawˇlamˬ sahˬ paˬ geuꞈ-awˇ uˆ lahˇ-euˬ aˇ yamˬ laꞈ kʼoeˇ, Eˬdoˬ miˇ kʼahˬ neh Yuˇdaˆ miˇ kʼahˬ-ahˇ puiˬ-awˇ, aˬ yawꞈ maꞈ miˇ kʼahˬ gʼaˇ duˬ sahˬ paˬ tiˬ gʼaˬ tseˇ doˆ-awˇ bi uˆ lahˇ-euˬ meh.

²¹ Kʼoeˇ ngeh, Yeˬhawˇlamˬ gʼaˬ aˬ yawꞈ-euˬ mahˬ laˆ lawˬ dawˬ tawˆ luꞈ teh-awˇ, Yaˬiˇlaˆ meuˬ-ahˇ iˇ-euˬ meh. Meuˬ kʼoeˇ meuˬ-ahˇ Eˬdoˬ guiˇ maꞈ deuˬ neh aˬ yawꞈ maꞈ-ahˇ loꞈ jawˬ-euˬ meh. Aˬ yawꞈ hawˇ-eu aˬ yawꞈ-euˬ mahˬ laˆ lawˬ teh-eu deuˬ uˬ ciꞈ paw cehˆ doˆ-awˇ, aˬ yawꞈ-euˬ yehˇ deuˬ kʼawꞈ, yawˬ ha-euˬ nymˇ kʼaˇ jaˆ gaˇ tiˬ paw tiˬ gʼaˬ-ehˇ ciˬ pyawˇ-awˇ cehˆ gʼoꞈ jiˇ-euˬ meh.

²² Kʼoeˇ ngeh neh naˇ, Eˬdoˬ miˇ kʼahˬ-aˬ, Yuˇdaˆ miˇ kʼahˬ uˆ lahˇ-eu uˬ moˆ maˬ paˇ jawˇ ni, yawˬ haˇ yawˬ ha uˆ lahˇ-eu miˇ kʼahˬ tiˬ kʼahˬ pyeuꞈ laˇ-euˬ meh. Aˇ yamˬ kʼoeˇ yamˬ laꞈ kʼoeˇ, Liˇbaˬnahˬ meuˬ kʼawꞈ, Yuˇdaˆ miˇ kʼahˬ-ahˇ puiˬ-euˬ meh.

²³ Yeˬhawˇlamˬ neh kʼaˇ mˇ kʼaˇ shaˇ yaꞈ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁴ Yeˬhawˇlamˬ ziˇ jiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Aˬhaˬziˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Aˬhaˬziˇ

²⁵ Aˬhaˆ-euˬ aˬ li Yoˇlamˬ Iˇsaˬleˬlaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-eu tseˇ nyiꞈ kʼoꞈ tiˬ kʼoꞈ-ahˇ, Yeˬhawˇlamˬ-euˬ aˬ li Aˬhaˬziˇ Yuˇdaˆ sahˬ paˬ pyeuꞈ laˇ-euˬ meh.

²⁶ Aˬ yawꞈ sahˬ paˬ pyeuꞈ laˇ ngeh, nyiˬ tseˇ nyiꞈ kʼoꞈ kʼawˆ-awˇ, tiˬ kʼoꞈ byah ni Yeˬluˇsaˬlehˬ meuˬ-ahˇ jawˇ-awˇ uˆ lahˇ-euˬ meh. Aˬ yawꞈ-euˬ aˬ ma Aˬdaˬliˇ-aˬ, Iˇsaˬleˬlaˆ sahˬ paˬ Aˬhaˆ-euˬ aˬ buˇ pyeuꞈ-awˇ, sahˬ paˬ Awˇmaˬliˇ-euˬ oeˬ ma pyeuꞈ-eu meh.

²⁷ Aˬhaˬziˇ-aˬ, zahˇ shaˇ taꞈ-eu laꞈ kʼoeˇ sahˬ paˬ Aˬhaˆ-ahˇ aˬ yuiꞈ aˬ nyiˇ jawꞈ-eu miˇ neh, Aˬhaˆ-euˬ nymˇ jiˇ loꞈ-ehˇ Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁸ Sahˬ paˬ Aˬhaˬziˇ-aˬ, Iˇsaˬleˬlaˆ sahˬ paˬ Yoˇlamˬ nehˬ-ehˇ gm leˇ-awˇ, Suˇliˆ sahˬ paˬ Haˬzeˬlaˇ-ahˇ guiˇ deuˆ-euˬ meh. Guiˇ maꞈ kʼoeˇ deuˬ Giˇlaˆ miˇ kʼahˬ Laˬmoˆ meuˬ-ahˇ deuˆ ceh ceh-awˇ, Yoˇlamˬ gʼaˬ bi deuˆ tahˬ-euˬ meh.

²⁹ Aˬ yawꞈ jawˇ saˇ doˆ laˇ ni Yeˬzaˬleˬlaˇ meuˬ-ahˇ gʼoꞈ naˬ-iˇ-awˇ, aˬ yawꞈ jawˇ gaˇ Aˬhaˬziˇ dawˬ deh gʼa leˇ-euˬ meh.