2 Sahˬpaˬ 5 - Akha

Neˬmaˬ-euˬ naˇ gawˇ laˆ taˬ nehˬ-euˬ

¹ Suˇliˆ miˇ kʼahˬ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Neˬmaˬ-ahˇ, Suˇliˆ sahˬ paˬ taˬ huiˬ taˬ mahˇ dui dui-eu meh. Aˬ jeˬ miˇ neh ehˇ naˇ, Neˬmaˬ baˬ da neh Suˇliˆ guiˇ maꞈ deuˬ-ahˇ aˬ cawˬ kʼoeˇ taˆ Sahˬpaˬ Miˬyehˇ bi gʼaˬ leˇ-euˬ meh. Aˬ yawꞈ-aˬ, guiˇ deuˆ-eu paw tsawˇ myahˇ doˆ dui dui kʼawꞈ, nyawˬ naˇ-eu tsawˇ haˬ tiˬ gʼaˬ pyeuꞈ-eu meh.

² Suˇliˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ guiˇ tiˬ poˆ deuˆ-iˇ ngeh, Iˇsaˬleˬlaˆ zaˬ miˬ aˬ buˇ tiˬ gʼaˬ sheuˬ kʼoꞈ laꞈ-awˇ, Neˬmaˬ-euˬ miˬ zaˬ-euˬ zaˬ kʼaˆ bi geuꞈ-euˬ meh.

³ Tiˬ nah keuˆ laˇ ngeh, Iˇsaˬleˬlaˆ zaˬ miˬ aˬ buˇ kʼoeˇ gʼaˬ, Neˬmaˬ-euˬ miˬ zaˬ-ahˇ ehˇ nehˬ-eu, “Ngaˬ-euˬ baw leˬ-ahˇ Saˬmaˬliˆ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ jawˇ gaˇ bi iˇ haw mawꞈ nya. Tsawˇ haˬ kʼoeˇ gʼaˬ aˬ yawꞈ-euˬ naˇ gawˇ laˆ taˬ nehˬ tehꞈ-a.”

⁴ Gaˇ kawˆ kʼoeˇ Neˬmaˬ ya gaˬ ngeh, sahˬ paˬ jawˇ gaˇ le-awˇ, aˬ buˇ kʼoeˇ buˇ neh ehˇ-euˬ dawˬ kʼoeˇ dzawˇ nehˬ leˇ-euˬ meh.

⁵ Kʼoeˇ ngeh, “Iˇsaˬleˬlaˆ sahˬ paˬ jawˇ gaˇ iˇ-awˇ, sahˬ boꞈ heu taꞈ yuˇ gʼeh nehˬ-awˬ” lehˇ, sahˬ paˬ ehˇ-eu meh. Kʼoeˇ naˇ, Neˬmaˬ-aˬ, pyuˇ maˇ byaˆ smˬ muiˇ byaˆ, shuiˇ maˇ byaˆ koꞈ heˇ byaˆ hawˇ-eu, muiˬ dui dui-eu mehˬ tsoeˬ tseˇ shehˆ yuˇ-awˇ iˇ-euˬ meh.

⁶ Aˬ yawꞈ neh yuˇ gʼeh-euˬ sahˬ boꞈ kʼoeˇ taꞈ-aˬ, “Ngaˬ-euˬ gaˇ mˇ-eu yaw huiˬ yaw mahˇ pyeuꞈ-eu Neˬmaˬ-ahˇ, nyawˬ naˇ-eu naˇ gawˇ laˆ saˆ taˬ nehˬ-eu gʼaˇ duˬ, nawˇ jawˇ gaˇ bi oe-euˬ jeˬ pyeuꞈ-eu ma” lehˇ boꞈ taˬ-euˬ meh.

⁷ Sahˬ boꞈ kʼoeˇ taꞈ-ahˇ Iˇsaˬleˬlaˆ sahˬ paˬ gui gʼaˬ ngeh, aˬ yawꞈ dm luꞈ-eu mehˬ tsoeˬ cehˬ pyaˬ-awˇ ehˇ-eu, “Tsawˇ haˬ heu gʼaˬ-euˬ naˇ gawˇ laˆ saˆ taˬ nehˬ-awˬ lehˇ, Suˇliˆ sahˬ paˬ ngaˬ-ahˇ aˬ joˆ-ehˇ ehˇ nya-eu nga. Ngaˇ-aˬ, tsawˇ haˬ-ahˇ laˆ dehꞈ laˆ shiˇ nya-eu baoˬ ahˇ-eu miˬyehˇ nga lehˇ aˬ yawꞈ noeˬ ta loˇ. Aˬ yawꞈ ngaˬ-ahˇ nui ma laˆ pehˇ-awˇ, ceh dzaˬ-eu gaˇ ma poˆ-eu lehˇ gʼeh-eu ngaˇ.”

⁸ Iˇsaˬleˬlaˆ sahˬ paˬ mehˬ tsoeˬ cehˬ pyaˬ-euˬ gaˇ kawˆ Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Eˇliˇshehˇ ya gaˬ ngeh, heu loꞈ-ehˇ bi ehˇ gaˬ leˇ-euˬ meh. “Aˬ jeˬ miˇ neh nawˇ nui ma cawˆ luꞈ te. Tsawˇ haˬ kʼoeˇ gʼaˬ-ahˇ ngaˇ jawˇ gaˇ pyehˬ gʼeh leꞈ-awˬ. Iˇsaˬleˬlaˆ miˇ kʼahˬ laꞈ kʼoeˇ miˬyehˇ gʼaˇ duˬ ngehˬ dah-eu tiˬ gʼaˬ jawˇ-eu gaˇ kawˆ, aˬ yawꞈ yaw muiˬ paˬ-ehˇ ya siˬ duˬ tehꞈ-a.”

⁹ Kʼoeˇ naˇ, Neˬmaˬ-aˬ, aˬ yawꞈ-euˬ mahˬ deuˬ hawˇ-eu mahˬ laˆ lawˬ deuˬ teh-awˇ, Eˇliˇshehˇ-euˬ nymˇ gʼoˆ kʼehˬ-ahˇ naˬ-iˇ-euˬ meh.

¹⁰ Neˬmaˬ jawˇ gaˇ Eˇliˇshehˇ zaˬ kʼaˆ tiˬ gʼaˬ pyehˬ gʼeh-awˇ, “Yawˇdaˬ lawˇ baˬ-ahˇ iˇ-awˇ, iˇ cuꞈ shiꞈ poˆ dzuiꞈ-iˇ-awˬ. Nawˬ-euˬ naˇ gawˇ taˬ leˇ tehꞈ-a” lehˇ bi ehˇ gaˬ-iˇ-euˬ meh.

¹¹ Ehˇ kʼawꞈ, Neˬmaˬ nui ma pehˇ-eu laꞈ kʼoeˇ doˆ-iˇ-awˇ, heu loꞈ-ehˇ ehˇ-eu meh. “Aˬ yawꞈ-euˬ gʼawˇ mawˇ ngaˇ jawˇ gaˇ oe doˆ-awˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ-eu laꞈ kʼoeˇ, ngaˬ-euˬ maˇ naˇ kʼoeˇ taˆ aˬ laꞈ cawˬ ja-awˇ, laˆ taˬ nehˬ laꞈ-eu tsaˬ tehꞈ-a.

¹² Kʼoeˇ uˬ taꞈ, Suˇliˆ miˇ kʼahˬ-ahˇ yoeˇ-eu Aˬbaˬnaˬ lawˇ baˬ hawˇ-eu Paˬpaˬ lawˇ baˬ-aˬ, Iˇsaˬleˬlaˆ miˇ kʼahˬ-ahˇ yoeˇ-eu lawˇ baˬ dawˬ tawˆ luꞈ naˆ maˬ tseˇ muiˬ dzehˬ-eu maˬ ngeuˇ-a loˇ. Lawˇ baˬ kʼoeˇ deuˬ-ahˇ ngaˇ dzuiꞈ shawˇ kʼawꞈ, ngaˬ-euˬ naˇ gawˇ taˬ leˇ nya tehꞈ-a.”

¹³ Ehˇ kʼawꞈ, aˬ yawꞈ-euˬ zaˬ kʼaˆ tiˬ gʼaˬ aˬ yawꞈ-euˬ dawˬ peh le-awˇ ehˇ-eu, “Yaw huiˬ gʼaˬ-oˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ ui cuiˆ yaw kʼaˆ-ehˇ shaˬ shaˬ-ehˇ ya mˇ-eu jeˬ nawˬ-ahˇ ehˇ nehˬ laꞈ law nmˇ-aˬ, nawˇ naˇ haˬ geuꞈ-eu duˇ. Toˆ-ehˇ ngeuˇ naˇ, nawˬ-euˬ gʼawˇ mawˇ dzuiꞈ shawˇ-eu tehꞈ-ehˇ kʼawꞈ, naˇ gawˇ taˬ leˇ tehꞈ-a lehˇ aˬ yawꞈ ehˇ-eu-aˬ, aˬ jeˬ miˇ neh nawˇ maˬ mˇ-ehˇ byehˇ-eu gʼeh te.”

¹⁴ Kʼoeˇ ngeh, Yawˇdaˬ lawˇ baˬ-ahˇ Neˬmaˬ iˇ-awˇ, Eˇliˇshehˇ neh kʼaˇ ehˇ nehˬ-euˬ loꞈ-ehˇ shiꞈ poˆ keuˆ ni iˇ byoˆ byoˆ ngeh, aˬ yawꞈ-euˬ naˇ gawˇ taˬ tsehˆ leˇ-awˇ, aˬ yawꞈ-euˬ shaˬ jiˇ kʼawꞈ, zaˬ yaw nyiˇ-euˬ shaˬ jiˇ loꞈ-ehˇ muiˬ laˇ shawˇ laˇ-euˬ meh.

¹⁵ Kʼoeˇ naˇ, aˬ yawꞈ-euˬ tsawˇ haˬ dawˬ tawˆ luꞈ sheuˬ-awˇ, Eˇliˇshehˇ jawˇ gaˇ paˇ gʼoꞈ poˆ leˇ-awˇ, heu loꞈ-ehˇ ehˇ-eu meh. “Nymˬ-mˇ poˆ jawˇ-aˬ, Iˇsaˬleˬlaˆ-euˬ Miˬyehˇ maˬ ngeuˇ naˇ miˬyehˇ nui gʼaˬ maˬ jawˇ-eu ngaˇ lehˇ ngaˇ siˬ duˬ-eu ma. Teu miˇ neh, ngaˬ neh biꞈ-euˬ laꞈ sawˬ-ahˇ ha geuꞈ nehˬ laꞈ-awˬ.”

¹⁶ Eˇliˇshehˇ ehˇ-eu, “Aˬ cawˬ neh biꞈ laˬ-euˬ laꞈ sawˬ-ahˇ ngaˇ maˬ ha geuꞈ lehˇ, ngaˇ uˬ duˬ tahˬ luꞈ-eu dehꞈ luꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ ngaˇ kamˬ-eu ma.” Neˬmaˬ gʼaˬ, “Ha geuꞈ nehˬ laꞈ-awˬ” lehˇ shaˇ kʼawꞈ, aˬ yawꞈ maˬ ha geuꞈ nehˬ-a.

¹⁷ Neˬmaˬ ehˇ-eu, “Ngaˬ neh biꞈ-euˬ laꞈ sawˬ-ahˇ nawˇ maˬ ha geuꞈ te lehˇ ngeuˇ naˇ kʼawꞈ, mahˬ shaˆ lawˬ nyiˬ mawˇ byah ni miˇ tsaˬ bi tawˬ kʼoꞈ gʼeh nehˬ laꞈ-awˬ. Aˬ jeˬ miˇ neh ehˇ naˇ, nymˬ-mˇ neh aˇ dahˬ beh-awˇ, Sahˬpaˬ Miˬyehˇ-ahˇ maˬ ngeuˇ naˇ, miˬ yehˇ nui gʼaˬ-ahˇ lawˇ-eu shehˇ-eu hawˇ-eu miˬ dzaˬ dzah puiˆ-awˇ lawˇ-eu jeˬ ngaˇ maˬ paˇ lawˇ ma.

¹⁸ Ehˇ kʼawꞈ, Suˇliˆ miˬ yehˇ pyeuꞈ-eu Leˬmoˬ miˬ yehˇ-euˬ uˬ duˬ tahˬ nymˇ-ahˇ, ngaˬ-euˬ sahˬ paˬ mehˬ nah ngaˇ caw teh-awˇ uˬ duˬ tahˬ leˇ ngeh, Sahˬpaˬ Miˬyehˇ ngaˬ-ahˇ iˬ baˇ pyehˬ nehˬ laꞈ tehꞈ-a lehˇ ngaˇ jah ma. Aˬ diˇ aˬ maˇ Sahˬpaˬ Miˬyehˇ ngaˬ-ahˇ iˬ baˇ pyehˬ neh laꞈ tehꞈ-a.”

¹⁹ Kʼoeˇ naˇ, “Nui saˇ oꞈ-eu laꞈ kʼoeˇ gʼoꞈ leˇ-awˬ” lehˇ Eˇliˇshehˇ ehˇ ngeh, Neˬmaˬ doˆ-iˇ-euˬ meh. Neˬmaˬ ui cuiˆ iˇ kaˬ ngeh,

²⁰ Eˇliˇshehˇ-euˬ zaˬ kʼaˆ Geˬhaˬziˇ yawˬ haˇ yawˬ ha ehˇ-eu, “Ngaˬ-euˬ yaw sahˇ gʼaˬ Neˬmaˬ-ahˇ tiˬ jeˬ-iˬ maˬ shaˇ ni bi gʼoꞈ leˇ-euˬ nga. Suˇliˆ tsawˇ haˬ kʼoeˇ gʼaˬ neh biꞈ yaꞈ-euˬ jeˬ aˬ yawꞈ ha geuꞈ-eu tsaˬ meh. Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ-euˬ mehˬ nah ngaˇ caw teh leˇ-awˇ, tiˬ jeˬ paˬ shaˇ geuꞈ ma.”

²¹ Kʼoeˇ naˇ, Neˬmaˬ-euˬ mehˬ nah aˬ yawꞈ caw teh leˇ-euˬ meh. Tsawˇ haˬ tiˬ gʼaˬ cehˆ laꞈ gaˇ Neˬmaˬ ya mawˇ ngeh, mahˬ laˆ lawˬ-ahˇ neh tsawˬ ka-awˇ, “Aˬ jeˬ gʼeh ta” lehˇ naˇ haˬ-euˬ meh.

²² Geˬhaˬziˇ ehˇ-eu, “Tiˬ jeˬ-iˬ maˬ ngeuˇ-a. Ehˇ kʼawꞈ, ngaˬ-euˬ yaw sahˇ gʼaˬ ngaˬ-ahˇ pyehˬ gʼeh laꞈ-awˇ, nawˬ-ahˇ heu loꞈ-ehˇ bi ehˇ laˇ-euˬ meh. Nymˬ-mˇ tseuˆ tseuˆ hawˇ-eu, Eˇpaˬleˬ miˇ kʼahˬ gawˬ jawˬ gawˬ duˇ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ nyiˬ muˇ oe keuˆ taˬ-euˬ meh. Aˬ yawꞈ maꞈ gʼaˇ duˬ pyuˇ maˇ byaˆ smˬ heˇ byaˆ hawˇ-eu, muiˬ-eu mehˬ tsoeˬ nyiˬ shehˆ bi biꞈ laꞈ mawꞈ nya lehˇ, nawˬ-ahˇ bi ehˇ gaˬ laˇ-euˬ meh.”

²³ Kʼoeˇ ngeh, “Pyuˇ maˇ byaˆ koꞈ heˇ byaˆ yuˇ gʼeh-awˬ” lehˇ Neˬmaˬ ehˇ-eu meh. Aˬ yawꞈ kʼoeˇ loꞈ-ehˇ ehˇ-awˇ, pyuˇ maˇ byaˆ kʼoeˇ deuˬ-ahˇ pehˇ zeuˇ nyiˬ zeuˇ laꞈ kʼoeˇ dawˆ ahˇ-awˇ paꞈ cuꞈ nehˬ-euˬ meh. Kʼoeˇ naˇ, muiˬ-eu mehˬ tsoeˬ nyiˬ shehˆ paˇ biꞈ nehˬ-awˇ, aˬ yawꞈ-euˬ zaˬ kʼaˆ nyiˬ gʼaˬ-ahˇ kʼehˇ-awˇ, Geˬhaˬziˇ-euˬ mehˬ hu pyuˇ hawˇ-eu mehˬ tsoeˬ kʼoeˇ deuˬ bi biꞈ ha-iˇ-euˬ meh.

²⁴ Eˇliˇshehˇ jawˇ-eu gawˬ duˇ-ahˇ aˬ yawꞈ maꞈ le keuˆ ngeh, Geˬhaˬziˇ gʼaˬ pyuˇ pehˇ zeuˇ kʼoeˇ nyiˬ zeuˇ-ahˇ, nymˇ laꞈ kʼoeˇ baꞈ ahˇ taˬ-euˬ meh.

²⁵ Kʼoeˇ naˇ, zaˬ kʼaˆ kʼoeˇ nyiˬ gʼaˬ-ahˇ bi gʼoꞈ leˇ-euˬ meh. Aˬ yawꞈ nymˇ laꞈ kʼoeˇ gʼoꞈ uˇ leˇ ngeh, “Nawˇ aˬ gaˇ iˇ teˬ” lehˇ, Eˇliˇshehˇ naˇ haˬ-euˬ meh. “Ngaˇ tiˬ gaˇ-iˬ maˬ iˇ-aˬ” lehˇ aˬ yawꞈ ehˇ kʼoꞈ nehˬ-euˬ meh.

²⁶ Ehˇ kʼawꞈ, Eˇliˇshehˇ heu loꞈ-ehˇ ehˇ-eu meh. “Tsawˇ haˬ kʼoeˇ gʼaˬ mahˬ laˆ lawˬ-ahˇ neh tsawˬ ka-awˇ, nawˬ-ahˇ tahˬ puˬ le ngeh, yaw sahˇ laꞈ kʼoeˇ ngaˇ kʼoeˇ gaˇ jawˇ luꞈ-eu siˬ nya ma loˇ. Aˇ yamˬ heu yamˬ-aˬ, pyuˇ maˬ ehˇ, mehˬ tsoeˬ maˬ ehˇ, saˬ loˬ yaˇ kmˇ maˬ ehˇ, aˬ gaꞈ yaˇ kmˇ maˬ ehˇ, yawˇ maˬ ehˇ, mawˇ neˇ maˬ ehˇ, zaˬ kʼaˆ maˬ ehˇ, ya ha geuꞈ-eu aˇ yamˬ maˬ ngeuˇ-a.

²⁷ Nymˬ-mˇ poˆ jawˇ, Neˬmaˬ-euˬ naˇ gawˇ kʼoeˇ nawˬ-ahˇ nyawˬ laˇ-awˇ, nawˇ hawˇ-eu nawˬ-eu zaˬ nawˬ-euˬ uˆ deuˬ dawˬ tawˆ luꞈ, mˬ maˬ maˬ byaˆ zaˇ ziˇ naˇ gawˇ kʼoeˇ ya daˬ tehꞈ-a.” Geˬhaˬziˇ doˆ-iˇ ngeh, nyawˬ naˇ laˇ-awˇ, aˬ yawꞈ-euˬ shaˬ jiˇ ngehˇ loꞈ-ehˇ pyuˇ deuˬ ni pyeuꞈ-iˇ-euˬ meh.