2 Sahˬpaˬ 3 - Akha

Iˇsaˬleˬlaˆ miˇ kʼahˬ hawˇ-eu Mawˇbaˆ miˇ kʼahˬ guiˇ deuˆ-euˬ

¹ Sahˬ paˬ Yeˬhawˇshaˬpaˇ Yuˇdaˆ miˇ kʼahˬ-ahˇ uˆ lahˇ-euˬ tseˇ yehꞈ kʼoꞈ tiˬ kʼoꞈ-ahˇ, Aˬhaˆ-euˬ aˬ li Yoˇlamˬ gʼaˬ, Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ tseˇ nyiꞈ kʼoꞈ uˆ lahˇ-euˬ meh.

² Sahˬpaˬ Miˬyehˇ-euˬ mehˬ shi aˬ yawꞈ iˬ baˇ mˇ-euˬ meh. Ehˇ kʼawꞈ, aˬ yawꞈ-euˬ aˬ da Aˬhaˆ hawˇ-eu aˬ yawꞈ-euˬ aˬ ma Yeˬsaˬbeˬlaˇ naˆ ni aˬ yawꞈ iˬ baˇ maˬ mˇ-a. Baˬlaˇ miˬ yehˇ-ahˇ uˬ duˬ tahˬ-eu gʼaˇ duˬ aˬ yawꞈ-euˬ aˬ da neh ka tuˇ taˬ yaꞈ-euˬ tahˬ pahˬ aˬ ma mawˇ kawˇ-ahˇ, aˬ yawꞈ gʼeu coˬ-euˬ meh.

³ Ehˇ kʼawꞈ, aˬ yawꞈ-euˬ mehˬ hu sahˬ paˬ geuꞈ dzeuˇ yaꞈ-euˬ Neˬbaˇ-euˬ aˬ li Yeˬyawˇbamˬ loꞈ-ehˇ, Iˇsaˬleˬlaˆ miˇ kʼahˬ iˬ baˇ mˇ ni sheuˬ gʼeh nehˬ-eu jeˬ-ahˇ maˬ byehˇ-a.

⁴ Mawˇbaˆ sahˬ paˬ Meˬshaˬ-aˬ, yawˇ cu-eu tsawˇ haˬ pyeuꞈ-awˇ, tiˬ kʼoꞈ-euˬ yawˇ zaˬ tiˬ seh mawˇ maˬ ehˇ, yawˇ tiˬ seh mawˇ-ahˇ tehˬ uiˬ-euˬ yawˇ caꞈ hm deuˬ maˬ ehˇ, Iˇsaˬleˬlaˆ sahˬ paˬ-ahˇ ya biꞈ-eu meh.

⁵ Ehˇ kʼawꞈ, Iˇsaˬleˬlaˆ sahˬ paˬ Aˬhaˆ shiˇ ngeh jawˇ, Iˇsaˬleˬlaˆ miˇ kʼahˬ-ahˇ aˬ yawꞈ puiˬ-euˬ meh.

⁶ Kʼoeˇ ngeh, sahˬ paˬ Yoˇlamˬ gʼaˬ Saˬmaˬliˆ meuˬ-ahˇ neh tiˬ poˆ tehꞈ-ehˇ doˆ le-awˇ, aˬ yawꞈ-euˬ yehˇ dawˬ tawˆ luꞈ-ahˇ kuˇ uiˬ-euˬ meh.

⁷ Yuˇdaˆ sahˬ paˬ Yeˬhawˇshaˬpaˇ jawˇ gaˇ kʼawꞈ tsawˇ haˬ pyehˬ gʼeh-awˇ, “Mawˇbaˆ sahˬ paˬ ngaˬ-ahˇ puiˬ-euˬ meh. Nawˇ ngaˬ nehˬ-ehˇ aˬ yawꞈ-ahˇ guiˇ deuˆ-iˇ ma loˇ” lehˇ bi ehˇ gaˬ-iˇ-euˬ meh. Sahˬpaˬ Yeˬhawˇshaˬpaˇ ehˇ-eu, “Nawˬ nehˬ-ehˇ ngaˇ guiˇ deuˆ-iˇ ma. Nawˬ-ahˇ ngaˇ nui ma gm ma. Ngaˬ-euˬ tsawˇ haˬ hawˇ-eu ngaˬ-euˬ mahˬ deuˬ kʼawꞈ, nawˬ-euˬ tsawˇ haˬ hawˇ-eu nawˬ-euˬ mahˬ deuˬ-ahˇ duˇ tehꞈ-a.

⁸ Aˬ geu paw neh iˇ-awˇ deuˆ-iˇ nmˇ.” Yoˇlamˬ ehˇ-eu, “Eˬdoˬ miˇ kʼahˬ bawˇ tsahˬ bawˇ dahˇ paw neh, gaˇ jaw gʼawˬ mahˇ ni jaw-awˇ deuˆ-iˇ ma.”

⁹ Kʼoeˇ naˇ, Iˇsaˬleˬlaˆ sahˬ paˬ gʼeh, Yuˇdaˆ sahˬ paˬ hawˇ-eu Eˬdoˬ sahˬ paˬ nehˬ-ehˇ tiˬ kawˆ loꞈ-ehˇ gʼoˆ doˆ-iˇ-euˬ meh. Aˬ yawꞈ maꞈ doˆ-iˇ-euˬ shiꞈ nah ehˇ gʼaˬ ni byah laˇ ngeh, iˇ cuꞈ nym laˇ-awˇ, tsawˇ haˬ gʼaˇ duˬ maˬ ehˇ, jeˬ zaˬ gʼaˇ duˬ maˬ ehˇ, iˇ cuꞈ tiˬ pawꞈ-iˬ maˬ jaˆ-a.

¹⁰ Kʼoeˇ ngeh jawˇ, “Aˬ dui sahˬ paˬ smˇ gʼaˬ-ahˇ Sahˬpaˬ Miˬyehˇ kuˇ dzoeˇ-awˇ, Mawˇbaˆ sahˬ paˬ-euˬ aˬ laꞈ laꞈ kʼoeˇ a nehˬ-eu lehˇ gʼeh-eu ngaˇ” lehˇ, Iˇsaˬleˬlaˆ sahˬ paˬ ehˇ-eu meh.

¹¹ “Aˬ dui gʼaˇ duˬ Sahˬpaˬ Miˬyehˇ-ahˇ mehˬ bawˬ bi mˇ haw-eu gʼaˇ duˬ, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ na heu gaˇ maˬ jawˇ-a loˇ” lehˇ, sahˬ paˬ Yeˬhawˇshaˬpaˇ ehˇ ngeh, “Shaˬpaˇ-euˬ aˬ li Eˇliˇshehˇ heu gaˇ jawˇ meh” lehˇ, sahˬ paˬ Yoˇlamˬ-euˬ guiˇ maꞈ kʼoeˇ taˆ yaw huiˬ yaw mahˇ geuꞈ luꞈ-eu tiˬ gʼaˬ ehˇ-eu meh. “Aˬ yawꞈ-aˬ, Eˇliˇyaˆ-euˬ gʼaˬ zaˬ meh” lehˇ ehˇ-eu meh.

¹² Kʼoeˇ ngeh jawˇ, “Aˬ yawꞈ-aˬ, aˬ diˇ aˬ maˇ Miˬyehˇ gʼaˇ duˬ ngehˬ dah-eu tsawˇ haˬ meh” lehˇ sahˬ paˬ Yeˬhawˇshaˬpaˇ ehˇ-awˇ, sahˬ paˬ smˇ gʼaˬ luꞈ Eˇliˇshehˇ jawˇ gaˇ iˇ-euˬ meh.

¹³ Iˇsaˬleˬlaˆ sahˬ paˬ-ahˇ Eˇliˇshehˇ ehˇ nehˬ-eu, “Ngaˇ nawˬ-ahˇ aˬ jeˬ miˇ neh ya caw ba ta. Nawˬ da nawˬ ma gʼoe-euˬ miˬ yehˇ gʼaˇ duˬ ngehˬ dah-eu kʼoeˇ deuˬ jawˇ gaˇ iˇ-awˬ tawˇ.” Yoˇlamˬ ehˇ-eu, “Toˆ-ehˇ maˬ ngeuˇ-a. Mawˇbaˆ sahˬ paˬ-euˬ aˬ laꞈ laꞈ kʼoeˇ a nehˬ-eu lehˇ, ngaˬ ha sahˬ paˬ smˇ gʼaˬ-ahˇ kuˇ dzoeˇ nehˬ laꞈ-euˬ gʼaˬ-aˬ, Sahˬpaˬ Miˬyehˇ meh.”

¹⁴ Eˇliˇshehˇ ehˇ-eu, “Nawˬ-ahˇ nui ma gm-eu Yuˇdaˆ sahˬ paˬ Yeˬhawˇshaˬpaˇ-ahˇ ngaˇ yaw zeu baw neh maˬ ngeuˇ law nmˇ-aˬ, nawˬ-ahˇ ngaˇ tiˬ jeˬ-iˬ maˬ taꞈ lehˇ, ngaˇ uˬ duˬ tahˬ luꞈ-eu dehꞈ luꞈ-eu Sahˬpaˬ Miˬyehˇ mehˬ shi, iˬ nah ngaˇ kamˬ tsehˆ-eu lehˇ ma. Nymˬ-mˇ deuˇ-mˬ diˬ nya-eu tsawˇ haˬ tiˬ gʼaˬ sheu laꞈ-awˬ.”

¹⁵ Deuˇ-mˬ diˬ nya-eu tsawˇ haˬ kʼoeˇ gʼaˬ deuˇ-mˬ diˬ luꞈ ngeh, Sahˬpaˬ Miˬyehˇ-euˬ baoˬ Eˇliˇshehˇ kʼoeˇ taˆ keuˆ le-euˬ meh.

¹⁶ Eˇliˇshehˇ ehˇ-eu, “Sahˬpaˬ Miˬyehˇ heu loꞈ-ehˇ ehˇ-eu meh. Iˇ cuꞈ gui iˇ-euˬ lawˇ baˬ heu gawˆ doe ni uiˇ kʼehˬ caˬ-awˬ.

¹⁷ Uˬ yehˇ hawˇ-eu jaˬ lehˇ naw maꞈ maˬ ya mawˇ kʼawꞈ, lawˇ baˬ heu gawˆ iˇ cuꞈ byah laˇ-awˇ, naw maꞈ hawˇ-eu naw maꞈ-euˬ jeˬ zaˬ deuˬ iˇ cuꞈ ya dawˇ dehˆ tehꞈ-a lehˇ ehˇ-eu meh.”

¹⁸ Eˇliˇshehˇ paˇ ehˇ-eu, “Gaˇ heu-aˬ, Sahˬpaˬ Miˬyehˇ gʼaˇ duˬ awˬ dui dui-eu gaˇ meh. Mawˇbaˆ miˇ kʼahˬ kʼawꞈ, naw maꞈ-euˬ aˬ laꞈ laꞈ kʼoeˇ aˬ yawꞈ a nehˬ laꞈ tehꞈ-a.

¹⁹ Aˬ yawꞈ maꞈ neh gawˬ ziꞈ taˬ-euˬ haw muiˬ dui dui-eu meuˬ deuˬ-ahˇ naw maꞈ ya deuˆ gʼaˬ tehꞈ-a. Aˬ yawꞈ maꞈ-euˬ aˇ siˬ aˇ bawˇ deuˬ-ahˇ naw maꞈ tuˇ dzeh-awˇ, aˬ yawꞈ maꞈ-euˬ lah duˬ deuˬ-ahˇ naw maꞈ ya duˬ dzm tehꞈ-a. Miˇ tsaˬ miˇ muiˬ muiˬ dui dui-eu aˬ yawꞈ maꞈ-euˬ deh yaˇ deuˬ-ahˇ kʼaˬ lo ngawˬ tsoeˬ-eu laꞈ kʼoeˇ, naw maꞈ ya laˆ cawˆ tehꞈ-a.”

²⁰ Yawˬ shawˬ yawˬ lawˇ-eu shehˇ-eu jeˬ mˇ-eu aˇ yamˬ keuˆ laˇ ngeh, Eˬdoˬ miˇ kʼahˬ paw neh iˇ cuꞈ yoeˇ ka le-awˇ, miˇ tsaˬ-ahˇ iˇ cuꞈ yoeˇ byah jiˇ-euˬ meh.

²¹ Sahˬ paˬ smˇ gʼaˬ aˬ yawꞈ maꞈ-ahˇ guiˇ deuˆ-eu lehˇ oe luꞈ-eu gaˇ kawˆ, Mawˇbaˆ tsawˇ haˬ deuˬ ya gaˬ ngeh, guiˇ deuˆ-eu keu ka baꞈ coeˇ laˇ-euˬ huiˬ zaˬ nyiˇ zaˬ dawˬ tawˆ luꞈ kuˇ uiˬ jiˇ-awˇ, miˇ kaˬ dawˬ peh loꞈ-euˬ meh.

²² Yawˬ shawˬ yawˬ aˬ yawꞈ maꞈ uˬ suˇ tuˇ ngeh, iˇ cuꞈ-ahˇ nahˇ ma yaw shehꞈ tahˬ-awˇ shiˬ loꞈ-ehˇ neˇ tseuˆ ni jaˆ luꞈ gaˇ ya mawˇ-euˬ meh.

²³ Aˬ yawꞈ maꞈ ehˇ-eu, “Kʼoeˇ-aˬ, aˬ diˇ aˬ maˇ shiˬ ngaˇ. Muiˇ-eu deuˬ-euˬ guiˇ maꞈ smˇ maꞈ yaw kaˬ deuˆ ceh ceh-awˇ, tiˬ gʼaˬ tiˇ gʼaˬ deuˆ sehꞈ jiˇ-euˬ ngaˇ. Aˬ dui maꞈ le-awˇ myawˬ yuˇ geuꞈ-iˇ kaˇ-euˇ.”

²⁴ Ehˇ kʼawꞈ, Iˇsaˬleˬlaˆ tsawˇ jeuˬ-euˬ taˆ dawˬ peh aˬ yawꞈ maꞈ le keuˆ ngeh, Iˇsaˬleˬlaˆ tsawˇ haˬ deuˬ aˬ yawꞈ maꞈ-ahˇ deuˆ-awˇ teh kʼoꞈ gʼeh-euˬ meh. Iˇsaˬleˬlaˆ tsawˇ haˬ deuˬ neh Mawˇbaˆ tsawˇ haˬ deuˬ-ahˇ teh teh-ehˇ sehꞈ-euˬ meh.

²⁵ Meuˬ deuˬ-ahˇ aˬ yawꞈ maꞈ laˆ cawˆ nehˬ jiˇ-awˇ, deh yaˇ kʼaˇ muiˬ-eu kʼaˬ lo lo gahˬ pyeuꞈ jiˇ ni, tiˬ gʼaˬ-euˬ kʼaˬ lo tiˬ siˬ yawˬ gʼaˬ na luꞈ biˬ ahˇ-euˬ meh. Iˇ cuꞈ lah duˬ deuˬ-ahˇ aˬ yawꞈ maꞈ duˬ tsoeˬ-awˇ, aˇ siˬ aˇ bawˇ deuˬ tuˇ dzeh-euˬ meh. Aˇ saˬ saˬ laˇ ngeh, sahˬ paˬ jawˇ-eu meuˬ pyeuꞈ-eu Kiˇlaˆheˬyehˆ meuˬ tiˬ meuˬ tehꞈ-ehˇ maˬ cawˆ-iˇni dzeˇ-eu meh. Caˬ oeˬ pi luꞈ-eu deuˬ meuˬ kʼoeˇ meuˬ-ahˇ loꞈ jawˬ-awˇ guiˇ deuˆ-euˬ meh.

²⁶ Mawˇbaˆ sahˬ paˬ-aˬ, aˬ cawˬ aˬ yawꞈ-ahˇ guiˇ deuˆ gʼaˬ shaw-iˬ-eu gaˇ kawˆ siˬ leˇ ngeh, mi cehˇ baꞈ-eu yehˇ shiꞈ yaˇ gʼaˬ sheuˬ-awˇ, muiˇ-eu deuˬ jawˇ gaˇ neh tahˬ paˆ doˆ gʼeh-awˇ, Suˇliˆ sahˬ paˬ jawˇ gaˇ cehˆ uˇ leˇ-eu lehˇ leh jeh-euˬ meh. Ehˇ kʼawꞈ, aˬ yawꞈ neh noeˬ-euˬ loꞈ-ehˇ maˬ pyeuꞈ leˇ-a.

²⁷ Kʼoeˇ miˇ neh, aˬ yawꞈ shiˇ naˇ dzoeˬ dzaˬ oꞈ-eu gʼaˬ pyeuꞈ-eu aˬ yawꞈ-euˬ aˬ li aˬ yuiꞈ yuiꞈ saˬ gʼaˬ-ahˇ, meuˬ meuˬ lahˇ kʼoeˇ taˆ Mawˇbaˆ miˬ yehˇ-ahˇ aˬ yawꞈ lawˇ nehˬ-euˬ meh. Kʼoeˇ loꞈ-ehˇ jahˇ gaˇ Iˇsaˬleˬlaˆ tsawˇ haˬ deuˬ ya mawˇ ngeh, zahˬ leˇ-awˇ, yawˬ ha-euˬ miˇ kʼahˬ-ahˇ gʼoꞈ leˇ jiˇ-euˬ meh.