2 Sahˬpaˬ 25 - Akha

Yeˬluˇsaˬlehˬ meuˬ guiˇ bi deuˆ gʼaˬ-euˬ

¹ Baˬbuˇloˬ sahˬ paˬ Neˬbuˬkaˬneˬzaˬ-ahˇ Zeˬdaˬkiˇ puiˬ-awˇ, Neˬbuˬkaˬneˬzaˬ gʼaˬ aˬ yawꞈ-euˬ guiˇ maꞈ dawˬ tawˆ luꞈ sheuˬ-awˇ, Zeˬdaˬkiˇ sahˬ paˬ geuꞈ luꞈ-eu gʼoeˬ kʼoꞈ tiˬ kʼoꞈ, ba la tseˇ siˬ tiˬ siˬ, tseˇ nah tiˬ nah-ahˇ, Yeˬluˇsaˬlehˬ meuˬ-ahˇ guiˇ deuˆ le-euˬ meh. Meuˬ-euˬ laꞈ nyiˇ paw aˬ yawꞈ maꞈ taˆ tsoˆ-awˇ jawˇ-awˇ, meuˬ meuˬ lahˇ jawˬ jawˬ-ehˇ miˇ tsaˬ ciˬ goˇ-euˬ meh.

² Zeˬdaˬkiˇ sahˬ paˬ geuꞈ luꞈ-eu tseˇ kʼoꞈ tiˬ kʼoꞈ-ahˇ keuˆ ni, Yeˬluˇsaˬlehˬ meuˬ-ahˇ aˬ yawꞈ maꞈ loꞈ jawˬ taˬ-euˬ meh.

³ Kʼoeˇ ngeh kʼoꞈ ba la oeˬ siˬ tiˬ siˬ tseˇ nah tiˬ nah-ahˇ, meuˬ laꞈ kʼoeˇ mehꞈ dui shuꞈ dui dui laˇ-awˇ, dzaˬ-eu maˬ jaˆ-ehˇ pyeuꞈ laˇ taˬ-euˬ meh.

⁴ Meuˬ meuˬ lahˇ laˆ pehꞈ-awˇ, Baˬbuˇloˬ tsawˇ haˬ deuˬ loꞈ jawˬ taˬ-euˬ kʼawꞈ, yehˇ dawˬ tawˆ luꞈ uˬ ciꞈ paw cehˆ kʼoeˬ doˆ jiˇ-euˬ meh. Sahˬpaˬ-euˬ yaˇ kmˇ paw aˬ yawꞈ maꞈ iˇ-awˇ, meuˬ meuˬ lahˇ nyiˬ pyawˬ dzoeˇ le-euˬ laꞈ coeˇ-ahˇ jaˆ-eu lahˇ kʼehˬ-ahˇ neh cehˆ doˆ-awˇ, Yawˇdaˬ lawˇ baˬ deh kʼawꞈ paw cehˆ-euˬ meh.

⁵ Ehˇ kʼawꞈ, Baˬbuˇloˬ guiˇ maꞈ deuˬ sahˬ paˬ Zeˬdaˬkiˇ-euˬ mehˬ nah teh-awˇ, Yeˬliˇkoˇ meuˬ dawˬ peh jaˆ-eu deh ga-ahˇ, aˬ yawꞈ-ahˇ nyehꞈ mi-euˬ meh. Aˬ yawꞈ-euˬ yehˇ dawˬ tawˆ luꞈ aˬ yawꞈ-ahˇ byehˇ dzeh-awˇ cehˆ-euˬ meh.

⁶ Yiˇbaˬlahˬ meuˬ-ahˇ jawˇ luꞈ-eu sahˬ paˬ Neˬbuˬkaˬneˬzaˬ jawˇ gaˇ Zeˬdaˬkiˇ-ahˇ nyehꞈ gʼeh-awˇ, Neˬbuˬkaˬneˬzaˬ neh aˬ yawꞈ-ahˇ yaˇ kʼaˬ daˇ nehˬ-euˬ meh.

⁷ Zeˬdaˬkiˇ-euˬ aˬ li deuˬ-ahˇ, Zeˬdaˬkiˇ-euˬ mehˬ shi sehꞈ mehˬ nehˬ-euˬ meh. Kʼoeˇ naˇ, Zeˬdaˬkiˇ-euˬ myaˆ nuiˆ Neˬbuˬkaˬneˬzaˬ neh tsawˆ behꞈ-awˇ, Zeˬdaˬkiˇ-ahˇ shmˇ caˆ paꞈ-awˇ, Baˬbuˇloˬ miˇ kʼahˬ-ahˇ tsahˇ kʼoꞈ gʼeh-euˬ meh.

Uˬ duˬ tahˬ nymˇ nymˇ ma laˆ cawˆ-euˬ

⁸ Baˬbuˇloˬ miˇ kʼahˬ-ahˇ Neˬbuˬkaˬneˬzaˬ sahˬ paˬ geuꞈ-awˇ uˆ lahˇ-euˬ tseˇ gʼoeˬ kʼoꞈ tiˬ kʼoꞈ, ba la ngaˬ siˬ tiˬ siˬ shiꞈ nah-ahˇ, sahˬ paˬ-ahˇ nui noeˬ nui duˇ biꞈ-eu gʼaˬ hawˇ-eu sahˬ paˬ-euˬ guiˇ maꞈ-ahˇ uˆ lahˇ-eu gʼaˬ geuꞈ luꞈ-eu Neˬbuˬzaˬlaˬdaˬ gʼaˬ, Yeˬluˇsaˬlehˬ meuˬ-ahˇ uˇ le-euˬ meh.

⁹ Uˬ duˬ tahˬ nymˇ nymˇ ma maˬ ehˇ, sahˬ paˬ-euˬ hawˇ nymˇ maˬ ehˇ, Yeˬluˇsaˬlehˬ meuˬ laꞈ kʼoeˇ tsawˇ myahˇ doˆ-eu tsawˇ haˬ deuˬ-euˬ nymˇ dawˬ tawˆ luꞈ maˬ ehˇ, aˬ yawꞈ neh miˬ dzaˬ keuˬ dzeh jiˇ-euˬ meh.

¹⁰ Aˬ yawꞈ-euˬ yehˇ deuˬ-aˬ, Yeˬluˇsaˬlehˬ meuˬ tiˬ jawˬ gawˬ taˬ-euˬ meuˬ meuˬ lahˇ laˆ pyaˆ-euˬ meh.

¹¹ Meuˬ laꞈ kʼoeˇ dzeˇ yaꞈ-euˬ tsawˇ haˬ deuˬ hawˇ-eu laꞈ myawˬ laꞈ sawˆ nya-eu deuˬ-ahˇ, Baˬbuˇloˬ sahˬ paˬ jawˇ gaˇ cehˆ jawˇ leˇ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ, Baˬbuˇloˬ miˇ kʼahˬ-ahˇ Neˬbuˬzaˬlaˬdaˬ neh sheuˬ gʼeh-euˬ meh.

¹² Ehˇ kʼawꞈ, yaw shaˬ zaˬ deuˬ-ahˇ Yeˬluˇsaˬlehˬ meuˬ laꞈ kʼoeˇ bi jawˇ yaꞈ-awˇ, aˬ gaꞈ yaˇ kmˇ bi mˇ-awˇ, deh ma bi tsehˬ-euˬ meh.

¹³ Uˬ duˬ tahˬ nymˇ nymˇ ma laꞈ kʼoeˇ jaˆ-eu guiˬ shuiˇ kʼawˇ zeuˇ deuˬ hawˇ-eu laˆ lawˬ deuˬ maˬ ehˇ, guiˬ shuiˇ lah maˬ ehˇ, Baˬbuˇloˬ tsawˇ haˬ deuˬ neh deh pyaˆ doˆ jiˇ-awˇ, guiˬ shuiˇ dawˬ tawˆ luꞈ Baˬbuˇloˬ miˇ kʼahˬ-ahˇ yuˇ kʼoꞈ gʼeh jiˇ-euˬ meh.

¹⁴ Lawˇ duˬ laˆ shawˇ ngeh zmˬ-eu kuˬ tseuˆ deuˬ hawˇ-eu kʼaˬ lehˇ tawˆ ahˇ duˬ maˬ ehˇ, tsiˇ kʼmˬ laˆ saˆ doꞈ gaˇ zmˬ-eu keu ka deuˬ maˬ ehˇ, lawˇ ngeh shehˇ ngeh sehꞈ-euˬ jeˬ zaˬ-euˬ shiˬ ciˬ kʼmˇ-eu naˬ bo maˬ ehˇ, Uˬ duˬ tahˬ nymˇ nymˇ ma-ahˇ kʼaˇ zmˬ-eu guiˬ shuiˇ neh jahˇ taˬ-euˬ keu ka dawˬ tawˆ luꞈ, aˬ yawꞈ maꞈ neh yuˇ geuꞈ gʼeh jiˇ-euˬ meh.

¹⁵ Doꞈ luꞈ-eu miˬ jiˆ pehˆ ahˇ-eu mui za deuˬ hawˇ-eu naˬ bo bo zaˬ deuˬ ahˇ leˇ-ehˇ, shuiˇ neh kʼaˇ jahˇ taˬ-euˬ keu ka dawˬ tawˆ luꞈ kʼawꞈ, aˬ yawꞈ maꞈ neh yuˇ geuꞈ gʼeh jiˇ-euˬ meh.

¹⁶ Uˬ duˬ tahˬ nymˇ nymˇ ma laꞈ kʼoeˇ zmˬ-eu gʼaˇ duˬ, sahˬ paˬ Sawˇlaˬmoˬ neh guiˬ shuiˇ yuˇ-awˇ jahˇ taˬ-euˬ kʼawˇ zeuˇ nyiˬ zeuˇ, laˆ lawˬ deuˬ hawˇ-eu, lah kʼoeˇ lah-aˬ, maˬ saˆ haw jiˇ coeˇ gaˇ keuˆ ni kah-eu meh.

¹⁷ Kʼawˇ zeuˇ kʼoeˇ nyiˬ zeuˇ-aˬ, aˬ yawꞈ tiˬ shehˆ meh. Kʼawˇ zeuˇ tiˬ zeuˇ-euˬ oeˬ lmˇ nui paˆ goˇ-awˇ, kʼawˇ zeuˇ uˬ duˬ-ahˇ smˬ caˆ byah-eu uˬ kʼoˆ jahˇ tsoꞈ taˬ-euˬ meh. Uˬ kʼoˆ kʼoeˇ-ahˇ, guiˬ shuiˇ neh aˇ ka uˆ aˇ siˬ aˇ baˇ aˇ boꞈ boꞈ taˬ-euˬ meh.

Yuˇdaˆ tsawˇ haˬ deuˬ Baˬbuˇloˬ meuˬ-ahˇ bi sheuˬ gʼeh-euˬ

¹⁸ Kʼoeˇ uˬ taꞈ, guiˇ maꞈ-ahˇ uˆ lahˇ-eu gʼaˬ pyeuꞈ-eu Neˬbuˬzaˬlaˬdaˬ-aˬ, piˇ ma yaw huiˬ gʼaˬ pyeuꞈ-eu Seˬlehˇyaˬ-ahˇ maˬ ehˇ, piˇ ma nyiˬ gʼaˬ tiˬ gʼaˬ pyeuꞈ-eu Zeˬpaˬniˇ-ahˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ luꞈ-eu yaw huiˬ smˇ gʼaˬ-ahˇ maˬ ehˇ, sheuˬ geuꞈ gʼeh-euˬ meh.

¹⁹ Meuˬ laꞈ kʼoeˇ jawˇ-eu deuˬ laꞈ kʼoeˇ, guiˇ maꞈ-ahˇ uˆ lahˇ-eu gʼaˬ maˬ ehˇ, meuˬ laꞈ kʼoeˇ jawˇ yaꞈ-euˬ sahˬ paˬ-ahˇ nui noeˬ nui duˇ biꞈ-eu deuˬ laꞈ kʼoeˇ ngaˬ gʼaˬ maˬ ehˇ, guiˇ maꞈ-ahˇ uˆ lahˇ-eu gʼaˬ-euˬ laꞈ oˆ guiˇ paw taꞈ leˇ-eu jaˇ laˇ yuˇ-eu gʼaˬ maˬ ehˇ, tsawˇ myahˇ doˆ-eu nui deuˬ koꞈ tseˇ gʼaˬ maˬ ehˇ, aˬ yawꞈ sheuˬ geuꞈ gʼeh-euˬ meh.

²⁰ Neˬbuˬzaˬlaˬdaˬ neh aˬ yawꞈ maꞈ-ahˇ Yiˇbaˬlahˬ meuˬ-ahˇ, Baˬbuˇloˬ sahˬ paˬ jawˇ gaˇ sheuˬ gʼeh-euˬ meh.

²¹ Haˬmaˆ miˇ kʼahˬ Yiˇbaˬlahˬ meuˬ laꞈ kʼoeˇ, Baˬbuˇloˬ sahˬ paˬ neh aˬ yawꞈ maꞈ-ahˇ sehꞈ-euˬ meh. Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ miˇ kʼahˬ laꞈ kʼoeˇ neh, aˬ cawˬ neh kʼoeˇ loꞈ-ehˇ bi nyehꞈ byoˆ gʼeh jiˇ-euˬ meh.

Yuˇdaˆ miˇ kʼahˬ-ahˇ Geˬdaˬliˇ uˆ lahˇ-euˬ

²² Baˬbuˇloˬ sahˬ paˬ Neˬbuˬkaˬneˬzaˬ-aˬ, Shaˇpaˬ-euˬ oeˬ paˬ pyeuꞈ-eu Aˬhiˇkamˬ-euˬ aˬ li Geˬdaˬliˇ-ahˇ, Yuˇdaˆ miˇ kʼahˬ-ahˇ uˆ lahˇ-eu gʼaˬ bi geuꞈ-awˇ, Baˬbuˇloˬ miˇ kʼahˬ-ahˇ maˬ bi nyehꞈ gʼeh ni dzeˇ yaꞈ-euˬ deuˬ-ahˇ bi haw bi pyaˆ-euˬ meh.

²³ Baˬbuˇloˬ tsawˇ haˬ-euˬ laꞈ oꞈ maˬ awꞈ ni jawˇ luꞈ-eu Yuˇdaˆ tsawˇ haˬ yaw huiˬ yaw mahˇ deuˬ hawˇ-eu yehˇ deuˬ gaˇ kawˆ kʼoeˇ ya gaˬ ngeh, Miˇzaˬpaˬ meuˬ-ahˇ Geˬdaˬliˇ jawˇ gaˇ aˬ yawꞈ maꞈ iˇ-euˬ meh. Yaw huiˬ yaw mahˇ kʼoeˇ deuˬ-aˬ, Naˬdaˬniˇ-euˬ aˬ li Iˇshaˬmeˬlaˇ, Kaˬyaˬ-euˬ aˬ li Yoˇhaˬnaˬ, Neˬtawˇpaˬ meuˬ-ahˇ jawˇ-eu Taˬhuˇmehˇ-euˬ aˬ li Seˬlehˇyaˬ hawˇ-eu, Mawˇkah meuˬ-ahˇ jawˇ-eu Yeˬzaˬniˆ aˬ ha maꞈ meh.

²⁴ Aˬ yawꞈ maꞈ-ahˇ Geˬdaˬliˇ ehˇ nehˬ-eu, “Baˬbuˇloˬ sahˬ paˬ-euˬ gaˇ mˇ luꞈ-eu yaw huiˬ yaw mahˇ deuˬ-ahˇ naw maꞈ guˆ-eu maˬ loˬ-a lehˇ ngaˇ kamˬ ma. Baˬbuˇloˬ sahˬ paˬ uˆ lahˇ-eu uˬ moˆ naw maꞈ jawˇ-awˬ. Naw maꞈ gʼaˇ duˬ yawˬ jeˬ na luꞈ muiˬ tehꞈ-a.”

²⁵ Ehˇ kʼawꞈ, kʼoeˇ ngeh kʼoꞈ ba la shiꞈ siˬ tiˬ siˬ-ahˇ, sahˬ paˬ aˇ jeuˬ pyeuꞈ-eu Eˇliˇshaˬmaˇ-euˬ aˬ li Naˬdaˬniˇ-euˬ aˬ li Iˇshaˬmeˬlaˇ gʼaˬ, tsawˇ haˬ tseˇ gʼaˬ sheuˬ-awˇ, Miˇzaˬpaˬ meuˬ-ahˇ iˇ-awˇ, Geˬdaˬliˇ-ahˇ sehꞈ-euˬ meh. Geˬdaˬliˇ nehˬ-ehˇ jawˇ luꞈ-eu Iˇsaˬleˬlaˆ tsawˇ haˬ deuˬ hawˇ-eu, Baˬbuˇloˬ tsawˇ haˬ deuˬ-ahˇ kʼawꞈ, aˬ yawꞈ sehꞈ-euˬ meh.

²⁶ Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ, smˇ muiˬ maˬ ehˇ, iˇ shaˬ maˬ ehˇ, guiˇ maꞈ kʼoeˇ taˆ aˬ yuiꞈ geuꞈ-eu yaw huiˬ yaw mahˇ deuˬ maˬ ehˇ, Baˬbuˇloˬ tsawˇ haˬ deuˬ-ahˇ guˆ-eu miˇ neh, Iˇjiˇtuˆ miˇ kʼahˬ-ahˇ cehˆ-euˬ meh.

Yeˬhawˇyaˬciˬ-ahˇ paꞈ kuˆ laꞈ kʼoeˇ neh pyehˬ doˆ nehˬ-euˬ

²⁷ Eˇbiˇlaˆmeˬyawˇdaˆ gʼaˬ Baˬbuˇloˬ sahˬ paˬ pyeuꞈ laˇ ngeh kʼoꞈ, Yuˇdaˆ sahˬ paˬ Yeˬhawˇyaˬciˬ-ahˇ aˬ yawꞈ gʼawˬ shaˬ gaˬ-awˇ, paꞈ kuˆ laꞈ kʼoeˇ neh pyehˬ doˆ nehˬ-euˬ meh. Yeˬhawˇyaˬciˬ-ahˇ paꞈ kuˆ laꞈ kʼoeˇ nyehꞈ ahˇ taˬ-euˬ smˬ tseˇ shiꞈ kʼoꞈ tiˬ kʼoꞈ, ba la tseˇ nyiꞈ siˬ tiˬ siˬ nyiˬ tseˇ shiꞈ nah-ahˇ, kʼoeˇ loꞈ-ehˇ pyehˬ doˆ nehˬ-euˬ meh.

²⁸ Eˇbiˇlaˆmeˬyawˇdaˆ-aˬ, Yeˬhawˇyaˬciˬ-ahˇ yaw muiˬ paˬ-ehˇ cawˬ cawˬ nehˬ-awˇ, Baˬbuˇloˬ miˇ kʼahˬ-ahˇ nyehꞈ taˬ-euˬ sahˬ paˬ nui deuˬ naˆ maˬ tseˇ taˬ huiˬ taˬ mahˇ nehˬ-euˬ meh.

²⁹ Yeˬhawˇyaˬciˬ-aˬ, paꞈ kuˆ laꞈ kʼoeˇ uˇ-eu deuˬ dm-eu mehˬ tsoeˬ dzeˇ paˇ paˇ dzeh-awˇ, maˬ shiˇ tiˬ ziˇ Baˬbuˇloˬ sahˬ paˬ nehˬ-ehˇ dzaˬ taꞈ dawˇ taꞈ-eu a kawˬ-aˬ za-euˬ meh.

³⁰ Aˬ yawꞈ yaw dehꞈ kʼaˇ dehꞈ kʼoeˇ keuˆ ni, aˬ yawꞈ nah yawꞈ kʼaˇ loˬ-eu jeˬ aˬ yawꞈ-ahˇ biꞈ loꞈ nehˬ-euˬ meh.